Un Regalo Eterno for di e Kreadó

BO NO ta haña ku ta asombroso ku e faktornan ku sientífikonan ta kere ta esensial pa bida riba kualke planeta ta ser menshoná direktamente òf indirektamente den e promé kapítulo di Beibel? Ki faktornan esakinan ta?

Pa bida rende i prosperá mester tin un kantidat grandi di awa, manera Génesis 1:2 ta menshoná. E temperatura mester ta nèt na e nivel korekto pa awa riba e planeta keda den forma líkido. Esaki ta rekerí pa e planeta ta na e distansia korekto for di su solo. E relato di Génesis bes tras bes ta hala atenshon na solo i su efekto riba tera.

Pa hende por biba riba un planeta, e planeta mester tin un atmósfera ku un kombinashon spesial di gas. E aspekto masha importante aki ta ser menshoná na Génesis 1:6-8. E kresementu di vegetashon, deskribí na Génesis 1:11 i 12, ta kontribuí na e suministro grandi di oksígeno ku tin. Un planeta riba kua un variedat grandi di bida animal por rende i prosperá ta rekerí kontinentenan di tereno seku i produktivo, manera Génesis 1:9-12 a deskribí. Finalmente, pa por tin un klima moderá, un planeta mester ta den un posishon skùin segun ku e ta drei rònt di su as i mantené e posishon ei; den e kaso di tera, ta e forsa di gravedat di nos luna pa un parti ta logra esei. Génesis 1:14 i 16 ta menshoná e eksistensia di luna i algun di su benefisionan.

Kon e eskritor di antigwedat, Moisés, por a hala atenshon na e faktornan menshoná ariba sin yudansa di siensia moderno? Akaso Moisés simplemente tabatin un kapasidat inusual pa komprondé nan importansia miéntras ku su kontemporáneonan sí no tabatiné? E splikashon ta ku Moisés tabata inspirá pa e Kreadó di shelu i tera. Ta bale la pena pa tuma nota di esaki en bista di e eksaktitut sientífiko di e relato di Génesis.

Beibel ta konfirmá ku tin un propósito tras di e maravianan ku nos ta opservá den e universo rònt di nos. Salmo 115:16 ta deklará: ‘Shelunan ta e shelunan di Yehova, ma tera el a duna na e yunan di hende.’ Un otro salmo ta deklará: “El a establesé tera riba su fundeshinan, pa asina esei no kita for di su lugá nunka mas.” (Salmo 104:5) Si ta un Kreadó a diseñá i produsí e universo i nos bunita planeta, ta lógiko pa kere e ora ei ku e tin tambe e kapasidat pa sostené nan. Esaki ta nifiká ku nos por antisipá ku konfiansa e kumplimentu di e promesa maravioso: “E hustunan lo heredá e tera, i lo biba den dje pa semper.” (Salmo 37:29) Un kos ta sigur, Dios “no a krea [e tera] pa e keda bashí, ma el a form’é pa e wòrdu habitá” pa semper pa hende gradisidu ku ta rekonosé su obranan.—Isaias 45:18.

Segun e Skritura, Hesus a bin na tera pa siña nos tokante Dios i Su propósito di duna bida eterno na humanidat obediente. (Juan 3:16) Beibel ta sigurá nos ku pronto Dios lo “destruí esnan ku ta destruí e tera,” miéntras ku for di tur nashon hende amante di pas ku ta aseptá su provishon pa salbashon lo sobrebibí. (Revelashon 7:9, 14; 11:18) Esta maravioso bida lo ta segun ku hende ta sigui deskubrí i disfrutá di e maravianan di Dios su kreashon pa semper!—Eklesiastés 3:11; Romanonan 8:21.

[Rekonosementu pa Potrèt na página 8]

NASA photo