Apoyá Kristu i Su Esklabo Fiel Lealmente

“Su shon . . . lo lag’é keda na enkargo di tur su propiedatnan.”—MATEO 24:45-47.

1, 2. (a) Segun e Skritura, ken ta nos Lider? (b) Kiko ta mustra ku Kristu ta dirigí e kongregashon kristian aktivamente?

“TAMPOKO sea yamá ‘lider,’ pasobra un so ta boso Lider, e Kristu.” (Mateo 23:10, NW) Ku e palabranan aki Hesus a mustra su siguidónan bon kla ku niun hende riba tera lo ta nan lider. Nan úniko Lider lo ta unu selestial—Hesukristu mes. Esun ku a nombra Hesus na e posishon aki ta Yehova, kende “a lant’é for di e mortonan, i . . . a duna e komo kabes riba tur kos na e iglesia [“kongregashon,” NW], kual ta su kurpa.”—Efesionan 1:20-23.

² Siendo ku Kristu ta “kabes riba tur kos” relashoná ku e kongregashon kristian, e ta ehersé outoridat riba tur loke ta tuma lugá den e kongregashon. E ta mira tur loke ta pasa den e kongregashon. E ta opservá bon e kondishon spiritual di kada grupo di kristian òf kongregashon. Nos por dedusí esei klaramente for di e revelashon ku apòstel Juan a haña na fin di e promé siglo di nos era. Hesus a deklará sinku biaha na shete kongregashon ku e tabata sa di nan echonan, nan puntonan fuerte i nan puntonan débil, i el a duna konseho i animashon di akuerdo ku esei. (Revelashon 2:2, 9, 13, 19; 3:1, 8, 15) Nos tin tur motibu pa kere ku Kristu tabata na haltura tambe di e kondishon spiritual di otro kongregashonnan na Asia Menor, Palestina, Siria, Babilonia, Gresia, Italia i otro kaminda. (Echonan 1:8) Kiko djawe?

 Un Esklabo Fiel

3. Pakiko ta apropiá pa kompará Kristu ku un kabes i su kongregashon ku un kurpa?

³ Despues ku Hesus a resusitá i djis promé ku el a subi bai serka su Tata den shelu, el a bisa su disipelnan: “Tur outoridat a wòrdu duná na mi den shelu i riba tera.” El a bisa tambe: “Mira, mi ta ku boso semper, te na fin di mundu.” (Mateo 28:18-20) E lo a sigui dirigí nan aktivamente komo nan Kabes. Den e kartanan ku apòstel Pablo a skirbi e kristiannan na Efeso i Kolosas, el a kompará e kongregashon kristian ku un “kurpa,” di kua Kristu ta e Kabes. (Efesionan 1:22, 23; Kolosensenan 1:18) The Cambridge Bible for Schools and Colleges ta deklará ku e komparashon aki ta “indiká no solamente ku union ku e Kabes ta esensial, sino tambe ku e boluntat di e Kabes ta ser ehersé atraves di e miembronan. Nan ta Su instrumentonan.” Ken Kristu ta usa komo su instrumento kolektivo for di tempu ku el a haña poder di Reino na 1914?—Daniel 7:13, 14.

4. Segun e profesia di Malakias, kiko Yehova i Kristu Hesus a haña ora nan a bini pa inspekshoná e tèmpel spiritual?

⁴ E profesia di Malakias a pronostiká ku Yehova, “e Señor” berdadero, akompañá pa su “mensahero di e aliansa,” su Yu Kristu Hesus resien entronisá, lo a bini pa husga i inspekshoná Su “tèmpel,” òf kas spiritual di adorashon. Tur kos ta indiká ku e “tempu pa huisio kuminsá ku e hendenan di e kas di Dios” a yega na 1918. * (Malakias 3:1; 1 Pedro 4:17) Esnan ku a pretendé di representá Dios i su adorashon berdadero riba tera a keda debidamente eksaminá. E iglesianan di kristiandat, ku pa siglonan a siña hende doktrinanan ku ta desonrá Dios i ku tabata hopi enbolbí den e masakrenan di Promé Guera Mundial, a ser rechasá. Un restu fiel di kristian ungí ku spiritu a ser di tèst, refiná komo si fuera ku kandela i aprobá. Asina nan a bira un pueblo ku ta “presentá . . . ofrendanan den hustisia” na Yehova.—Malakias 3:3.

