Krueldat Lo Kaba un Dia?

HOPI hende lo bai di akuerdo mesora ku e kousa prinsipal di krueldat den e mundu djawe ta egoismo. Dékadanan pasá hende a kuminsá pone mas i mas énfasis riba un estilo di bida egoista, i esei awor a produsí un sosiedat den kua mayoria di hende ta preokupá prinsipalmente ku nan mes. Hopi hende lo hasi loke sea ta nesesario pa haña loke nan ke, i esei ta resultá hopi biaha den aktonan kruel. Ta asina no solamente den kaso di personanan individual sino tambe di nashonnan kompletu.

Aparentemente bida di otro hende no ta importante mas. Tin hende ku asta ta gusta hasi kos kruel. Nan ta dibertí nan mes ku esei, meskos ku e kriminalnan ku ta konfesá ku nan ta kousa daño na otro hende djis pa sinti un ‘kick.’ Anto kiko di e miónes di hendenan ku ta gusta pelíkula violento i kruel asina tantu te ku nan ta stimulá e industria di sine pa traha mas di e tipo di pelíkulanan ei pa saka ganashi for di nan? Hopi hende a bira sin heful debí ku konstantemente nan ta mira kosnan kruel den entretenimentu i medionan di notisia.

Hopi biaha krueldat ta kousa daño mental i emoshonal i ta pone ku e víktimanan ta inkliná na hasi ku otro hende meskos ku a hasi ku nan. Noemí Díaz Marroquín, kende ta duna lès na e Universidat Nashonal Outónomo di Mexico, a papia di e violensia ku krueldat ta fomentá. El a bisa: “Violensia ta un kos ku hende ta siña, e ta un kos di kultura . . . Nos ta siña aktua den maneranan violento ora nos ambiente ta permitié i ta stimul’é.” Pues, tin hopi chèns ku personanan ku tabata víktima di abusu ta bai abusá di otro hende, podisé asta na e mesun maneranan ku a abusá di nan.

Den otro kasonan, hende ku ta hasi mal uso di supstansianan manera droga òf alkohòl, ku tempu por bai komportá nan mes den un forma kruel. Ademas, mester menshoná tambe personanan ku ta mal kontentu ku nan gobièrnu pasobra e gobièrnu no ta satisfasé e nesesidatnan di e pueblo. Tin di e personanan ei, desididu pa laga hende sa nan punto di bista, ta rekurí na aktonan kruel i ta fomentá terorismo, hopi biaha a kosto di hende inosente.

Pero kisas bo ta puntra bo mes: ‘Ta di nan mes hende a siña aktua kruel? Kiko tin tras di e situashon aktual?’

Ken Realmente Ta Tras di Krueldat?

Beibel ta informá nos ku Satanas e Diabel ta ehersé un influensia grandi riba e mundu aki, i ta yam’é “e dios di e mundu aki.” (2 Korintionan 4:4) E ta e persona mas egoista i kruel den universo. Hesus aptamente a deskribié  komo “un matadó” i “e tata di mentira.”—Juan 8:44.

Humanidat ta bou di e influensia poderoso di Satanas desde ku Adam ku Eva a desobedesé Dios. (Génesis 3:1-7, 16-19) Un 15 siglo despues ku e promé pareha humano a bira lomba pa Yehova, angelnan rebelde a bisti kurpa humano, tene relashon ku hende muhé i a produsí un rasa bastá ku na e idioma original a ser yamá nèfilim. Ki karakterístika distintivo nan tabatin? Nan nòmber ta duna e kontesta. Nèfilim ta nifiká “tumbadónan,” esta, “esnan ku ta pone otronan kai.” Evidentemente, nan tabata personanan violento ku a kousa tal grado di krueldat i inmoralidat ku solamente un diluvio di orígen divino por a pone un fin na esei. (Génesis 6:4, 5, 17) E Diluvio a destruí e nèfilim, pero nan tatanan sí a bai bèk na e region di spiritu komo demoñonan invisibel.—1 Pedro 3:19, 20.

E karakter kruel di e angelnan rebelde tabata bisto den e kaso di e mucha poseí pa demoño den tempu di Hesus. E demoño kada bes tabata pone e mucha haña steipi, i tabata tir’é den kandela i den awa den un intento pa destruyé. (Marko 9:17-22) Pues, ta bisto ku e “forsanan spiritual di maldat” ei ta reflehá e personalidat sin miserikòrdia di nan komandante kruel, Satanas e Diabel.—Efesionan 6:12.

