Pregunta di Lektor
Pregunta di Lektor
Un kristian mester evitá di kome i bebe kos ku ta kontené kafeina?
Beibel no ta prohibí un kristian di bebe kòfi, te, chukulati, maté (te di paisnan suramerikano) i limonada ku ta kontené kafeina. Loke sí nos ta haña den e Skritura ta prinsipionan ku por yuda nos tuma desishonnan sabí. Laga nos konsiderá promé pakiko algun hende ta evitá di kome i bebe kos ku ta kontené kafeina.
Un di e motibunan prinsipal ta ku kafeina por ser konsiderá komo un droga ku ta kousa kambio den hende su estado di ánimo, ya ku e tin un efekto stimulante riba e mente. E por kousa adikshon tambe. Un buki di referensia básiko pa botikario ta deklará: “Konsumo prolongá di hopi kafeina por pone e kurpa kustumbrá kuné i kuminsá dependé sikológikamente di dje. Si e kurpa stòp di haña e stimulante diripiente, esei por kousa doló di kabes, iritashon, nèrviosismo, ansiedat i biramentu di kabes.” Outornan di e buki Diagnostic and Statistical Manual of Mental Disorders (Manual Diagnóstiko i Estadístiko di Trastornonan Mental) a pensa di menshoná e síntomanan ku sa presentá ora e kurpa stòp di haña kafeina, huntu ku e síntomanan ku sa presentá ora hende stòp di usa otro droga. P’esei, ta di komprondé ku kisas algun kristian no ta haña ta korekto pa kome i bebe kos ku ta kontené kafeina ya ku nan ke evitá tur loke por krea adikshon i nan ta deseá di desplegá dominio propio.—Galationan 5:23.
Tin hende ta kere ku kafeina por afektá un persona su salú òf esun di un mucha ku no a nase ainda. Kristiannan mester stima Dios ‘ku henter nan alma,’ pues nan no ta hasi nada ku por kousa nan morto prematuro. I siendo ku Beibel ta manda nan tambe pa stima nan próhimo, nan ta evitá tur loke por kousa daño na un yu ku no a nase ainda.—Lukas 10:25-27.
Tal preokupashonnan enkuanto salú ta hustifiká? Ounke algun eksperto ta pretendé ku kafeina por kousa vários enfermedat, no ta tur ta di akuerdo ku esaki. Algun asta ta bisa ku kòfi ta saludabel. Na 2006, e revista Time a informá: “E promé estudionan a indiká [ku kafeina] por kousa kanser na blas, preshon haltu i otro enfermedat. Investigashon mas resien no solamente a refutá mayoria di e pretenshonnan ei sino tambe a deskubrí algun benefisio signifikativo. Aparentemente kafeina tin un ke otro efekto ku ta sirbi komo protekshon kontra daño na higra, malesa di Parkinson, diabétis, Alzheimer, piedra na hal, depreshon i kisas asta algun forma di kanser.” Tokante uso di kafeina, un revista di notisia a bisa: “E klave ta moderashon, i esei no ta un sorpresa.”
Kada kristian lo mester tuma su mes desishon a base di loke e ta komprondé di e informashon ku tin aktualmente disponibel tokante kafeina i e prinsipionan bíbliko ku por tin di haber ku e asuntu. Por ehèmpel, un kristian ku ta na estado por disidí di no kome ni bebe nada ku ta kontené kafeina durante su embaraso si e ta pensa ku esei lo por afektá e yu ku no a nase ainda. Si un kristian ripará ku e ta bira krepchi òf un poko malu ora e no gasta nada ku ta kontené kafeina manera ta su kustumber, kisas ta konsehabel pa e apstené di kafeina, por lo ménos pa un tempu. (2 Pedro 1:5, 6) Otro kristiannan mester respetá un desishon asina i no imponé nan punto di bista.
Sea kual sea e desishon ku bo tuma relashoná ku kos di kome i di bebe ku ta kontené kafeina, kòrda e spièrtamentu di Pablo: “Sea ku boso ta kome òf bebe òf kiko ku boso ta hasi, hasi tur pa e gloria di Dios.”—1 Korintionan 10:31.