Hóbennan, Sigui Tras di Metanan Ku Ta Onra Dios

“Entrená bo mes ku deboshon na Dios komo bo meta.”—1 TIMOTEO 4:7, NW.

1, 2. (a) Pakiko Pablo a elogiá Timoteo? (b) Kon hóbennan djawe ta ‘entrenando nan mes ku deboshon na Dios komo nan meta’?

“MI NO tin ni un otro hende di e mesun spiritu ku lo preokupá sinseramente pa boso bienestar. . . . El a sirbi huntu ku mi, manera un yu ku su tata, den e trabou di evangelio.” (Filipensenan 2:20, 22) Apòstel Pablo a inkluí e elogio kaluroso aki den su karta na e kristiannan di promé siglo na Filipos. Na ken e tabata referí? Na Timoteo, su kompañero di biahe mas hóben. Imaginá bo kon kontentu e konfirmashon aki di e kariño i konfiansa di Pablo mester a hasi Timoteo!

² Hóbennan manera Timoteo ku ta teme Dios semper tabata hopi útil pa e pueblo di Yehova. (Salmo 110:3) Awe, e organisashon di Dios ta bendishoná ku hopi hóben ku ta sirbi komo pionero, misionero, trahadó boluntario den konstrukshon i bètelita. Otronan ku ta partisipá ku entusiasmo den aktividatnan di kongregashon miéntras ku nan ta kumpli ku otro responsabilidatnan tambe ta digno di elogio. E hóbennan ei ta haña e berdadero satisfakshon di por sigui tras di metanan ku ta onra nos Tata selestial, Yehova. Nan en bèrdat ta ‘entrenando nan mes ku deboshon na Dios komo nan meta.’—1 Timoteo 4:7, 8, NW.

3. Ki preguntanan nos lo konsiderá den e artíkulo aki?

³ Hóben, abo ta trahando pa alkansá metanan spiritual spesífiko? Unda bo por haña yudansa i animashon pa hasi esei? Kon bo por resistí e preshonnan di e mundu materialista aki? Ki bendishon bo por spera di risibí si bo sigui tras di metanan ku ta onra Dios? Laga nos haña kontesta riba e preguntanan aki dor di konsiderá e bida i karera di Timoteo.

Bida i Karera di Timoteo

4. Deskribí Timoteo su karera kristian brevemente.

⁴ Timoteo a lanta na Listra, un stat chikitu den e provinsia romano di Galasia. Probablemente el a bin den kontakto ku kristianismo tempu ku e tabata un teenager ora Pablo a prediká na Listra rònt di aña 47 di nos era. Den poko tempu Timoteo a haña un ekselente reputashon entre e rumannan kristian lokal. Ora Pablo a bolbe dos aña despues na Listra i a haña sa di su progreso, el a skohe Timoteo pa sirbi komo su kompañero den e trabou di misionero. (Echonan 14:5-20; 16:1-3) Segun ku Timoteo a madurá, el a ser konfiá ku asta mas responsabilidat, inkluso mishonnan krusial pa fortalesé e rumannan. Tempu Pablo a skirbi Timoteo for di prizon na Roma rònt di aña 65, Timoteo tabata sirbiendo komo ansiano kristian na Efeso.

5. Segun 2 Timoteo 3:14 i 15, ki dos faktor a kontribuí na Timoteo su desishon pa sigui tras di metanan spiritual?

⁵ Tabata bisto ku Timoteo a opta pa sigui tras di metanan spiritual. Pero kiko a motiv’é p’e hasi esei? Den Pablo su di dos karta na Timoteo,  el a menshoná dos faktor determinante. El a skirbi: “Kontinuá den e kosnan ku bo a siña i a keda konvensí di dje, sabiendo di ken bo a siña nan; i ku for di infansia bo a konosé e skrituranan santu.” (2 Timoteo 3:14, 15) Laga nos analisá promé ki influensia otro kristiannan tabatin riba Timoteo su eskohonan den bida.

