Asambleanan Ta un Motibu pa Ta “Semper Regosihando”

AFRIKA, e kontinente habitá pa un désimo parti di e poblashon di mundu, ta manera un inmenso paña bòrdá ku hopi koló. Bo ta haña e santu blanku di e Kosta Mediteráneo, e koló di oro di Sahara, e selvanan bèrdè, i e skuma di olanan agitá pa bientu ku ta suta kosta di Kaap Goede Hoop. Atraves di Afrika ta kore hopi riu meskos ku hilu fini, manera por ehèmpel Nilo, Níger, Congo i Zambezi. Anto den e profundidat di su “ploinan” tin reservanan inmenso di oro, koper i piedra presioso.

Zambia ta situá kaminda e selva tropikal di e Kònchi di Congo ta subi pa enkontrá e sabananan ondulá ku ta forma e plateau di Afrika sentral.

Asambleanan

Fiestanan prekristian di e nashon di Israel i tambe nan ‘konvokashonnan santu,’ esta reunionnan spesial, tabata okashonnan alegre ku a yuda e presentenan enfoká riba asuntunan spiritual. (Levítiko 23:21; Deuteronomio 16:13-15) Meskos ta e kaso ku e asambleanan ku e pueblo di Dios ta organisá den nos tempu. Na Zambia, e rumannan no ta tene asamblea- òf kongresonan den komplehonan deportivo moderno i luluis-lulius. Nan ta traha loke nan ta yama un pueblito di kongreso, ku ta inkluí kabañanan chikitu pa drumi aden.

Atraves di añanan, nan a traha strukturanan mas permanente na e lugánan ei. Sin embargo, e promé añanan tabata un periodo yen di reto i inovashon. Un misionero ku yama Peter Palliser a konta: “Na un kongreso e rumannan a disidí ku nan lo tin gana di un plataforma un poko na haltu. Un di nan tabata bon den usamentu di eksplosivo. El a prepará e área i a bula e parti ariba di un nèshi di komehein bandoná di seis meter haltu. Esei a laga nos ku un seritu kaminda nos por a traha un plataforma.”

Esfuersonan pa Asistí

Kasi tur e kongresonan tabata tuma lugá leu for di kamindanan prinsipal i na sitionan ku ta difísil pa yega. Robinson Shamuluma ta kòrda un kongreso ku el a asistí na dje na aña 1959. El a konta: “Mas o ménos 15 di nos a bai Kabwe na e Provinsia Sentral riba baiskel. Nos a bai ku hariña di funchi i piská seku pa kome. Tur anochi nos tabata drumi den mondi. Na Kabwe nos a subi un trein, i finalmente a yega e sitio di kongreso despues di kasi kuater dia riba kaminda.”

Lamp Chisenga ta kòrda un ruman hòmber ku a biaha un 130 kilometer na pia i riba baiskel huntu ku su seis yunan pa asistí na un kongreso. El a konta: “Pa e biahe, nan a prepará kuminda, esta, yuka di roster, pinda i pindakas. Hopi biaha nan mester a kamper den mondi sin ningun protekshon.”

Miedu di Públiko!

Dramanan bíbliko den pleno trahe i esenario antiguo ta keda un di e rasgonan mas popular di kongreso. Tur partisipante ta tuma masha na serio nan responsabilidat pa transmití e emoshonnan di nan personahe, i masha poko hende di Zambia tin e reputashon di no ta ekspresivo. Frank Lewis, un eks-misionero i kende awor ta miembro di e famia di Bètel di Merka, ta kòrda: “Na prinsipio nos no tabata haña e dramanan riba  tape. Ke men ku e rumannan tabatin ku siña nan ròl kompletamente for di kabes. Mi ta kòrda e promé drama ku nos tabatin. El a trata tokante Hosé i nos tabatiné na un asamblea den e Provinsia Nort. Wèl, komo ku pòst tabata poko slow i e rumannan no a haña e skrep, nos tabatin ku traha te lat anochi pa purba yuda nan siña for di kabes loke nan tabatin ku bisa. Durante presentashon di e drama, nos a yega na e esena kaminda e esposa di Potifar na gritu ta konta su kasá ku Hosé a purba viol’é. Na e momento ei e ruman ku tabata hunga pa Potifar a bira nervioso dilanti di públiko i a baha for di esenario. Ami tabata patras di plataforma ta duna instrukshon na e rumannan i mi a mir’é baha for di esenario. Rápidamente mi a bis’é e promé frasenan ku e tabatin ku bisa i a push’é bèk riba esenario. Anto na un manera masha bon mes el a ekspresá su palabranan di despresio pa e hòmber aki akusá di kier a violá su kasá! Ounke esaki a hera di bira un desaster pa nos asamblea, semper ku mi lesa e relato bíbliko ei mi ta pensa: ‘Podisé ta asina mes a sosodé. Podisé Potifar den su rabia a sali for di e kamber, a dominá su mes i despues a bin bèk pa kondená Hosé!’”

Na aña 1978, despues di kuater aña di restrikshon riba e tamaño di e asamblea- i kongresonan, e situashon a bira mas fleksibel. E aña ei e Kongreso “Fe Viktorioso” tabata un reto. Un eks-superintendente biahero ta splika dikon: “Na e kongreso ei nos a presentá tur e dramanan ku nos no a haña e añanan anterior ora ku nos tabata obligá na reuní den Salòn di Reino. E kongreso a dura sinku dia, i nos tabatin sinku drama, un pa kada dia. . . . Esei tabata hopi dushi, pero pa e representante di Bètel ku mester a supervisá tur e dramanan ei sí e tabata hopi trabou!”

Un miembro di e Komité di Sukursal a bisa: “Di bèrdat mi por bisa ku nunka mi no a asistí na kongresonan mas dushi. Mainta e famianan ta sali for di nan kabañanan chikitu, tur hende nèchi i limpi. Nan ta presentá nan mes dilanti Yehova, lusiendo lo mihó posibel. Por lo general nan ta sinta den solo, ya ku no tin lugá den sombra. Asina mes, nan ta keda henter dia i ta presta bon atenshon. Esei ta algu bunita pa mira.” Testigunan di Yehova ta konsiderá nan reunionnan un parti esensial di nan adorashon. (Hebreonan 10:24, 25) Sea ku nan ta “tristu” òf nò debí na problemanan personal òf debí na oposishon religioso, e pueblo di Yehova sa ku nan asistensia na asamblea ta un motibu pa nan ta “semper regosihando.”—2 Korintionan 6:10.