Laga e Palabra di Dios Guia Bo Pasonan

“Bo palabra ta un lampi pa mi pia i un lus pa mi kaminda.”—SALMO 119:105.

1, 2. Pakiko mayoria di hende no a logra haña berdadero pas i felisidat?

BO POR kòrda un okashon ku bo tabatin ku pidi un hende pa splika bo kon pa yega un kaminda? Tal bes bo tabata hopi serka di e lugá pero bo no tabata sigur ta den kua di e último hanchinan bo mester a drenta. Òf kisas bo a pèrdè kaminda kompletamente i mester a bai den henteramente un otro direkshon. Sea kual sea e kaso, lo no tabata sabí pa sigui e guia di un persona ku konosé e área? Un persona asina lo por a yuda bo alkansá bo destinashon.

² Pa míles di aña, humanidat en general a purba dirigí nan bida sin yudansa di Dios. Pero sin guia di Dios, hende imperfekto ta kompletamente pèrdí. Simplemente nan no por haña e kaminda ku ta hiba na berdadero pas i felisidat. Pakiko nan no por a alkansá e ‘destinashon’ ei? Mas ku 2.500 aña pasá, profeta Jeremias a deklará: “No ta keda na hende pa dirigí su pasonan.” (Jeremias 10:23) Ken ku purba dirigí su mes pasonan sin aseptá yudansa kompetente, tardi òf trempan ta haña su mes ku frustrashon. En bèrdat, hende mester di guia!

3. Dikon Yehova Dios ta e persona di mas kapas pa guia humanidat, i kiko e ta primintí?

³ Yehova Dios ta e persona di mas kapas pa duna e guia ei. Dikon? Pasobra e sa mihó ku kualke otro persona kon hende a ser formá. I e ta bon na haltura di e manera ku hende a desviá i ‘pèrdè kaminda.’ E sa tambe kiko nan tin ku hasi pa haña e kaminda bèk. Ademas, komo Kreadó, Yehova semper sa kiko ta mihó pa nos. (Isaias 48:17) Pues, nos por konfia plenamente den su promesa skirbí na Salmo 32:8: “Lo mi instruí bo i siña bo e kaminda ku bo tin ku kana; lo mi konsehá bo; mi wowo ta riba bo.” No tin duda, Yehova ta perkurá e mihó guia. Pero kon eksaktamente e ta guia nos?

4, 5. Kon e deklarashonnan di Dios por guia nos?

⁴ Un salmista a bisa den orashon na Yehova: “Bo palabra ta un lampi pa mi pia i un lus pa mi kaminda.” (Salmo 119:105) Nos por haña Dios su deklarashon- i rekordatorionan den Beibel, i nan por yuda nos vense e opstákulonan ku nos por topa den nos kaminda. En bèrdat, ora nos lesa Beibel i lag’é guia nos, nos ta eksperimentá personalmente loke Isaias 30:21 ta bisa: “Bo orea lo tende un palabra tras di bo ta bisa: ‘Esaki ta e kaminda, kana den dje.’”

⁵ Pero ripará ku Salmo 119:105 ta mustra riba dos funshon di e Palabra di Dios ku ta relashoná ku otro. Di promé, e ta sirbi komo un lampi pa nos pia. Ora nos ta enfrentá e problemanan di tur dia, e prinsipionan ku nos ta haña den Beibel mester guia nos pasonan pa nos por tuma desishonnan sabí i evitá e trampanan di e mundu aki. Di dos, e rekordatorionan di Dios ta iluminá nos kaminda; nan ta yuda nos hasi eskohonan ku ta kuadra ku nos speransa di biba pa semper den e Paradeis ku Dios a primintí. Ku e kaminda nos dilanti bon iluminá, nos lo por diserní e konsekuensianan—sea bon òf malu—di un sierto rumbo. (Romanonan 14:21; 1 Timoteo 6:9; Revelashon 22:12) Laga nos wak ku mas detaye kon loke Dios a deklará den su Palabra por ta un lampi pa nos pia i un lus pa nos kaminda.