5. Na armonia ku e profesia di Hesus relashoná ku su “presensia,” ken a resultá di ta e “esklabo” fiel?

⁵ Na armonia ku e profesia di Malakias, e señal komponí ku Hesus a duna su disipelnan pa yuda nan rekonosé e tempu di su “binida [“presensia,” NW] i di e fin di tempu” a inkluí e identifikashon di un “esklabo” kolektivo. Hesus a deklará: “Ken anto ta e esklabo fiel i prudente ku su shon a laga enkargá ku su kas pa duna nan nan kuminda na su debido tempu? Bendishoná ta e esklabo ei, ku su shon ta haña ta hasi asina ora ku e bin. Di bèrdat mi ta bisa boso ku e lo lag’é keda na enkargo di tur su propiedatnan.” (Mateo 24:3, 45-47) Ora Kristu a “bin” pa inspekshoná e “esklabo” na 1918, el a haña un restu di disipel fiel ungí ku spiritu ku for di 1879 ta usando e revista aki i otro publikashonnan basá riba Beibel pa perkurá “kuminda [spiritual] na su debido tempu.” El a rekonosé nan komo su instrumento, òf “esklabo,” kolektivo, i na 1919 el a enkargá nan ku maneho di tur su propiedatnan riba tera.

Maneho di Kristu Su Propiedatnan Riba Tera

6, 7. (a) Ki otro palabra Hesus a usa pa su “esklabo” fiel? (b) Kiko Hesus tabata ke men ku e palabra “mayordomo”?

⁶ Un par di luna promé ku Hesus a duna su profesia tokante e señal di su presensia, ku a inkluí e eksistensia di un “esklabo” ku ta represent’é riba tera, el a papia di e “esklabo” aki usando un palabra poko diferente. E palabra ei a tira lus riba e responsabilidatnan di e esklabo. Hesus a deklará: “Ken anto ta e fiel i prudente mayordomo, kende su shon lo nombra riba su sirbidónan, pa duna nan nan parti di kuminda na su debido tempu? Di bèrdat mi ta bisa boso ku e lo lag’é keda na enkargo di tur su propiedatnan.”—Lukas 12:42, 44.

⁷ Aki e esklabo ta ser yamá un mayordomo,  un palabra tradusí for di un ekspreshon griego ku ta duna e idea di “esun ku ta manehá un kas òf propiedat.” E mayordomo kolektivo no ta simplemente un grupo di intelektual ku ta splika puntonan interesante for di Beibel. Ademas di perkurá alimento spiritual nutritivo “na su debido tempu,” e ‘mayordomo fiel’ lo a ser nombrá riba henter e kuerpo di Kristu su sirbidónan i lo a haña e enkargo pa manehá tur Kristu su interesnan riba tera, esta, “tur su propiedatnan.” Kiko tur esaki lo a enserá?

8, 9. Ki ‘propiedat’ e esklabo a haña e enkargo pa manehá?

⁸ Un di e responsabilidatnan di e esklabo ta pa supervisá e fasilidatnan físiko ku siguidónan di Kristu ta usa pa kumpli ku nan aktividatnan kristian, manera e sede mundial i sukursalnan di Testigunan di Yehova, i tambe nan lugánan di adorashon, manera Salòn di Reino i Salòn di Asamblea na tur parti di mundu. Pero mas importante ainda, e esklabo ta supervisá tambe e programanan spiritual edifikante di estudio di Beibel na reunionnan semanal, i na asamblea- i kongresonan ku ta tuma lugá periódikamente. Na e reunionnan aki, e esklabo ta duna informashon riba kon profesianan di Beibel ta kumpli, i tambe guia oportuno riba kon apliká prinsipionan di Beibel den bida diario.

⁹ Un otro responsabilidat di e mayordomo ta pa supervisá e trabou importantísimo di prediká ‘e evangelio di e reino’ i hasi ‘hende di tur nashon disipel.’ Esaki ta enserá siña hende kumpli ku tur loke Kristu, Kabes di e kongregashon, ta manda nan hasi durante e tempu di fin. (Mateo 24:14; 28:19, 20, NW; Revelashon 12:17) E trabou di prediká i di siña a produsí “un multitut grandi” di kompañeronan leal di e restu ungí. Indudablemente, mester konta tal “rikesa di tur nashon” den e “propiedatnan” presioso di Kristu ku e esklabo fiel ta manehá.—Revelashon 7:9; Hageo 2:7.

Un Kuerpo Gobernante Ku Ta Representá e Esklabo

10. Ki kuerpo enkargá ku tumamentu di desishon a eksistí den e promé siglo, i ki efekto esaki tabatin riba e kongregashonnan?

