Laga e Kongregashon Alabá Yehova

“Lo mi proklamá bo nòmber na mi rumannan, meimei di e kongregashon lo mi kanta bo alabansa.”—HEBREONAN 2:12.

1, 2. Pakiko e kongregashon ta asina benefisioso, i kiko ta su funshon prinsipal?

TUR tempu hende a haña kompañerismo i siguridat den e sírkulo di famia. Sin embargo, Beibel ta identifiká un otro sírkulo den kua masha hopi hende rònt mundu awe ta disfrutando di un kompañerismo i siguridat eksepshonal. Ta trata aki di e kongregashon kristian. Sea bo ta parti di un famia uní den kua e miembronan ta apoyá otro òf nò, bo por i mester apresiá loke Dios a perkurá mediante e areglo di kongregashon. Naturalmente, si bo ta asosiá kaba ku un kongregashon di Testigunan di Yehova, probablemente bo tambe por papia di e kompañerismo kaluroso ku bo ta disfrutá di dje einan i e sentido di siguridat ku bo tin.

² E kongregashon no ta djis un grupo sosial. E no ta un klup òf un asosiashon den komunidat kaminda hende ku tin e mesun antesedente òf e mesun interesnan den sierto deporte òf hòbi ta bini huntu. Mas bien, e kongregashon ta sirbi prinsipalmente pa alabá Yehova Dios. Manera e buki di Salmo ta enfatisá, pa hopi tempu kaba esei tabata asina. Na Salmo 35:18, nos ta lesa: “Lo mi duna bo gradisimentu den e kongregashon grandi; lo mi alabá bo meimei di un multitut enorme.” Meskos tambe, Salmo 107:31 i 32 ta animá nos: “Laga nan duna gradisimentu na SEÑOR pa su miserikòrdia, i pa su maravianan na e yunan di hende! Laga nan hals’é tambe den e kongregashon di e pueblo.”

3. Segun Pablo, kiko e kongregashon ta?

³ Apòstel Pablo a resaltá un otro funshon esensial di e kongregashon ora el a referí na “e kas di Dios, ku ta e iglesia [“kongregashon,” NW] di e Dios bibu, e pilá i sosten di e bèrdat.” (1 Timoteo 3:15) Ta di kua kongregashon Pablo tabata papia? Den ki sentido Beibel ta usa e palabra “kongregashon”? I ki efekto esaki mester tin riba nos bida i nos speransa pa futuro? Pa haña sa esaki, laga nos analisá promé kon e Palabra di Dios ta usa e ekspreshon “kongregashon.”

4. Den e Skritura Hebreo, na kiko e palabra hebreo pa “kongregashon” ta referí generalmente?

⁴ E palabra hebreo hopi biaha tradusí komo “kongregashon” ta bini di un verbo ku ta nifiká “reuní” òf “konvoká un asamblea.” * (Deuteronomio 4:10; 9:10) E salmista a usa e mesun palabra hebreo aki relashoná ku e angelnan den shelu, i por us’é tambe pa deskribí un grupo di hende malbado. (Salmo 26:5; 89:5-7) Sin embargo, e Skritura Hebreo ta aplik’é mas tantu biaha na e israelitanan. Dios a indiká ku Jakòb lo a “bira un multitut di pueblonan,” i esei ta loke a sosodé. (Génesis 28:3; 35:11; 48:4) E israelitanan a ser yamá, òf skohí, pa ta “e asamblea di SEÑOR,” “e asamblea di Dios.”—Numbernan 20:4; Nehemias 13:1; Josué 8:35; 1 Samuel 17:47; Mikeas 2:5.

5. Ki palabra griego ta ser tradusí generalmente komo “kongregashon,” i kon por apliká e palabra aki?

⁵ E palabra korespondiente na griego ta ek·kle·sí·a; e ta bini di dos palabra griego ku ta nifiká  “afó” i “yama.” Por aplik’é na un grupo ku ta reuní pa un propósito no-religioso, manera “e reunion” ku Demetrio a lanta kontra Pablo na Efesio. (Echonan 19:32, 39, 41) Pero por lo general Beibel ta us’é pa e kongregashon kristian. Algun vershon, manera Beibel Santu, ta tradusí e palabra aki komo “iglesia,” pero The Imperial Bible-Dictionary ta bisa ku “nunka . . . e ta referí na e edifisio mes den kua kristiannan tabata bini huntu pa rindi adorashon públiko.” Pero ta interesante pa nota ku den e Skritura Griego Kristian e palabra pa “kongregashon” tin por lo ménos kuater diferente aplikashon.