 “Un Lampi pa Mi Pia”

6. Den ki sirkunstansianan e palabranan di Dios por ta un lampi pa nos pia?

⁶ Tur dia nos ta tuma desishon. Algun desishon por parse relativamente insignifikante, pero tin biaha nos por haña nos den un situashon ku ta pone nos moralidat, nos onestidat òf nos posishon neutral na prueba. Pa por enfrentá e pruebanan ei ku éksito, nos mester tin nos “mente entrená pa diserní loke ta bon i loke ta malu.” (Hebreonan 5:14) Segun ku nos ta haña konosementu eksakto di e Palabra di Dios i ta desaroyá un komprondementu di su prinsipionan, nos ta entrená nos konsenshi pa asina nos por tuma desishonnan ku ta agradá Yehova.—Proverbionan 3:21.

7. Deskribí un situashon den kua un kristian por haña su mes tentá pa asosiá ku kolega di trabou ku no ta kreyente.

⁷ Pensa riba e siguiente ehèmpel. Bo ta un adulto ku ta hasi esfuerso sinsero pa alegrá e kurason di Yehova? (Proverbionan 27:11) Si ta asina, nos ta elogiá bo pa esei. Pero imaginá bo ku algun kolega di trabou ta ofresé bo un karchi di entrada pa bo bai un evenemento deportivo huntu ku nan. Nan ta gusta bo kompania na trabou i nan tin gana di asosiá ku bo pafó di ora di trabou. Kisas bo tin e impreshon fuerte ku e personanan aki no ta mal hende. Podisé asta nan tin algun bon prinsipio. Kiko lo bo hasi? Tin algun peliger den aseptá e invitashon? Kon e Palabra di Dios por yuda bo tuma un desishon sabí den e asuntu aki?

8. Ki prinsipionan bíbliko ta yuda nos rasoná riba e asuntu di asosiashon?

⁸ Laga nos konsiderá algun prinsipio bíbliko. Kisas e promé ku ta bini na bo mente ta esun na 1 Korintionan 15:33, ku ta bisa: “Mal kompania ta daña bon kustumber.” E echo ku bo ta sigui e prinsipio aki ta nifiká ku bo tin ku evitá hende ku no ta kreyente kompletamente? E kontesta bíbliko riba e pregunta ei ta nò. Al fin i al kabo, apòstel Pablo mes a mustra konsiderashon amoroso na “tur klase di hende,” inkluso hende ku no tabata kristian. (1 Korintionan 9:22, NW) E esensia di kristianismo ta eksigí pa nos mustra interes den otro hende—inkluso esnan ku no tin e mesun kreensianan ku nos. (Romanonan 10:13-15) En bèrdat, kon nos por sigui e konseho pa “hasi bon na tur hende” si nos apartá nos mes for di hende ku lo por tin mester di nos yudansa?—Galationan 6:10.

9. Ki konseho bíbliko ta yuda nos keda balansá den nos relashon ku nos koleganan di trabou?

⁹ Sin embargo, tin un diferensia grandi entre ser amigabel ku un kolega di trabou i ser un amigu íntimo di dje. Aki ta kaminda un otro prinsipio bíbliko ta drenta den wega. Apòstel Pablo a spièrta kristiannan: “No uni boso mes den yugo desigual ku inkrédulonan.” (2 Korintionan 6:14) Kiko e palabranan “no uni boso mes den yugo desigual” ta nifiká? Algun vershon di Beibel ta tradusí e  palabranan ei komo lo siguiente: “no mara boso mes,” “no purba traha huntu komo hende igual” òf “stòp di forma relashonnan inapropiá.” Na ki momento un relashon ku un kolega di trabou ta bira inapropiá? Ki ora e ta pasa límite i bira un yugo desigual? Beibel, e Palabra di Dios, por dirigí bo pasonan den e situashon aki.

10. (a) Kon Hesus a skohe amigu? (b) Ki preguntanan por yuda un persona tuma desishonnan sabí tokante asosiashon?

¹⁰ Konsiderá e ehèmpel di Hesus, kende desde kreashon padilanti tabatin amor pa hende. (Proverbionan 8:31) Tempu e tabata riba tera, el a forma un amistat íntimo ku su siguidónan. (Juan 13:1) Asta el a ‘stima’ un hòmber ku no a haña un bon guia religioso. (Marko 10:17-22) Pero tambe Hesus a fiha límitenan bon kla relashoná ku su eskoho di amigu íntimo. E no a forma laso estrecho ku hende ku no tabata realmente interesá den hasi e boluntat di su Tata. Na un okashon, Hesus a deklará: “Boso ta mi amigu, si boso hasi loke mi ta ordená boso.” (Juan 15:14) Kisas bèrdat bo ta sali bon ku un sierto kolega di trabou. Pero puntra bo mes: ‘E persona aki ta dispuesto pa hasi loke Hesus ta manda? E ke siña tokante Yehova, esun ku Hesus a instruí nos pa adorá? E tin e mesun normanan moral ku ami komo kristian tin?’ (Mateo 4:10) Ora bo ta papia ku bo koleganan di trabou tokante normanan di Beibel i ta insistí pa apliká nan, e kontestanan riba e preguntanan aki lo bira evidente.

