En Buska di Kontesta Korekto

Kon mi por protehá mi salú?

Kiko mi por hasi pa mi bida di famia ta mas felis?

Kiko por yuda mi keda ku mi trabou?

BO A yega di puntra bo mes un di e preguntanan ei? Bo a haña kontesta ku ta realmente práktiko? Tur aña, ta sali alrededor di 2.000 buki nobo ku ta ofresé konseho riba e tópikonan aki i otro tópikonan importante. Na Gran Bretaña so, lektornan ta gasta 80 mion libra esterlina (mas o ménos 150 mion dòler merikano) pa aña na buki ku ta ofresé konseho tokante kon pa trata ku e problemanan di bida. Na Merka, benta di bukinan pa yuda bo mes ta produsí alrededor di 600 mion dòler pa aña. Pues definitivamente bo no ta e úniko persona ku ta en buska di bon konseho pa trata ku bida di tur dia.

Un outor a bisa tokante konseho ku bo ta haña den e avalancha di publikashon aki: “Hopi buki nobo simplemente ta ripití loke a yega di ser skirbí kaba.” Esaki ta bèrdat, gran parti di e konseho ku nos ta haña den e bukinan aki simplemente ta un ripitishon di e sabiduria ku tin pará skirbí den un di e bukinan di mas bieu na mundu. E buki aki sin duda ta e publikashon mas ampliamente distribuí na mundu. El a ser tradusí kompletu òf en parte na alrededor di 2.400 idioma i en total a imprimí mas ku 4,6 mil mion ehemplar di dje. Esaki no ta ningun otro buki sino Beibel.

Beibel ta deklará bon kla: “Tur Skritura ta inspirá pa Dios i ta útil pa siñansa, pa reprendementu, pa korekshon, pa eduká den hustisia.” (2 Timoteo 3:16) Ta bèrdat ku Beibel no a ser skirbí komo un manual pa yuda bo mes. Su propósito prinsipal ta pa revelá kiko ta e boluntat di Dios pa humanidat. Pero asina mes, Beibel ta kontené hopi informashon ku ta mustra kon pa trata ku e problemanan ku nos tur ta konfrontá, i e ta primintí ku esnan ku sigui su guia lo siña saka benefisio. (Isaias 48:17, 18) Ora hende apliká su konseho práktiko, semper e ta resultá efektivo, sin importá un persona su antesedente étniko, su kultura òf edukashon. Pakiko no konsiderá e siguiente artíkulo i disidí pa bo mes si loke Beibel ta bisa di tópikonan manera salú, famia i empleo ta práktiko?