Viktoria den e Korte Europeo di Derechonan Humano

DIA 11 DI YANÜARI 2007, e Korte Europeo di Derechonan Humano na Strasburgo, Fransia, a tuma un desishon unánime na fabor di Testigunan di Yehova na Rusia den nan kaso kontra e Federashon Ruso. E desishon a sostené e libertat di religion ku Testigunan di Yehova ta gosa di dje i e derecho ku nan tin di haña un oudiensia imparsial. Laga nos konsiderá kiko a hiba na e kaso.

Tin un kongregashon di Testigu di Yehova den e stat di Chelyabinsk, Rusia, ku ta konsistí prinsipalmente di personanan surdu. Nan tabata tene nan reunionnan den un lokalidat ku nan a hür di un skol di formashon profeshonal. Djadumingu 16 di aprel di aña 2000, e presidente, òf komishonado, di e Komishon di Derechonan Humano di e region ei huntu ku dos polis di alto rango i un polis na sivil a interumpí nan reunion. Pa motibu di prehuisio, partikularmente di parti di e komishonado, nan a para e reunion bou di e akusashon falsu ku e Testigunan di Yehova tabata tene reunion sin un base legal. Pa 1 di mei 2000 e skol a kibra e kontrakt di hür di e sala.

Testigunan di Yehova a entregá un keho serka e fiskal di e stat di Chelyabinsk, pero sin resultado. Tantu e Konstitushon di Rusia komo e Tratado pa Protekshon di Derechonan Humano i Libertatnan Fundamental ta garantisá libertat di religion i libertat di asosiashon. P’esei e Testigunan a entregá un keho sivil na un korte di distrito i despues nan a apelá na un korte regional. Anteriormente, dia 30 di yüli 1999, korte supremo a dikta den un otro kaso ku “segun e Lei di Rusia tokante libertat di konsenshi i asosiashon religioso, e palabranan ‘sin opstrukshon’ ta nifiká ku no tin nodi pidi pèrmit, òf outorisashon di outoridatnan seglar pa efektuá seremonianan religioso na lugánan ku ta fungi [pa e propósito ei].” (Haknan ta di nan.) Apesar di e presedente aki, e kehonan ku e Testigunan a entregá na e kortenan di distrito i regional a ser poné un banda.

Dia 17 di desèmber 2001, e Testigunan a presentá e kaso na e Korte Europeo di Derechonan Humano. Dia 9 di sèptèmber 2004 tabatin un oudiensia. Lo siguiente ta algun sita for di e veredikto final ku e korte a dikta:

“Korte ta haña ku ora e ofisialnan di Estado a para e reunion religioso di e demandantenan dia 16 di aprel 2000 promé ku e ora di terminá, nan a interferí ku e demandantenan su derecho riba libertat di religion.”

“Klaramente, no tabatin niun base legal pa a para un evenemento religioso ku tabata tuma lugá den un lokalidat ku a ser di hür legítimamente pa e propósito ei.”

“[Korte] a tuma nota ku a base di otro kasonan ku e Korte Supremo di Rusia a yega di trata, no tin nodi pidi pèrmit adelantá di outoridatnan ni pone nan na haltura ku ta bai tene reunionnan religioso.”

“P’esei ora e komishonado i su asistentenan a stroba e demandantenan di tene nan reunion religioso dia 16 di aprel 2000, nan a violá Artíkulo 9 [libertat di religion] di e Tratado.”

“Korte ta haña ku e kortenan [di distrito i regional di Rusia] a faya den nan deber . . . di demostrá ku e partidonan a ser tendé na un manera imparsial i hustu. . . . Esei tabata un violashon di Artíkulo 6 [derecho riba un oudiensia imparsial] di e Tratado.”

Testigunan di Yehova ta gradisí Dios pa e viktoria ku el a duna nan na e Korte Europeo di Derechonan Humano. (Salmo 98:1) E desishon di e Korte lo bai tin un efekto grandi? Joseph K. Grieboski, presidente di e Instituto Riba Religion i Polítika Públiko, a bisa: “Esaki ta otro desishon hopi importante ku lo tin su efekto riba libertat di religion den henter Europa, ya ku e desishon lo tin su impakto riba derechonan religioso den tur estado ku ta kai bou di e Korte Europeo di Derechonan Humano.”