Mira! E Lus Ta Maravioso!

SI BO a yega di fula den skuridat pa haña sa kon bo tin ku kana, bo sa kon frustrante esei por ta. Lus ta trese un gran alivio! Kisas bo a yega di haña bo den un situashon tambe ku a laga bo sinti komo si fuera bo tabata den un skuridat total. Podisé esaki a sosodé ora bo no por a mira e solushon di un problema. Anto tiki-tiki bo a bin mira lus—ku tabatin un solushon. Ta un eksperensia maravioso pa sali for di skuridat i bai kaminda tin lus.

Den e promé siglo, mayoria di hende tabata den skuridat spiritual. Apòstel Pedro a dirigí su mes na esnan ku a laga nan kreensianan anterior i aseptá kristianismo, ora el a skirbi: “[Dios] a yama boso for di skuridat na su lus maravioso.” (1 Pedro 2:9) Pa nan, ta komo si fuera nan a sali for di skuridat total pa bai den lus briante. Ta meskos ku ora un persona ta solitario i sin speransa i despues e ta bira miembro di un famia ku un futuro sigur.—Efesionan 2:1, 12.

“Bo A Bandoná Bo Promé Amor”

E promé kristiannan a haña “e bèrdat,” esta, e berdadero fe kristian. (Juan 18:37) Nan a mira e lus maravioso di e bèrdat i a hasi e transishon for di skuridat spiritual pa e lus iluminador. Sin embargo, den transkurso di tempu, e entusiasmo i selo inisial di algun kristian a fria. Por ehèmpel, pa fin di e promé siglo, a surgi un problema serio den e kongregashon na Efeso. Hesukristu resusitá a identifiká e problema, bisando: “Mi tin esaki kontra bo, ku bo a bandoná bo promé amor. P’esei, kòrda for di unda bo a kai, i repentí i hasi e obranan ku bo tabata hasi promé.” (Revelashon 2:4, 5) E kristiannan na Efeso mester a rebibá nan amor pa Dios i pa e bèrdat.

Kiko di nos? Nos tambe a eksperensiá e goso di mira e lus, di konosé e bèrdat maravioso di e Palabra di Dios. Nos a stima e bèrdat. Pero e difikultatnan ku hende sa pasa aden por fria nos amor pa e bèrdat. Huntu ku esaki ta bini e problemanan ku ta komun pa “e último dianan.” Nos ta bibando den un mundu karakterisá pa “tempunan trabahoso”—un mundu yen di hende ku ta “stimadó di nan mes, stimadó di plaka, gabadó, arogante, blasfemadó, desobedesidu na mayornan, ingrato, impio.” (2 Timoteo 3:1, 2) Nan influensia por pone nos selo mengua i nos amor pa Yehova fria.

Si nos a pèrdè e amor ku nos tabatin na prinsipio, nos tin ku ‘kòrda for di unda nos a kai i repentí.’ Nos tin ku bolbe na nos kondishon spiritual di ántes. Ademas, nos tin ku tene kuidou pa no laga nos apresio pa e bèrdat mengua. Ta masha importante pa nos tur keda ku un aktitut positivo i alegre i mantené nos amor pa Dios i pa su bèrdat bibu.

‘E Bèrdat Ku Ta Hasi Nos Liber’

E lus di bèrdat bíbliko ta maravioso pasobra Beibel ta kontestá preguntanan importante ku a konfundí humanidat pa míles di aña. Preguntanan manera: Pakiko nos ta aki?  Kiko ta e propósito di bida? Pakiko tin maldat? Tin bida despues di morto? Yehova a iluminá nos ku bèrdatnan maravioso basá riba e siñansanan di Beibel. Nos no mester ta gradisidu di kurason pa esakinan? Laga nos no keda sin mustra gratitut pa loke nos a siña!

Hesus a bisa su disipelnan: “Boso lo konosé e bèrdat, i e bèrdat lo hasi boso liber.” (Juan 8:32) E sakrifisio di reskate di Hesus a habri kaminda pa nos haña libertat for di piká i morto. Pero tambe e bèrdatnan presioso aki a libra nos di e ignoransia i e insiguridatnan di un mundu den skuridat. Ora nos meditá ku apresio riba loke nos a siña, esei lo yuda nos fortalesé nos amor pa Yehova i pa su Palabra.

Apòstel Pablo a skirbi e kristiannan na Tesalónika: “Ora boso a risibí for di nos e palabra di Dios su mensahe, boso a asept’é no komo palabra di hende, ma pa loke e ta berdaderamente, e palabra di Dios ku ta obra tambe den boso ku ta kere.” (1 Tesalonisensenan 2:13) E tesalonisensenan a tende i a “risibí e palabra [di Dios] ku goso.” Nan no tabata den “skuridat” mas. Na lugá di esei, nan a bira “yunan di lus.” (1 Tesalonisensenan 1:4-7; 5:4, 5) E kristiannan ei a siña ku Yehova ta e Kreadó i ku e ta todopoderoso, sabí, amoroso i miserikòrdioso. Meskos ku otro siguidó di Kristu, nan tambe a siña ku Yehova a hasi areglo pa kita nan pikánan pa medio di e sakrifisio di reskate di su Yu, Hesukristu.—Echonan 3:19-21.

