Speransa den un Mundu Yen di Angustia

“SIUDADANONAN tin mas poder pa kontribuí na bienestar públiko i resolvé problemanan komun ku nunka promé den historia humano.” Asina Eks-Presidente Bill Clinton a deklará durante un konferensia na Ottawa, Canada, na mart 2006. El a yega na e konklushon ku for di dia di e tsunami di 2004 tin un tendensia internashonal di bon boluntat i a agregá—ku un toke di optimismo—ku awor ta ‘un tempu ku rònt mundu hende ta dependé di otro mas ku nunka promé.’

Akaso nos por spera ku desasternan natural lo motivá hende na tur parti pa traha pa alkansá un mihó futuro? E echo ku ‘hende ta dependé di otro mas ku nunka promé’ ta un base konfiabel pa karga e speransa ku lo bin un futuro di berdadero pas i siguridat duradero?

Fuente di Berdadero Speransa

E historia largu di e esfuersonan ku humanidat a hasi atraves di mas ku seis mil aña ta demostrá ku hende bes tras bes ta desepshoná otro. Ku bon motibu anto, e Skritura inspirá  ta konsehá nos: “No konfia den prensnan, den yu di hende, den kende no tin salbashon.” (Salmo 146:3) Si nos ta basa nos speransa riba e organisashonnan, kosnan material i soñonan di e mundu aki, esei lo hiba na desepshon so. Dikon? Pasobra “mundu ta pasa bai i su deseonan tambe.”—1 Juan 2:17.

Sin embargo, atraves di siglonan Dios tabata e speransa infalibel di hende hustu. Beibel ta yam’é e “speransa di Israel [di antigwedat]” i “e speransa di [Israel su] tatanan,” i ta kontené tantísimo ekspreshon mas di speransa i konfiansa den Dios. (Jeremias 14:8; 17:13; 50:7) De echo, e Skritura ta animá nos pa ‘spera riba Yehova.’—Salmo 27:14.

Proverbionan 3:5 i 6 ta urgi nos: “Konfia den SEÑOR ku henter bo kurason, i no dependé riba bo mes komprondementu. Den tur bo kamindanan rekonos’é, i e lo dirigí bo bereanan.” Bo tin tur motibu pa pone pleno konfiansa den un promesa asina, pasobra Yehova Dios no ta kambia, e ta konfiabel i semper ta kumpli ku su palabra. (Malakias 3:6; Santiago 1:17) E kier loke ta mihó pa bo, i si semper bo ta hasi kaso di loke ta ser bisá den su Palabra, Beibel, lo e guia bo ku éksito atraves di e tempunan spantoso aki.—Isaias 48:17, 18.

Un persona ku di henter kurason ta sigui e guia di Dios por stèns riba e promesa aki: “No tene miedu, pasobra mi ta ku bo; no desmayá, pasobra mi ta bo Dios. Lo mi fortalesé bo, sí, lo mi yuda bo, sí, lo mi sostené bo ku mi man drechi di hustisia.” (Isaias 41:10) Hende ku realmente ta stima Yehova Dios ta haña gran konsuelo ora nan ta hasi orashon fervientemente i ta meditá riba e promesa aki, pasobra esaki ta yuda nan trata ku sirkunstansianan difísil i ansiedat.

Tuma e kaso di Andrea, un Testigu di Yehova ku ta mama di dos yu. E ta bisa: “Ta solamente dor di hasi orashon i meditá riba e promesanan di Yehova mi tin e fortalesa pa bolbe para riba pia ora periodonan di insiguridat surgi den mi bida. Si mi mantené Yehova komo e rasgo konstante den mi bida, ta hopi mas fásil pa mantené stabilidat.”

