Ora Ekspektativanan No Kristalisá

DESILUSION por desaroyá den kualke matrimonio, asta si durante enamorashon a parse ku un pareha tabata pas bon ku otro. Pero kon dos hende ku aparentemente tabata bai asina bon ku otro promé ku nan kasa, por kambia i bira asina distinto despues?

Beibel ta bisa ku hende ku kasa lo tin “doló i tristesa.” (1 Korintionan 7:28, The New English Bible) Hopi bes un grado di e tribulashon ei ta debí na imperfekshon humano. (Romanonan 3:23) Ademas, por ta asina ku un òf ámbos partner no ta aplikando prinsipionan bíbliko. (Isaias 48:17, 18) Pero tin biaha tambe ta e hòmber òf e muhé ta drenta bida matrimonial ku ekspektativanan ku no ta realístiko. Ora ku ta asina, mal komprondementu por hiba na problemanan serio.

Ekspektativanan Ku No Ta Realístiko

Si bo ta kasá, probablemente bo a drenta bida matrimonial ku vários ekspektativa; mayoria di hende ta hasi esei. Tuma un momento pa reflekshoná riba e klase di bida ku bo a spera ku lo bo tabatin. Bo matrimonio no ta loke bo a imaginá? Si ta asina, no konkluí ku bo problemanan ta sin solushon. Si bo apliká prinsipionan bíbliko, esei por yuda bo korigí e situashon. * (2 Timoteo 3:16) Miéntras tantu, ta bon pa bo analisá algun di e ekspektativanan ku bo tabatin tokante matrimonio.

Por ehèmpel, tin hende a pensa ku den bida kasá semper lo a reina un ambiente romántiko, manera bo ta lesa den sprookje. Òf podisé bo a pensa ku abo ku bo kasá lo a pasa mayoria di boso tempu huntu òf ku boso dos lo a resolvé tur desakuerdo den un manera suave i madurá. Hopi hende a kere ku unabes nan ta kasá, nan lo no tabatin nodi ehersé dominio propio mas den asuntunan seksual. Komo ku tur e ekspektativanan komun aki no ta masha realístiko, nan sigur lo laga algun hende keda desepshoná.—Génesis 3:16.

Un otro ekspektativa ku no ta realístiko ta ku matrimonio riba su mes lo hasi un persona felis. Klaru ku ora bo tin un partner den bida, esei por ta un gran fuente di goso. (Proverbionan 18:22; 31:10; Eklesiastés 4:9) Pero akaso nos por spera ku matrimonio lo ta un kura milagroso pa tur desakuerdo? Pa hende ku ta pensa esei, un dia realidat lo por dal nan duru!

Ekspektativanan Ku No Ta Ser Ekspresá

No ta tur ekspektativa ta irealístiko. Al kontrario, algun di nan ta enserá deseonan ku ta na nan lugá. Pero problema por surgi debí na sierto ekspektativa. Un konsehero matrimonial a komentá lo siguiente: “Mi sa mira kon parehanan ta rabia ku otro pasobra un di  nan ta warda pa e otro kumpli ku un sierto deseo, miéntras ku e otro nunka tabata sa mes di e deseo ei.” Pa komprondé kon esaki por sosodé, laga nos konsiderá e siguiente senario.

Maria a kasa ku David, kende tabata biba sientos di kilometer leu for di Maria su stat natal. Promé ku e kasa, Maria a realisá ku lo no ta fásil ora ku e bai biba den un área nobo, foral komo ku di naturalesa e ta un persona tímido. Sin embargo, e tabatin sigur ku David lo a yud’é adaptá. Por ehèmpel, Maria a ferwagt ku David lo a keda huntu kuné i yud’é sera konosí ku David su amistatnan. Sin embargo, esaki no a sosodé. David tabata bai kòmbersá ku su tantísimo amigunan, i laga Maria ku a kaba di yega, su so. Maria ta sinti su mes neglishá, asta un poko bandoná. E ta puntra su mes: ‘Kon David por ta sin konsiderashon asina?’

