Felis di Por Warda Riba Yehova

BO A yega di kome fruta bèrdè? Sin duda bo no a gusta kon el a smak. Fruta ta tuma tempu pa hecha, i definitivamente ta bale la pena warda pa esei sosodé. Tin otro sirkunstansianan tambe den kua ta bale la pena pa nos warda. Beibel ta bisa: “Ta bon pa warda den silensio riba e salbashon di SEÑOR.” (Lamentashon 3:26; Tito 2:13) Den ki maneranan kristiannan tin ku warda riba Yehova? Kon nos por benefisiá di warda riba dje?

Warda Riba Dios—Kiko Esei Ta Enserá?

Komo kristian, nos ta “sperando i purando e binida di e dia di Dios.” Ku anhelo nos ta spera riba e alivio ku nos lo haña ora ku Yehova kousa e “destrukshon di hendenan impio” òf malbado. (2 Pedro 3:7, 12) Yehova mes tambe ta ansioso pa pone fin na tur maldat, pero e ta frena su mes ya asina e por salba kristiannan den un manera ku lo glorifiká su nòmber. Beibel ta bisa: “Dios, ounke dispuesto pa demostrá su furia i pa hasi su poder konosí, a soportá ku hopi pasenshi e ophetonan di furia, prepará pa destrukshon . . . I el a hasi asina pa e por hasi konosí e rikesa di su gloria riba e ophetonan di miserikòrdia.” (Romanonan 9:22, 23) Yehova sa ki ora ta e momento oportuno pa salba su pueblo awe, meskos ku el a hasi den tempu di Noe. (1 Pedro 3:20) Pues, warda riba Dios ta enserá warda riba su tempu pa aktua.

Segun ku nos ta warda riba e dia di Yehova, nos lo por sinti nos de bes en kuando bastante angustiá ora nos mira kon e normanan moral di e mundu rònt di nos konstantemente ta bai mas atras. Na momentonan asina ta bon pa pensa riba e palabranan di Dios su profeta Mikeas, kende a skirbi: “E persona fiel a peresé for di e tera, i no tin persona rekto meimei di hende.” Anto el a agregá: “Pa loke t’ami, lo mi warda ku speransa riba SEÑOR; lo mi spera [“lo mi mustra un aktitut di warda,” NW] riba e Dios di mi salbashon.” (Mikeas 7:2, 7) Kiko ta e “aktitut di warda” ku nos lo mester kultivá? Ora nos sa tin ku warda, esei hopi biaha ta iritá nos. Pues, kon nos por tin goso miéntras ku nos ta warda riba Dios?

Felis Miéntras Nos Ta Warda

Nos por siña e aktitut korekto for di Yehova. Nunka e no a stòp di ta “e Dios felis.” (1 Timoteo 1:11, NW) E ta felis miéntras ku e ta warda pasobra e ta sigui traha den direkshon di kumpli ku su propósito pa elevá hende ku ta stim’é na e nivel di perfekshon ku tabata su intenshon for di ora ku el a traha hende. (Romanonan 5:12; 6:23) Anto Yehova ta mira e bon resultado di su trabou: miónes di hende a ser atraí na adorashon berdadero. Hesus a bisa: “Mi Tata ta traha te awor i mi tambe ta traha.” (Juan 5:17) Hasi kos pa otro hende ta un faktor fundamental pa ta felis. (Echonan 20:35) Asina tambe, kristiannan berdadero no ta sinta warda ku man krusá. Al kontrario, nan ta sigui traha pa yuda hende siña tokante e propósito di Dios pa humanidat.

Hende fiel semper a keda satisfecho ku nan por alabá Dios miéntras ku nan ta warda riba su tempu pa aktua. Tuma por ehèmpel salmista David. David su rei a persiguié, un kompañero íntimo a traishon’é i su yu a bira kontra dje. Akaso David, den kada un di e  sirkunstansianan aki, lo por tabata felis miéntras el a warda pa haña alivio na Yehova su debido tempu? Salmo 71, skirbí evidentemente pa David, ta bisa: “Pa loke t’ami, lo mi spera kontinuamente, i lo mi alabá bo ainda mas i mas. Mi boka lo konta di bo hustisia i di bo salbashon henter dia.” (Salmo 71:14, 15) En bes di warda tur frustrá, David a ekspresá goso pasobra el a keda okupá alabando Yehova i fortalesiendo otronan den adorashon berdadero.—Salmo 71:23.