Benefisio di Influensianan Positivo

6. Ki entrenamentu Timoteo a risibí, i kon el a respondé na esaki?

⁶ Timoteo a lanta den un kas dividí den sentido religioso. Su tata tabata un griego, i su mama, Eunise, i su wela Loida tabata di orígen hudiu. (Echonan 16:1) Eunise i Loida a siña Timoteo e bèrdatnan di e Skritura Hebreo for di su infansia. Despues ku nan a kombertí na kristianismo, sin duda nan a yuda persuadí Timoteo p’e aseptá e siñansanan kristian. Klaramente, Timoteo a saka pleno probecho for di e entrenamentu ekselente aki. Pablo a remarká: “Mi [ta kòrda] e fe sinsero ku ta den bo, ku promé tabata biba den bo wela Loida, i den bo mama Eunise, i mi tin sigur ku ta den bo tambe.”—2 Timoteo 1:5.

7. Ki bendishon hopi hóben ta disfrutá di dje awor, i kon esaki por benefisiá nan?

⁷ Awe, hopi hóben ta bendishoná ku mayor-, wela- i tawelanan temeroso di Dios kendenan, meskos ku Loida i Eunise, ta rekonosé e importansia di metanan spiritual. Por ehèmpel, ainda Samira ta kòrda e kòmbersashonnan largu ku e tabatin ku su mayornan tempu e tabata un teenager. “Mami ku papi a siña mi mira kosnan manera Yehova ta mira nan i pa duna prioridat na e trabou di prediká,” e ta konta. “Semper nan a motivá mi pa drenta e sirbishi di tempu kompletu.” Samira a respondé faborablemente na e animashon ku su mayornan a dun’é i awor e tin e privilegio di sirbi komo miembro di e famia di Bètel den su pais. Si bo mayornan ta animá bo pa enfoká riba metanan spiritual, pensa seriamente riba nan konseho. Nan tin bo bienestar na pechu.—Proverbionan 1:5.

8. Kon Timoteo a benefisiá di kompañerismo kristian edifikante?

⁸ Ta importante tambe pa bo buska kompañerismo edifikante den e hermandat kristian. Tantu e ansianonan kristian di Timoteo su mes kongregashon komo esnan di Ikonio, rònt di 30 kilometer leu, tabata konos’é hopi bon. (Echonan 16:1, 2) El a kultivá un amistat íntimo ku Pablo, un persona dinámiko. (Filipensenan 3:14) Pablo su kartanan ta indiká ku Timoteo tabata habrí pa konseho i semper kla pa imitá ehèmpelnan di fe. (1 Korintionan 4:17; 1 Timoteo 4:6, 12-16) Pablo a skirbi: “Abo a sigui [“ku sumo kuidou,” NW] mi siñansa,  kondukta, propósito, fe, pasenshi, amor, perseveransia.” (2 Timoteo 3:10) Sí, Timoteo a sigui Pablo su ehèmpel kuidadosamente. Di igual manera, si bo hala serka personanan fuerte den sentido spiritual den e kongregashon, nan lo por yuda bo desaroyá metanan spiritual saludabel.—2 Timoteo 2:20-22.

Studia “e Skrituranan Santu”

9. Ademas di skohe e asosiashon korekto, kiko bo tin ku hasi pa “entrená bo mes ku deboshon na Dios komo bo meta”?

⁹ Akaso e úniko kos ku bo mester hasi pa alkansá metanan spiritual ta di skohe e asosiashon korekto? Nò. Meskos ku Timoteo, bo tin ku analisá “e skrituranan santu” kuidadosamente. Kisas bo no ta un hende ku ta gusta studia, pero kòrda ku Timoteo tabatin ku ‘entrená su mes ku deboshon na Dios komo su meta.’ Hopi bes atletanan ta train duru lunanan largu pa por alkansá nan meta. Di igual manera, pa bo alkansá metanan spiritual, bo tin ku hasi sakrifisio i esfuerso diligente. (1 Timoteo 4:7, 8, 10, NW; nota na pia di página) Pero kisas bo ta puntra bo mes: ‘Kon studiamentu di Beibel por yuda mi alkansá mi metanan?’ Laga nos konsiderá tres manera den kua esei por yuda bo.

