Hopi Mas Importante ku Pronostiká Wer

KASI tur nashon tin dicho tokante wer. Shelu kòrá anochi, marinero kontentu; shelu kòrá mainta, marinero tene kuidou. Awe meteorólogonan ta duna splikashon tékniko pakiko e wer por desaroyá manera e dicho ta bisa.

Den tempu di Hesus tambe hende tabatin e kustumber di studia shelu i interpretá su aparensia. Hesus a bisa algun hudiu: “Ora bira tardi boso ta bisa: ‘Ta bai tin bon tempu, pasobra shelu ta kòrá.’ I mainta: ‘Awe ta bai tin mal tempu, pasobra shelu ta kòrá i tur tapá ku nubia skur.’ Boso sa kon pa distinguí e aspekto di shelu.” Anto Hesus a sigui bisando algu sorprendente: “Ma boso no por distinguí e señalnan di e tempunan?”—Mateo 16:2, 3.

Kiko tabata “e señalnan di e tempunan”? Nan tabata e tantísimo señalnan ku a indiká bon kla ku Hesus tabata e berdadero Mesias ku Dios a manda. Hesus su akshonnan tabata masha kla i mes fásil pa rekonosé ku e koló kòrá di shelu. Sin embargo, mayoria di hudiu a ignorá e señalnan ku a indiká ku e Mesias a bin, loke definitivamente tabata hopi mas importante ku pronostiká tempu.

Awe tambe tin un señal ku ta hopi mas importante pa komprondé ku e nifikashon di e koló di shelu. Hesus a profetisá ku lo bin un fin na e mundu malbado aki ya asina un mihó mundu por kuminsá. El a menshoná vários desaroyo ku huntu lo a indiká ki tempu e kambio aki lo tabata serka di tuma lugá. E desaroyonan aki a inkluí guera i hamber na tur parti di mundu. Hesus a bisa ku ora hende mira e kosnan aki, e tempu pa Dios intervení ta serka.—Mateo 24:3-21.

Abo ta mira “e señalnan di e tempunan”?