E ekspektativa di Maria ta irealístiko? Bon mirá, nò. Simplemente e ke pa su kasá yud’é adaptá na e ambiente nobo. Maria ta tímido, i e no sa kon e tin ku hasi pa sera konosí ku tantu hende nobo asina. Pero echo ta ku Maria no a bisa David nunka kon e ta sinti. Pues, David no tin e mínimo idea di loke Maria ta pasando aden. Kiko lo pasa si e situashon sigui asina? Maria su renkor lo por sigui krese, anto despues di tempu, lo e por pensa ku su esposo no tin kunes ku su sintimentunan.

Podisé bo tambe a yega di sinti bo desepshoná i frustrá ora ku bo kasá aparentemente no ta reakshoná riba loke bo tin mester. Si esei ta e kaso, kiko bo por hasi?

Papia!

Ekspektativanan ku no kristalisá en bèrdat por kousa aflikshon. (Proverbionan 13:12)  Pero tin un kos ku bo por hasi tokante e situashon. Un proverbio bíbliko ta bisa: “Bo por konvensé otronan si bo ta sabí i ta papia rasonablemente.” (Proverbionan 16:23, Contemporary English Version) Pues, si bo ta sinti ku bo tin un ekspektativa rasonabel i bo kasá no ta kumpliendo kuné, papia tokante e asuntu ku bo kasá.

Purba skohe e momento korekto, e ambiente korekto i e palabranan korekto pa ekspresá bo preokupashonnan. (Proverbionan 25:11) Papia trankil i ku rèspèt. Kòrda ku bo meta no ta pa akusá bo kasá, sino pa inform’é di bo ekspektativanan i sintimentunan.—Proverbionan 15:1.

Pero pakiko lo bo tin ku hasi esaki mes? Un kasá komprensivo no mester por ripará ki nesesidatnan bo tin? Wèl, podisé bo kasá simplemente ta mira e asuntu for di un otro ángulo, pero gustosamente lo e tuma na kuenta bo nesesidatnan si bo splik’é nan. Si bo tin ku ekspresá loke bo ke òf tin mester, esei no ta nifiká ku bo tin un mal matrimonio òf ku bo kasá no tin konsiderashon.

Pues, no vasilá pa papia tokante asuntunan ku bo kasá. Por ehèmpel, den e situashon deskribí anteriormente, Maria lo por a bisa David: “Mi tin ku atmití ku ta un poko difísil pa mi pa sera konosí ku asina tantu hende nobo. Lo bo por yuda mi sera konosí ku tur hende te ora ku mi ta sinti mi un poko mas na kas?”

 “Lihé pa Tende”

Awor wak e asuntu for di un otro ángulo. Suponé ku bo kasá ta bin serka bo, i ta bisa bo ku e ta sintié afligí pasobra bo no ta kumpliendo ku un ekspektativa rasonabel ku e tin. Si esaki sosodé, skucha bo kasá! Purba di no bira defensivo. Mas bien, sea “lihé pa tende, no lihé pa papia i no lihé pa rabia.” (Santiago 1:19; Proverbionan 18:13) Apòstel Pablo a urgi kristiannan: “No laga ningun hende buska su mes interes, sino esun di su próhimo.”—1 Korintionan 10:24.

Bo por hasi esaki dor di pone bo mes den sapatu di bo kasá. Beibel ta deklará: “Boso, esposonan, biba ku boso esposanan ku komprenshon,” òf manera e tradukshon di J. B. Phillips ta bis’é, “boso, esposonan, purba di komprondé e esposa ku boso ta biba kuné.” (1 Pedro 3:7) Klaru ku ta bon pa esposanan tambe hasi e mesun esfuerso relashoná ku nan esposo.

