Kon Nos Por Resistí e Demoñonan?

“Angelnan ku no a warda nan mes posishon, ma a bandoná nan propio lugá di biba, [Dios] a tene na kadena eterno den skuridat pa e huisio di e gran dia.”—HUDAS 6.

1, 2. Ki preguntanan ta surgi tokante Satanas e Diabel i e demoñonan?

“SEA sobrio, sea alerta,” apòstel Pedro a spièrta. “Boso atversario, e Diabel, ta kana rònt manera un leon ku ta gruña, buskando ken e por devorá.” (1 Pedro 5:8) Relashoná ku e demoñonan, apòstel Pablo a bisa: “Mi no kier pa boso tin komunion ku demoño. Boso no por bebe e kopa di Señor i e kopa di demoñonan; boso no por tuma parti na e mesa di Señor i na e mesa di demoñonan.”—1 Korintionan 10:20, 21.

² Pero ken Satanas e Diabel i e demoñonan ta? Kon nan a originá i na ki tempu? Ta Dios a krea nan? Kon poderoso nan influensia riba hende ta? Nos tin un defensa kontra nan?

Di Unda Satanas i e Demoñonan A Bin?

3. Kon un angel di Dios a bira Satanas e Diabel?

³ For di prinsipio di historia humano, ora humanidat a kuminsá biba den hòfi di Edén, un angel di Dios a bira rebelde. Dikon? Pasobra e no tabata satisfecho ku su papel den e organisashon selestial di Yehova. Despues di e kreashon di Adam ku Eva, e angel ei a mira un oportunidat pa kita nan obedensia i adorashon for di e Dios berdadero i dirigí esei na su mes. E angel aki a hasi su mes Satanas e Diabel ora el a rebeldiá kontra Dios i a pone e promé pareha sigui un rumbo pekaminoso. Ku tempu, otro angelnan a djòin Satanas den su rebelion. Kon nan a hasié?—Génesis 3:1-6; Romanonan 5:12; Revelashon 12:9.

4. Kiko algun angel rebelde a hasi promé ku e Diluvio di tempu di Noe?

⁴ E Skritura inspirá ta konta nos ku algun tempu promé ku e gran Diluvio di tempu di Noe, sierto angelnan a kuminsá mustra un interes inusual den hende muhé riba tera. Ku mal intenshon, “e yu hòmbernan [selestial] di Dios a mira ku e yu muhénan di hende tabata bunita,” Beibel ta deklará, “i nan a tuma esposanan pa nan mes, esun ku nan tabata kier a skohe.” E unionnan aki tabata  innatural, i nan a produsí yunan bastá, konosí na e idioma original komo nèfilim. (Génesis 6:2-4) Pues, e kriaturanan spiritual ku a desobedesé Dios, a djòin e rebelion di Satanas kontra Yehova.

5. Kiko a pasa ku e rebeldenan ora Yehova a trese destrukshon pa medio di e gran Diluvio?

⁵ Ora Yehova a trese e Diluvio riba humanidat, e nèfilim i nan mamanan humano a muri. E angelnan rebelde a haña nan obligá ta kita nan kurpa humano i bolbe na e region di spiritu. Sin embargo, nan no por a bolbe na ‘nan posishon’ original serka Dios. Mas bien, nan a ser entregá na “skuridat [spiritual] diki,” konosí komo Tártaro.—Hudas 6; 2 Pedro 2:4, NW.

6. Kon e demoñonan ta gaña hende?

⁶ For di momento ku e angelnan malbado a pèrdè ‘nan posishon’ original, nan a bira e kompañeronan demoño di Satanas i a sirbi su interesnan malbado. Djei padilanti, e demoñonan no tabatin e poder mas pa bisti kurpa humano. Sin embargo, nan por tenta hende hòmber i hende muhé pa partisipá den vários forma di relashon seksual apnormal i inaseptabel. Demoñonan ta gaña hende aktivamente tambe pa medio di spiritismo, lokual por enserá kosnan manera uso di palabranan mágiko, vudu i medium spiritista. (Deuteronomio 18:10-13; 2 Krónikanan 33:6) E angelnan malbado i Diabel tin mesun destino, esta, destrukshon eterno. (Mateo 25:41; Revelashon 20:10) Pero tanten ku nan t’ei nos tin ku para firme i resistí nan. Ta sabí di nos parti pa konsiderá kon poderoso Satanas ta i kon nos por logra resistí e i su demoñonan.