¹⁰ Opviamente, pa motibu di e responsabilidatnan di peso ku e esklabo fiel tin, e tin ku tuma hopi desishon. Den e kongregashon kristian di promé siglo, e apòstel- i ansianonan na Yerusalèm a representá e esklabo, i nan a tuma desishon pa henter e kongregashon kristian. (Echonan 15:1, 2) E desishonnan di e kuerpo gobernante aki di promé siglo a ser mandá na e kongregashonnan pa medio di karta i representantenan biahero. E promé kristiannan tabata masha kontentu di por a risibí e instrukshonnan kla aki, i nan koperashon di buena gana ku e kuerpo gobernante a fomentá pas i union.—Echonan 15:22-31; 16:4, 5; Filipensenan 2:2.

11. Ken Kristu ta usando awe pa dirigí su kongregashon, i kon nos mester mira e grupo di kristian ungí aki?

 ¹¹ Meskos ku na kuminsamentu di e era kristian, un grupo chikitu di superintendente ungí ku spiritu ta forma e Kuerpo Gobernante di Kristu su siguidónan riba tera awe. Pa medio di su “man drechi” di poder den akshon, Kristu, komo Kabes di e kongregashon, ta dirigí e hòmbernan fiel aki segun ku nan ta supervisá e obra di Reino. (Revelashon 1:16, 20) Albert Schroeder, kende pa hopi aña tabata miembro di e Kuerpo Gobernante i ku resientemente a terminá su bida riba tera, a skirbi den su historia di bida: “E Kuerpo Gobernante ta reuní tur djarason; nan ta kuminsá e reunion ku orashon i ta pidi e guia di Yehova su spiritu. E rumannan aki ta hasi un berdadero esfuerso pa hasi sigur ku tur asuntu ku nan atendé i tur desishon ku nan tuma ta na armonia ku Beibel, e Palabra di Dios.” * Nos por tin konfiansa den e fiel kristiannan ungí ei. Spesialmente relashoná ku nan, nos mester hasi kaso di e òrdu di apòstel Pablo: “Sea obediente na esnan ku ta hiba delantera den boso i sea sumiso, pasobra nan ta vigilá riba boso alma.”—Hebreonan 13:17, NW.

Mustra Debido Rèspèt pa e Esklabo Fiel

12, 13. Ki motibu bíbliko tin pa mustra rèspèt pa e klase di esklabo?

¹² Un motibu fundamental pakiko nos mester mustra debido rèspèt pa e klase di esklabo fiel ta pasobra ora nos hasi esei, en realidat nos ta mustrando rèspèt pa e Shon, Hesukristu. Pablo a skirbi di e ungínan: “Esun ku a wòrdu yamá siendo liber, ta esklabo di Kristu. Boso a wòrdu kumprá pa un preis.” (1 Korintionan 7:22, 23; Efesionan 6:6) P’esei, ora nos someté nos lealmente na e guia di e esklabo fiel i su Kuerpo Gobernante, nos ta sometiendo nos na Kristu, e Shon di e esklabo. Ora nos mustra debido rèspèt pa e instrumento ku Kristu ta usando pa manehá su propiedatnan riba tera, nos ta rekonosé públikamente ku “Hesukristu ta Señor, pa e gloria di Dios [e] Tata.”—Filipensenan 2:11.

¹³ Un otro motibu bíbliko pakiko nos mester mustra rèspèt pa e esklabo fiel ta pasobra Beibel ta deskribí kristiannan ungí komo un “tèmpel” ku Yehova ta habitá “den spiritu.” Komo tal, nan ta “santu.” (1 Korintionan 3:16, 17; Efesionan 2:19-22) Ta na e grupo aki, deskribí komo un tèmpel santu, Hesus a enkargá su propiedatnan riba tera. Esei ta nifiká ku tin sierto derecho i responsabilidat den e kongregashon kristian ku ta e esklabo kolektivo aki so tin. P’e motibu aki, tur miembro di e kongregashon ta komprondé ku nan tin un deber sagrado di sigui i apoyá e guia ku ta bini di e esklabo fiel i su Kuerpo Gobernante. Sí, pa e “otro karnénan” ta un berdadero onor di por yuda e klase di esklabo kuida e interesnan di e Shon.—Juan 10:16.

Apoyá Nan Lealmente

14. Segun e profesia di Isaias, kon e otro karnénan ta kana tras di e klase di esklabo ungí i sirbi komo ‘trahadó sin pago’?