E Kongregashon Ungí di Dios

6. Kiko David i Hesus a hasi den e kongregashon?

⁶ Apòstel Pablo a apliká David su palabranan na Salmo 22:22 na Hesus. El a skirbi: “‘Lo mi proklamá bo nòmber na mi rumannan, meimei di e kongregashon lo mi kanta bo alabansa.’ P’esei [Hesus] mester a wòrdu hasí igual ku su rumannan den tur kos, pa e por a bira un sumo saserdote miserikòrdioso i fiel den kosnan ku tin di hasi ku Dios.” (Hebreonan 2:12, 17) David a alabá Dios meimei di e kongregashon di Israel di antigwedat. (Salmo 40:9) Sin embargo, na kiko Pablo tabata referí ora el a bisa ku Hesus a alabá Dios “meimei di e kongregashon”? Kua kongregashon?

7. Den e Skritura Griego Kristian, kiko ta e sentido prinsipal di e palabra “kongregashon”?

⁷ Loke nos ta lesa na Hebreonan 2:12 i 17 ta hopi signifikante. E ta mustra ku Kristu mes tabata miembro di un kongregashon kaminda el a deklará e nòmber di Dios na su rumannan. Ken e rumannan ei tabata? Ta esnan ku ta forma parti di e simia òf “desendientenan di Abraham,” e rumannan di Kristu ungí ku spiritu, “partisipantenan den un yamada selestial.” (Hebreonan 2:16–3:1; Mateo 25:40) Sí, den e Skritura Griego Kristian e sentido prinsipal di e palabra “iglesia” òf kongregashon ta e totalidat di siguidónan di Kristu ungí ku spiritu. E 144.000 ungínan aki ta forma e “iglesia [“kongregashon,” NW] di e primogénitonan, kendenan ta inskribí den shelu.”—Hebreonan 12:23.

8. Kon Hesus a indiká di antemano ku lo a bai forma e kongregashon kristian?

⁸ Hesus a indiká ku lo a bai forma e “kongregashon” kristian aki. Mas o ménos un aña promé ku su morto, el a bisa un apòstel: “Abo ta Pedro, i riba e baranka aki lo mi edifiká mi kongregashon, i e portanan di Hades lo no domin’é.” (Mateo 16:18, NW) Tantu Pedro komo Pablo a komprondé korektamente ku ta Hesus mes tabata e baranka profetisá. Pedro a skirbi ku esnan ku ta ser edifiká komo “piedra bibu” di un kas spiritual riba e baranka, esta Kristu, tabata “un pueblo pekuliar [pa] proklamá e alabansanan” di Esun ku a yama nan.—1 Pedro 2:4-9; Salmo 118:22; Isaias 8:14; 1 Korintionan 10:1-4.

9. Na ki tempu e kongregashon di Dios a kuminsá forma?

⁹ Na ki tempu e “pueblo pekuliar” aki, es desir, e pueblo pa un poseshon spesial, a kuminsá forma pa bira e kongregashon kristian? Esei tabata na Pentekòste di aña 33 di nos era ora Dios a drama spiritu santu riba e disipelnan ku a reuní na Yerusalèm. Mas lat riba e dia ei, Pedro a duna un diskurso impreshonante na  un grupo di hudiu i prosélito. E morto di Hesus a konmové hopi di nan te den fondo di nan kurason; nan a repentí i a batisá. E relato históriko ta mustra ku tres mil persona a hasi esei, i asina nan a bira parti di Dios su kongregashon nobo ku a sigui krese. (Echonan 2:1-4, 14, 37-47) El a krese pasobra mas i mas hudiu i prosélito a aseptá e echo ku Israel komo nashon no tabata e kongregashon di Dios mas. Mas bien, kristiannan ungí ku a forma e “Israel [spiritual] di Dios” a bira e berdadero kongregashon di Dios.—Galationan 6:16; Echonan 20:28.

10. Ki relashon Hesus tin ku e kongregashon di Dios?

¹⁰ Hopi bes Beibel ta hasi un distinshon entre Hesus i e ungínan, manera den e frase “tokante di Kristu i e iglesia.” Hesus ta Kabes di e kongregashon aki di kristiannan ungí ku spiritu. Pablo a skirbi ku Dios “a duna [Hesus] komo kabes riba tur kos na e iglesia, kua ta su kurpa.” (Efesionan 1:22, 23; 5:23, 32; Kolosensenan 1:18, 24) Awe, ta solamente un restu chikitu di e miembronan ungí di e kongregashon aki tin riba tera. Pero nos por ta sigur ku nan Kabes, Hesukristu, ta stima nan. Efesionan 5:25 ta deskribí kiko e ta sinti pa nan: “Kristu tambe a stima e iglesia i a entregá su mes p’e.” E ta stima nan pasobra ku entusiasmo nan ta ofresé Dios “un sakrifisio di alabansa, esta, e fruta di lepnan ku ta hasi deklarashon públiko di su nòmber,” meskos ku Hesus a hasi tempu e tabata riba tera.—Hebreonan 13:15, NW.