Kon Poderoso Satanas Ta?

7. Ki poder Satanas tin riba mundu?

⁷ Satanas a kalumniá Yehova durante henter historia. (Proverbionan 27:11) Es mas, el a influensiá un gran parti di humanidat. “Henter mundu ta bou di kontròl di e malbado,” segun 1 Juan 5:19. Ta p’esei Diabel por a tenta Hesus ku e oferta di dun’é e outoridat i e gloria di “tur e reinonan di mundu.” (Lukas 4:5-7) Apòstel Pablo a bisa en konekshon ku Satanas: “Si nos evangelio ta tapá ku velo, e ta tapá pa esnan ku ta bai pèrdí, den kende nan kaso e dios di e mundu aki a siega mente di esnan ku no ta kere, pa nan no mira e lus di e evangelio di e gloria di Kristu, kende ta e imágen di Dios.” (2 Korintionan 4:3, 4) Satanas ta “un gañadó i e tata di mentira,” pero e ta presentá su mes komo “un angel di lus.” (Juan 8:44; 2 Korintionan 11:14) E tin e poder i e métodonan nesesario pa siega mente di e gobernantenan di mundu i nan súpditonan. Satanas a gaña humanidat pa medio di informashon inkorekto i tambe mito- i mentiranan religioso.

8. Kiko Beibel ta indiká tokante e influensia di Satanas?

⁸ E poder i influensia di Satanas tabata bisto den tempu di profeta Daniel, un sinku siglo promé ku nos era komun. Ora Yehova a manda un angel pa entregá un mensahe di estímulo na Daniel, “e prens [demoño] di e reino di Persia” a resistié. E angel fiel a wòrdu strobá 21 dia largu te ora ku “Miguel, un di e prensnan prinsipal,” a bin yud’é. E mesun relato ta papia tambe di “e prens [demoño] di Gresia.” (Daniel 10:12, 13, 20) Anto na Revelashon 13:1 i 2, Beibel ta deskribí Satanas komo “e dragon” ku ta duna e bestia salbahe polítiko “su poder i su trono i gran outoridat.”

9. Kontra ken kristiannan ta lucha?

⁹ P’esei no ta straño ku apòstel Pablo a skirbi: “Nos lucha no ta kontra karni i sanger, sino kontra e gobernantenan, kontra e podernan, kontra e forsanan mundial di e skuridat aki, kontra e forsanan spiritual di maldat den e lugánan selestial.” (Efesionan  6:12) Te ku awe, forsanan demoniako bou di kontròl di Satanas e Diabel ta tras di esenario, ehersiendo influensia riba gobernantenan humano i riba humanidat en general, motivando nan pa kometé aktonan monstruoso di genosidio, terorismo i asesinato. Laga nos ban analisá kon nos por resistí e forsanan spiritual poderoso aki ku éksito.

Ki Defensa Nos Tin Kontra Demoño?

10, 11. Kon nos por resistí Satanas i su angelnan malbado?

¹⁰ Nos no por resistí Satanas i su angelnan malbado riba nos mes forsa, sea ta forsa físiko òf mental. Pablo a konsehá nos: “Sea fuerte den Señor, i den e forsa di su poder.” Nos tin ku akudí na Dios pa haña protekshon. Pablo a agregá: “Bisti e armadura kompletu di Dios, pa boso por para firme kontra e trampanan di Diabel. . . . Tuma e armadura kompletu di Dios, pa boso por resistí den e dia malu, i despues di a hasi tur kos, para firme.”—Efesionan 6:10, 11, 13.

¹¹ Dos biaha Pablo a urgi su kompañeronan kristian pa bisti “e armadura kompletu di Dios.” E palabra “kompletu” ta duna di komprondé ku un aktitut indiferente lo no ta sufisiente pa resistí atakenan demoniako. Pues, kiko ta e komponentenan masha importante di e armadura ku kristiannan djawe urgentemente tin mester pa nan por resistí e demoñonan?

