Kon Angel Ta Influensiá Bida di Hende

“Despues di e kosnan aki mi a mira un otro angel ta baha for di shelu, kende tabatin gran outoridat . . . I el a grita ku un bos poderoso, bisando: ‘At’el a kai! At’e gran Babilonia a kai!’”—REVELASHON 18:1, 2.

1, 2. Kiko ta mustra ku Yehova ta usa angel pa kumpli ku su boluntat?

APÒSTEL Juan na edat avansá tabatin e privilegio di haña vishonnan profétiko miéntras e tabata den eksilio riba e isla di Patmos. El a mira susesonan emoshonante ora ku “mediante inspirashon” el a haña su mes den “e dia di Señor.” E dia ei a kuminsá ku e entronisashon di Hesukristu na aña 1914, i ta kore te na fin di su Reinado di Mil Aña.—Revelashon 1:10, NW.

² Yehova Dios no a duna e revelashon aki direktamente na Juan. El a usa un kanal di komunikashon. Revelashon 1:1 ta deklará: “E revelashon di Hesukristu, ku Dios a dun’é pa mustra su sirbidónan e kosnan ku mester sosodé pronto; i el a manda esaki i a komunik’é pa medio di su angel na su sirbidó Juan.” Yehova, mediante Hesus, a usa un angel pa informá Juan di e kosnan maravioso relashoná ku “e dia di Señor.” Na un momento dado, Juan a mira tambe “un otro angel ta baha for di shelu, kende tabatin gran outoridat.” Kiko tabata e tarea di e angel aki? “El a grita ku un bos poderoso, bisando: ‘At’el a kai! At’e gran Babilonia a kai!’” (Revelashon 18:1, 2) E angel poderoso aki tabatin e privilegio di anunsiá e kaida di Babilonia e Grandi, e imperio mundial di religion falsu. Pues, un kos ta sigur, Yehova ta usa e angelnan den un manera importante pa kumpli ku su boluntat. Pero promé ku nos bai analisá detayadamente ki papel angel ta hunga den e propósito di Dios i kon nan ta influensiá nos bida, laga nos konsiderá e orígen di e kriaturanan spiritual aki.

Di Unda Angel A Bin?

3. Ki idea robes hopi hende tin tokante angel?

³ Miónes di hende awe ta kere ku angel ta eksistí. Pero hopi di nan tin idea robes tokante angel i nan orígen. Por ehèmpel, algun hende religioso ta kere ku ora un ser kerí muri, e persona ei ta haña un yamada pa bai serka Dios i ta bira un angel. Pero ta esei e Palabra di Dios ta siña tokante e kreashon, e eksistensia i e propósito di angel?

4. Kiko e Skritura ta konta nos tokante e orígen di angel?

⁴ E angel ku tin mas poder i outoridat—e angel prinsipal—yama Miguel e arkangel. (Hudas 9) E no ta ningun otro sino Hesukristu. (1 Tesalonisensenan 4:16) Masha, masha hopi siglo pasá ora ku Yehova a disidí di bira Kreadó, e promé-promé kos ku el a krea tabata e Yu angelikal aki. (Revelashon 3:14) Despues, mediante e Yu primogénito aki, Yehova a krea tur otro kriatura spiritual. (Kolosensenan 1:15-17) Refiriendo na e kriaturanan angelikal aki komo su yunan, Yehova a puntra patriarka Jòb: “Na unda bo tabata tempu ku mi a pone fundeshi di mundu? Bisa mi, si bo tin komprondementu. . . . Ken a pone su piedra-di-skina, tempu ku e streanan di mardugá tabata kanta huntu, i tur e yu hòmbernan di Dios tabata grita di alegria?” (Jòb 38:4, 6, 7) Ta bisto anto ku angel ta un kreashon di Dios, i nan a bin na eksistensia hopi tempu promé ku hende.

5. Kon e angelnan ta organisá?

⁵ “Dios no ta un Dios di konfushon, sino  di pas,” segun 1 Korintionan 14:33. Pues na armonia ku esei, Yehova a organisá su yunan spiritual den tres kategoria básiko: (1) serafin, kende ta fungi komo sirbidó na e trono di Dios, ta deklará su santidat i ta mantené su pueblo spiritualmente limpi; (2) kerubin, kende ta sostené Yehova su soberania; i (3) otro angelnan ku ta kumpli ku su boluntat. (Salmo 103:20; Isaias 6:1-3; Ezekiel 10:3-5; Daniel 7:10) Kua ta algun manera ku e kriaturanan spiritual aki ta influensiá e bida di hende?—Revelashon 5:11.

