Pakiko Tur Sufrimentu Lo Kaba Pronto
Pakiko Tur Sufrimentu Lo Kaba Pronto
“E Baranka! Su obra ta perfekto.”—DEUTERONOMIO 32:4.
1, 2. (a) Pakiko bo ta karga e speransa di biba pa semper? (b) Kiko ta stroba hopi hende di kere den e Dios ku ta primintí kosnan maravioso pa futuro?
BO GUSTA imaginá bo kon bida den Paradeis lo ta? Kisas bo ta mira bo mes ta eksplorá e planeta maravioso aki i siña tokante e variedat kasi sin límite di kosnan bibu ku tin riba dje. Òf tal bes bo sa meditá riba e satisfakshon ku lo bo sinti segun ku bo ta traha huntu ku otro hende pa kuida tera i yuda transform’é den un parke mundial. Òf podisé bo sa pensa riba e talentonan ku lo bo por desaroyá den arte, arkitektura, músika òf otro aktividatnan pa kua bo no tin tempu den e bida drùk djawe. Sea kual sea e kaso, bo ta karga e speransa di biba loke Beibel ta yama e “bida berdadero,” esta, e bida ku Yehova tabata ke pa nos biba, ku eternidat na bista.—1 Timoteo 6:19.
2 Ta un plaser i un privilegio presioso di por kompartí e speransa bíbliko ei ku otro hende, no ta bèrdat? Sin embargo, hopi hende ta rechasá e speransa ei. Nan ta konsider’é un ilushon, un soño irealista, bon pa hende naïf. Kisas ta asta duru pa nan kere den e Dios ku ta primintí bida eterno den Paradeis. Dikon? Un opstákulo pa algun persona ta loke hopi bes ta ser yamá e problema di maldat. Nan ta haña ku si ta eksistí un Dios ku ta todopoderoso i amoroso, no por tin asina tantu maldat i sufrimentu den e mundu aki. Nan ta rasoná ku no por tin un Dios ku ta tolerá maldat; òf si e ta eksistí mes, sea e no ta todopoderoso òf e no ta interesá den nos. Pa algun hende, e tipo di rasonamentu aki ta zona konvinsente. Un kos ta sigur, Satanas a demostrá di ta un eksperto den siega mente di hende.—2 Korintionan 4:4.
3. Ki pregunta difísil nos por yuda hende kontestá, i pakiko nos ta den un posishon úniko pa hasi esei?
3 Komo Testigu di Yehova, nos ta den un posishon úniko pa yuda hende ku ta ser engañá pa Satanas i pa e sabiduria di e mundu aki. (1 Korintionan 1:20; 3:19) Nos ta komprondé pakiko hopi hende no ta kere den e promesanan di Beibel. E kos ta ku nan no konosé Yehova. Kisas nan no sa su nòmber ni loke e nòmber ei ta nifiká, i probablemente nan no sa nada òf kasi nada di su kualidatnan òf di su reputashon komo kumplidó di su promesanan. Nos sí ta bendishoná ku e konosementu ei. De bes en kuando, ta bon pa nos repasá kon nos por yuda personanan—“tapá ku skuridat den nan komprondementu”—haña kontesta riba un di e preguntanan di mas difísil ku hende sa hasi: “Pakiko Dios ta permití maldat i sufrimentu?” (Efesionan 4:18) Promé, nos lo konsiderá kon nos por pone e base pa kontestá e pregunta ei na un manera satisfaktorio. Despues nos lo konsiderá kon Yehova su kualidatnan ta sali na kla den e manera ku el a atendé e asuntu di maldat.
E Manera Korekto pa Kontestá e Pregunta
4, 5. Kiko ta e promé kos ku nos lo tin ku hasi ora un persona puntra pakiko Dios ta permití sufrimentu? Splika.
4 Ora un hende puntra pakiko Dios ta permití sufrimentu, kon nos ta kontest’é? Kisas nos ta inkliná na bula dun’é un splikashon detayá, kuminsando ku loke a sosodé den e hòfi di Edén. Den algun kaso, esei por ta bon. Pero un palabra di koutela ta na su lugá. Tal bes mester pone un base. (Proverbionan 25:11; Kolosensenan 4:6) Laga nos konsiderá tres punto ku nos lo por usa pa yuda un persona promé ku nos kontestá e pregunta.
5 Di promé, si loke tin e persona hopi molestiá ta e maldat ku ta reina den e mundu aki, probablemente e maldat ei a afektá sea e mes òf su sernan kerí personalmente. P’esei, kisas ta sabí pa kuminsá ku mustra berdadero empatia. Apòstel Pablo a konsehá kristiannan: “Yora ku esnan ku ta yora.” (Romanonan 12:15) Ora nos mustra empatia òf “kompashon,” nos por yega na kurason di e persona. (1 Pedro 3:8) Si e sinti ku nos tin interes den dje, lo e ta mas inkliná na skucha loke nos tin di bisa.
