Historia di Bida

Sperando Riba un Reino Ku ‘No Ta Parti di Mundu’

Segun e Relato di Nikolai Gutsulyak

Durante 41 dia i anochi, mi a haña mi meimei di un rebelion den prizon. Diripiente zonidu di bala di kañon a lanta mi fo’i soño. Tanki di guera i sòldá a basha bini den e kampamentu di prizon i ataká e prezunan. Mi bida tabata na peliger.

KON bin mi a haña mi den e situashon aki? Laga mi splika. Esaki a sosodé na aña 1954. E tempu ei mi tabatin 30 aña. Meskos ku hopi Testigu di Yehova ku tabata biba bou di e régimen soviétiko, outoridatnan a sera mi den prizon pa motibu ku mi a keda neutral den asuntunan polítiko i pa motibu ku mi a papia ku otro hende tokante e Reino di Dios. Nos grupo di Testigu enkarselá tabata konsistí di 46 hende hòmber i 34 hende muhé. Nan a tene nos den un kampo di trabou fòrsá den serkania di e pueblito di Kengir, parti sentral di Kazakstan. Ei nos tabata biba meimei di míles di otro prezu.

Josef Stalin, lider di Union Soviétiko, a muri e aña anterior. Hopi prezu a spera ku e gobièrnu nobo na Moskú lo a duna oido na nan reklamonan tokante e kondishonnan deplorabel di prizon. Ku tempu mal kontentu bou di e prezunan a hiba na un rebelion abierto den prizon. Durante e konfrontashonnan ku a sigui, nos komo Testigu di Yehova tabatin ku splika nos posishon na e rebeldenan agitá i tambe na e bewakernan militar. Pa nos a tuma e posishon neutral aki nos mester tabatin fe den Dios.

 Rebelion!

Dia 16 di mei e rebelion den e kampamentu di prizon a kuminsá. Dos dia despues, mas ku 3.200 prezu a nenga di bai traha, eksigiendo mihó kondishonnan den e kampamentu i sierto derechonan pa esnan ku tabata prezu polítiko. Masha lihé un kos a hiba na otro. Promé, e rebeldenan a kore ku e bewakernan for di e kampamentu. Despues nan a traha buraku den waya di e kurá rònt di e tereno. Siguientemente nan a tumba e murayanan ku tabata separá e prezunan maskulino for di esnan femenino, kreando e asina yamá baraknan di famia. Den e dianan di euforia ku a sigui, algun prezu asta a kasa ku otro, ku seremonianan di kasamentu efektuá pa pastornan ku tambe tabata enkarselá. Den e tres áreanan di e kampamentu kaminda e lantamentu a kuminsá, mayoria di e 14.000 prezunan a partisipá den e rebelion.

E rebeldenan a forma un komité di kampamentu pa negoshá ku e militarnan. Sin embargo, no a tarda muchu ku miembronan di e komité a kuminsá diskutí ku otro, i kontròl di e kampamentu a bin kai den man di e elementonan mas ekstremista. E ambiente a bira mas i mas hostil. E lidernan rebelde a organisá un departamento di siguridat, un departamento militar i un departamento di informashon pa mantené “òrdu.” E lidernan tabata usa loutspiker montá na staka rònt e kampamentu pa plama mensahenan yen di fervor i asina mantené e ánimo di rebelion na haltu. E rebeldenan a stroba otro hende di hui, a kastigá esnan ku tabata kontra nan i a deklará ku nan lo no a vasilá pa mata ken ku nan no a aprobá. Asta tabata kore rumor ku nan a ehekutá algun prezu kaba.

Ya ku e rebeldenan tabata ferwagt un atake militar, nan a prepará nan mes kuidadosamente pa defendé nan mes. Pa hasi sigur ku e mayor kantidat di prezu posibel lo tabata ekipá pa defendé e kampamentu, e lidernan a duna òrdu pa tur prezu arma nan mes. Pa hasi esei, e prezunan a kita e baranan di heru for di e bentananan i a traha kuchú i otro armanan ku e metal. Asta nan a logra haña skopèt i eksplosivo.

Preshon pa Djòin e Rebelion

Un dia dos rebelde a aserká mi. Un di nan a saka un kuchú ku nan a kaba di sleip. E di: “Tuma esaki! Lo bo bai tin mester di dje pa bo protekshon.” Den silensio mi a pidi Yehova yuda mi keda kalmu. Mi a kontest’é: “Mi ta un kristian, un Testigu di Yehova. Ami ku e otro Testigunan ta aki den pasobra nos ta bringa, no kontra hende, sino kontra forsanan spiritual invisibel. Nos armanan kontra nan ta nos fe i nos speransa den e Reino di Dios.”—Efesionan 6:12.

 Pa mi sorpresa, e hòmber a sagudí kabes ku el a komprondé. Sin embargo, e otro hòmber sí a dal mi duru. Despues nan a bai. E rebeldenan tabata pasa di barak pa barak pa purba fòrsa e Testigunan pa djòin e lantamentu. Pero tur nos rumannan kristian a nenga.

