Pakiko Asisti na Reunionnan Kristian?

CHRISTINE su esposo a bai lag’é inesperadamente despues di 20 aña kasá. Christine a hañ’é ta lanta shete yu hòmber i un yu muhé su so. Nan tabatin entre 7 pa 18 aña. El a konta: “Awor ta ami so mester a tuma tur desishon importante. E responsabilidat grandi ei a deskurashá mi i mi tabatin masha gana di haña poko sosten i guia.” Unda el a haña e yudansa nesesario?

Christine a deklará: “E reunionnan kristian tabata un salbabida pa mi i pa mi famia. Na e reunionnan, nos a haña sosten di nos amigunan i guia for di e Palabra di Dios. Asistensia regular na e reunionnan a yuda nos den tur aspekto importante di nos bida di famia.”

Durante e “tempunan trabahoso” aki, nos tur ta enfrentá vários prueba. (2 Timoteo 3:1) Kisas bo tambe, meskos ku Christine, ta mira e reunionnan di Testigunan di Yehova komo un salbabida spiritual, un parti masha importante di bo adorashon na Yehova. Muy probablemente, e sinku reunionnan di kongregashon programá semanalmente ta stimulá bo amor pa Dios, ta fortifiká bo speransa pa futuro i ta duna bo guia basá riba Beibel pa trata ku vários prueba.

Sin embargo, pa algun ruman ta difísil pa asistí na e reunionnan ku regularidat. Nan ta morto kansá na final di dia, i e idea so ku nan tin ku bai bisti paña apropiá i sali riba kaya pa bai reunion ta parse demasiado. Otro rumannan ta konstatá ku hopi biaha nan orario di trabou ta stroba nan di asistí na reunion. Pa asistí na tur e reunionnan, nan lo tin ku konformá nan mes ku ménos pago òf kore e riesgo di pèrdè nan trabou. Podisé algun ruman ta falta reunion pasobra nan ta haña ku sierto tipo di rekreo lo ta mas refreskante ku asosiá ku e kongregashon.

Pues, ki motibunan konvinsente tin pa asistí na e reunionnan kristian? Kon bo por hasi e reunionnan ei personalmente refreskante? Pa yuda kontestá e preguntanan aki, laga nos analisá Hesus su invitashon kaluroso ku nos ta haña na Mateo 11:28-30. El a deklará: “Bin serka mi tur ku ta kansá i kargá, i lo mi duna boso sosiegu [òf, “refreskamentu,” NW]. Tuma mi yugo riba boso, i siña di mi, pasobra mi ta mansu i humilde di kurason; i boso lo haña sosiegu pa boso alma. Pasobra mi yugo ta suave i mi karga ta lihé.”

“Bin Serka Mi”

Hesus a bisa: “Bin serka mi.” Un manera pa hasi kaso di e invitashon ei ta di asistí ku regularidat na e reunionnan. Tin bon motibu pa ta presente,  pasobra na un otro okashon Hesus a deklará: “Kaminda dos òf tres ta reuní den mi nòmber, ei mi ta meimei di nan.”—Mateo 18:20.

Den promé siglo, Hesus personalmente a invitá vários hende pa siguié. El a duna nan pues e oportunidat di gosa di asosiashon íntimo kuné. Algun a aseptá mesora. (Mateo 4:18-22) Otronan a laga kosnan manera interes material stroba nan di aseptá e invitashon ei. (Marko 10:21, 22; Lukas 9:57-62) Na esnan ku sí a siguié, Hesus a ekspresá e siguiente garantia: “Boso no a skohe mi, ma ami a skohe boso.”—Juan 15:16.

Despues di Kristu su morto i resurekshon, e no tabata físikamente presente mas serka su disipelnan. Pero tòg e tabata ku nan ainda den e sentido ku el a dirigí nan aktividat i a opservá nan reakshon riba su konseho. Por ehèmpel, un 70 aña despues di su resurekshon, el a duna konseho i animashon na shete kongregashon na Asia Menor. Su komentarionan a mustra ku e tabata bon na haltura di tantu e puntonan fuerte komo esnan débil di e personanan den e kongregashonnan ei.—Revelashon 2:1–3:22.

