“El A Obligá Nos di Aseptá”

PAISNAN di Oriente ta bon konosí pa nan hospitalidat. Por ehèmpel, na India un famia por asta keda sin kome pa nan duna un bishitante inesperá kuminda. Na Iran, ta normal ku un mama semper ta stòk su frishidèr ku kuminda ya asina e por mustra hospitalidat na bishitantenan inesperá.

E aktitut ei di duna generosamente tabata bisto serka hopi persona menshoná den Beibel. Un ehèmpel sobresaliente ta Lidia, kende probablemente tabata un prosélito hudiu bibá na Filipos, e stat prinsipal di e distrito di Masedonia. Riba un dia di sabat, apòstel Pablo ku su kompañeronan di biahe a topa Lidia ku algun hende muhé banda di un riu pafó di Filipos. Yehova a habri Lidia su kurason miéntras ku Pablo tabata papia na e okashon ei. Komo resultado, Lidia a batisá huntu ku miembronan di su kas. Kaba el a roga e biaheronan: “Si boso a husga ku mi ta fiel na Yehova, drenta den mi kas i keda.” Pablo su kompañero Lukas, a deklará: “Simplemente el a obligá nos di aseptá.”—Echonan 16:11-15, NW.

Meskos ku Lidia, kristiannan djawe tambe ta mustra hospitalidat na rumannan den fe, manera por ehèmpel superintendentenan biahero i nan esposa. E anfitrionnan simplemente ta ‘obligá nan di aseptá.’ Esnan ku mustra hospitalidat, na nan turno, ta ser bendishoná ku kòmbersashon edifikante i asosiashon spiritual. Ounke mayoria di Testigu di Yehova ta di poko rekurso, nan ta ‘praktiká hospitalidat.’ (Romanonan 12:13; Hebreonan 13:2) Nan aktitut di duna ta hasi nan felis. Definitivamente Hesus tabatin rason ora el a bisa: “Ta mas bendishoná pa duna ku pa risibí.”—Echonan 20:35.