E Resurekshon Ta Real pa Bo?
E Resurekshon Ta Real pa Bo?
“Siguramente lo tin un resurekshon.”—ECHONAN 24:15.
1. Pakiko morto ta parse un kos sigur?
“DEN e mundu aki, e úniko kosnan sigur ta morto i belasting.” Tin hende ta haña e komentario ei, ku e estadista merikano Benjamin Franklin a skirbi na 1789, masha asertá. Sin embargo, hopi hende desonrado ta evadí belasting. Morto ta parse muchu mas inevitabel. Riba nos mes, ningun di nos por evit’é. Tardi òf trempan e ta haña nos na kaminda. Ku un hamber insasiabel, Seol—e graf komun di humanidat—ta devorá nos sernan kerí. (Proverbionan 27:20) Pero laga nos konsiderá un pensamentu ku ta duna konsuelo.
2, 3. (a) Dikon morto no ta dje inevitabel ei manera hopi hende ta kere? (b) Kiko nos lo konsiderá den e artíkulo aki?
2 Yehova su Palabra ta duna e speransa sigur di resurekshon, esta, ku hende lo ser lantá na bida atrobe. No ta trata aki di djis un soño, i niun poder den universo por stroba Yehova di hasi e speransa aki un realidat. Sin embargo, awe hopi hende no ta realisá ku pa algun persona morto no ta inevitabel. Dikon nò? Pasobra un kantidat no-spesifiká di hende—un “multitut grandi”—lo sobrebibí “e gran tribulashon” ku lo bini pronto. (Revelashon 7:9, 10, 14) Nan lo sigui biba despues di esei, ku e chèns di haña bida eterno. Pues morto no ta algu inevitabel pa nan. Es mas, ‘morto lo wòrdu destruí.’—1 Korintionan 15:26.
3 Nos mester ta mes sigur di e resurekshon ku apòstel Pablo tabata. El a bisa: “Siguramente lo tin un resurekshon di tantu e hustunan komo e malbadonan.” (Echonan 24:15) Laga nos konsiderá tres pregunta relashoná ku resurekshon. Di promé, kiko ta hasi e speransa aki asina sigur? Di dos, kon abo personalmente por haña konsuelo den e speransa di resurekshon? Di tres, ki efekto e speransa aki por tin riba e manera ku bo ta biba aworakí?
E Resurekshon Ta Algu Sigur
4. Kon e resurekshon ta para sentral den e propósito di Yehova?
4 Tin vários faktor ku ta hasi e resurekshon algu sigur. Na promé lugá, e ta para sentral den e propósito di Yehova. Kòrda ku ta Satanas a pone hende kai den piká, lokual a hiba inevitablemente na nan morto. P’esei Hesus a bisa di Satanas: “E tabata un matadó for di prinsipio.” (Juan 8:44) Pero Yehova a primintí ku su organisashon den shelu semehante na un esposa—su “muhé”—lo a produsí un “simia” ku lo heridá kabes di e “kolebra di antigwedat,” likidando Satanas kompletamente. (Génesis 3:1-6, 15; Revelashon 12:9, 10; 20:10) Segun ku Yehova a revelá gradualmente su propósito ku a enbolbé e Simia Mesiániko ei, a bira opvio ku e Simia lo a bai mas aleu ku solamente destruí Satanas. E Palabra di Dios ta bisa: “E Yu di Dios a aparesé pa e propósito aki, pa e destruí e obranan di Diabel.” (1 Juan 3:8) Un di e obranan prinsipal di Satanas ku Yehova tin intenshon di eliminá, òf destruí, pa medio di Hesukristu ta morto kousá pa e piká ku nos a heredá for di Adam. En konekshon ku esaki, e sakrifisio di reskate di Hesus i e resurekshon ta sumamente importante.—Echonan 2:22-24; Romanonan 6:23.
5. Pakiko e resurekshon lo glorifiká e nòmber di Yehova?
5 Yehova ta determiná pa glorifiká su nòmber sagrado. Satanas a difamá e nòmber di Dios i a fomentá mentira. El a gaña ora el a bisa ku Adam ku Eva ‘sigur lo no a muri’ si nan a kome di e fruta ku Dios a prohibí. (Génesis 2:16, 17; 3:4) Djei padilanti, Satanas a sigui fomentá e tipo di mentiranan ei, manera e doktrina falsu ku un hende su alma ta sigui biba despues ku su kurpa muri. Sin embargo, pa medio di e resurekshon, Yehova lo eksponé tur e mentiranan ei pa loke nan ta. Lo e demostrá di unabes pa semper ku ta e so por konserbá i restorá bida.