Ounke e tesalonisensenan no tabata sa tur kos di e bèrdat di Beibel, nan tabata sa sí unda nan mester a akudí pa haña konosementu. E Skritura inspirá por hasi e hende di Dios kompetente, “ekipá pa tur bon obra.” (2 Timoteo 3:16, 17) E kristiannan na Tesalónika por a kontinuá ku nan estudio i eksperensiá bes tras bes ku e lus prosedente di Dios ta berdaderamente maravioso. Nan tabatin motibu pa alegrá tur ora, meskos ku nos tambe tin.—1 Tesalonisensenan 5:16.

Un Lus pa Nos Kaminda

E salmista a duna un motibu mas pakiko e lus ta maravioso. El a kanta: “Bo palabra ta un lampi pa mi pia i un lus pa mi kaminda.” (Salmo 119:105) E guia ku nos ta risibí for di e Palabra di Dios por yuda nos hiba un bida sigur i di satisfakshon. Nos no tin nodi di ta manera un barku ku ta drif sin rumbo. E echo ku nos sa e bèrdat i ta aplik’é ta protehá nos pa nos no ser “tirá p’aki p’aya dor di olanan, i hibá dor di tur bientu di doktrina.”—Efesionan 4:14.

Beibel ta bisa: “No konfia den prensnan, den yu di hende, den kende no tin salbashon.” E ta bisa tambe: “Bendishoná ta esun, kende su yudansa ta e Dios di Jakòb, kende su speransa ta den SEÑOR su Dios.” (Salmo 146:3, 5) Ademas, konfiansa den Yehova ta yuda nos vense miedu i ansiedat. Apòstel Pablo a skirbi: “No preokupá pa nada; ma den tur kos, pa medio di orashon i súplika ku gradisimentu, laga boso petishonnan ta konosí dilanti di Dios. I e pas di Dios, ku ta surpasá tur komprondementu, lo warda boso kurason i boso mente den Kristu Hesus.” (Filipensenan 4:6, 7) Ora nos laga e lus di e Palabra di Dios guia nos, esei realmente lo benefisiá nos.

 Bria Manera Lus den Mundu

Un otro motibu pakiko e lus di e Palabra di Dios ta maravioso ta ku e ta duna nos e oportunidat pa risibí e asignashon di mas onorabel ku hende por haña. Hesus a instruí su siguidónan: “Bai i hasi tur e nashonnan disipel di mi, i batisá nan den nòmber di e Tata i di e Yu i di e spiritu santu, i siña nan pa kumpli ku tur loke mi a ordená boso; i mira, mi ta ku boso semper, te na fin di mundu.” El a introdusí e mandamentu bisando: “Tur outoridat a wòrdu duná na mi den shelu i riba tera.”—Mateo 28:18-20.

Pensa riba ken ta yudando kristiannan berdadero den e trabou di prediká e bon nobo i siña hende di tur nashon e bèrdatnan di Beibel. Hesus a primintí su siguidónan ku lo e ta ku nan. En bèrdat e ta yudando nan i sosteniendo nan den nan ministerio segun ku nan ta ‘laga nan lus bria’ den e manera ei i pa medio di otro ‘bon obra.’ (Mateo 5:14-16) Angelnan tambe ta enbolbí den e trabou aki di prediká e bon nobo. (Revelashon 14:6) I kiko nos por bisa di Yehova Dios? Apòstel Pablo a skirbi: “Ami a planta, Apolos a muha, ma ta Dios a duna kresementu.” Ta ki un onor di por ta entre “Dios su kolaboradónan”!—1 Korintionan 3:6, 9.

Pensa tambe riba e manera ku Yehova ta bendishoná nos esfuersonan den e trabou ku el a duna nos. No tin nada ku por para banda di e privilegio ku Dios a duna nos di “bria manera lusnan den mundu.” Ora nos abla i akshonnan ta reflehá e lus di e Palabra di Dios, nos ta den e posishon di por duna berdadero yudansa na personanan di kurason onrado. (Filipensenan 2:15) I nos por alegrá segun ku nos ta prediká i siña otro hende ku selo, “pasobra Dios no ta inhustu pa lubidá [nos] trabou i e amor ku [nos] a mustra pa su nòmber.”—Hebreonan 6:10.

‘Kumpra Ungwento pa Hunta Bo Wowonan Kuné’

Den un mensahe ku Hesus a dirigí na e kongregashon di promé siglo na Laodisea, el a bisa: “Kumpra serka mi . . . ungwento pa hunta bo wowonan kuné, pa bo mira. Esnan ku mi ta stima, mi ta reprendé i disipliná.” (Revelashon 3:18, 19) E remedi konfiabel pa sieguedat spiritual ta “ungwento”—e siñansanan i disiplina di Hesus. Si nos ke mantené un punto di bista spiritual saludabel, nos mester aseptá su konseho i someté nos na dje i tambe na e guia ku nos ta haña den Beibel kompletu. Ademas, nos mester tin e mesun aktitut mental ku Kristu tabatin i imitá su ehèmpel. (Filipensenan 2:5; 1 Pedro 2:21) E ungwento no ta grátis. Hesus a bisa: ‘Kumpr’é serka mi.’ E ta ‘kosta’ tempu i esfuerso.

Ora nos sali for di un lugá skur i drenta un kuarto ku tin lus, por tuma poko tempu pa nos wowonan adaptá nan mes. Meskos tambe, ta tuma tempu pa studia e Palabra di Dios i pa mira e lus di e bèrdat. Ta tuma tempu pa meditá riba loke nos ta siña i reflekshoná riba kon presioso e bèrdat ta. Ma esei no ta kosta nos mashá. Dikon nò? Pasobra e lus ta maravioso!

[Plachi na página 14]

“Kumpra serka mi . . . ungwento pa hunta bo wowonan kuné, pa bo mira”