Bo Tin Miedu di Futuro?

TIN hopi motibu pakiko hende tin miedu. Por ehèmpel, algun hende tin miedu di loke ta spera planeta Tera. E revista Time di 3 di aprel 2006 a bisa: “Ola di kalor, tormenta, inundashon, kandela, dirtimentu masal di gletsjer, tur ta duna indikashon ku e klima mundial a daña konsiderablemente.”

Na mei 2002, e Programa di Nashonnan Uní pa Medio Ambiente a publiká un rapòrt titulá “Perspektiva di Medio Ambiente di Mundu-3.” Mas ku 1.000 hende a koperá pa traha e rapòrt aki. Segun un informe di notisia, e rapòrt a bisa: “E planeta ta na un punto krusial ya ku e eskohonan ku hende ta hasi awe ta afektando seriamente selva, oséano, riu, seru, bida den naturalesa i otro sistemanan pa sostené bida riba kua e generashonnan aktual i di futuro ta dependé.”

E estado aktual di e medio ambiente di e planeta aki ta apénas un di e tantísimo kousanan di ansiedat. Hende na tur parti di mundu ta biba awor ku miedu di atake terorista. E supdirektor di e agensia di spionahe prinsipal di Canada a bisa: “Nos ta pèrdè soño anochi preokupando pa e menasanan ku nos no sa di dje.” De echo, djis sinta wak notisia di anochi na televishon por ansha nos!

Hopi hende adulto ku ta traha duru tin miedu di pèrdè nan empleo. Retironan, seramentu di fábrika, kompetensia na trabou i demasiado eksigensia di parti di doñonan di trabou por krea un klima di insiguridat laboral. Tinernan tin miedu ku nan pareunan ta rechasá nan. Muchanan chikí podisé tin miedu ku nan mayornan no ta ègt stima nan. Anto kiko nan ta pensa di e kondishonnan den e mundu rònt di nan? Un mama preokupá a bisa:  “Pa mucha chikí i inosente, e mundu pafó di nan kas tin biaha mester ta parse un lugá grandi spantoso.” Ademas, hopi mayor ta preokupá pa e efekto ku e degenerashon moral di mundu tin riba nan sernan kerí, spesialmente nan yunan.

Hende di edat hopi biaha tin miedu di kai for di trapi òf di ser atraká riba kaya. Sí, nan “tin miedu di un lugá haltu i di terornan riba kaminda.” (Eklesiastés 12:5) Hende tin miedu di haña un malesa grave. Informenan tokante vírusnan mortal di grip, kanser i malesanan kontagioso por duna nos miedu di haña un malesa nobo i straño ku lo por manka òf mata nos òf nos famia. De echo, ora nos mira hende salú i yen di energia bira malu i débil, ta difísil pa nos keda sin preokupá ku e mesun kos lo por pasa ku nos òf ku nos sernan kerí. Anto esta tristu pa wak un persona enfermo den su kara i mira ku su wowonan no ta reflehá ningun speransa!

Ku asina tantu motibu pa tene miedu, a sobra un motibu válido pa ta optimista tokante futuro? Tin algu ku por yuda nos mantené un punto di bista positivo? E siguiente artíkulo lo kontestá e preguntanan aki.

[Rekonosementu pa Potrèt na página 3]

© Jeroen Oerlemans/​Panos Pictures