Na un reunion di e komité dje rebeldenan nan a papia tokante e posishon neutral di Testigunan di Yehova. “Miembronan di tur religion—pentekostal, atventista, baptista i tur otro hende—ta uniendo nan mes ku e lantamentu. Ta Testigunan di Yehova so a nenga,” nan a remarká. “Kiko nos ta bai hasi ku nan?” Un miembro di e komité a sugerí pa tira un di e Testigunan den e fòrnu di prizon pa hinka miedu den nos. Pero un eks-ofisial militar, un prezu respetá, a lanta para i bisa: “No ta sabí pa hasi esei. Nos mester sera nan tur den un solo barak nèt na rant di e kampamentu, banda di e porta. E ora ei, si e ehérsito ataká nos ku tanki, e Testigunan lo ta e proménan ku nan lo pasa riba dje. Anto nos lo no ta esnan kulpabel di nan morto.” E otronan a aseptá su sugerensia.

Den un Posishon Peligroso

Djis despues di esei, prezunan tabata kana rònt den e kampamentu gritando: “Testigunan di Yehova, sali pafó!” Anto nan a manda nos tur 80 den direkshon di un barak na rant di e kampamentu. Nan a saka e kamanan di ariba ku abou for di e barak pa traha mas espasio paden i a ordená nos pa drenta. E barak ei a bira nos prizon den e prizon.

Pa haña poko privasidat, e rumannan muhé kristian den nos grupo a kose laken na otro, i nos a usa nan pa skòt e barak den dos sekshon: un pa hende hòmber i e otro pa hende muhé. (Despues, un Testigu na Rusia a pinta un kuadro di e barak aki, ku bo por mira aki bou.) Den e dianan ku nos a biba tur pèrtá riba otro den e barak aki, hopi bes nos tabata hasi orashon huntu, pidiendo Yehova fervientemente p’e duna nos sabiduria i “poder mas ayá di loke ta normal.”—2 Korintionan 4:7, NW.

Tur e tempu ei, nos tabata den e posishon peligroso entre e rebeldenan i e ehérsito soviétiko.  Ningun di nos no tabata sa kiko esun òf e otro lo a bai hasi. Un ruman hòmber kristian fiel di edat a urgi nos: “Stòp di purba rei. Yehova lo no bandoná nos.”

Nos kerido ruman muhénan kristian, hóben i bieu, a mustra un perseveransia eksepshonal. Un di nan tabatin den kareda di 80 aña i tabatin mester di mas yudansa. Otronan tabata enfermo i tabatin mester di atenshon médiko. Tur e tempu ei e portanan di e barak mester a keda habrí pa e rebeldenan por a kontrolá nos konstantemente. Anochi, prezunan armá tabata drenta den nos barak. Algun biaha nos a tende nan bisa: “E Reino di Dios ta na soño.” Den dia, ora nan tabata laga nos bai e komedor di e kampamentu, semper nos tabata keda huntu i pidi Yehova den orashon p’e protehá nos kontra hòmbernan violento.

Den e barak, nos tabata purba sostené otro spiritualmente. Por ehèmpel, hopi biaha un ruman hòmber a konta un relato di Beibel sufisiente duru pa nos tende. Despues e tabata apliká e relato na nos sirkunstansianan. Spesialmente un ruman hòmber di edat tabata gusta papia tokante e ehérsito di Gideon. El a rekordá nos: “Den nòmber di Yehova, 300 hòmber ku instrumento musikal den nan man a bringa kontra 135.000 sòldá armá. Tur 300 a sali ileso.” (Huesnan 7:16, 22; 8:10) E ehèmpel bíbliko aki i otronan mas a duna nos fortalesa spiritual. Mi no tabatin hopi tempu komo Testigu di Yehova, pero ora mi a mira e fe fuerte ku e rumannan ku mas eksperensia tabatin, esei a animá mi hopi. Mi a sinti ku Yehova tabata berdaderamente ku nos.

E Bataya A Kuminsá

Simannan a pasa i e tenshon den e kampamentu tabata oumentando. Negosiashonnan entre e rebeldenan i outoridatnan a bira mas intenso. E lidernan rebelde a insistí pa e gobièrnu sentral na Moskú manda un representante pa reuní ku nan. E outoridatnan a eksigí pa e rebeldenan entregá, duna nan armanan i bolbe bai traha. Ningun banda no kier a sede. Na e haltura ei, e kampamentu tabata rondoná pa forsanan militar, kla pa ataká riba e promé komando. E rebeldenan tambe tabata kla pa bringa; nan a lanta barikada i a traha un stòk di arma. Tur hende tabata spera e konfrontashon final entre e ehérsito i e prezunan un ora pa otro.