11. Duna ehèmpel di situashonnan den kua e deklarashonnan di Dios mester guia nos pasonan.

¹¹ Tin hopi otro situashon den kua e deklarashonnan di Dios por ta manera un lampi pa nos pia. Por ehèmpel, kisas un kristian desempleá ku tin mester di un trabou desesperadamente ta haña un oferta di trabou. Sin embargo, e oranan ku lo e tin ku traha ta bai eksigí hopi di dje, i si e aseptá e trabou lo e bai falta vários reunion kristian i lo no por partisipá den otro aktividatnan relashoná ku adorashon berdadero. (Salmo 37:25) Un otro kristian por haña e tentashon fuerte pa wak entretenimentu ku ta violá prinsipio di Beibel klaramente. (Efesionan 4:17-19) I un otro ta kla pa sinti su mes ofendí pa e imperfekshonnan  di su rumannan kristian. (Kolosensenan 3:13) Den tur e situashonnan ei, nos mester laga e Palabra di Dios ser un lampi pa nos pia. Realmente, ora nos ta sigui prinsipionan di Beibel, nos por enfrentá kualke reto den bida ku éksito. E Palabra di Dios ta “útil pa siñansa, pa reprendementu, pa korekshon, pa eduká den hustisia.”—2 Timoteo 3:16.

“Un Lus pa Mi Kaminda”

12. Kon e palabranan di Dios ta un lus pa nos kaminda?

¹² Salmo 119:105 ta bisa tambe ku e palabranan di Dios por iluminá e kaminda nos dilanti. Pa loke ta futuro, nos no ta den skuridat pasobra Beibel ta splika e nifikashon di e kondishonnan angustioso di mundu i den kiko nan lo resultá. Sí, nos ta realisá ku nos ta bibando den “e último dianan” di e mal sistema di kosnan aki. (2 Timoteo 3:1-5) E echo ku nos sa kiko tin nos dilanti mester tin un efekto profundo riba e manera ku nos ta biba awor. Apòstel Pedro a skirbi: “Komo ku tur e kosnan aki lo wòrdu destruí di e manera aki, ki sorto di hende boso mester ta den un kondukta santu i deboto, sperando i purando e binida di e dia di Dios!”—2 Pedro 3:11, 12.

13. Ki efekto e urgensia di nos tempu mester tin riba nos manera di pensa i nos estilo di bida?

¹³ Nos manera di pensa i nos estilo di bida mester reflehá nos konvikshon firme ku “mundu ta pasa bai i su deseonan tambe.” (1 Juan 2:17) Ora nos apliká e guia di Beibel, esei lo yuda nos tuma desishonnan sabí relashoná ku nos metanan pa futuro. Por ehèmpel, Hesus a deklará: “Buska promé e reino di Dios i su hustisia, i tur e kosnan aki lo wòrdu añadí na boso.” (Mateo 6:33) E gran kantidat di hóbennan ku ta mustra fe den e palabranan di Hesus dor di traha pa alkansá e ministerio di tempu kompletu ta meresé nos elogio! Otronan—inkluso famianan kompletu—a muda di buena gana pa paisnan kaminda tin un nesesidat urgente pa proklamadónan di Reino.

14. Kon un famia kristian a amplia nan ministerio?

¹⁴ Tuma por ehèmpel un famia kristian di kuater miembro ku a muda for di Merka bai Repúblika Dominikana pa sirbi den un kongregashon na un pueblo di 50.000 habitante. E kongregashon ta konsistí di mas o ménos 130 publikadó di Reino. Pero dia 12 di aprel  2006, rònt di 1.300 persona a asistí na e Konmemorashon di e morto di Kristu! E kunuku den e área ei ta asina “blanku pa wòrdu kosechá” ku den apénas sinku luna, e tata, mama, yu hòmber i yu muhé aki tabata kondusiendo huntu un total di 30 estudio di Beibel. (Juan 4:35) E tata a splika: “E kongregashon tin 30 ruman hòmber i muhé ku a muda bin aki pa yuda. Mas o ménos 20 di nan ta di Merka, miéntras ku e otronan ta bini di Bahámas, Canada, Italia, Nueva Zelandia i Spaña. Nan ta yega ansioso pa partisipá den sirbishi i nan ta kousa un tremendo impakto riba e entusiasmo di e rumannan lokal.”

