Kon pa Identifiká Adorashon Berdadero

MAYORIA di religion ta pretendé ku loke nan ta bisa ta bin di Dios. P’esei ta bon pa nos hasi kaso di e palabranan di Juan, apòstel di Hesus, kende a skirbi: “Stimánan, no kere tur spiritu [“ekspreshon inspirá,” NW], ma pone e spiritunan na prueba pa mira si nan ta bin di Dios, pasobra hopi profeta falsu a sali bai den mundu.” (1 Juan 4:1) Kon nos por tèst algu pa wak si e ta bin di Dios?

Tur loke ta bin di Dios ta reflehá su personalidat, spesialmente su kualidat predominante, esta, amor. Por ehèmpel, nos sentido di hole, ku ta permití nos disfrutá di e aroma di speserei, di flor òf di pan kayente, ta un ekspreshon di e amor di Dios. Nos kapasidat di mira un bahada di solo, un barbulètè òf e sonrisa di un mucha chikitu ta reflehá e amor ku Dios tin pa nos. Meskos ta e kaso ku nos kapasidat di tende bunita piesa, kanto di un para òf e stèm di un ser kerí. Asta nos naturalesa humano, pa imperfekto ku e ta, ta reflehá e amor di Dios. P’esei hopi biaha nos sa di eksperensia ku e palabranan di Hesus, “ta mas bendishoná pa duna ku pa risibí,” ta bèrdat. (Echonan 20:35) Nos ta gusta ekspresá amor pasobra nos ta trahá “segun e imágen di Dios.” (Génesis 1:27) Ounke Yehova tin hopi otro kualidat, amor ta e aspekto mas sobresaliente di su personalidat.

Obranan skirbí ku ta bin di Dios lo mester ta reflehá su amor. E religionnan di mundu tin kantidat di obra ku a ser skirbí hopi tempu pasá. Te kon leu e tipo di obranan aki ta reflehá e amor di Dios?

Echo ta ku mayoria di teksto religioso di antigwedat no ta duna muchu splikashon tokante kon Dios ta stima nos òf kon nos por stima Dios. Ta p’esei miónes di hende no ta haña kontesta ora nan puntra: “Dikon sufrimentu i maldat ta sigui eksistí miéntras ku nos ta mira prueba di e amor di Dios den kreashon?” Di otro banda, Beibel ta e úniko obra religioso di antigwedat ku ta splika e amor di Dios plenamente. E ta splika nos tambe kon nos por praktiká amor.

E Buki Tokante Amor

E Palabra di Dios, Beibel, ta revelá Yehova komo “e Dios di amor.” (2 Korintionan 13:11) E ta deskribí kon amor a motivá Yehova pa duna e promé hendenan un bida sin malesa i morto. Pero rebelion kontra e outoridat di Dios a resultá den sufrimentu pa humanidat. (Deuteronomio 32:4, 5; Romanonan 5:12) Yehova a dal paso pa restorá loke a bai pèrdí. E Palabra di Dios ta bisa: “Dios a stima mundu asina tantu, ku el a duna su Yu unigénito, pa ken ku kere den dje no bai pèrdí, ma tin bida eterno.” (Juan 3:16) E Santu Skritura ta revelá e amor di Dios asta  mas ainda ora e ta deskribí kon Dios a perkurá un gobièrnu perfekto den man di Hesus pa restorá pas na humanidat obediente.—Daniel 7:13, 14; 2 Pedro 3:13.

Beibel ta resumí e obligashon di hende den e palabranan aki: “‘Stima [Yehova] bo Dios ku henter bo kurason, i ku henter bo alma, i ku henter bo mente.’ Esaki ta e gran mandamentu i e di promé. I e di dos ta semehante: ‘Stima bo próhimo manera bo mes.’ Riba e dos mandamentunan aki henter e Lei . . . ta basá.” (Mateo 22:37-40) Beibel ta afirmá ku e ta inspirá pa Dios. Siendo ku ta bisto ku e ta reflehá e personalidat di Dios, nos por tin sigur ku e ta bin di “e Dios di amor.”—2 Timoteo 3:16.

Ora nos apliká e norma aki, nos por identifiká ki obranan skirbí di antigwedat ta bin realmente for di Dios. Amor tambe ta identifiká adoradónan berdadero, pasobra nan ta imitá Dios den mustra amor.

Kon Nos Por Rekonosé Hende Ku Ta Stima Dios

E hendenan ku realmente ta stima Dios ta sobresalí, foral awor ku nos ta biba den loke Beibel ta yama “e último dianan.” Mas i mas, hende ta ‘stimadó di nan mes, stimadó di plaka, stimadó di plaser mas bien ku stimadó di Dios.’—2 Timoteo 3:1-4.

