Sigui Pablo Su Pasonan pa Berea

E trabou di e dos misioneronan tabatin hopi éksito, i un multitut grandi a bira kreyente. Pero un grupo violento a lanta kontra nan. Un desishon a ser tumá e ora ei. Pa bienestar di e kongregashon resien formá i pa siguridat di e propio misioneronan, meianochi nan dos lo mester a bandoná e lugá mesora. Asina Pablo ku Silas a hui for di Tesalónika, un stat portuario di Masedonia, rònt di aña 50 di nos era. Nan siguiente destinashon den e trabou di prediká tabata Berea.

UN HENDE djawe ku bai bishitá Berea (Véroia) por mira e stat for di un distansia—meskos ku un biahero di antigwedat lo a mir’é—na pia di e parti ost di Bermios, un seru hopi bèrdè. Berea ta keda un 65 kilometer zùitwèst di Tesalónika i mas o ménos 40 kilometer for di kosta di Laman Egeo. Na zùit di e stat ta keda Seru Olimpo, kaminda segun mitologia e diosnan prinsipal di e panteon griego di antigwedat tabata biba.

Studiantenan di Beibel ta interesá den Berea komo un lugá kaminda Pablo a prediká i a kombertí hopi hende na kristianismo. (Echonan 17:10-15) Laga nos sigui e pasonan di Pablo i analisá e pasado di e stat.

Komienso di Berea Su Historia

Ningun hende no sa sigur na ki tempu Berea a keda fundá. E hendenan di Masedonia a kore ku su promé habitantenan, probablemente tribunan di Frigia, rònt di siglo 7 promé ku nos era. Tres siglo despues, Masedonia a bira riku despues di e konkistanan di Alexander e Grandi. Nan a konstruí edifisionan impreshonante den e stat, i tambe santuario di diosnan griego, manera Zeus, Artémis, Apolos i Atenas.

Un buki di historia ta bisa ku atraves di siglonan, Berea “a hunga un papel importante tantu den su área komo den e restu di e parti nort di Gresia.” E stat a bira mas importante foral durante e reinado di e último dinastia di Masedonia—e antígononan (di aña 306 pa 168 promé ku nos era)—ku despues di tempu a kai bou di dominio di Roma.

Ora ku e romanonan a derotá Rei Filipo V na aña 197 promé ku nos era, “e struktura di poder ku tabatin a kai den otro i Roma a bira e poder desisivo den e parti ost di Mediteráneo,” segun Encyclopædia Britannica. Na aña 168 promé ku nos era, na Pidna, algun kilometer zùit di Berea, un general romano a logra un viktoria desisivo riba Perseo, e último gobernante di antiguo Masedonia. Manera Beibel a profetisá, Roma a remplasá Gresia komo poder mundial.  (Daniel 7:6, 7, 23) Despues di e bataya ei, Berea tabata un di e promé statnan di Masedonia ku a entregá su mes na Roma.

Den e promé siglo promé ku nos era, Masedonia a bira un kampo di bataya durante e konflikto entre Pompeyo i Julio Cesar. De echo, Pompeyo a stashoná su kuartel general i su ehérsito den e bisindario di Berea.

Berea A Prosperá bou di e Romanonan

Durante e Pax Romana (Pas Romano), hende ku a bishitá Berea a haña kayanan di piedra ku galeria di pilá na ámbos banda di kaya. E stat tabatin vários baño públiko, teater, biblioteka i fasilidat pa tene kompetensianan di gladiadó. Nan tabatin ret di pipa pa awa di bebe, i e stat tabata ekipá ku un sistema di riolering supteráneo. Berea a bira famoso komo un sentro komersial ku tabata haña bishita di negoshante, artista i atleta, miéntras ku espektadornan tabata bin pa asistí na enkuentronan deportivo i otro evenementonan. Stranheronan por a haña lugánan di adorashon kaminda nan lo por a partisipá den ritualnan di nan propio religion. Sí, den e stat aki bo por a haña kultonan di henter e mundu romano.

Entre e diosnan ku hende a adorá na Berea tabatin e emperadornan romano ku a keda nombrá komo dios despues di nan morto. Pa e bereanonan esei lo no a parse nada straño pasobra ya kaba nan tabatin e defuntu emperador Alexander e Grandi komo un dios ku nan tabata venerá. Un fuente griego ta bisa: “Ya ku nan tabatin e kustumber kaba di rindi onor divino na un rei durante su bida, e hellenenan [griegonan] di e parti ost di e Imperio tabata  kontentu di por a rindi onor i adorashon na e emperadornan romano tambe . . . Riba nan monedanan nan a representá e emperador komo un dios bistí ku e korona di rayo. Nan tabata aklam’é ku e mesun orashonnan ku nan a hasi pa un dios, ku himno i kantika.” Nan a traha altar- i tèmpelnan, i a ofresé sakrifisio na dje. Asta emperadornan tabata asistí na e festividatnan di adorashon di emperador, ku a inkluí kompetensianan atlétiko, artístiko i literario.