6, 7. Pakiko ta na su lugá pa laga un persona sinsero sa ku ta bon ku el a hasi un pregunta riba un tópiko bíbliko ku tiné molestiá?
6 Di dos, nos por laga e persona sinsero sa ku ta bon ku el a hasi e pregunta aki. Algun hende ta pensa ku e echo ku e tipo di preguntanan aki ta molestiá nan ta un indikashon ku nan no tin fe òf ku nan ta falta Dios rèspèt. Kisas esei ta asta loke un miembro di klero a laga nan komprondé. Sin embargo, esei no nesesariamente ta e kaso. De echo, hende fiel den tempu bíbliko a hasi e mesun tipo di pregunta. Por ehèmpel, e salmista David a puntra: “Pakiko bo ta para leu asina, o SEÑOR? Pakiko bo ta skonde bo mes den tempunan di angustia?” (Salmo 10:1) Di igual manera, profeta Habakuk a puntra: “Te ki tempu, o SEÑOR, lo mi sklama pa yudansa, i abo no ta tende? Mi ta sklama na bo: ‘Violensia!’ Tòg bo no ta salba. Pakiko bo ta hasi mi mira inikidat, i ta hasi mi mira maldat? Sí, destrukshon i violensia ta mi dilanti; tin desunion i pleitu ta lanta.”—Habakuk 1:2, 3.
7 Tabata trata aki di hòmbernan fiel ku tabatin un gran rèspèt pa Dios. Akaso Dios a skual nan pasobra nan a hasi e preguntanan inkietante ei? Al kontrario, Yehova tabata ke pa nan preguntanan sinsero wòrdu registrá den su Palabra. Awe, un persona ku ta sinti su mes molestiá pa e maldat ku ta reina lo por tin asta un hamber spiritual; kisas e ta anhelá pa haña kontesta ku ta Beibel so por duna. Kòrda ku Hesus a papia bon di hende ku tin hamber spiritual, òf ku ta “konsiente di nan nesesidat spiritual.” (Mateo 5:3, NW) Ta realmente un onor pa yuda e personanan aki haña e felisidat ku Hesus a primintí!
8. Ki siñansanan konfuso a pone hende kere ku ta Dios ta responsabel pa sufrimentu, i kon nos por yuda nan?
8 Di tres, kisas nos tin ku yuda e persona komprondé ku no ta Dios ta responsabel pa e maldat ku ta reina den mundu. Hopi hende a ser siñá ku ta Dios ta goberná e mundu aki, ku hopi tempu pasá Dios a predeterminá tur loke ta sosodé ku nos, i ku pa motibunan misterioso i ineksplikabel el a trese sufrimentu pa humanidat. E siñansanan aki ta falsu. Nan ta desonrá Dios i ta lag’é parse komo esun responsabel pa e maldat i sufrimentu ku tin den mundu. Pues nos lo tin ku usa e Palabra di Dios pa rektifiká esei. (2 Timoteo 3:16) No ta Yehova ta e gobernante di e sistema di kosnan korupto aki; ta Satanas e Diabel. (1 Juan 5:19) Yehova no ta predestiná su kriaturanan inteligente; e ta duna kada un e libertat i oportunidat pa skohe entre bon i malu. (Deuteronomio 30:19) I Yehova hamas i nunka ta e fuente di maldat; e ta odia maldat i ta interesá den hende ku ta sufri inhustamente.—Jòb 34:10; Proverbionan 6:16-19; 1 Pedro 5:7.
9. Menshoná algun hèrmènt ku “e esklabo fiel i prudente” a perkurá pa yuda hende komprondé pakiko Yehova Dios ta permití sufrimentu.
9 Unabes bo pone e base ei, lo bo ripará ku bo oyente ta dispuesto pa haña sa pakiko te ainda Dios ta permití sufrimentu. Pa yuda bo den esei, “e esklabo fiel i prudente” a perkurá vários hèrmènt. (Mateo 24:45-47) Por ehèmpel, na e Kongreso di Distrito di aña 2005, “Obedensia na Dios,” a sali un tratado titulá Pronto Tur Sufrimentu Lo Kaba! Nos ke animá bo pa bo familiarisá bo mes ku su kontenido. E buki Kiko Beibel Ta Siña Realmente?, disponibel awor na 157 idioma, tambe ta dediká un kapítulo n’e pregunta importante aki. Hasi bon uso di e publikashonnan aki. Nan ta splika bon kla a base di Beibel kiko tin tras di e kuestion di soberania universal i pakiko Yehova a atendé e desafio ei den e forma ku el a hasié. Kòrda tambe ku segun ku bo ta konsiderá e tópiko aki, bo ta revelando na bo oyente e kampo di konosementu di mas importante ku ta eksistí. Esei ta e konosementu di Yehova i di su kualidatnan maravioso.