Awendia, e influensia di demoño ta sigui fomentá krueldat humano, manera Beibel a profetisá: “Den e último dianan tempunan trabahoso lo bin. Pasobra hende lo ta stimadó di nan mes, . . . gabadó, arogante, . . . ingrato, impio, sin amor, irekonsiliabel, ku mala lenga, sin dominio propio, grosero, odiadó di loke ta bon, traidó, imprudente, sobèrbè, mas bien stimadó di plaser ku stimadó di Dios; ku tin aparensia di ta religioso bèrdè, ma ku ta nenga su poder.”—2 Timoteo 3:1-5.

Profesianan bíbliko ta revelá ku foral nos tempu ta trabahoso pasobra despues ku e Reino di Dios den man di Kristu Hesus a keda establesí na aña 1914, Satanas i su ehérsito di demoño a ser saká for di shelu. Beibel ta deklará: “Ai di tera i laman, pasobra Diabel a baha bin serka boso ku gran furia, sabiendo ku ta ked’é solamente un poko tempu mas.”—Revelashon 12:5-9, 12.

Akaso esaki ta nifiká ku e situashon no por drecha? Díaz Marroquín, sitá anteriormente, a deklará ku “hende por siña pa stòp” ku komportashon indeseabel. Sin embargo, siendo ku e influensia di Satanas ta den tur skina di tera awe, ta improbabel ku un hende lo siña pa stòp ku violensia a ménos ku e permití un otro forsa, unu superior, influensiá su manera di pensa i di aktua. Kua forsa esei ta?

Kambio Ta Posibel—Kon?

Afortunadamente, e spiritu santu di Dios ta e forsa mas poderoso ku ta eksistí, i e por superá kualke influensia di demoño. E ta promové amor i e bienestar di hende. Pa ser yená ku e spiritu di Dios, tur hende ku ke agradá Yehova tin ku evitá komportashon ku ta asta parse kruel. Pa logra esaki nos mester transformá nos personalidat pa e ta konforme e boluntat divino. Anto kiko ta e boluntat ei? Imitá Dios su manera te kaminda nos por. Esaki ta enserá mira otro hende manera Dios ta mira nan.—Efesionan 5:1, 2; Kolosensenan 3:7-10.

Un análisis di e manera ku Dios ta atendé asuntunan lo konvensé bo ku Yehova nunka a mustra un falta di interes den otro hende. Nunka e no a trata ningun hende, i de echo ningun bestia, inhustamente. * (Deuteronomio 22:10; Salmo 36:7; Proverbionan 12:10) Yehova ta rechasá tur krueldat i ken ku ta praktik’é. (Proverbionan 3:31, 32) E personalidat nobo ku Yehova ke pa kristiannan kultivá ta yuda nan ku nan por konsiderá otro hende mas importante ku nan mes i respetá nan. (Filipensenan 2:2-4) E personalidat kristian nobo ei ta inkluí “un kurason di  kompashon, kariño, humildat, mansedumbre i pasenshi.” Anto no mester pasa por haltu di amor, pasobra e “ta e laso perfekto di unidat.” (Kolosensenan 3:12-14) Bo no ta di akuerdo ku mundu lo tabata un lugá hopi diferente si e kualidatnan ei tabata predominá?

Sin embargo, kisas bo ta puntra bo mes si di bèrdat hende por hasi kambionan duradero den nan personalidat. Wèl, konsiderá un ehèmpel di bida real. Martín * tabatin kustumber di grita su kasá dilanti di nan yunan i batié mal batí. Na un okashon, e situashon a bira asina peligroso ku e muchanan mester a kore bai buska yudansa serka bisiña. Despues di vários aña, e famia a kuminsá studia Beibel ku Testigunan di Yehova. Martín a siña ki klase di persona lo e mester ta i kon lo e mester trata otro hende. El a logra kambia? Su kasá a kontestá: “Ántes, mi esposo tabata bira un otro hende ora e rabia. Debí na esei nos bida tabata na wèrki pa hopi tempu. Mi no tin sufisiente palabra pa gradisí Yehova pa e echo ku el a yuda Martín kambia. Awor e ta un bon tata i un ekselente esposo.”

Esaki ta apénas ún kaso. Rònt mundu, miónes di hende ku a studia Beibel ku Testigunan di Yehova a stòp di ta kruel. Sí, kambio ta posibel.