10, 11. Dikon e Skritura lo motivá bo pa alkansá metanan spiritual? Duna un ehèmpel.

¹⁰ Di promé, e Skritura lo duna bo e motivashon korekto. E ta revelá e personalidat maravioso di nos Tata selestial, su akto supremo di amor na nos fabor, i e bendishonnan eterno ku e tin reservá pa su fiel sirbidónan. (Amos 3:7; Juan 3:16; Romanonan 15:4) Segun ku bo konosementu di Yehova ta krese, bo amor p’e i bo deseo pa dediká bo bida na dje tambe lo oumentá.

¹¹ Hopi kristian hóben ta bisa ku básikamente loke a yuda nan hasi e bèrdat di nan mes ta un estudio personal di Beibel riba un base regular. Tuma por ehèmpel Adele. El a lanta den un famia kristian pero nunka e no a pone meta spiritual. E ta kòrda: “Mi mayornan tabata bai Salòn di Reino ku mi, pero mi no tabatin un estudio personal ni mi no tabata skucha na reunion.” Despues ku su ruman muhé a batisá, Adele a kuminsá tuma e bèrdat mas na serio. “Mi a kuminsá lesa Beibel kompletu. Mi tabata lesa un poko i despues skirbi un komentario riba loke mi a kaba di lesa. Te ainda mi tin tur mi notanan. Mi a lesa Beibel den un aña.” Komo resultado di esei, Adele a sinti su mes motivá pa dediká su bida na Yehova. Apesar di un desabilidat físiko serio ku e tin, aworakí e ta traha komo pionero, òf evangelisadó di tempu kompletu.

12, 13. (a) Ki kambionan un estudio di Beibel lo yuda un hóben hasi, i kon? (b) Duna ehèmpel di sabiduria práktiko ku e Palabra di Dios ta kontené.

¹² Di dos, Beibel lo yuda bo hasi e kambionan nesesario den bo personalidat. Pablo a bisa Timoteo ku “e skrituranan santu” ta “útil pa siñansa, pa reprendementu, pa korekshon, pa  eduká den hustisia, pa e hende di Dios por ta perfekto, ekipá pa tur bon obra.” (2 Timoteo 3:16, 17) Ora bo ta meditá regularmente riba asuntunan ku tin di haber ku e Palabra di Dios i ta apliká prinsipionan bíbliko, bo ta permití e spiritu di Dios refiná bo personalidat. Lo e kultivá den bo kualidatnan esensial, manera humildat, perseveransia, diligensia i berdadero amor pa bo rumannan kristian. (1 Timoteo 4:15) Timoteo tabata poseé e kualidatnan aki, i p’esei e tabata hopi útil tantu pa Pablo komo pa e kongregashonnan ku Timoteo a sirbi.—Filipensenan 2:20-22.

¹³ Di tres, e Palabra di Dios ta un mangasina di sabiduria práktiko. (Salmo 1:1-3; 19:7; 2 Timoteo 2:7; 3:15) Lo e yuda bo skohe bo amigunan sabiamente, selektá entretenimentu saludabel i trata ku hopi otro situashon difísil. (Génesis 34:1, 2; Salmo 119:37; 1 Korintionan 7:36) Si bo ke alkansá metanan spiritual, ta importante pa bo tuma desishonnan sabí awor.