¹⁴ Profeta Isaias a papia di e manera humilde ku e otro karnénan lo someté nan na e miembronan ungí di Israel spiritual, bisando: “Esaki ta loke Yehova a bisa: ‘E trahadónan sin pago di Egipto i e komersiantenan di Etiopia i e sabeonan, hòmbernan di estatura haltu, nan mes lo bini na bo, i di bo nan lo bira. Bo tras nan lo kana; di bui nan lo bini, i na bo nan lo bùig. Na bo nan lo hasi orashon i bisa: “Realmente Dios ta den union ku bo, i no tin ningun otro; no tin ningun otro Dios.”’” (Isaias 45:14, NW) Awe, na un manera simbóliko, e otro karnénan ta kana tras di e klase di esklabo ungí i su Kuerpo Gobernante, siguiendo nan guia. Komo “trahadónan sin pago,” di buena gana e otro karnénan ta ofresé nan vigor i nan rekursonan pa  apoyá e obra mundial di predikashon ku Kristu a enkargá su siguidónan ungí riba tera kuné.—Echonan 1:8; Revelashon 12:17.

15. Kon e profesia di Isaias 61:5 i 6 ta deskribí e relashon ku ta eksistí entre e otro karnénan i Israel spiritual?

¹⁵ E otro karnénan ta kontentu i gradisidu di por sirbi Yehova bou di supervishon di e klase di esklabo i su Kuerpo Gobernante. Nan ta rekonosé e ungínan komo miembro di “e Israel di Dios.” (Galationan 6:16) Komo hende ku na moda di papia ta ‘deskonosí’ i ‘stranhero,’ den asosiashon ku Israel spiritual, nan ta sirbi gososamente komo ‘kunukero’ i ‘kuidadó di kunuku di wendrùif’ bou di direkshon di e ungínan, e ‘saserdotenan di Yehova’ i ‘sirbidónan di Dios.’ (Isaias 61:5, 6) Nan ta partisipá selosamente den e trabou di prediká e bon nobo di Reino i hasi hende di tur nashon disipel. Di kurason nan ta yuda e klase di esklabo pastoriá i kuida e hendenan nobo semehante na karné.

16. Kiko ta motivá e otro karnénan pa apoyá e esklabo fiel i prudente lealmente?

¹⁶ E otro karnénan ta rekonosé ku nan a benefisiá masha hopi di e esfuersonan diligente ku e esklabo fiel ta hasi pa duna nan kuminda spiritual oportuno. Nan ta rekonosé humildemente ku si no tabata pa e esklabo fiel i prudente, nan lo no tabata sa kasi nada òf nada mes di e bèrdatnan presioso di Beibel, manera e soberania di Yehova, e santifikashon di su nòmber, e Reino, e shelu nobo i tera nobo, e alma, e kondishon di e mortonan i e berdadero identidat di Yehova, di su Yu i di spiritu santu. Motivá pa nan profundo gratitut i lealtat, e otro karnénan ta apoyá amorosamente e “rumannan” ungí di Kristu riba tera durante e tempu di fin aki.—Mateo 25:40.

17. Kiko e Kuerpo Gobernante a haña ku ta nesesario pa hasi, i kiko nos lo konsiderá den e siguiente artíkulo?

¹⁷ En bista ku e kantidat di ungínan riba tera ta menguando, nan no por ta presente den tur kongregashon pa manehá e propiedatnan di Kristu. P’esei mes e Kuerpo Gobernante ta nombra hòmber for di entre e otro karnénan komo superintendente pa supervisá sukursal-, distrito-, sirkuito- i kongregashonnan di Testigu di Yehova. Bo aktitut pa ku e supwardadónan aki tin efekto riba bo lealtat na Kristu i su esklabo fiel? Nos lo konsiderá esaki den e siguiente artíkulo.

[Nota]

Komo Repaso

• Ken ta nos Lider, i kiko ta mustra ku e ta na haltura di e kondishon di e kongregashonnan?

• Ora Yehova i Kristu Hesus a bini pa inspekshoná e “tèmpel,” ken nan a haña ta sirbi komo un esklabo fiel, i ki propiedat a ser enkargá na dje?

• Ki motibunan bíbliko tin pa apoyá e esklabo fiel lealmente?

[Preguntanan di Estudio]

[Plachinan na página 23]

E “propiedatnan” ku e “mayordomo” ta supervisá ta inkluí fasilidatnan físiko, programanan spiritual i e aktividat di prediká

[Plachi na página 25]

Miembronan di e otro karnénan ta apoyá e klase di esklabo fiel ku nan predikashon seloso