Warda riba Yehova no ta algu ku ta fada nos, manera ora nos ta warda riba un bùs ku ta lat. E ta mas manera ora mayornan ta warda ku goso miéntras nan yu ta desaroyá den un persona adulto ku nan por ta orguyoso di dje. E añanan ei ta yená ku aktividat—entrenamentu, instrukshon i disiplina—ku tin komo meta pa alkansá e resultado deseá. Den mesun manera, nos ku ta warda riba Yehova ta sinti nos felis di por yuda otro hende hala serka Dios. Nos tambe ke gana Dios su aprobashon i, al final, salbashon.

No Pèrdè Speransa

Warda riba Yehova ta enserá sigui stim’é i sirbié sin pèrdè speransa. Esaki por ta un reto. Hopi sirbidó di Dios awe ta biba den komunidatnan kaminda hende ta hasi bofon di ken ku ta hiba un bida basá riba fe den e promesanan di Dios. Pero konsiderá e ehèmpel di e fiel israelitanan ku a mantené nan speransa bibu durante e eksilio di 70 aña na Babilonia. Kiko a yuda nan hasi esei? Sin duda, lesamentu di e salmonan a fortalesé nan. Un salmo hopi animante ku kisas a ser skirbí rònt di e tempu ei ta bisa: “Mi speransa ta den su palabra. Mi alma ta spera riba [Yehova], mas ku e guardianan ta spera dia habri; sí, mas ku e guardianan ta spera dia habri. O Israel, spera riba [Yehova].”—Salmo 130:5-7.

E hudiunan ku a mantené nan speransa bibu dor di lesa i papia tokante e speransa ei, a haña nan rekompensa ora ku Babilonia finalmente a kai den man di invasor. Míles di hudiu fiel rápidamente a biaha pa Yerusalèm. Relashoná ku e tempu ei, un salmo ta bisa: “Dia SEÑOR a hasi esnan di Sion, ku tabata den koutiverio, regresá, . . . nos boka a yena ku harimentu.” (Salmo 126:1, 2) E hudiunan ei no a entregá, sino mas bien a sigui fortalesé nan fe. Ademas, nunka nan no a stòp di kanta e alabansa di Yehova.

Den e mesun manera, kristiannan berdadero ku ta warda riba Dios durante e ‘tempu di fin’ aki ta hasi esfuerso konstantemente pa mantené nan fe bibu. Nan ta studia e Palabra di Dios, ta animá otro i ta sigui alabá Yehova pa medio di e predikashon di e bon nobo di su Reino.—Mateo 24:3, 14.

Warda Riba Dios pa Benefisiá di Disiplina

Dios su profeta Jeremias a skirbi: “Ta bon pa warda den silensio riba e salbashon di SEÑOR.” (Lamentashon 3:26) Jeremias tabata ke men ku lo tabata bon pa e pueblo di Dios  no keha tokante e manera ku Yehova a disipliná nan ora ku el a permití Yerusalèm ser destruí. Mas bien, nan mester a benefisiá di e eksperensia dor di meditá riba nan desobedensia i riba e nesesidat pa nan kambia nan aktitut.—Lamentashon 3:40, 42.