“Para Firme”—Kon?

12. Kon kristiannan por faha nan hep ku bèrdat?

¹² Pablo a splika: “Para firme anto, ku boso hep fahá ku bèrdat, i ku e korasa di hustisia bistí.” (Efesionan 6:14) E dos partinan di armadura ku Pablo a referí na dje aki ta un faha i un korasa. Un sòldá tabatin ku tene su faha bon mará pa asina e protehá su hep (lokual a inkluí su sintura, meimei di su pia i e parti abou di su barika) i pa karga e peso di su spada. Den e mesun manera, e bèrdat bíbliko mester ta bon mará rònt di nos kurpa, na moda di papia, di manera ku nos ta biba na armonia kuné. Nos tin un programa pa lesa Beibel tur dia? Henter e famia ta enbolbí den esei? Nos tin un rutina pa konsiderá e teksto di dia komo famia? Ademas, nos ta keda al dia ku e splikashonnan ku ta sali den e publikashonnan ku “e esklabo fiel i prudente” ta perkurá? (Mateo 24:45) Si ta asina, anto esei ta mustra ku nos ta hasiendo esfuerso pa apliká e konseho di Pablo. Ademas, nos tin vários vidio i DVD ku por duna guia bíbliko. Si nos tin un gara firme riba e bèrdat, esei por yuda nos tuma desishonnan sabí i ta protehá nos di sigui un kaminda robes.

13. Kon nos por protehá nos kurason figurativo?

¹³ E korasa literal a sirbi pa protehá e sòldá su pechu, kurason i otro órganonan importante. Un kristian por protehá su kurason figurativo—es desir, e persona ku e ta di paden—pa medio di kultivá amor pa e hustisia di Dios i pa medio di pega na e normanan hustu di Yehova. E korasa figurativo ta protehá nos pa nos no minimisá e importansia di e Palabra di Dios. Segun ku nos ta siña “odia maldat, stima bondat,” nos ta frena  nos pianan “for di tur mal kaminda.”—Amos 5:15; Salmo 119:101.

14. Kiko ta nifiká ku nos tin nos “pianan bistí ku e preparashon di e evangelio di pas”?

¹⁴ E pianan di sòldánan romano por lo general tabata ekipá ku sapatu apropiá pa hasi marchanan largu riba e míles di kilometernan di karetera romano ku a abarká henter e imperio. Kiko e ekspreshon “pianan bistí ku e preparashon di e evangelio di pas” ta nifiká pa kristiannan? (Efesionan 6:15) E ta nifiká ku nos ta prepará pa aktua. Nos ta kla pa kompartí e bon nobo di e Reino di Dios na tur okashon apropiá. (Romanonan 10:13-15) E echo ku nos ta aktivo den e ministerio kristian ta un protekshon kontra e “trampanan” di Satanas.—Efesionan 6:11.

15. (a) Kiko ta mustra ku e eskudo grandi di fe ta masha importante? (b) Ki “flechanan sendí” por tin un efekto perhudisial riba nos fe?

¹⁵ Pablo a sigui bisa: “Riba tur kos, tumando e eskudo di fe, ku kual boso lo por paga tur e flechanan sendí di e malbado.” (Efesionan 6:16) E konseho pa tuma e eskudo grandi di fe ta ser introdusí ku e ekspreshon “riba tur kos,” lokual ta indiká ku e parti aki di e armadura ta masha importante. Nos fe no mag di tin defisiensia. Meskos ku un eskudo protektivo grandi, nos fe ta protehá nos di e “flechanan sendí” di Satanas. Kiko e flechanan ei lo por representá awe? Nan por ta insulto, mentira i mitar bèrdatnan ku ta doloroso i ku enemigu i apóstata ta plama den un intento pa debilitá nos fe. E “flechanan” aki por ta tambe vários tentashon pa ser materialista, lokual por pone nos bira  kompletamente apsorbá den kumpramentu di hopi kos i asta influensiá nos pa kompetí ku personanan ku a sukumbí pa un estilo di bida di luho i di prònk ku loke nan tin. Podisé nan a invertí den kas i outo mas grandi i mas mihó òf nan ta prònk ku nan hoyanan karu i e último estilonan di paña. Sin importá kiko otro hende ta hasi, nos mester tin fe ku ta sufisiente fuerte pa desviá e “flechanan sendí” aki. Kon nos ta edifiká i mantené fe fuerte?—1 Pedro 3:3-5; 1 Juan 2:15-17, BPK.