Dia 26 di yüni, zonidu durísimo di un áwaseru di bala di kañon a lanta nos for di soño. Tanki di guera a tumba e kura i a basha bin den e kampamentu. Tras di nan a sigui trupanan militar di atake tirando ku mitrayeur. Prezunan—hòmber i muhé—a kore bai riba e tankinan ku tabata drentando, gritando “Hurá!” i tirando piedra, bòm ku nan mes a traha i tur otro kos ku nan por a haña den nan kaminda. A sigui un bataya feros, i nos komo Testigu a haña nos meimei di dje. Kon Yehova lo a kontestá nos orashonnan pa yudansa?

 Diripiente, sòldánan a kore drenta den nos barak. “Boso, santunan, sali pafó!” nan a grita. “Hasi lihé, wak pa boso sali pafó di e kurá!” E ofisial na mando a bisa e sòldánan pa no tira nos pero pa keda serka nos i protehá nos. Miéntras ku e bataya tabata den su furia, nos a sinta riba e tereno di yerba djis pafó di e kampamentu. Pa kuater ora largu nos a tende eksploshon, tiru, gritu i keñamentu ta bin for di paden di e kampamentu. Despues, tur kos a keda ketu. Mas lat, den e rayonan di lus di mainta nos a mira kon sòldánan tabata karga kadaver saka for di e kampamentu. Nos a tende despues ku sientos di prezu a sufri leshon òf pèrdè nan bida.

Mas lat riba e dia ei, un ofisial ku mi tabata konosé a bini serka nos. El a puntra mi orguyosamente: “Pues anto Nikolai, ken a salba boso? Nos òf Yehova?” Nos a gradisié sinseramente pa a salba nos bida i a agregá: “Nos ta konvensí ku nos Dios todopoderoso, Yehova, a motivá boso pa spar nos, meskos ku el a motivá otronan pa libra su sirbidónan den tempunan bíbliko.”—Esdras 1:1, 2.

E mesun ofisial ei a splika nos tambe kon e sòldánan a haña sa ken nos tabata i na unda nos tabata keda. El a bisa ku durante un di e seshonnan di negosiashon entre e militarnan i e rebeldenan, e militarnan a akusá e rebeldenan di a mata prezunan ku no tabata apoyá nan. E rebeldenan a defendé nan mes bisando ku Testigunan di Yehova no a partisipá den e lantamentu, pero nan no a mata nan. En bes di esei, komo kastigu, a sera tur e Testigunan den un solo barak. E ofisialnan militar a kòrda e deklarashon ei.

Nos A Para Firme pa e Reino

E outor ruso bon konosí Aleksandr Solzhenitsyn a menshoná den su buki The Gulag Archipelago (E Archipiélago di Gulag) e rebelion ku nos a eksperensiá den prizon. Relashoná ku e suseso ei, el a skirbi ku e rebelion a kuminsá pasobra, manera el a bisa, “ta klaru ku nos ke libertat, . . . pero ken por duna nos e?” Komo Testigu di Yehova den e mesun kampamentu di prizon, nos tambe a anhelá libertat. Pero no djis un libertat for di prizon sino libertat ku e Reino di Dios so por perkurá. Tempu nos tabata den prizon, nos tabata sa ku nos tabatin mester di e forsa di Dios pa para firme na fabor di su Reino. I Yehova a duna nos tur loke nos tabatin mester. El a duna nos viktoria sin usa kuchú òf granada.—2 Korintionan 10:3.

Hesukristu a bisa Pilato: “Mi reino no ta [parti] di e mundu aki. Si mi reino tabata di e mundu aki, mi sirbidónan lo a bringa.” (Juan 18:36) P’esei, komo siguidó di Kristu, nos no ta partisipá den luchanan polítiko. Nos tabata kontentu ku tantu durante komo despues di e lantamentu, nos lealtat na e Reino di Dios tabata bisto pa tur hende. Solzhenitsyn a skirbi tokante nos kondukta den e dianan ei: “Testigunan di Yehova a sinti nan liber pa sigui nan reglanan estriktamente i a nenga di konstruí fortifikashonnan òf di para komo bewaker.”

Mas ku 50 aña a pasa desde e susesonan turbulento ei. Sin embargo, hopi biaha mi ta kòrda ku gratitut riba e tempu ei pasobra mi a siña algun lès duradero, manera, warda riba Yehova i konfia plenamente den su brasa poderoso. Sí, meskos ku hopi otro Testigu stimá den eks-Union Soviétiko, mi a eksperensiá ku Yehova en bèrdat ta duna libertat, protekshon i salbashon na esnan ku ta spera riba e Reino ku no ta ‘parti di e mundu aki.’

[Plachinan na página 8, 9]

E kampo di trabou fòrsá na Kazakstan kaminda nos tabata enkarselá

[Plachi na página 10]

Un pintura di e sekshon di hende muhé dje barak di e Testigunan

[Plachi na página 11]

Ku rumannan kristian despues ku nos a sali liber