15. Ki bendishon bo a risibí pa motibu ku bo a pone interesnan di Reino na promé lugá den bo bida?

¹⁵ Klaru ku hopi ruman no ta den e posishon pa muda bai un otro pais pa sirbi kaminda tin mas nesesidat. Pero esnan ku sí por—òf ku por ahustá nan sirkunstansianan pa hasi nan mes disponibel—sigur lo risibí hopi bendishon ora nan ta partisipá den e aspekto aki di e ministerio. I sin importá unda abo ta sirbi, no pèrdè chèns di eksperensiá e goso ku lo bo por haña ora bo ta sirbi Yehova ku tur bo forsa. Si bo pone interesnan di Reino na promé lugá den bo bida, Yehova ta primintí di “basha asina tantu bendishon, ku [lo bo] no tin sufisiente lugá pa konten’é.”—Malakias 3:10.

Benefisiá di e Guia di Yehova

16. Ki benefisio nos ta haña ora nos laga e deklarashonnan di Dios guia nos?

¹⁶ Manera nos a mira, e deklarashonnan di Yehova ta guia nos den dos manera ku ta relashoná ku otro. Nan ta sirbi komo un lampi pa nos pia, lokual ta yuda nos move padilanti den e direkshon korekto i guia nos ora nos tin ku tuma desishon. I nan ta iluminá nos kaminda, lokual ta permití nos mira bon kla kiko tin den futuro. Esei na su turno ta yuda nos sigui e spièrtamentu di Pedro: “Faha e hepnan di boso mente, sea sobrio, fiha boso speransa kompletamente riba e grasia ku lo wòrdu tresí na boso na e revelashon di Hesukristu.”—1 Pedro 1:13.

17. Kon un estudio di Beibel lo yuda bo sigui e guia di Dios?

¹⁷ No tin duda ku Yehova ta duna guia. E pregunta ta: Abo lo someté bo na dje? Pa bo por komprondé e guia ku Yehova ta duna, sea determiná pa lesa un porshon di Beibel tur dia. Meditá riba loke bo ta lesa, trata na persibí Yehova su boluntat den asuntunan i pensa riba e diferente maneranan ku bo por apliká e informashon den bo bida. (1 Timoteo 4:15) Anto usa bo “fakultat di rasoná” ora bo ta tuma desishon.—Romanonan 12:1, NW.

18. Ki bendishon nos lo risibí ora nos laga e Palabra di Dios guia nos?

¹⁸ E prinsipionan ku nos ta haña den e Palabra di Dios por iluminá nos i duna nos e guia ku nos tin mester ora nos ta tuma desishon tokante e kaminda korekto ku nos tin ku sigui. Nos por tin konfiansa ku e deklarashonnan di Yehova registrá den su Palabra ta hasi e “hende simpel bira sabí.” (Salmo 19:7) Ora nos laga Beibel guia nos, nos lo haña e bendishon di un konsenshi limpi i e satisfakshon di ta agradá Yehova. (1 Timoteo 1:18, 19) Si kada dia nos laga e palabranan di Dios guia nos pasonan, Yehova lo rekompensá nos finalmente ku e bendishon di bida eterno.—Juan 17:3.

Bo Ta Kòrda?

• Pakiko ta importante pa laga Yehova Dios guia nos pasonan?

• Den ki manera e deklarashonnan di Dios por ta un lampi pa nos pia?

• Kon e deklarashonnan di Dios por ta un lus pa nos kaminda?

• Kon estudio di Beibel lo yuda nos sigui e guia di Dios?

[Preguntanan di Estudio]

[Plachi na página 15]

Ki ora lo no ta sabí pa asosiá ku un persona ku no ta kreyente?

[Plachi na página 16]

Hesus su amigunan íntimo tabata hende ku a hasi e boluntat di Yehova

[Plachi na página 17]

Nos estilo di bida ta demostrá ku nos ta pone interesnan di Reino na promé lugá?