Te ainda Hesus ta profundamente interesá den kada un di su disipelnan. El a primintí: “Mira, mi ta ku boso semper, te na fin di mundu.” (Mateo 28:20) Nos ta bibando awor den e tempu di fin, i p’esei nos tin ku hasi kaso di e invitashon ku Hesus a ekstendé pa siguié. Te na sierto grado, pa nos por hasi esei nos mester asistí na reunion ku regularidat. Hesus ke pa nos skuch’é i “wòrdu siñá den dje” mediante estudio- i diskursonan basá riba Beibel, lokual ta un rasgo regular di e reunionnan. (Efesionan 4:20, 21) Abo ta hasiendo kaso di Hesus su invitashon: “Bin serka mi”?

Boso “Ku Ta Kansá i Kargá”

Un motibu masha importante pa asistí na e reunionnan kristian ta pa haña animashon. (Hebreonan 10:24, 25) Sin duda, hopi di nos ta “kansá i kargá” den vários manera. Kisas bo ta kargá ku preokupashonnan personal, manera problema di salú. Na e reunionnan kristian, bo por disfrutá di un interkambio di estímulo. (Romanonan 1:11, 12) Por ehèmpel, lo bo tende komentarionan spiritualmente edifikante, lo bo ser rekordá di bo speransa basá riba Beibel, i lo bo opservá e fe di otro rumannan ku ta wanta prueba. Tur esaki por yuda bo trata ku bo problemanan i mira nan den un manera balansá.

Konsiderá e siguiente komentario di un ruman muhé kristian ku tin un malesa króniko ku ta strob’é den su aktividatnan. El a splika: “Mi malesa ta pone ku kada bes mi mester keda un par di dia den hospital. Despues di un estadia asina na hospital ta un poko difísil pa bai reunion, pero ei ta mi lugá. E kalor i amor di e rumannan ta restorá mi goso, i e siñansa i instrukshon ku mi ta risibí di Yehova i Hesus ta duna mi bida propósito.”

“Mi Yugo Ta Suave i Mi Karga Ta Lihé”

Tuma nota ku den e pasashi ku nos ta analisando, Hesus di: “Siña di mi.” Ora nos siña for di Hesus, nos ta bira su disipel, i ora nos hasi un dedikashon na Dios i batisá nos ta tuma su yugo. (Mateo 28:19, 20) Pa nos por keda disipel di Hesus ta masha importante pa nos partisipá ku regularidat den e reunionnan. Dikon? Pasobra ta na e reunionnan kristian nos ta siña tokante Hesus, su siñansanan i su métodonan.

Kiko ta e karga ku Kristu ke pa nos tuma riba nos? Esei ta e karga ku e mes a tuma riba dje, esta, e privilegio di hasi e boluntat di Dios. (Juan 4:34; 15:8) Nos tin ku hasi esfuerso pa obedesé e mandamentunan di Dios, pero e karga aki no ta muchu pisá. Lo e por parse pisá si nos ta purba karg’é riba nos mes forsa. Sin embargo, si nos ta pidi den orashon p’e spiritu di Dios i ta alimentá nos  mes ku e kuminda spiritual presentá na e reunionnan, nos lo haña serka Dios “e poder mas ayá di loke ta normal.” (2 Korintionan 4:7, NW) Ora nos ta prepará pa e reunionnan i ta partisipá den nan, nos amor pa Yehova ta bira mas i mas grandi. Anto si nos ta ser motivá pa amor, e mandamentunan di Dios “no ta pisá.”—1 Juan 5:3.

