Hóbennan Boso Tin Efekto Riba Kurason di Boso Mayornan

“NO TIN goso mas grandi pa mi ku di tende ku mi yunan ta kana den e bèrdat,” e biehitu apòstel Juan a skirbi. (3 Juan 4) Ounke e yunan menshoná den e teksto di Beibel aki ta referí na disipel kristian, ta fásil pa un mayor temeroso di Dios komprondé e sintimentunan di Juan. Meskos ku mayornan ta hasi un diferensia signifikativo den bida di nan yunan, yunan tambe ta hasi un gran diferensia den bida di nan mayornan.

Rei Salomon di Israel a ripará ki efekto profundo yunan por tin riba nan mayornan. El a skirbi: “Un yu sabí ta hasi su tata kontentu, ma un yu bobo ta un tristesa pa su mama.” (Proverbionan 10:1) P’esei, ta bon pa tur yu—asta esnan mas grandi—pensa ki efekto nan akshonnan lo tin riba nan mama ku tata. Dikon ta bon pa nan hasi esaki?

Djis pensa riba tur e tempu i atenshon ku bo mayornan temeroso di Dios a invertí den bo formashon! Nan a kuminsá preokupá i hasi orashon pa bo hopi tempu promé ku bo a nase. Despues ku bo a nase, tur bo dos mayornan tabatin e plaser di forma un laso emoshonal ku bo i probablemente a gradisí Dios pa e privilegio i responsabilidat maravioso—pero serio—di lanta yu. Nan a haña e enkargo di kuida un beibi indefenso, i komo adoradónan di Yehova, nan a tuma esaki na serio.

Siendo ku bo mayornan ta kristiannan berdadero, nan a akudí na Beibel i literatura basá riba Beibel pa haña un guia konfiabel, i a buska konseho serka personanan ku tin eksperensia den kriamentu di yu. Ademas, semper nan a ekspresá nan preokupashonnan na Dios den nan orashonnan. (Huesnan 13:8) Segun ku bo tabata krese, bo mayornan tabata sa kiko tabata bo puntonan fuerte pero no a sera wowo pa bo debilidatnan. (Jòb 1:5) Bo añanan di adolesensia a trese otro retonan. Podisé algun biaha bo tabata rebelde, i bo mayornan a haña nan ta hasi mas orashon, lesa mas i pensa mas riba kiko nan por hasi pa yuda bo sigui adorá bo Tata selestial, Yehova.

Semper bo mayornan lo keda mama ku tata. Asta ora bo bira mas grandi nan ta sigui interesá den bo bienestar físiko, mental, emoshonal i spiritual. Ma durante tur e  tempunan ei, bo mayornan ta kòrda ku bo tin boluntat liber i ku no tin niun garantia di kiko lo resultá di bo bida. Na final di kuenta, ta abo ta esun ku ta disidí ki rumbo bo ta kohe.

No ta lógiko anto ku, si “no tin goso mas grandi” pa mayornan di tende ku nan yunan “ta kana den e bèrdat,” nan lo sinti nan tristu tambe ora nan yunan bira lomba pa e bèrdat? En bèrdat, yunan ku ta kometé bobedat ta kousa doló di kurason pa nan mayornan. Salomon a deklará: “Un yu bobo ta tristesa pa su tata, i amargura pa esun ku a pon’é na mundu.” (Proverbionan 17:25) Ora un yu stòp di adorá e Dios berdadero, esaki ta kousa un tristesa profundo pa e mayornan!

Ta opvio anto ku bo tin un gran influensia riba bo famia i otro personanan. Bo kondukta tin un efekto profundo riba kurason di bo mayornan. Si bo bira lomba pa Dios i su prinsipionan, bo mayornan lo sufri. Ma visevèrsa tambe ta e kaso. Si bo keda fiel i obediente na Yehova, bo mayornan lo alegrá. Sea determiná pa alegrá e kurason di bo mayornan! Ki regalo mas presioso lo bo por duna esnan ku a lanta bo, protehá bo i stima bo?