“Kongregashon” den Vários Otro Sentido

11. Den ki di dos sentido e Skritura Griego Kristian ta usa “kongregashon”?

¹¹ Tin biaha Beibel ta usa e palabra “kongregashon” den un sentido mas limitá, sin aplik’é na henter e grupo di 144.000 ungí ku ta forma “e kongregashon di Dios.” Por ehèmpel, Pablo a skirbi un grupo di kristian: “Evitá di bira kousa di tropieso tantu pa hudiu komo pa griego i p’e kongregashon di Dios.” (1 Korintionan 10:32, NW) Opviamente, si un kristian den Korinto di antigwedat a hasi algu malu, esei lo por a pone algun hende trompeká. Pero esei lo por a pone delaster un griego, hudiu òf kristian ungí for di e tempu ei te awe trompeká? Klaru ku nò. Ta parse anto ku “e kongregashon di Dios” den e versíkulo aki ta apliká na kristiannan ku ta na bida na un sierto tempu. Meskos tambe, ora nos bisa ku Dios ta guia, sostené òf bendishoná e kongregashon, esei ta referí na tur kristian ku na e momento ei ta na bida, sin importá na unda nan ta riba e planeta aki. Òf ora nos ta papia di e pas i felisidat ku ta reina den e kongregashon di Dios awe, esei ta referí na henter e hermandat kristian.

12. Den ki di tres sentido Beibel ta usa e palabra “kongregashon”?

¹² Un di tres sentido den kua Beibel ta usa e palabra “kongregashon” ta apliká na tur kristian den un sierto área geográfiko. Por ehèmpel, nos ta lesa: “E iglesia den henter Hudea i Galilea i Samaria tabatin pas.” (Echonan 9:31) Tabatin mas ku un grupo di kristian den e área ekstenso ei, pero Beibel ta referí na tur e gruponan na Hudea, Galilea i Samaria komo “e kongregashon.” En bista di e kantidat di kristian ku a batisá na Pentekòste di aña 33 i djis despues di esei, por tabatin asta mas ku un grupo ku tabata reuní regularmente den e área di Yerusalèm. (Echonan 2:41, 46, 47; 4:4; 6:1, 7) Herodes Agripa I a goberná Hudea te na su morto na aña 44, i nos por komprondé for di 1 Tesalonisensenan 2:14 ku por lo ménos pa aña 50 tabatin un kantidat di kongregashon na Hudea. Pues, ora nos lesa ku Herodes ‘a maltratá algun hende di iglesia,’ esaki por ta referí na mas ku un grupo so ku tabata reuní na Yerusalèm.—Echonan 12:1.

13. Den ki di kuater sentido, i mas komun, Beibel ta usa e palabra “kongregashon”?

¹³ Un di kuater sentido, un uso mas limitá ainda i mas komun di e palabra “kongregashon,” ta referí na e kristiannan ku ta forma un solo kongregashon lokal, manera den un kas. Pablo a menshoná “e iglesianan di Galasia.” Tabatin mas ku un kongregashon lokal den e  provinsia romano grandi ei. Dos biaha Pablo a usa e palabra plural “iglesianan” relashoná ku Galasia, lokual lo a inkluí esnan na Antiokia, Derbe, Listra i Ikonio. Den e kongregashonnan lokal aki tabata nombra ansianonan òf superintendentenan kualifiká. (1 Korintionan 16:1; Galationan 1:2; Echonan 14:19-23) Segun e Skritura, nan tur tabata “iglesianan di Dios.”—1 Korintionan 11:16; 2 Tesalonisensenan 1:4.

14. Kiko nos por komprondé for di e manera ku un par di teksto ta usa e palabra “kongregashon”?

¹⁴ Den algun kaso, e gruponan di kristian ku a reuní lo mester tabata chikitu i lo por a pas den un kas privá. Pero tòg a apliká e palabra “kongregashon” na algun di e gruponan ei. Esnan ku nos sa di dje tabata e kongregashonnan na kas di Akila i Prisila, Ninfas, i Filemon. (Romanonan 16:3-5; Kolosensenan 4:15; Filemon 2) Esaki mester ta un fuente di estímulo pa e kongregashonnan lokal djawe ku ta hopi chikitu i ku kisas asta ta reuniendo regularmente den kasnan privá. Yehova a rekonosé e kongregashonnan chikitu ei den promé siglo, i siguramente e ta rekonosé nan awe tambe, bendishonando nan mediante su spiritu.

Kongregashonnan Ta Alabá Yehova

15. Kon spiritu santu a obra riba algun kristian ungí i kon esei a manifestá su mes den algun kongregashon di promé siglo?