Ki Papel Angel Ta Hunga?

6. Kon Yehova a usa kerubin en konekshon ku e hòfi di Edén?

⁶ Beibel ta menshoná kriaturanan spiritual direktamente pa promé biaha na Génesis 3:24. Ei nos ta lesa: “[Yehova] a saka e hòmber afó; anto parti pariba di hòfi di Edén el a stashoná e kerubinnan i un spada tur na vlam di kandela ku tabata bira den tur direkshon, pa warda e kaminda ku ta bai na e palu di bida.” E kerubinnan aki a stroba Adam ku Eva di bolbe drenta nan hogar paradísiko original. Esei tabata na komienso di historia humano. Ki papel angel a hunga djei padilanti?

7. Kiko e nifikashon di e palabra pa “angel” na e idiomanan original ta indiká tokante un di e papelnan ku angel ta hunga?

⁷ Beibel ta menshoná angel kasi 400 biaha. Por tradusí tantu e palabra hebreo komo e palabra griego pa “angel” komo “mensahero.” Pues angel a fungi komo un medio di komunikashon entre Dios i humanidat. Manera a keda menshoná den e promé dos paragrafnan di e artíkulo aki, Yehova a usa un angel pa entregá su mensahe na apòstel Juan.

8, 9. (a) Ki efekto e bishitanan di un angel tabatin riba Manoa ku su kasá? (b) Kiko mayornan por siña for di Manoa su enkuentro ku e angel di Dios?

⁸ Dios ta usa angel tambe pa duna sosten i animashon na su sirbidónan riba tera. Por ehèmpel, den tempu di e Huesnan di Israel, Manoa ku su esposa steril tabatin masha deseo di haña un yu. Yehova a manda su angel bai informá e kasá di Manoa ku lo e haña un yu hòmber. E relato ta konta nos ku e angel a bisa: “Mira, lo bo konsebí i duna lus na un yu hòmber, i nabaha lo no pasa riba su kabes, pasobra e mucha lo ta un nazareo pa Dios for di den barika di su mama; i e lo kuminsá libra Israel for di man di e filisteonan.”—Huesnan 13:1-5.

⁹ E kasá di Manoa ku tempu a duna lus na un yu hòmber, Samson, kende a bira famoso den historia bíbliko. (Huesnan 13:24) Promé ku e yu a nase, Manoa a pidi pa e angel bolbe pasa pa instruí nan kon nan tin ku lanta e mucha. Manoa a puntra: “Kon e mucha su manera di biba i su vokashon mester ta?” E angel di Yehova a ripití e instrukshonnan ku el a duna na e kasá di Manoa. (Huesnan 13:6-14) Manoa lo mester a sinti su mes hopi animá! Awendia angel no ta bishitá hende mas di e manera ei, pero meskos ku Manoa, mayornan por buska Yehova su instrukshon ora di entrená nan yunan.—Efesionan 6:4.

10, 11. (a) Ki efekto e invashon di e ehérsito sirio tabatin riba Eliseo i su sirbidó? (b) Ki benefisio nos por saka si nos meditá riba e suseso aki?

 ¹⁰ Den tempu di profeta Eliseo tabatin un ehèmpel impreshonante di sosten di angel. Eliseo tabata kedando na Dotan, un stat den Israel. Un dia, ora ku e sirbidó di Eliseo a lanta mainta trempan i a wak pafó, el a mira ku e stat tabata rondoná pa kabai i garoshi di guera. E rei di Siria a manda un forsa militar poderoso pa kaptura Eliseo. Kon e sirbidó di Eliseo a reakshoná? Morto spantá, i kisas den pániko, el a sklama: “Ai, mi shon! Kiko nos lo hasi?” Den su bista, tur kos tabata pèrdí. Pero Eliseo a kontestá: “No tene miedu, pasobra esnan ku ta ku nos ta mas ku esnan ku ta ku nan.” Kiko e tabata ke men?—2 Reinan 6:11-16.