6, 7. Kiko ta Yehova su sintimentunan tokante e resurekshon di hende, i kon nos por sa esei?
6 Yehova ta anhelá pa efektuá e resurekshon. Beibel ta mustra bon kla kiko ta Yehova su sintimentunan al respekto. Por ehèmpel, konsiderá e palabranan inspirá aki di Jòb, un hòmber fiel: “Si un hende muri, lo e bolbe biba? Tur e dianan di mi lucha [“sirbishi obligatorio,” NW] lo mi spera, te ora mi liberashon bin. Abo lo yama, i ami lo kontestá bo; lo bo anhelá na e obra di bo mannan.” (Jòb 14:14, 15) Kiko e palabranan ei ta nifiká?
7 Jòb tabata sa ku ora e muri, lo e tabatin ku warda pa un tempu drumí den morto. El a mira esei komo un “sirbishi obligatorio,” un periodo di tempu ku lo el a haña su mes obligá ta warda te ora su liberashon bini. Pa Jòb, e liberashon ei tabata un kos sigur. E tabata konvensí ku su alivio lo bini. Dikon? Pasobra e tabata sa di Yehova su sintimentunan. Yehova lo a “anhelá” pa mira su fiel sirbidó atrobe. Sí, Dios tin masha deseo di trese tur persona hustu bèk na bida. Ademas, Yehova lo duna otro hende tambe un oportunidat pa biba pa semper den Paradeis riba tera. (Lukas 23:43; Juan 5:28, 29) Siendo ku ta Dios su boluntat pa kumpli ku e propósito ei, ken por par’é?
8. Kon Yehova a duna “un garantia” di nos speransa pa futuro?
8 E resurekshon di Hesus ta un garantia di nos speransa pa futuro. Ora Pablo a duna un diskurso na Atenas, el a deklará: “[Dios] a fiha un dia den kua e lo husga mundu ku hustisia pa medio di un hòmber, kende el a apuntá, dunando prueba [“un garantia,” NW] na tur hende dor di lant’é for di e mortonan.” (Echonan 17:31) Algun di e hendenan ku tabata skucha Pablo a hasi bofon ora nan a tende di un resurekshon. Pero tabatin otronan ku a bira kreyente. Podisé e idea ku tabatin un garantia tras di e speransa aki a hala nan atenshon. Ora Yehova a resusitá Hesus, El a efektuá e milager di mas grandi ku a yega di tuma lugá. El a lanta su Yu for di morto komo un spiritu poderoso. (1 Pedro 3:18) Hesus resusitá tabata asta mas poderoso ainda ku promé ku el a bira hende. Siendo un persona inmortal i ku solamente Yehova komo mas poderoso kuné, Hesus awor ta den un posishon pa kumpli ku e asignashonnan maravioso ku su Tata ta dun’é. Hesus ta e medio ku Yehova ta usa pa efektuá tur otro resurekshon, sea ta pa bida den shelu òf pa bida riba tera. Hesus mes a bisa: “Ami ta e resurekshon i e bida.” (Juan 5:25; 11:25) Dor di resusitá su Yu, Yehova a garantisá e speransanan ei pa tur hende fiel.
9. Kon e registro bíbliko ta konfirmá ku e resurekshon ta un realidat?
9 Tabatin testigu okular di kasonan di resurekshon i esakinan ta registrá den e Palabra di Dios. Beibel ta kontené deskripshonnan detayá di ocho resurekshon di personanan ku a ser lantá bèk komo hende riba tera. E milagernan aki no a tuma lugá den sekreto sino públikamente, hopi bes den presensia di testigu okular. Hesus a resusitá Lázaro, kende tabata morto pa kuater dia, dilanti un multitut di hende ku tabata yora su morto. Sin duda, entre nan tabatin Lázaro su famia-, amigu- i bisiñanan. E evidensia aki di ku ta Dios a manda Hesus tabata asina konvinsente ku Hesus su enemigunan religioso nunka no a nenga ku e resurekshon ei a tuma lugá. Mas bien, nan a traha kòmplòt pa mata no solamente Hesus sino tambe Lázaro! (Juan 11:17-44, 53; 12:9-11) Sí, nos por tin konfiansa ku e resurekshon ta algu sigur. Dios a duna nos un registro di resurekshonnan di pasado pa konsolá nos i edifiká nos fe.