16. Kiko por yuda nos edifiká un fe fuerte?

¹⁶ Nos por hala serka Dios pa medio di estudio personal i regular di Beibel i pa medio di orashon sinsero. Nos por roga Yehova pa duna nos un fe mas fuerte, anto kaba nos ta dal e pasonan nesesario pa traha na armonia ku nos orashonnan. Por ehèmpel, nos ta prepará kuidadosamente pa e Estudio di Toren di Vigilansia semanal ku e intenshon di partisipá? Nos fe lo ta fuerte si nos ta studia Beibel i publikashonnan basá riba Beibel.—Hebreonan 10:38, 39; 11:6.

17. Kon nos por “tuma e hèlm di salbashon”?

¹⁷ Pablo a konkluí su deskripshon di e armadura spiritual ku e konseho: “Tuma e hèlm di salbashon, i e spada di e spiritu, kual ta e Palabra di Dios.” (Efesionan 6:17) E hèlm a protehá e sòldá su kabes i selebro, e sentro di tumamentu di desishon. Den e mesun manera, nos speransa kristian ta protehá nos fakultatnan mental. (1 Tesalonisensenan 5:8) En bes di yena nos mente ku metanan mundano i deseonan materialista, nos lo mester enfoká nos pensamentu riba e speransa ku Dios a duna nos, manera Hesus tambe a hasi.—Hebreonan 12:2.

18. Dikon nos no mester neglishá nos programa di lesamentu regular di Beibel?

¹⁸ Nos último protekshon kontra e influensia di Satanas i su demoñonan ta e palabra, òf mensahe, di Dios ku tin pará den Beibel. Esaki ta un motibu mas pakiko nos no mester neglishá nos programa di lesamentu regular di Beibel. Un bon konosementu di e Palabra di Dios ta protehá nos kontra e mentiranan di Satanas, kontra informashon inkorekto di e demoñonan i tambe kontra e publikashonnan i palabranan amargá di apóstatanan.

Sigui Hasi Orashon “Tur Ora Bai”

19, 20. (a) Kiko ta spera Satanas i su demoñonan? (b) Kiko por fortifiká nos spiritualmente?

¹⁹ Eliminashon di Satanas, su demoñonan i e mundu malbado ta serka. Satanas sa ku “ta ked’é solamente un poko tempu mas.” E ta furioso i ta hasi guera kontra esnan ku ‘ta warda e mandamentunan di Dios i ta duna e testimonio di Hesukristu.’ (Revelashon 12:12, 17) Ta masha importante pa nos resistí Satanas i su demoñonan.

²⁰ Nos por ta hopi gradisidu pa e instrukshon pa bisti e armadura kompletu di Dios! Pablo a konkluí su konsiderashon di e armadura spiritual ku e konseho aki: “Ku tur orashon i súplika pidi tur ora bai den spiritu, i ku esaki na bista, sea alerta ku tur perseveransia i súplika pa tur e santunan.” (Efesionan 6:18) Orashon por fortifiká nos spiritualmente i yuda nos keda alerta. Laga nos tuma e palabranan di Pablo na pechu i sigui hasi orashon, pasobra esaki lo yuda nos resistí Satanas i su demoñonan.

Kiko Bo A Siña?

• Kon Satanas i su demoñonan a originá?

• Kon poderoso Diabel ta?

• Ki defensa nos tin kontra Satanas i su demoñonan?

• Kon nos por bisti e armadura kompletu di Dios?

[Preguntanan di Estudio]

[Plachinan na página 26]

‘E yu hòmbernan di Dios a mira e yu muhénan di hende’

[Plachi na página 28]

Bo por identifiká e seis komponentenan di nos armadura spiritual?

[Plachinan na página 29]

Kon partisipashon den e aktividatnan aki ta un defensa kontra Satanas i su demoñonan?