“Lucha e Bon Lucha”

14. Pakiko siguimentu tras di metanan spiritual no ta e kos di mas fásil pa hasi den bida?

¹⁴ E kos di mas sabí ku un persona por hasi den su bida ta di duna prioridat na metanan ku ta onra Yehova; pero esei sigur no ta e kos di mas fásil pa hasi. Por ehèmpel, ora bo tin ku skohe un karera, bo famia-, amigu- i maestronan di skol ku bon intenshon por pone hopi preshon riba bo pa sigui un enseñansa avansá i un karera lukrativo ku, segun nan, ta e klave pa berdadero éksito i felisidat. (Romanonan 12:2) Meskos ku Timoteo, lo bo tin ku “lucha e bon lucha di fe” pa bo por “gara e bida eterno” ku Yehova ta ekstendé na bo.—1 Timoteo 6:12; 2 Timoteo 3:12.

15. Probablemente, ki oposishon Timoteo a enfrentá?

¹⁵ Ora miembro di famia ku no ta kreyente ta bai kontra di bo eskohonan den bida, e prueba por ta asta mas difísil ainda. Posiblemente, Timoteo tabatin ku vense e oposishon ei. Segun un ensiklopedia bíbliko, probablemente e famia di Timoteo “tabata pertenesé na e klase eduká i ku bon entrada.” Kasi sigur su tata a ferwagt di dje p’e buska enseñansa avansá i sigui ku un empresa di famia. * Imaginá bo kon e tata di Timoteo lo a reakshoná ora el a haña sa ku Timoteo a preferá e peliger- i insiguridatnan finansiero di e trabou di misionero huntu ku Pablo!

16. Kon un hóben a trata ku oposishon di mayor?

¹⁶ Awe hóbennan kristian ta haña nan ku retonan similar. Matthew, kende ta sirbi na un sukursal di Testigunan di Yehova, ta kòrda: “Dia mi a kuminsá traha komo pionero, mi tata a keda sumamente desepshoná. El a haña ku mi a ‘desperdisiá’ mi enseñansa dor di hasi trabou di limpiesa pa sostené mi den mi ministerio. E tabata ridikulisá mi i kòrda mi kuantu lo mi por a gana si mi a buska un trabou fultaim.” Kon Matthew a trata ku e oposishon ei? “Mi a tene mi na un programa rígido di lesamentu di Beibel i tabata hasi orashon konstantemente, foral na momentonan ku lo mi por a pèrdè mi temperamento fásilmente.” Matthew su determinashon a hiba na un gran bendishon. Ku tempu, e relashon ku su tata a mehorá. Tambe Matthew a hala mas serka Yehova. El a bisa: “Mi a mira kon Yehova a perkurá pa mi, animá mi i yuda mi evitá di tuma mal desishon. Si mi no a hasi esfuerso pa alkansá metanan spiritual lo mi no a eksperensiá ningun di e kosnan aki.”

Keda Enfoká Riba Metanan Spiritual

17. Kon algun ruman por kometé e ekibokashon di desanimá esnan ku ta plania pa drenta e sirbishi di tempu kompletu? (Mateo 16:22)

¹⁷ Den un forma sutil asta bo propio rumannan di fe por desanimá bo pa sigui tras di  metanan spiritual. Kisas algun ta bisa bo: ‘Pakiko traha pionero? Bo por hiba un bida normal i tòg partisipá den e trabou di prediká. Buska un bon trabou i garantisá bo siguridat finansiero.’ Esaki por parse un konseho sano, pero si bo siguié, lo bo ta entrenando bo mes ku deboshon na Dios komo bo meta?

18, 19. (a) Kon bo por keda enfoká riba metanan spiritual? (b) Splika ki sakrifisio abo, komo hóben, ta hasiendo na fabor di e Reino.