Kon bo por rekonosé hende ku ta stima Dios? Beibel ta bisa: “Esaki ta e amor di Dios, ku nos ta warda su mandamentunan.” (1 Juan 5:3) Amor pa Dios ta motivá hende pa respetá e normanan moral di Beibel. Por ehèmpel, e Palabra di Dios ta kontené lei relashoná ku relashon seksual i matrimonio. Relashon seksual ta ser permití solamente den matrimonio, i matrimonio mester ta permanente. (Mateo 19:9; Hebreonan 13:4) Na Spaña, un señora ku a studia teologia a asistí na un reunion kaminda Testigunan di Yehova tabata studia e leinan moral di Beibel ku hopi interes. El a komentá: “Mi a sali for di e reunion edifiká, no solamente pa e diskursonan instruktivo basá riba Beibel, sino tambe pa e union ku ta reina entre e hendenan aki, nan normanan moral haltu i nan kondukta ekselente.”

Banda di nan amor pa Dios, kristiannan berdadero ta ser identifiká fásilmente na e manera ku nan ta mustra amor na nan próhimo. Nan obra di mas importante ta di papia ku otro hende tokante e úniko speransa pa humanidat, esta, e Reino di Dios. (Mateo 24:14) No tin nada ku por trese benefisionan mas duradero pa nan próhimo ku yuda nan gana konosementu di Dios. (Juan 17:3) Kristiannan berdadero ta demostrá nan amor den otro maneranan tambe. Nan ta duna yudansa práktiko na hende ku ta sufriendo. Por ehèmpel, tempu ku un temblor a kousa desaster na Italia, un korant lokal a informá ku Testigunan di Yehova ta “traha na un manera práktiko, sakando un man pa esnan ku ta sufri, sin preokupá na ki religion nan ta pertenesé.”

Ademas di stima Dios i nan próhimo, kristiannan berdadero ta stima otro. Hesus a bisa: “Un mandamentu nobo mi ta duna boso, pa boso stima otro, i meskos ku ami a stima boso, pa boso tambe stima otro. Na esaki tur hende lo sa ku boso ta mi disipel, si boso tin amor un pa otro.”—Juan 13:34, 35.

E amor ku kristiannan berdadero tin pa otro ta remarkablemente diferente? Un kriá di kas ku yama Ema ta pensa ku sí. E ta traha na La Paz, Bolivia, kaminda diferensianan étniko hopi biaha ta separá hende riku for di hende pober. El a konta: “E promé biaha ku mi a bai un reunion di Testigu di Yehova, mi a mira un kabayero bon bistí sintá ta kòmbersá ku un señora indjan. Nunka mi a yega di mira esei. Esei a pone mi realisá mesora ku esaki mester ta e pueblo di Dios.” Asina tambe un señora hóben di Brazil ku yama Miriam a bisa: “Mi no tabata sa kon mi por ta felis, ni sikiera den mi famia. E promé biaha ku mi a mira hende demostrá amor tabata entre e Testigunan di Yehova.” Na Merka, e direktor di notisia di un  kanal di televishon a skirbi: “Si mas hende tabata biba e manera ku boso religion ta biba, e nashon aki lo no ta den e kondishon ku e ta awor. Ami ta un periodista ku sa ku boso organisashon ta fundá riba amor i un fe fuerte den e Kreadó.”

Buska Adorashon Berdadero

Amor ta un karakterístika ku ta distinguí adorashon berdadero. Hesus a kompará hañamentu di e adorashon berdadero ku hañamentu di e kaminda korekto i skohe pa kana riba dje. Esei ta e úniko kaminda ku ta hiba na bida eterno. Hesus a bisa: “Drenta dor di e porta smal, pasobra hanchu ta e porta i espasioso e kaminda ku ta hiba na destrukshon, i hopi ta esnan ku ta drenta dor di dje. Pasobra chikitu ta e porta i smal e kaminda ku ta hiba na bida, i poko ta esnan ku ta hañ’é.” (Mateo 7:13, 14) Ta un grupo so di kristiannan berdadero ta kana unidamente ku Dios riba e kaminda di adorashon berdadero. Pues, ta importá kua religion bo ta skohe. Si bo haña e kaminda ei i bo skohe pa kana riba dje, bo a haña e mihó manera di biba, pasobra esei ta e kaminda di amor.—Efesionan 4:1-4.

Imaginá bo e goso ku bo por tin segun ku bo ta kana riba e kaminda di adorashon berdadero! Ta komo si fuera bo ta kana ku Dios. Serka Dios bo por haña sabiduria i siña kiko ta amor di manera ku bo por tin bon relashon ku otro hende. Bo por siña tambe for di dje kiko ta e propósito di bida, i bo por komprondé e promesanan di Dios i haña un speransa pa futuro. Nunka lo duel bo di a buska e adorashon berdadero.

[Plachi na página 5]

Di e obranan religioso di antigwedat, ta Beibel so ta revelá e amor di Dios

[Plachinan na página 7]

Ta fásil pa rekonosé kristiannan berdadero pasobra nan ta praktiká amor