¹⁵ Nos a tuma nota ku Salmo 22:22 a kumpli ora Hesus a alabá Dios meimei di e kongregashon. (Hebreonan 2:12) Su siguidónan fiel mester a hasi meskos. Den promé siglo ora kristiannan berdadero a ser ungí ku spiritu santu pa bira yu di Dios i pues ruman di Kristu, spiritu santu a kuminsá obra riba algun di nan na un manera adishonal i spesial. Nan a risibí donnan milagroso di spiritu. E donnan ei a manifestá nan mes entre otro den forma di abla spesial di sabiduria òf konosementu, poder pa kura òf pa profetisá, òf asta e kapasidat pa papia den lenganan deskonosí pa nan.—1 Korintionan 12:4-11.

16. Kiko tabata un di e metanan dje donnan milagroso di spiritu?

¹⁶ Enkuanto papiamentu den lenga, Pablo a bisa: “Lo mi kanta alabansa ku e don di e spiritu, pero lo mi kanta alabansa tambe ku mi mente.” (1 Korintionan 14:15, NW) El a realisá ku tabata importante pa otronan komprondé su palabranan pa nan por a risibí instrukshon. Pablo su meta tabata pa alabá Yehova  den e kongregashon. El a urgi otro kristiannan ku tabatin don di spiritu: “Trata di abundá den esakinan pa edifikashon di e iglesia,” refiriendo anto na e kongregashon lokal kaminda nan a manifestá e don. (1 Korintionan 14:4, 5, 12, 23) Ta bon kla anto ku Pablo tabata interesá den e kongregashonnan lokal, sabiendo ku den kada un di nan, kristiannan lo a haña oportunidat pa alabá Dios.

17. Pa loke ta e kongregashonnan lokal awe, kiko nos por ta sigur di dje?

¹⁷ Yehova ta sigui usa i sostené su kongregashon. E ta bendishonando e grupo di kristian ungí riba tera awe i nos por mira esei na e abundansia di alimento spiritual ku e pueblo di Dios ta risibí. (Lukas 12:42) E ta bendishonando e hermandat mundial den su totalidat. I e ta bendishonando e kongregashonnan lokal, kaminda nos ta alabá nos Kreadó pa medio di nos akshonnan i komentarionan spiritualmente edifikante. Ei nos ta risibí instrukshon i entrenamentu pa asina nos por alabá Dios na otro okashonnan, ora nos no ta na nos kongregashon lokal.

18, 19. Kiko kristiannan deboto den kualke kongregashon lokal kier hasi?

¹⁸ Kòrda ku apòstel Pablo a urgi e kristiannan den e kongregashon lokal na Filipos, Masedonia: “Esaki ta mi orashon, ku boso [por ta] yená ku e fruta di hustisia ku ta bin dor di Hesukristu, pa e gloria i alabansa di Dios.” Esei lo a nifiká entre otro ku nan mester a papia ku otro hende—hende pafó di e kongregashon kristian—tokante nan fe den Hesus i nan speransa maravioso. (Filipensenan 1:9-11; 3:8-11) Na armonia ku esei, Pablo a urgi otro kristiannan: “Mediante [Hesus], laga nos semper ofresé na Dios un sakrifisio di alabansa, esta, e fruta di lepnan ku ta hasi deklarashon públiko di su nòmber.”—Hebreonan 13:15, NW.

¹⁹ Abo tin deleite den alabá Dios “meimei di e kongregashon,” manera Hesus a hasi, i den usa bo lepnan pa alabá Yehova dilanti di esnan ku ainda tin ku konos’é i alab’é? (Hebreonan 2:12; Romanonan 15:9-11) Te na sierto grado nos kontesta personal ta dependé di kiko nos ta pensa di e funshon di nos kongregashon lokal den e propósito di Dios. Den e siguiente artíkulo, nos lo analisá kon Yehova ta dirigí i usa nos kongregashon lokal i ki papel e kongregashon mester hunga den nos bida awe.

[Nota]

Bo Ta Kòrda?

• Kon “e kongregashon di Dios,” ku ta konsistí di kristiannan ungí, a ser formá?

• Den ki tres sentido adishonal Beibel ta usa e palabra “kongregashon”?

• Relashoná ku e kongregashon, kiko David, Hesus i e kristiannan di promé siglo kier a hasi, i ki efekto esaki mester tin riba nos?

[Preguntanan di Estudio]

[Plachi na página 21]

Hesus tabata e fundeshi di kua kongregashon?

[Plachi na página 23]

Gruponan lokal di kristian a reuní komo ‘kongregashonnan di Dios’

[Plachi na página 24]

Meskos ku e kristiannan na Benin, nos por alabá Yehova den kongregashon