¹⁸ Aparentemente algun kristian den tempu di Timoteo tabatin e mesun pensamentu. (1 Timoteo 6:17) Pa yuda Timoteo mantené su bista riba metanan spiritual, Pablo a anim’é, bisando: “Ningun sòldá den sirbishi militar no ta enbolbé su mes den asuntunan di tur dia, pa e por komplasé esun ku a tum’é den sirbishi komo sòldá.” (2 Timoteo 2:4) Un sòldá ku ta den servisio aktivo no por laga empeñonan sivil kita su atenshon. E mester ta semper kla pa sigui òrdu di su komandante. Tantu su bida komo bida di otro hende ta dependé di esei. Komo un sòldá bou di Kristu, bo tambe tin ku keda enfoká riba un solo kos i evitá di bai innesesariamente tras di empeñonan material ku por stroba bo di kumpli ku bo ministerio ku ta salba bida.—Mateo 6:24; 1 Timoteo 4:16; 2 Timoteo 4:2, 5.

¹⁹ En bes sigui e meta di hiba un bida di komodidat, kultivá un spiritu di sakrifisio propio. “Komo miembro di e ehérsito di Kristu, sea prepará pa biba sin e komodidatnan di bida.” (2 Timoteo 2:3, The English Bible in Basic English) Tempu ku Timoteo tabata akompañá Pablo, el a siña e sekreto pa keda kontentu asta den e sirkunstansianan di mas difísil. (Filipensenan 4:11, 12; 1 Timoteo 6:6-8) Abo por hasi meskos. Bo ta dispuesto pa hasi sakrifisio na fabor di e Reino?

Bendishonnan Awor i den Futuro

20, 21. (a) Menshoná algun bendishon ku lo bo risibí si bo sigui tras di metanan spiritual. (b) Kiko bo ta determiná pa hasi?

²⁰ Pa mas o ménos 15 aña, Timoteo a traha estrechamente ku Pablo. Timoteo a mira personalmente kon kongregashonnan nobo a forma segun ku e bon nobo a plama den kasi henter e área nort di Laman Mediteráneo. Su bida tabata mas eksitante i satisfasiente ku si el a skohe pa hiba un bida “normal.” Si bo sigui tras di metanan spiritual, bo tambe lo kosechá bendishonnan spiritual riku. Lo bo hala serka Yehova i gana e amor i rèspèt di otro kristiannan. En bes di sinti e doló i frustrashon ku korementu tras di rikesa material ta trese kuné, lo bo disfrutá di e felisidat berdadero ku dunamentu inegoista ta produsí. I e kos di mas presioso ku lo bo haña ta e ‘berdadero bida,’ esta, bida eterno den un paradeis riba tera.—1 Timoteo 6:9, 10, 17-19; Echonan 20:35.

²¹ Pues, si ainda bo no ta entrenando bo mes ku deboshon na Dios komo bo meta, nos ta animá bo kalurosamente pa bo kuminsá hasi esei mesora. Hala serka di e rumannan di bo kongregashon ku por yuda bo traha pa alkansá metanan spiritual, i buska nan guia. Duna prioridat na estudio personal di e Palabra di Dios riba un base regular. Sea determiná pa resistí e spiritu materialista di e mundu aki. I kòrda semper ku e Dios ku “ta proveé pa nos tur kos na abundansia” ta primintí ku bo por risibí bendishon riku tantu awor komo den futuro si bo skohe metanan ku ta onr’é.—1 Timoteo 6:17.

[Nota]

Bo Ta Kòrda?

• Unda hóbennan por haña yudansa pa traha pa alkansá metanan spiritual?

• Pakiko un estudio di Beibel diligente ta asina importante?

• Kon hóbennan por resistí e influensia materialista di e mundu aki?

• Ki bendishon hende ku ta buska metanan spiritual ta risibí?

[Preguntanan di Estudio]

[Plachi na página 24]

Timoteo a sigui tras di metanan ekselente

[Plachinan na página 25]

Ki influensianan positivo a yuda Timoteo?

[Plachinan na página 26]

Abo ta traha pa alkansá metanan spiritual?