Enfoká Riba e Kualidatnan di Yehova
10. Pakiko hopi hende no por kaba di komprondé e echo ku Dios ta permití sufrimentu, i ki konosementu por yuda nan?
10 Segun ku bo ta yuda hende komprondé pakiko Yehova a permití hende goberná nan mes bou di influensia di Satanas, purba hala atenshon na Yehova su kualidatnan maravioso. Hopi hende sa ku Dios ta poderoso; nan sa tende ku e ta wòrdu yamá Dios Todopoderoso. Ma kisas nan no por kaba di komprondé pakiko e no ta usa su gran poder pa pone fin na inhustisia i sufrimentu mesora. Probablemente nan no konosé e otro kualidatnan di Yehova, manera su santidat, hustisia, sabiduria i amor. Yehova ta desplegá e kualidatnan aki na un manera perfekto i balansá. P’esei Beibel ta bisa: “Su obra ta perfekto.” (Deuteronomio 32:4) Kon bo por enfatisá e kualidatnan aki segun ku bo ta kontestá preguntanan ku ta wòrdu hasí hopi biaha tokante e kuestion aki? Laga nos konsiderá un par di ehèmpel.
11, 12. (a) Dikon no tabata posibel pa Adam ku Eva haña pordon ora nan a peka? (b) Dikon Yehova lo no tolerá piká pa semper?
11 Yehova no por a simplemente pordoná Adam ku Eva? Nò, pordon no tabata posibel den nan kaso. Komo hende perfekto, Adam ku Eva a skohe deliberadamente pa rechasá e soberania di Yehova i, na lugá di esei, a aseptá e guia di Satanas. Pues, no ta nada straño ku e rebeldenan no a duna ningun señal di arepentimentu. Sin embargo, ora hende puntra dikon Yehova no a pordoná nan, de fakto nan ta puntrando nan mes dikon Yehova no a simplemente baha su normanan i tolerá piká i rebelion. E kontesta ta enserá un kualidat esensial di Yehova su personalidat, esta, su santidat.
12 Masha hopi biaha Beibel ta enfatisá e santidat di Yehova. Pero lamentablemente, masha poko hende den e mundu korupto aki ta komprondé e kualidat ei. Yehova ta limpi, puru i separá for di tur loke ta pekaminoso. (Isaias 6:3; 59:2) Enkuanto piká, el a perkurá un medio pa ekspiá òf eliminá piká, pero lo e no toler’é pa semper. Si Yehova tabata dispuesto pa tolerá piká pa semper, nos lo no tabatin ningun speransa pa futuro. (Proverbionan 14:12) Na Yehova su debido tempu, lo e trese henter kreashon bèk den un kondishon santu. Nos por ta sigur di esei pasobra esaki ta e boluntat di Esun Santu.
13, 14. Pakiko Yehova a opta pa no destruí e rebeldenan den Edén?
13 Yehova no por a simplemente destruí e rebeldenan den Edén i kuminsá di nobo? Sin duda e tabatin poder pa hasi esei i pronto lo e usa e poder ei pa destruí tur malbado. Algun hende por puntra nan mes: ‘Dikon e no a hasi esei ora tabatin solamente tres pekadó den universo? Esei lo no a evitá e pika—i tur e sufrimentu ku nos ta mira den mundu—di plama? Pakiko Yehova no a opta pa hasi esei? Deuteronomio 32:4 ta bisa: “Tur su kamindanan ta hustu.” Yehova tin un sentido hopi fuerte di hustisia. De echo, Yehova ta “stima hustisia,” i pa e motibu ei e no a eliminá e rebeldenan den Edén. (Salmo 37:28) Dikon?
14 E rebelion di Satanas a lanta un pregunta relashoná ku e rektitut di e soberania di Dios. Yehova su sentido di hustisia a pone ku e desafio di Satanas mester a haña un kontesta hustu. Si Yehova a likidá e rebeldenan mesora, ounke nan a meresé esei, lo e no a duna un kontesta basá riba hustisia. Nan ehekushon lo a duna mas prueba ku Yehova tin poder supremo, pero e kuestion no tabata tokante ken tin mas poder. Ademas, Yehova a deklará su propósito na Adam ku Eva. Nan mester a haña yu i yena e tera, i tambe someté e tera i henter e kreashon riba tera. (Génesis 1:28) Si Yehova a djis destruí Adam ku Eva, su propósito ekspresá relashoná ku hende lo a keda na palabra so. E hustisia di Yehova hamas lo a permití esei, pasobra semper su propósito ta kumpli.—Isaias 55:10, 11.