Haña Konsuelo den e Speransa di Resurekshon
10. Kiko lo yuda nos haña konsuelo for di e relatonan bíbliko di resurekshon?
10 Bo ta anhelá pa haña konsuelo ora bo ta konfrontá morto? E relatonan bíbliko tokante resurekshon por ta un fuente sigur di konsuelo pa bo. Ora bo lesa e relatonan ei, meditá riba nan i visualisá e susesonan, e speransa di resurekshon por bira mas real pa bo. (Romanonan 15:4) Nan no ta djis un par di kuenta. Ta kosnan ku di bèrdat a sosodé ku hende meskos ku nos, ku a biba den un tempu i un lugá ku di bèrdat a eksistí. Laga nos enfoká brevemente riba un di nan, e promé resurekshon registrá den Beibel.
11, 12. (a) Ki tragedia un biuda di Sarepta a hañ’é kuné, i kon el a reakshoná na promé instante? (b) Yehova a duna su profeta Elias poder pa hasi kiko pa e biuda?
11 Imaginá bo e esena. Profeta Elias tabatin algun siman komo huéspet di un biuda di Sarepta. E tabata keda den un kamber ariba. Tabata un tempu di tristesa. Sekura i hamber a asotá e region, i hopi hende tabata muriendo. Pa rekompensá e fe di e biuda humilde aki Yehova ya a usa Elias pa hasi un milager ku a ekstendé pa un periodo largu. E biuda ku su yu hòmber chikitu tabata a punto di kuminsá sufri di hamber, ya ku nan tabatin nèt sufisiente pa un último kuminda. Ma Dios a duna Elias poder pa hasi un milager di manera ku nan suministro di hariña i zeta no a kaba. Pero awor e biuda a hañ’é ku un tragedia. Diripiente su yu a bira malu i djis despues a stòp di hala rosea. E biuda a keda tur kibrá! Ta hopi difísil kaba pa biba sin e fortalesa i apoyo di un esposo, anto awor el a pèrdè su úniko yu. Den su tristesa el a asta kulpa Elias i esaki su Dios, Yehova! Kiko e profeta lo a bai hasi awor?
12 Elias no a reprendé e biuda pa su akusashon falsu. En bes di esei, el a bis’é: “Duna mi bo yu.” Despues ku Elias a karga e mucha morto hiba den e kamber ariba, el a pidi Dios bes tras bes den orashon pa bida di e mucha bolbe den dje. Finalmente, Yehova a aktua! Imaginá bo e goso riba kara di Elias ora el a mira e mucha su pechu reis pa hala rosea. Wowonan di e mucha a habri i tabata bria ku bida. Elias a baha ku e mucha, a hib’é serka su mama i a bis’é: “Mira, bo yu ta bibu!” No tabatin palabra pa deskribí e biuda su goso. El a bisa: “Awor mi sa ku bo ta un hòmber di Dios, i ku e palabra di SEÑOR den bo boka ta bèrdat.” (1 Reinan 17:8-24) Su fe den Yehova i den su representante a bira mas fuerte ku nunka.
13. Pakiko e relato kaminda Elias a resusitá e yu di un biuda ta duna nos konsuelo awe?
13 Ora bo meditá riba e relato ei, sigur e ta duna bo un gran konsuelo. Ta hopi bisto ku Yehova tin poder pa derotá nos enemigu morto! Djis imaginá bo e dia ora ku míles i míles di hende mas sinti e goso di e biuda ei durante e resurekshon general di e mortonan! Den shelu tambe lo tin gran goso ora Yehova gustosamente dirigí su Yu pa efektuá resurekshon na eskala mundial. (Juan 5:28, 29) Bo a pèrdè un ser kerí den morto? Ta ki maravioso pa sa ku Yehova por i lo trese e mortonan bèk na bida!
Bo Speransa i Bo Manera di Biba Awor
14. Ki efekto e speransa di resurekshon por tin riba bo bida?
14 Ki efekto e speransa di resurekshon por tin riba e manera ku bo ta biba aworakí? Ora bo haña bo ku kontratempu, difikultat, persekushon òf peliger, e speransa aki por fortalesé bo. Satanas ke pa bo tin asina tantu miedu di morto ku lo bo ta dispuesto pa sakrifiká bo integridat pa algun promesa bashí di siguridat. Kòrda ku Satanas a bisa Yehova: “Tur loke un hende tin e lo duna pa su bida.” (Jòb 2:4) Ora Satanas a bisa esei, el a kalumniá nos tur; abo tambe. Di bèrdat lo bo stòp di sirbi Dios si bo bida ta na peliger? Ora bo meditá riba e speransa di resurekshon, bo por fortifiká bo determinashon pa sigui hasi e boluntat di bo Tata selestial.