Kòrda, maske kon bon abo ku bo kasá ta pas ku otro, boso no tin e mesun punto di bista riba tur asuntu. (Wak e kuadro “Mesun Paisahe, Diferente Bista.”) En realidat esaki ta un bendishon, pasobra ta bon pa konsiderá asuntunan for di e punto di bista di un otro hende. Abo ku bo kasá kada un a bin ku ekspektativanan úniko, basá riba kosnan manera antesedente di famia i kultura. Komo resultado, boso por ta profundamente enamorá di otro, pero tòg boso no tin e mesun ekspektativanan.

Por ehèmpel, parehanan kristian ta bon na haltura di e prinsipio bíbliko di hefatura. (Efesionan 5:22, 23) Pero kon, spesífikamente, hefatura lo ser ehersé den boso famia, i kon sumishon lo keda demostrá? Boso dos ta laga e prinsipio bíbliko aki guia boso, i boso ta hasiendo berdadero esfuerso pa siguié?

Podisé boso por tin ideanan distinto tambe relashoná ku otro asuntunan di bida diario. Ken lo atendé sierto tareanan di kas? Ki ora boso lo bai bishitá famia, i kuantu tempu lo dediká na esei? Kon parehanan kasá lo mustra ku nan ta poniendo interesnan di Reino na promé lugá den nan bida? (Mateo 6:33) Pa loke ta asuntunan finansiero, ta masha fásil pa hinka boso kurpa den debe, pues ta bale la pena pa boso ta ekonómiko i no dispidí. Pero kiko presis ke men ser ekonómiko i no dispidí? Boso tin ku papia abiertamente i respetuosamente tokante asuntunan asina, i esei lo trese gran benefisio.

E tipo di kòmbersashonnan ei por yuda bo logra mas pas den bo matrimonio, asta si te ku awor algun di bo ekspektativanan no a kristalisá. De echo, lo bo ta den mihó posishon pa apliká e konseho di apòstel Pablo: “Boso soportá otro i pordoná otro, si un di boso tin un keho kontra un otro.”—Kolosensenan 3:13.

[Nota]

[Kuadro/​Plachi na página 10]

MESUN PAISAHE, DIFERENTE BISTA

‘Imaginá bo un grupo grandi di turista ku ta atmirá un paisahe bunita. Ounke henter e grupo ta mira e mesun paisahe, kada persona ta mir’é diferente. Pakiko? Pasobra kada persona tin un punto di bista distinto. No tin dos persona ku ta pará presisamente n’e mesun sitio. Ademas, tur hende no ta enfoká riba e mesun sekshon di e paisahe. Kada persona ta haña un aspekto diferente ku ta spesialmente interesante. Meskos ta sierto den matrimonio. Asta ora e pareha ta pas masha bon huntu, nan dos no tin presisamente e mesun punto di bista di un asuntu. . . . Komunikashon ta inkluí hasi esfuerso pa armonisá e diferensianan den un relashon di un solo karni. Pa logra esaki ta nesesario pa traha tempu pa papia.’—E Toren di Vigilansia, 1 di ougùstùs 1993, página 4.

[Plachi na página 11]

LOKE BO POR HASI AWOR

• Bolbe analisá bo ekspektativanan. Nan ta realístiko? Bo ta ferwagt mas di bo kasá di loke ta rasonabel?—Filipensenan 2:4; 4:5, NW.

• Purba ahustá kualke ekspektativa ku no ta realístiko. Por ehèmpel, en bes di bisa “nunka nos lo no tin desakuerdo,” pone bo pa hasi esfuerso pa resolvé desakuerdo na un manera trankil.—Efesionan 4:32.

• Kòmbersá ku otro tokante boso ekspektativanan. Papiamentu tokante un asuntu ta un paso klave pa siña kon pa mustra amor i rèspèt pa otro.—Efesionan 5:33.

[Plachi na página 9]

Sea “lihé pa tende” loke ta preokupá bo kasá