Fortifiká Bo Speransa den Yehova

Enfatisando e importansia di pone nos speransa den Yehova, un salmista a bisa: “Esnan ku ta stima bo lei tin gran pas, i nada no ta hasi nan trompeká.” (Salmo 119:165) Un estudio sinsero di e Palabra di Dios por yuda bo konsiderablemente pa yena bo mente i kurason ku kosnan spiritual sano i positivo, kosnan ku ta ‘berdadero, onorabel, hustu, puru, bunita, di bon fama, birtuoso i digno di alabansa.’ Si bo hasi un esfuerso diligente pa tende, siña, risibí i praktiká e kosnan ei, ‘e Dios di pas lo ta ku bo.’—Filipensenan 4:8, 9.

John, a base di dékadanan di eksperensia personal, a bisa: “Pa mi por a kambia mi sintimentunan tokante futuro, tabata importante pa mi siña ku mi mester a hasi un kambio drástiko den mi personalidat i manera di pensa promé ku mi por a spera di kultivá un relashon ku un Dios perfekto i invisibel. E úniko manera ku mi por a forma e relashon ei tabata dor di bira un persona spiritual. Esaki a enserá hasi un kambio pa ta mas orientá riba Dios, es desir, haña Dios su punto di bista di asuntunan dor di lesa su Palabra inspirá i meditá riba dje.”

Si bo ta bebe di e awa refreskante di e bèrdat ku tin den e Skritura, awa ku ta duna bida, lo bo ta aplikando un remedi efektivo i komprobá ku lo yuda bo kontrarestá e avalancha interminabel di kosnan malu ku ta ser presentá diariamente den medionan di komunikashon. Aplikando loke Beibel ta bisa por fortifiká tambe nos lasonan di famia i yuda redusí ansiedat. Es mas, Dios ta primintí ku e ta kla pa “sostené fuertemente esnan ku nan kurason ta kompletamente di dje.” (2 Krónikanan 16:9) Lo e resolvé asuntunan di tal manera ku realmente bo no tin nada di teme.

Phinehas, kende a pasa dor di guera i matansanan masal, a bisa: “Mi a siña pone mi  bida den e mannan amoroso di Yehova. Algu ku a spar mi di hopi problema ta ku mi a pega duru na prinsipionan bíbliko.” Si di bèrdat bo ta konfia den Yehova Dios, e por yuda bo bula over di tur muraya di atversidat. (Salmo 18:29) Un mucha chikitu ku ta pegá ku su mayornan ta siña konfia nan plenamente i ta sinti su mes sigur bou di nan kuido asta ora e ta malu òf den kualke problema. Bo por tin un sintimentu similar si bo hasi e esfuerso pa aseptá e invitashon pa pone bo speransa den Yehova.—Salmo 37:34.

Un Fundeshi Sólido pa Speransa

Hesukristu a bisa su siguidónan: “Hasi orashon . . . asin’aki: ‘Nos Tata ku ta den shelu, bo nòmber sea santifiká. Ku bo reino bin. Ku bo boluntat sosodé na tera meskos ku den shelu.’” (Mateo 6:9, 10) Mediante e Reino selestial ei—un gobièrnu den man di Hesukristu—Dios lo ekspresá Su soberania legítimo riba tera.—Salmo 2:7-12; Daniel 7:13, 14.

E tantísimo motibunan di miedu ku ta afektá tur aspekto di bida awe ta un indikashon kla ku nos tin mester di intervenshon divino. Felismente, e intervenshon ei ta serka! Hesukristu, kende Dios a entronisá awor komo Rei Mesiániko, a ser konfiá ku outoridat pa vindiká Yehova su soberania i santifiká Su nòmber. (Mateo 28:18) Pronto e gobernashon di Reino lo dirigí su atenshon na tera pa eliminá tur e kousanan di miedu i ansiedat. Isaias 9:6 ta sita e kredensialnan di Hesus pa mustra ku e ta un Gobernante digno ku por aliviá nos di nos temornan. Por ehèmpel, e ta ser yamá “Tata Eterno,” “Konsehero Maravioso” i “Prens di Pas.”