15, 16. Ora hende bin ku otro “solushon” pa e kuestion ku a surgi den Edén, kon nos lo por yuda nan?
15 Tin un persona den universo ku por a atendé e rebelion na un manera mas sabí ku Yehova? Kisas algun hende ta bin ku nan mes “solushon” pa e rebelion den Edén. Pero ora nan hasi esei, nan no ta insinuando ku nan sa mihó kon pa atendé e kuestion? Kisas nan no ta hasi esei ku un mal motibu, pero nan no ta komprondé Yehova i su sabiduria impreshonante. Ora apòstel Pablo a skirbi e kristiannan na Roma, el a bai hopi profundo riba e sabiduria di Dios, inkluso e “sekreto sagrado” [NW] relashoná ku Yehova su propósito pa usa e Reino Mesiániko pa reskatá hende fiel i pa santifiká Su nòmber santu. Kiko Pablo a pensa di e sabiduria di e Dios ku a formulá e propósito aki? E apòstel a konkluí su karta ku e palabranan aki: “Na e úniko Dios sabí sea gloria pa medio di Hesukristu pa semper. Amèn.”—Romanonan 11:25; 16:25-27.
16 Pablo a komprondé ku Yehova ta “e úniko Dios sabí”; e ta poseé e plenitut di sabiduria den universo. Kua hende imperfekto por tribi di kere ku e tin un mihó manera pa atendé kualke asuntu, te pa e sa kon pa atendé e desafio ku Satanas a lanta kontra e rektitut di e soberania di Yehova? Pues anto, nos tin ku yuda hende haña e mesun rèspèt profundo ku nos ta sinti pa e Dios ku ta “sabí di kurason.” (Jòb 9:4) Mas mihó nos komprondé e sabiduria di Yehova, mas plenamente nos lo konfia ku su manera di atendé asuntunan ta e mihó.—Proverbionan 3:5, 6.
Komprondé Yehova Su Kualidat Predominante
17. Kon un mihó komprondementu di Yehova su amor por yuda personanan ku ta sinti nan molestiá pa e echo ku Dios ta permití sufrimentu?
17 “Dios ta amor.” (1 Juan 4:8) Ku e palabranan remarkabel ei, Beibel ta identifiká Yehova su kualidat predominante, esun di mas atraktivo di tur su kualidatnan i esun ku mas ta konsolá hende ku ta sinti nan molestiá pa motibu di e maldat ku ta reina. Yehova a mustra amor den tur aspekto di e manera ku el a atendé e desaster grandi ku piká a kousa den su kreashon. Amor a motivá Yehova pa duna speransa na e yunan pekaminoso di Adam ku Eva, dunando nan un medio pa aserk’é i establesé un relashon aprobá kuné. Amor a motivá Dios pa perkurá un reskate ku lo a habri kaminda pa pordoná hende kompletamente di nan pikánan i restorá nan na un bida eterno i perfekto. (Juan 3:16) I amor a motiv’é pa tene pasenshi ku humanidat, dunando mas tantu hende posibel e oportunidat pa rechasá Satanas i skohe Yehova komo nan Soberano.—2 Pedro 3:9.
18. Nos a ser bendishoná ku ki komprondementu, i kiko nos lo konsiderá den e siguiente artíkulo?
18 Ora un pastor a papia ku un grupo di hende ku a bini huntu pa konmemorá e aniversario di un atake terorista devastador, el a bisa: “Nos no sa pakiko te ainda Dios ta permití maldat i sufrimentu.” Esta lamentabel no! Nos ta kontentu ku nos sí ta komprondé pakiko esaki ta tumando lugá, no ta bèrdat? (Deuteronomio 29:29) I siendo ku Yehova ta sabí, hustu i amoroso, nos sa ku pronto lo e pone fin na tur sufrimentu. De echo, el a primintí di hasi esei. (Revelashon 21:3, 4) Pero, kiko di tur e personanan ku a muri atraves di siglonan? Akaso Yehova su manera di atendé e kuestion ku a surgi den Edén a laga nan sin speransa? Nò. Amor a motiv’é pa perkurá pa nan tambe, pa medio di e resurekshon. Esei lo ta e tópiko di e siguiente artíkulo.
Kon Lo Bo Kontestá?
• Kiko nos por bisa un persona ku ta puntra pakiko Dios ta permití sufrimentu?
• Kon e manera ku Yehova a atendé ku e rebeldenan den Edén ta manifestá su santidat i su hustisia?
• Pakiko nos mester yuda hende haña un mihó komprondementu di Yehova su amor?
[Preguntanan di Estudio]
[Plachi na página 21]
Trata na yuda e personanan ku ta sinti nan molestiá pa e sufrimentu ku tin na mundu
[Plachi na página 23]
Hòmbernan fiel manera David i Habakuk a hasi Dios preguntanan sinsero