Hende en general ta konfrontá problemanan manera kon pa gana nan pan di kada dia, kon pa trata ku asuntunan di salú i problemanan personal. Sin embargo, pa trata ku nan eksitosamente nos no ta stèns simplemente riba sabiduria humano. E reunionnan di kongregashon ta yuda nos pa stòp di “preokupá,” pasobra Yehova ta satisfasé nos nesesidatnan i ta yuda nos trata ku éksito ku problema. (Mateo 6:25-33) De echo, e reunionnan kristian ta un manera ku Dios ta ekspresá su amor pa nos.

“Mi Ta Mansu i Humilde di Kurason”

Hesus tabatin e kustumber di bishitá snoa, kaminda nan a konsiderá e Palabra di Dios. Na un okashon asina, Hesus a tuma e ròl di Isaias i a lesa: “E spiritu di SEÑOR ta riba mi, pasobra el a ungi mi pa prediká evangelio na e pobernan; el a manda mi pa proklamá libertat na e prezunan, i restorashon di bista na e siegunan, pa duna libertat na esnan ku ta wòrdu oprimí, pa proklamá e aña agradabel di SEÑOR.” (Lukas 4:16, 18, 19) Esta emoshonante lo tabata pa tende Hesus apliká e palabranan ei bisando: “Awe e Skritura aki a keda kumplí boso dilanti”!—Lukas 4:21.

Hesus e “wardadó prinsipal” ta mansu, i te ainda e ta supervisá e kuido spiritual di su siguidónan. (1 Pedro 5:1-4) Bou di su guia, “e esklabo fiel i prudente” a nombra hòmbernan komo wardadó den e kongregashonnan di Testigunan di Yehova rònt mundu. (Mateo 24:45-47; Tito 1:5-9) E hòmbernan aki ta “pastoriá e [kongregashon] di Dios” ku suavedat i ta pone un bon ehèmpel dor di asistí na e reunionnan ku regularidat. Abo por demostrá bo apresio pa e ‘donnan den hende’ aki dor di ta presente na e reunionnan, kaminda bo por animá otro rumannan ku bo presensia i partisipashon.—Echonan 15:30-33; 20:28; Efesionan 4:8, 11, 12.

‘Boso Lo Haña Refreskamentu pa Boso Alma’

Ora bo ta asistí na e reunionnan kristian, kon bo por hasi sigur ku e okashonnan aki ta realmente refreskante? Un manera ta dor di apliká e konseho di Hesus: “Pone bon atenshon kon boso ta skucha.” (Lukas 8:18) Hende ku realmente tabata deseá di siña a presta bon atenshon na Hesus. Nan a pidié splika su ilustrashonnan i, komo resultado, nan a ser rekompensá ku un komprondementu mas profundo.—Mateo 13:10-16.

Bo por imitá e personanan ei ku tabatin hamber den sentido spiritual dor di presta bon atenshon na e diskursonan na nos reunionnan. (Mateo 5:3, 6, NW) Pa bo por konsentrá bon, trata na sigui e liña di rasonamentu di e oradó. Mentalmente, hasi bo mes preguntanan manera: ‘Kon mi por apliká e informashon aki den mi bida? Den ki manera mi por us’é pa yuda otro hende? Kon mi por splika òf ilustrá e punto aki?’ Ademas, buska e tekstonan bíbliko ku e oradó ta usa pa apoyá e puntonan klave. Mas bo presta atenshon na kon bo ta skucha, mas refreskante e reunionnan lo bira.

Despues di reunion, papia tokante e programa ku otro hende. Enfoká riba e informashon i riba kon lo bo por aplik’é. Kòmbersashonnan edifikante ta hasi e reunionnan masha refreskante.

Definitivamente anto nos tin bon motibu pa reuní huntu. Despues di repasá e benefisionan ku nos a kaba di trata, pakiko no puntra bo mes: ‘Kon ami ta hasiendo kaso di Hesus su invitashon: “Bin serka mi”?’

[Plachinan na página 11]

Otro aktividatnan ta stroba bo di asistí na reunion?