Pensa riba e ekspreshon di kariño “Tata Eterno.” Komo tal, Hesus tin e poder i outoridat—i tambe e deseo—pa duna hende obediente e posibilidat di bida eterno riba tera a base di e balor di su sakrifisio di reskate. Esaki ta nifiká ku nan por fin lo ser librá di piká i imperfekshon heredá di e promé hòmber pekaminoso, Adam. (Mateo 20:28; Romanonan 5:12; 6:23) Ademas, Kristu lo apliká e outoridat ku Dios a dun’é pa resusitá hopi hende ku a muri.—Juan 11:25, 26.

Tempu ku Hesus tabata riba tera, el a duna prueba di ta e “Konsehero Maravioso.” Debí na su konosementu di e Palabra di Dios i su komprondementu ekstraordinario di naturalesa humano, Hesus tabata sa kon pa solushoná e problemanan di bida diario. Despues ku Kristu a keda entronisá den shelu, el a sigui ta e “Konsehero Maravioso,” sirbiendo komo e personahe prinsipal den Yehova su kanal di komunikashon ku humanidat. Hesus su konseho, registrá den Beibel, semper ta sabí i perfekto. Si bo sa i ta kere esaki, lo bo por hiba un bida liber di insiguridat i miedu paralisante.

Isaias 9:6 ta identifiká Hesus komo e “Prens di Pas” tambe. Den e kapasidat ei, Kristu pronto lo usa su poder pa eliminá tur desigualdat riba tereno polítiko, sosial i ekonómiko. Kon? Dor di pone humanidat bou di e solo gobernashon pasífiko di e Reino Mesiániko.—Daniel 2:44.

Bou di gobernashon di Reino, pas duradero lo reina rònt mundu. Dikon bo por ta sigur di esaki? E motibu ta ser revelá na Isaias 11:9, kaminda nos ta lesa: “Nan [e súpditonan di e Reino] lo no kousa daño ni destrukshon den henter mi seru santu, pasobra tera lo ta yen di e konosementu di SEÑOR, manera awa ta tapa laman.” Ku tempu, tur hende riba tera lo tin konosementu eksakto di Dios i lo obedes’é. E prospekto ei ta hasi bo kontentu? Si ta asina, no tarda pa atkerí e presioso ‘konosementu di Yehova.’

Bo por hasi uso di e konosementu di Dios ku ta edifiká fe i ta duna bida dor di analisá loke Beibel ta siña realmente tokante e susesonan di nos tempu i e futuro briante primintí den Beibel. P’esei nos ta urgi bo pa probechá di e programa di estudio di Beibel grátis ku Testigunan di Yehova ta ofresé den bo komunidat. Esaki ta un manera pa kalma miedu i haña berdadero speransa den un mundu yen di angustia.

 [Kuadro/​Plachinan na página 7]

Kon Bin e Gobièrnu di Reino Ta Inspirá Speransa

Hesukristu, komo Rei di e Reino di Dios, a risibí e kapasidat i derecho di ehersé poder universalmente. (Mateo 28:18) Lo e restorá e ekologia di tera na e balansa perfekto. E tin poder riba malesa i enfermedat tambe. E obranan poderoso ku Hesus a efektuá riba tera tabata pa duna un idea di e bendishonnan mas magnífiko ainda ku lo bai tin bou di su gobernashon komo un Rei perfekto i konfiabel. Kua di e kualidatnan di e Rei Mesiániko ku ta ser menshoná aki bou ta atraé bo mas?

▪ Aserkabel.​—Marko 10:13-16.

▪ Rasonabel i imparsial.​—Marko 10:35-45.

▪ Responsabel i sin egoismo.​—Mateo 4:5-7; Lukas 6:19.

▪ Hustu i rekto.​—Isaias 11:3-5; Juan 5:30; 8:16.

▪ Atento, komprensivo i humilde.​—Juan 13:3-15.

[Plachi na página 4]

Loke por duna nos speransa den Yehova ta di lesa i meditá riba Beibel