Dikon Berea tabata un sentro di adorashon pagano? Pasobra einan e koinon di Masedonia tabata situá. Koinon tabata un asamblea di delegado di e statnan di Masedonia. E delegadonan aki tabata reuní ku regularidat na Berea pa papia tokante asuntunan urbano i provinsial i pa atendé nan bou di supervishon romano. Un di e funshonnan prinsipal di e koinon tabata pa supervisá e seremonianan di adorashon di emperador.

Pues, esaki tabata e ambiente di e stat ku Pablo ku Silas a bishitá despues ku nan a hui for di Tesalónika. Pa e tempu ei, Berea tabatin dos siglo bou di okupashon romano.

E Bon Nobo A Yega Berea

Pablo a kuminsá ku su predikashon na Berea den e snoa di e stat. Kon nan a risibié? E relato inspirá ta informá nos ku e hudiunan einan “tabata hende di mentalidat mas noble ku esnan na Tesalónika, pasobra nan a risibí e palabra ku bon boluntat i tabata skudriñá e Skrituranan tur dia, pa mira si e kosnan aki tabata asina.” (Echonan 17:10, 11) Siendo “hende di mentalidat mas noble,” nan no a pega na un manera terko na nan tradishonnan. Ounke loke nan a tende tabata algu nobo, nan no tabata deskonfiá ni di mal genio. En bes di rechasá e mensahe di Pablo, nan a presta atenshon, i ku mente habrí i sin prehuisio nan a tende loke el a prediká.

Kon e hudiunan ei por a rekonosé ku loke Pablo a siña nan tabata e bèrdat? Nan a tèst loke nan a tende hasiendo uso di e standard di mas konfiabel. Nan a analisá e Skritura na un manera kuidadoso i diligente. E erudito bíbliko Matthew Henry a konkluí: “Siendo ku Pablo a rasoná for di e skritura, i a manda nan bai wak den e Tèstamènt Bieu pa haña prueba di loke el a bisa, nan por a rekurí na nan Beibel, bai na e referensianan ku el a bisa nan, lesa e konteksto, mira nan den nan kuadro mas amplio i kapta e nifikashon tras di nan, kompará nan ku otro pasashinan di e skritura, analisá si e konklushonnan ku Pablo a saka for di nan tabata  lógiko i outéntiko i si su argumentonan basá riba nan tabata konvinsente, anto saka nán konklushonnan di akuerdo ku esei.”

Esaki no tabata un estudio superfisial ku nan a hasi ún biaha so. E bereanonan a dediká nan mes na un estudio diligente i kontinuo, tumando tempu pa hasi esaki tur dia, no riba sabat so.

Anto pensa riba e resultado. Hopi hudiu na Berea a aseptá e mensahe i a bira kreyente. Un kantidat di griego, inkluso kisas algun ku tabata prosélito hudiu, tambe a bira kreyente. Esaki no a sosodé sin ku hende a ripará. Ora ku e hudiunan di Tesalónika a tende esei, nan a kore bin Berea pa “agitá i instigá e multitutnan.”—Echonan 17:4, 12, 13.

Pablo a hañ’é obligá ta bai for di Berea, pero el a sigui ku su predikashon otro kaminda. E biaha aki el a subi barku rumbo pa Atenas. (Echonan 17:14, 15) Apesar di esei, e por tabata kontentu ku debí na su trabou na Berea, kristianismo a saka rais einan. Anto te awe e ta duna fruta.

Sí, te ainda tin hende na Berea (Véroia) ku ta skudriñá e Skritura kuidadosamente pa “hasi sigur di tur kos” i pa “tene duru” na loke ta bon fundá i berdadero. (1 Tesalonisensenan 5:21, NW) Tin dos kongregashon progresivo di Testigunan di Yehova den e stat, i meskos ku Pablo nan ta partisipá den e trabou di prediká, kompartiendo e mensahe di Beibel ku otro hende. Nan ta buska hende di kurason onrado i ta rasoná ku nan for di e Skritura. Asina nan ta laga e forsa motivador di Beibel yuda tur esnan ku ke konosé Yehova, e Dios berdadero.—Hebreonan 4:12.

[Mapa na página 13]

(Pa e teksto den su formato kompleto, wak e publikashon)

Parti di Pablo su segundo biahe komo misionero

MISIA

Troas

Neápolis

Filipos

MASEDONIA

Amfipolis

Tesalónika

Berea

GRESIA

Atenas

Korinto

AKAYA

ASIA

Efeso

RODAS

[Plachi na página 13]

Moneda di plata ku kara di Alexander e Grandi komo un dios griego

[Rekonosementu]

Moneda: Pictorial Archive (Near Eastern History) Est.

[Plachi na página 14]

Un entrada di e bario hudiu na Berea (Véroia)

[Plachi na página 15]

Un snoa bieu na Berea (Véroia) djawe