Un Ehèmpel di Onestidat

NELMA, kende ta traha komo pelukera na Cruzeiro do Sul, Brazil, resientemente a konfrontá un tèst di su integridat kristian. Despues ku inundashon a asotá su área, el a haña algun paña serka un di su klientenan. Segun ku Nelma tabata surti e pañanan, el a haña plaka na balor di 1.800 florin antiano den saku di algun karson.

E plaka ku Nelma a haña tabata e ekivalente di shete luna di trabou, i e tabatin ègt mester di plaka. Su propio kas a sufri daño debí na e inundashon, i su tata i su rumannan a pèrdè kasi tur kos. Ku e plaka ku el a haña lo e por a kaba di drecha su kas i te asta sobra sèn pa yuda su famia. Sin embargo, Nelma su konsenshi bíblikamente entrená no a permitié keda ku e plaka.—Hebreonan 13:18, NW.

E siguiente mainta trempan el a bai trabou promé ku e negoshi habri i a tuma kontakto ku e señora komersiante ku a dun’é e pañanan. Nelma a gradisié pa e pañanan pero a agregá ku e no por a keda ku loke el a haña den e saku di karsonnan. E señora a keda sumamente kontentu di haña e plaka bèk. Tabata sèn ku el a pone un banda pa paga su trahadónan. E señora komersiante a bisa: “Onestidat ta algu ku bo no ta haña hopi.”

Sí, tin hende ta haña ku ser onesto no tin ningun balor spesial. Sin embargo, pa e hendenan ku ta hasi esfuerso pa agradá e Dios berdadero, Yehova, onestidat ta un kualidat ku nan ta balorá mashá. (Efesionan 4:25, 28) Nelma a bisa: “Lo mi no por a drumi anochi si mi a aktua di otro manera.”