Fin di Tur Krueldat Ta Serka

Den futuro serkano, e Reino di Dios lo ehersé pleno outoridat riba tera. E Reino ei ta un gobièrnu establesé awor den shelu ku un Gobernante kompasivo, Kristu Hesus. Ya kaba el a limpia den shelu i a saka Satanas, e fuente di tur krueldat, huntu ku su demoñonan. Pronto e Reino di Dios lo satisfasé e nesesidatnan di su súpditonan riba tera ku ta stima pas. (Salmo 37:10, 11; Isaias 11:2-5) Esei ta e úniko berdadero solushon pa e problemanan di mundu. Pero kiko si miéntras ku bo ta wardando riba e Reino aki, bo bira víktima di krueldat?

 Si nos paga krueldat bèk ku krueldat, esei no ta yuda. Lo e resultá den mas krueldat so. Beibel ta invitá nos pa konfia den Yehova, kende na su debido tempu lo “duna kada un segun su kondukta, segun e fruta di su echonan.” (Jeremias 17:10) (Wak e kuadro athunto, “Kon pa Reakshoná Riba Krueldat.”) Ta bèrdat ku lo bo por sufri si bo bira víktima di un krímen kruel. (Eklesiastés 9:11, NW) Sin embargo, Dios por eliminá e resultadonan di kualke krueldat, asta morto. Segun su promesa, e hendenan den su memoria ku a pèrdè nan bida debí na aktonan kruel lo bolbe na bida.—Juan 5:28, 29.

Ounke e posibilidat di bira víktima di krueldat ta eksistí te ainda, nos por haña konsuelo si nos tin un relashon íntimo ku Dios i fe firme den su promesanan. Konsiderá e kaso di Sara, kende sin yudansa di un kasá a lanta dos yu hòmber i a sòru pa nan haña un bon edukashon. Den su behes, su yunan a bandon’é, i no a dun’é ningun sosten material ni atenshon médiko. Sin embargo Sara, kende awor ta un kristian, a bisa: “Ounke mi no por yuda ku mi ta sinti mi tristu, Yehova no a bandoná mi. Mi ta sinti su sosten mediante mi rumannan spiritual, kendenan semper ta kuida mi. Mi ta kere firmemente ku pronto lo e solushoná no solamente mi problemanan sino tambe problema di tur hende ku ta konfia den su poder i ku ta hasi loke e ta manda.”

Ken ta e rumannan spiritual aki ku Sara a referí na dje? Nan ta su kompañeronan kristian, ku ta Testigu di Yehova. Nan ta forma un hermandat mundial di hende kompasivo ku ta konvensí ku pronto krueldat lo kaba. (1 Pedro 2:17) Ni Satanas e Diabel, kende ta esun prinsipalmente responsabel pa krueldat, ni ningun hende ku ta aktua meskos kuné lo keda. E “era di krueldat” aki, manera un eskritor a yam’é, lo ta un kos di pasado. Pakiko no siña tokante e speransa aki dor di tuma kontakto ku un Testigu di Yehova?

[Nota]

[Kuadro na página 6]

Kon pa Reakshoná Riba Krueldat

E Palabra di Dios ta ofresé konseho práktiko tokante kon pa trata ku krueldat. Pensa riba kon bo por apliká e siguiente palabranan di sabiduria:

“No bisa: ‘Lo mi paga maldat bèk’; spera riba SEÑOR i e lo salba bo.”—Proverbionan 20:22.

“Si bo mira ku nan ta oprimí esun di poko rekurso i ku violensia nan ta kita huisio i hustisia . . . , no keda straño p’e asuntu, pasobra un ku ta mas haltu ku esun haltu ta vigilando.”—Eklesiastés 5:8, NW.

“Felis ta esnan di genio suave, ya ku nan lo heredá e tera.”—Mateo 5:5, NW.

“Tur loke boso kier pa hende hasi pa boso, hasi meskos pa nan.”—Mateo 7:12.

“Nunka paga malu ku malu na ningun hende. Respetá loke ta korekto den bista di tur hende. Si ta posibel, asina leu ku ta dependé di boso, sea na pas ku tur hende. Nunka no venga boso mes, stimánan, ma laga lugá pa e furia di Dios, pasobra ta pará skirbí: ‘Ta di mi vengansa ta, ami lo paga bèk,’ Señor ta bisa.”—Romanonan 12:17-19.

“Kristu tambe a sufri pa boso, lagando un ehèmpel pa boso, pa boso sigui den su pasonan . . . ora ku el a wòrdu zundrá, e no a zundra bèk; ora ku el a sufri, e no a menasá, ma a konfia su mes na esun ku ta husga ku hustisia.”—1 Pedro 2:21-23.

[Plachinan na página 7]

Yehova a siña hopi hende pa stòp di ta kruel