¹¹ Eliseo tabata sa ku tin un ehérsito di angel presente pa yud’é. Sin embargo, su sirbidó no a mira nada. P’esei “Eliseo a hasi orashon i a bisa: ‘O Yehova, mi ta pidi bo, habri su wowo pa e mira.’ I [Yehova] a habri wowo di e sirbidó i el a mira, i at’e seru tabata yen di kabai i garoshi di kandela tur rònt di Eliseo.” (2 Reinan 6:17) E ora ei e sirbidó por a mira e ehérsito di angel ku tabatin. Si nos tin perspikasia spiritual, nos tambe por ta konsiente di e echo ku e angelnan, tur bou di e direkshon di Yehova i Kristu, ta duna yudansa i protekshon na e pueblo di Yehova.

Sosten di Angel den Tempu di Kristu

12. Ki sosten Maria a haña for di angel Gabriel?

¹² Konsiderá e sosten ku e bírgen hudiu Maria a haña ora ku el a tende e notisia: “Lo bo konsebí den bo matris i duna lus na un yu hòmber, i lo bo yam’é Hesus.” Djis promé ku angel Gabriel—kende Dios a manda—a entregá e mensahe sorprendente aki, el a bisa Maria: “No tene miedu, Maria, pasobra bo a haña grasia serka Dios.” (Lukas 1:26, 27, 30, 31) Maria lo mester a sinti su mes hopi animá i fortifiká pa e palabranan aki ku a sigur’é ku e tabatin Dios su aprobashon!

13. Kon angel a sostené Hesus?

¹³ Un otro okashon kaminda angel a duna sosten tabata despues ku Hesus a resistí e tres tentashonnan ku Satanas a pone Su dilanti den desierto. E relato ta konta nos ku na final di e pruebanan, “Diabel a lag’é; i mira, angelnan a bin i a sirbié.” (Mateo 4:1-11) Algu similar a pasa e anochi promé ku Hesus a muri. Den angustia, Hesus a hinka rudia i a kuminsá hasi orashon, bisando: “‘Tata, si ta bo boluntat, kita e kopa aki for di mi; sin embargo, no mi boluntat, ma di  bo sosodé.’ Awor a aparesé un angel for di shelu na dje pa fortales’é.” (Lukas 22:42, 43) Pero ki klase di sosten di angel nos ta haña awe?

Sosten di Angel den Nos Tempu

14. Ki persekushon Testigunan di Yehova tabatin ku wanta den nos tempu, i kiko tabata e resultado?

¹⁴ Nos ta mira evidensia di sosten di angel ora nos konsiderá e historia di e trabou di prediká di Testigunan di Yehova den nos tempu. Por ehèmpel, e pueblo di Yehova a logra wanta e atake di nazismo na Alemania i Wèst Europa promé i durante Segundo Guera Mundial (añanan 1939-45). Bou di e régimennan di fasismo katóliko na Italia, Spaña i Portugal, e Testigunan tabatin ku resistí persekushon pa asta mas tantu aña. Anto durante dékadanan largu nan a wanta persekushon na eks-Union Soviétiko i na e nashonnan ku tabata bou di su dominio. Anto no mester lubidá e persekushon ku e Testigunan a wanta den algun nashon afrikano. * Den añanan mas resien, e sirbidónan di Yehova a sufri di persekushon feros den e pais di Georgia. Satanas a hasi tur loke ta na su alkanse pa pone un fin na e aktividat di Testigunan di Yehova. Sin embargo, komo organisashon, nan a sobrebibí tal oposishon i a prosperá. Pa un parti, esei ta debí na e eskudo protektivo ku angel a perkurá.—Salmo 34:7; Daniel 3:28; 6:22.

15, 16. Ki sosten di angel Testigunan di Yehova ta haña den nan ministerio mundial?

