E Mundu Kruel Djawe

MARÍA tabatin 64 aña i tabata biba su so. Nan a hañ’é morto den su kas. Deskonosínan a batié i strangul’é ku un pida waya.

Un multitut violento i rabiá a bati tres polis, akusando nan di a sekuestrá dos menor di edat. E multitut a basha gasolin riba dos di e polisnan, pega nan na kandela i a kima nan mata. E di tres polis a logra skapa.

Un yamada telefóniko anónimo a hiba na un deskubrimentu spantoso. Outoridatnan a haña restunan mortal di kuater hòmber ku tabata di fakansi na e lugá ei, derá den un hardin. Nan kara tabata tapá i nan mannan mará. Outopsia a revelá ku a dera nan bibu.

E atrosidatnan aki no ta esenanan for di pelíkulanan di horor violento i kruel. E informenan aki tur ta susesonan real ku no muchu tempu pasá tabata titular di notisia den un pais latinoamerikano. Sin embargo, e pais ei no ta un eksepshon den e mundu djawe.

Aktonan kruel a bira kos di tur dia. Bombardeo, atake terorista, asesinato, atrako, tiramentu i violashon seksual ta forma apénas un frakshon di e aktonan di krueldat ei. Bes tras bes, medionan di komunikashon ta presentá reportahenan detayá di atrosidat, i hopi hende ya no ta keda di shòk mas ora nan mira òf tende di tal krueldat.

Podisé bo ta puntra bo mes: ‘Kiko ta pasando ku e mundu djawe? Akaso hende a pèrdè tur konsiderashon pa sintimentu di otro i no tin rèspèt pa bida mas?’ Dikon nos tin ku biba den un mundu asin’aki?

Awor tuma e kaso di Harry, un hòmber di 69 aña ku anteriormente tabatin kanser. Su kasá ta sufri di múltiple sklerósis, pero bisiña- i amigunan ta duna nan un man. Harry a bisa: “Mi no sa kiko nos lo a hasi sin tur e hendenan aki ku ta yuda nos.” Na Canada, kaminda Harry ta biba, un investigashon a revelá ku mas di 50 porshento di persona ku ta duna kuido na hende grandi, ta yudando un hende ku no ta nan famia. Sin duda bo tambe konosé hendenan komun i koriente ku dia aden dia afó ta mustra bondat i ta kla pa yuda nan próhimo. Sí, hende tin e potensial pa ser kompasivo i bondadoso en bes di kruel.

Pues dikon tin tantu atrosidat anto? Kiko ta hasi hende aktua na forma kruel? E personanan ku ta trata otro hende ku krueldat por kambia? Krueldat lo kaba un dia? Anto si ta asina, kon i ki dia?

[Rekonosementu pa Potrèt na página 3]

Trein: CORDON PRESS