E manera ku disiplina di Yehova ta benefisiá nos por ser kompará ku e manera ku fruta ta hecha. Beibel ta bisa tokante disiplina ku ta bin di Dios: “Pa esnan ku a wòrdu entrená dor di dje, despues e ta duna e fruta pasífiko di hustisia.” (Hebreonan 12:11) Meskos ku fruta tin mester di tempu pa hecha, asina nos tin mester di tempu pa kambia nos aktitutnan a base di e entrenamentu ku Dios ta perkurá. Por ehèmpel, si debí na mal komportashon nos a pèrdè algun privilegio den kongregashon, e echo ku nos ta dispuesto pa warda riba Dios lo yuda nos pa no desanimá i entregá. Den tal sirkunstansia, e palabranan inspirá di David ta masha alentador: “[Dios] su rabia ta pa un momento so, su fabor ta pa bida largu; yoramentu por dura un anochi, ma un gritu di alegria ta bin ora dia ta habri.” (Salmo 30:5) Si nos kultivá un aktitut di warda i apliká e konseho ku nos ta haña for di Dios su Palabra i su organisashon, nos tempu pa “un gritu di alegria” lo yega.

Krese na Madures Ta Tuma Tempu

Si bo ta hóben òf resien batisá, kisas bo ta ansioso pa haña algun responsabilidat den e kongregashon kristian. Pero ta tuma tempu pa desaroyá e madures spiritual nesesario pa karga tal responsabilidat. P’esei, probechá di e promé añanan pa bo krese den sentido spiritual. Por ehèmpel, e periodo di hubentut ta un bon tempu pa lesa e Beibel kompletu, pa desaroyá kualidatnan kristian i pa siña e arte di hasi disipel. (Eklesiastés 12:1) Si humildemente bo desplegá un aktitut di warda, Yehova su tempu pa bo haña mas responsabilidat lo yega.

Pa e trabou di hasi disipel tambe nos mester tin pasenshi. Meskos ku un kunukero tin ku sigui muha e simia te ora ku Dios lag’é krese, asina ta bai ku e trabou di hasi disipel. (1 Korintionan 3:7; Santiago 5:7) Pa kultivá fe i apresio pa Yehova den kurason di otro hende ta tuma vários luna òf asta años di duna estudio di Beibel ku pasenshi. Warda riba Yehova ta enserá perseverá, asta ora ku na promé instante studiantenan no ta reakshoná faborablemente riba loke nan ta siña. Si a lo ménos nan ta mustra un poko apresio, esei por ta un señal ku nan ta reakshonando bon riba e spiritu di Yehova. Ku pasenshi, lo bo por tin e goso di mira kon Yehova ta laga bo studiante krese bira un disipel di Kristu.—Mateo 28:20.

Ekspresá Amor dor di Warda

Warda riba un persona por ta un ekspreshon di amor i konfiansa. Komo un ehèmpel, laga nos konsiderá e situashon di un ruman muhé di edat ku ta biba den un region di desierto den e serunan di Andes, na Suramérika. E ruman di edat aki huntu ku un otro ruman muhé spiritual ta e úniko Testigunan di Yehova den nan pueblito. Bo por imaginá kon ansioso nan ta warda riba bishita di nan otro rumannan kristian? Un biaha, un superintendente biahero tabata riba kaminda pa bishitá nan pa promé bes, pero el a dual. Pa e por a haña e kaminda, e mester a bai bèk na su punto di salida. Esei a tum’é vários ora. Tabata basta ratu despues di meianochi ora ku finalmente el a mira e pueblito den distansia. Komo ku no tabatin koriente den e área, el a keda sorprendí di mira un lus ta bria. Esta felis e tabata ora ku finalmente el a yega na entrada di e pueblito i a mira ku e lus tabata di un lampi di kerosin ku e ruman di edat tabatin tené na laira! E ruman muhé tabatin sigur ku lo el a bin, pues el a keda ward’é.

Demostrando e mesun pasenshi ku e ruman muhé ei, nos ta felis di por warda riba Yehova. Nos tin sigur ku lo e kumpli ku su promesanan. Anto meskos ku e superintendente biahero, nos ta apresiá esnan ku amorosamente ta warda riba nos. P’esei no ta un sorpresa ku Dios tambe ta apresiá esnan ku ta warda riba dje. Beibel ta bisa: “[Yehova] ta hiba gustu . . . den esnan ku ta spera riba su miserikòrdia.”—Salmo 147:11.

[Plachi na página 18]

Personanan ku ta okupá alabando Dios, ta haña goso den warda riba Yehova