¹⁵ Testigunan di Yehova ta tuma masha na serio nan enkargo di prediká e bon nobo di e Reino di Dios rònt mundu i di hasi disipel dor di siña e bèrdat di Beibel na hende interesá tur kaminda. (Mateo 28:19, 20) Sin embargo,  e Testigunan ta bon konsiente di e echo ku nan no por kumpli ku e enkargo aki sin e sosten di angel. P’esei, loke tin pará na Revelashon 14:6 i 7 tabata semper un fuente di animashon pa nan. Einan nos ta lesa loke apòstel Juan a skirbi: “Mi a mira un otro angel ta bula meimei di shelu, kende tabatin un evangelio eterno pa prediká na esnan ku ta biba riba tera, i na tur nashon i tribu i lenga i pueblo; i el a bisa na bos haltu: ‘Teme Dios i dun’é gloria, pasobra e ora di su huisio a yega; i adorá Esun ku a traha shelu i tera i laman i fuentenan di awa.’”

¹⁶ E palabranan aki ta mustra bon kla ku e gran trabou di prediká e bon nobo rònt mundu ku Testigunan di Yehova ta efektuando, tin e respaldo i guia di angel. Yehova ta usando su angelnan pa dirigí hende sinsero na su Testigunan. E angelnan a yega di dirigí e Testigunan tambe na hende meresedor. Esaki lo por splika dikon na asina tantu okashon—demasiado biaha pa esei por ta simplemente koinsidensia—un Testigu di Yehova ta topa un persona nèt na momento ku e persona ta pasando den un krísis i tin mester di yudansa spiritual.

Un Papel Dramátiko den Futuro Serkano

17. Kiko a pasa ku e asirionan ora ku un solo angel a ataká nan?

¹⁷ Fuera di fungi komo mensahero i yudansa fortalesedor pa e adoradónan di Yehova, angel ta sirbi un otro propósito mas. Den pasado, nan a ehekutá e huisionan di Dios. Por ehèmpel, den siglo 8 promé ku nos era, Yerusalèm tabata bou di menasa di un inmenso ehérsito di sòldá asirio. Kon Yehova a reakshoná? El a bisa: “Ami lo defendé e stat aki, pa salb’é pa mi mes kousa i pa kousa di mi sirbidó David.” E relato bíbliko ta konta nos loke a pasa: “Anto a sosodé ku e anochi ei e angel di SEÑOR a sali mata shentiochentisinku mil hende den e kampamentu di e asirionan; i ora ku e hendenan a lanta su manisé, ata tur esakinan tabata morto.” (2 Reinan 19:34, 35) Ki insignifikante e ehérsitonan di hende ta na komparashon ku e forsa di un solo angel!

18, 19. Ki papel dramátiko angel lo hunga den futuro serkano, i ki efekto esei lo tin riba humanidat?

¹⁸ Angel lo fungi komo Dios su forsa di ehekushon den futuro serkano. Muy pronto, Hesus lo bin “ku su angelnan poderoso den kandela tur na vlam.” Nan mishon lo ta pa “duna pago meresí na esnan ku no konosé Dios i na esnan ku no ta obedesé e evangelio di nos Señor Hesus.” (2 Tesalonisensenan 1:7, 8) Ki un gran efekto e akshon aki lo tin riba humanidat! E hendenan ku ta nenga di reakshoná faborablemente riba e bon nobo di e Reino di Dios ku awor ta ser proklamá rònt mundu, lo sufri destrukshon. Ta solamente esnan ku buska Yehova, buska hustisia i humildat ‘lo wòrdu skondí riba e dia di e rabia di Yehova,’ sin sufri ningun daño.—Sofonias 2:3.

¹⁹ Nos por ta gradisidu ku Yehova ta usa su angelnan poderoso pa sostené i fortalesé su adoradónan riba tera. Ta un gran konsuelo pa nos ku nos ta komprondé e papel ku angel ta hunga den e propósito di Dios, ya ku tin angel ku a rebeldiá kontra Yehova i a bin kai bou di e liderato di Satanas. E siguiente artíkulo lo trata ki medidanan kristiannan berdadero por tuma pa protehá nan mes kontra e influensia poderoso di Satanas e Diabel i su demoñonan.

[Nota]

Kiko Bo A Siña?

• Kon angel a originá?

• Kon Dios a usa angel den tempu bíbliko?

• Kiko Revelashon 14:6 i 7 ta revelá tokante e aktividat di e angelnan awe?

• Ki papel dramátiko angel lo hunga den futuro serkano?

[Preguntanan di Estudio]

[Plachi na página 22]

Manoa ku su kasá a haña animashon di un angel

[Plachi na página 23]

“Esnan ku ta ku nos ta mas ku esnan ku ta ku nan”