Ta Importá Kua Religion Bo Ta Skohe?

MAYORIA di nos gusta haña un bon surtido pa nos por skohe for di dje ora nos ta hasi kómpras. Ora un marshe ta ofresé un variedat di fruta i bèrdura, nos por skohe esnan ku mas nos ta gusta i ku ta bon pa nos famia. Si un pakus ta ofresé un surtido grandi di estilo i koló di paña ku nos por afòrt, nos por skohe loke ta pas mihó ku nos. Algun eskoho ku nos ta hasi den bida ta simplemente un kuestion di gustu personal. Pero tin otro eskoho ku ta influensiá nos bienestar, por ehèmpel nos eskoho di kuminda saludabel òf di bon amigu. Pues, kiko di nos eskoho di religion? Akaso nos forma di adorashon mester ta simplemente un kuestion di gustu personal? Òf e ta un asuntu ku ta influensiá nos bienestar seriamente?

Tin un gran variedat di religion ku nos por skohe for di dje. Awendia, mayoria di pais ta garantisá libertat di religion, i mas i mas hende ta sinti nan liber pa bandoná e religion di nan mayornan. Un enkuesta na Merka a saka na kla ku 80 porshento di merikano “ta kere ku mas ku ún religion por hiba na salbashon.” Segun e mesun enkuesta ei, “un di kada sinku persona a bisa ku ora nan a bira adulto nan a kambia di religion.” Un enkuesta na Brazil a revelá ku kasi un kuart di tur brazilero a kambia di religion.

Den pasado, hende tabata diskutí pisá riba e doktrinanan ku a distinguí un religion for di otro. Awendia e punto di bista popular ta: ‘No ta importá kua religion bo skohe.’ Pero esei ta bèrdat? E religion ku bo skohe por tin efekto riba bo?

Meskos ku kumpradónan sabí ta hasi pregunta tokante orígen di e produktonan ku ta ser ofresé, asina tambe ta sabí di bo parti pa puntra: ‘Kon tur e diferente religionnan aki a kuminsá, i dikon?’ Beibel ta duna e kontesta.

 Kon Religionnan Ta Kuminsá?

Den Israel di antigwedat, Rei Jeroboam a funda un religion kasi mil aña promé ku Hesus a bin na tera. Jeroboam tabata e promé rei di Israel su reino independiente di nort. E tabatin e tarea difísil di uni e pueblo pa defendé su kousa. “[E] rei a buska konseho i a traha dos bisé di oro, i el a bisa [e pueblo]: ‘Ta muchu molèster pa boso bai Yerusalèm; ata boso diosnan, o Israel.’” (1 Reinan 12:28) Tabata bisto ku e rei kier a usa religion pa kita e pueblo su lealtat for di Yerusalèm, kaminda nan tabatin e kustumber di bai pa rindi adorashon. E religion ku Jeroboam a kuminsá kuné a dura siglonan i ku tempu a resultá den morto òf eksilio di miónes di hende ora Dios a ehekutá huisio riba e nashon apóstata di Israel. E religion di Jeroboam tabata pa sirbi interesnan polítiko. Te awe tin algun religion di estado ku tambe a kuminsá komo un intento pa konsolidá poder polítiko.

Apòstel Pablo a revelá un otro motibu pakiko hende ta kuminsá ku un religion nobo ora el a bisa: “Mi sa ku despues ku mi bai, lobo brabu lo drenta meimei di boso, ku lo no tin miserikòrdia di e tou; i for di meimei di boso mes lo lanta hòmbernan ku ta papia kosnan pèrvèrso, pa desviá e disipelnan i hasi nan bai nan tras.” (Echonan 20:29, 30) Lidernan orguyoso hopi biaha ta kuminsá ku movementunan religioso pa hala atenshon na nan mes. Iglesianan ku ta pretendé di ta kristian a splet den vários fakshon.

Ken Religionnan Ke Agradá?

Algun hende ta kuminsá un religion nobo komo reakshon riba demanda popular. Por ehèmpel, e revista Economist tabatin un reportahe tokante e asina yamá ‘mega-iglesianan’ na Merka. E artíkulo a bisa ku e iglesianan aki ta kresiendo pasobra nan ta “basá riba e mesun prinsipio di tur negoshi eksitoso, esta, ku kliente ta rei.” Algun di e mega-iglesianan ei ta “entretené nan miembronan ku vidio, drama i muzik kontemporáneo durante nan sirbishinan.” Sierto lidernan religioso den e iglesianan aki ta pretendé ku nan ta siña nan miembronan kon nan por hiba un bida “riku, saludabel i sin problema.” Ounke e iglesianan ei ta wòrdu kritiká pasobra nan ta den e industria di entretenimentu òf den e ‘negoshi di yuda bo mes,’ e revista ya menshoná ta bisa: “Simplemente nan ta reakshonando riba loke nan miembronan ta pidi.” E reportahe a konkluí: “E kombinashon di negoshi ku religion a resultá sumamente eksitoso.”

Ounke otro religionnan kisas no ta dje abiertamente komersial ei, iglesianan ku ta “reakshonando riba loke e miembronan ta pidi” ta pone nos kòrda riba un spièrtamentu ku Pablo a duna. El a skirbi: “E tempu lo bin ku nan lo no soportá doktrina sano mas; ma al kontrario, pa satisfasé nan mes deseonan, nan lo akumulá pa nan mes siñadónan pa bisa nan loke nan orea ku ta kishikí kier tende, i lo bira nan orea for di e bèrdat, i lo bolbe na fábula.”—2 Timoteo 4:3, 4.

Siendo ku hopi religion a surgi for di un deseo pa poder polítiko, pa prestigio i pa aseptashon popular mas bien ku for di un deseo pa agradá Dios, no ta un sorpresa ku religion ta enbolbí den kosnan malu manera abusu seksual di mucha, froude, guera i terorismo. Mayoria di biaha, religion no ta loke e ta parse. Kon bo por evitá di ser gañá?

[Komentario na página 4]

Hopi religion a surgi for di un deseo pa poder polítiko, pa prestigio i pa aseptashon popular mas bien ku for di un deseo pa agradá Dios