15. Kon e palabranan di Hesus na Mateo 10:28 por duna nos konsuelo ora di peliger?
15 Hesus a bisa: “No tene miedu di esnan ku ta mata e kurpa, ma ku no por mata e alma; ma mas bien tene miedu di esun ku por destruí tantu alma komo kurpa den [“Gehena,” NW].” (Mateo 10:28) Nos no tin nodi teme Satanas ni su representantenan humano. Ta bèrdat ku kisas algun di nan tin e poder pa kousa daño, asta morto. Sin embargo, asta e pió kos ku nan por hasi lo ta solamente temporal. Yehova por i lo eliminá kualke daño kousá na su sirbidónan fiel; si mester, lo e resusitá nan. Ta Yehova so ta digno di nos temor, gran atmirashon i rèspèt profundo. E so tin e poder pa kita bida i tur speransa pa bida den futuro, destruyendo tantu alma komo kurpa den Gehena. Felismente, Yehova no ke pa esei sosodé ku bo. (2 Pedro 3:9) Pa motibu di e speransa di resurekshon, nos komo sirbidó di Dios por ta semper sigur ku nos ta safe. Tanten ku nos ta fiel, nos tin bida eterno nos dilanti, i no tin nada ku Satanas òf su kompinchinan por hasi pa stroba esei.—Salmo 118:6; Hebreonan 13:6.
16. Ki efekto nos punto di bista tin riba e prioridatnan ku nos ta fiha?
16 Si e speransa di resurekshon ta real pa nos, e por kambia nos manera di mira bida. Nos ta realisá ku ‘sea nos biba òf nos muri, ta di Yehova nos ta.’ (Romanonan 14:7, 8) P’esei ora nos ta fiha prioridat, nos ta apliká e konseho di Pablo: “No sea konforme e mundu aki, ma sea transformá pa medio di e renobamentu di boso mente, pa boso por komprobá kiko ta e bon i agradabel i perfekto boluntat di Dios.” (Romanonan 12:2) Hopi hende ta trata frenétikamente di satisfasé tur deseo, tur ambishon, tur antoho. Den nan bista, bida ta masha kòrtiku i p’esei nan ta parse kasi desesperá den nan búskeda di plaser. Te na ora mes nan tin un forma di adorashon, sigur e no ta na armonia ku e “perfekto boluntat di Dios.”
17, 18. (a) Kon e Palabra di Yehova ta rekonosé ku bida humano ta kòrtiku, pero kiko Dios ke pa nos? (b) Kiko ta motivá nos pa alabá Yehova tur dia?
17 En bèrdat, bida ta kòrtiku. “Un djis el a pasa, i nos ta bula bai,” podisé den un 70 òf 80 aña asina. (Salmo 90:10) Hende ta bini i bai manera yerba bèrdè, manera un sombra ku ta pasa, manera un rosea. (Salmo 103:15; 144:3, 4) Pero e propósito di Dios no tabata pa nos pasa un par di dékada pa krese i gana sierto sabiduria i eksperensia, pa despues pasa e siguiente par di dékadanan bayendo atras, bira malu i muri. Yehova a krea hende ku e deseo di biba pa semper. Beibel ta bisa nos ku “el a pone eternidat den nan kurason.” (Eklesiastés 3:11) Akaso Dios ta asina kruel pa duna nos e deseo ei i despues stroba nos di kumpli kuné? Nò, pasobra “Dios ta amor.” (1 Juan 4:8) Lo e usa e resurekshon pa hasi bida eterno posibel pa hende ku a muri.
18 Debí na e speransa di resurekshon, nos por tin un futuro sigur. Nos no tin nodi di ansha, kore kabes di gai pa alkansá nos pleno potensial aworakí. Nos no tin nodi “hasi uso kompletu” di e mundu muribundo aki. (1 Korintionan 7:29-31; 1 Juan 2:17) Distinto di hende ku no tin berdadero speransa, nos tin e maravioso bendishon di sa ku si nos keda fiel na Yehova Dios, nos lo tin henter eternidat pa alab’é i disfrutá di bida. Laga nos hasi tur nos esfuerso anto pa tur dia alabá Yehova, kende ta hasi e speransa di resurekshon un kos sigur!
Kon Lo Bo Kontestá?
• Kon nos lo mester mira e resurekshon?
• Ki faktornan ta hasi e speransa di resurekshon un kos sigur?
• Kon bo por saka konsuelo for di e speransa di resurekshon?
• Ki efekto e speransa di resurekshon por tin riba e manera ku bo ta biba?
[Preguntanan di Estudio]
[Plachi na página 28]
Jòb tabata sa ku Yehova ta anhelá pa resusitá e hustunan
[Plachi na página 29]
“Mira, bo yu ta bibu!”