E Fuente di Maldat Desenmaskará!

DEN e promé siglo, hopi hudiu tabata spera yegada di e Mesias primintí. (Juan 6:14) Ora Hesus a bini na tera, el a trese konsuelo i iluminashon spiritual. El a kura e enfermonan, alimentá hende ku hamber, kalma mal tempu i asta lanta morto. (Mateo 8:26; 14:14-21; 15:30, 31; Marko 5:38-43) Tambe el a “papia e palabranan” di Yehova i a presentá e promesa di bida eterno. (Juan 3:34) Ku echo i palabra Hesus a demostrá kabalmente ku e tabata e Mesias, esun ku mester libra humanidat for di piká i tur su mal konsekuensianan.

Lógikamente, e lidernan religioso hudiu lo mester tabata e proménan pa risibí Hesus, skuch’é i aseptá su guia gustosamente. Pero nan no a hasié. En bes di esei, nan a odi’é, persiguié i sera kabes pa mat’é!—Marko 14:1; 15:1-3, 10-15.

P’esei Hesus tabatin bon motibu pa a kondená e hòmbernan kulpabel ei. (Mateo 23:33-35) Sin embargo, el a rekonosé ku tabatin un persona mas ku mester a kulpa pa e maldat ku tabatin den nan kurason. El a bisa nan: “Boso ta di boso tata e Diabel, i boso kier hasi e deseonan di boso tata. E tabata un matadó for di prinsipio, i no [a] para den e bèrdat, pasobra no tin bèrdat den dje. Ki ora ku e papia un mentira, e ta papia for di su mes naturalesa, pasobra e ta un gañadó i e tata di mentira.” (Juan 8:44) Ounke Hesus a rekonosé ku hende ta kapas di hasi malu, el a indiká ken ta e fuente mes di maldat: Satanas e Diabel.

Ora Hesus a bisa ku Satanas “no a para den e bèrdat,” el a revelá ku un tempu e kriatura spiritual aki tabata un fiel sirbidó di Dios pero ku el a desviá for di e kaminda rekto ei. Dikon Satanas a lanta kontra Yehova? El a kuminsá sinti su mes asina importante ku el a kudishá e adorashon ku ta pertenesé solamente na Dios. *—Mateo 4:8, 9.

E rebelion di Satanas a keda manifestá den e hòfi di Edén na momento ku el a engañá Eva i pon’é kome e fruta prohibí. Ora el a papia e promé mentira ei, lokual tabata un kalumnia kontra Yehova, Satanas a hasi su mes “e tata di mentira.” Ademas, dor di hinka Adam ku Eva den tentashon pa desobedesé Dios, el a pone nan kai den e gara di piká. I finalmente esaki a kousa tantu nan morto komo e morto di futuro generashonnan. Pues, Satanas a hasi su mes tambe “un matadó”—sí, e matadó di mas repugnante di tur tempu!—Génesis 3:1-6; Romanonan 5:12.

E influensia malbado di Satanas a alkansá asta e region di spiritu, kaminda el a instigá otro angelnan pa uni kuné den su rebelion. (2 Pedro 2:4) Meskos ku Satanas, e spiritunan malbado aki a mustra un interes inapropiá den hende. Sin embargo, den nan kaso, esei tabata  un interes seksual pèrvèrso, ku konsekuensianan desastroso.

Maldat A Reina Riba Tera

Beibel ta bisa nos: “Ora hende a kuminsá multipliká . . . i a haña yu muhénan, e yu hòmbernan di Dios a mira ku e yu muhénan di hende tabata bunita; i nan a tuma esposanan pa nan mes, esun ku nan tabata kier a skohe.” (Génesis 6:1, 2) Ken e “yu hòmbernan di Dios” ei tabata? Nan no tabata hende, sino kriaturanan spiritual. (Jòb 1:6; 2:1) Kon nos por sa esei? Un motibu ta ku hende tabatin 1.500 aña kaba ta kasa ku otro i p’esei no tabatin nodi di hasi menshon spesial di esei. Pues dor di hala atenshon na e echo ku “e yu hòmbernan di Dios” a tuma kurpa humano i a kasa ku “e yu muhénan di hende,” e relato ta referí klaramente na algu fuera di lo normal.

E tipo di yu ku e unionnan aki a produsí ta konfirmá ku esaki tabata apnormal. Den e idioma original di Beibel nan tabata yama nèfilim. Nan tabata yunan mesklá ku a krese bira gigante. Ademas, nan tabata hende sumamente violento. De echo, e palabra “nèfilim” ta nifiká “esnan ku ta pone otro kai.” E Palabra di Dios ta deskribí e salbahenan aki komo “hòmbernan poderoso i balente di tempunan aya, hòmbernan di fama.”—Génesis 6:4.

Bou di influensia di nèfilim i nan tatanan, e mundu di e tempu ei a bira mas malbado ku nunka. Segun Génesis 6:11, “tera tabata korumpí den bista di Dios i . . . yen di violensia.” Sí, otro hende tambe a kuminsá praktiká violensia i korupshon meskos ku e elementonan aki ku tabata meimei di nan.

Pero den ki manera nèfilim i nan tatanan a ehersé un mal influensia asina poderoso riba hende? Esei tabata dor di stimulá hende su inklinashon i deseonan pekaminoso. Ku ki resultado? “Tur karni a korumpí nan kaminda riba tera.” Finalmente, Yehova a trese un Diluvio mundial ku a destruí e mundu ei. Ta hustu Noe i su famia so a skapa. (Génesis 6:5, 12-22) Sin embargo, e angelnan materialisá a regresá e region di spiritu den un kondishon desaprobá. Komo demoñonan degradá, nan a sigui oponé Dios i su famia hustu di angelnan leal. Aparentemente, for di e tempu ei padilanti Dios a prohibí e spiritunan malbado aki di tuma kurpa humano. (Hudas 6) No opstante, te ainda nan tin influensia poderoso riba hende.

E Malbado Ta Kompletamente Desenmaskará!

Promé Juan 5:19 ta duna nos un idea di kon leu e influensia malbado di Satanas a yega. “Henter mundu ta bou di kontròl di e malbado.” Diabel ta manipulá humanidat hibando nan den un tormenta di mas i mas kalamidat. De echo, e ta mas desididu ku nunka pa kousa desaster. Dikon? Pasobra el a ser saká for di shelu huntu ku e demoñonan despues ku e Reino di Dios a ser establesé na 1914. Relashoná ku e ekspulshon aki, Beibel a profetisá: “Ai di tera . . . , pasobra Diabel a baha bin serka boso ku gran furia, sabiendo ku ta ked’é solamente un poko tempu mas.” (Revelashon 12:7-12) Pero kon Satanas ta ehersé su influensia riba humanidat awe?

E ta hasi esei prinsipalmente dor di fomentá un spiritu ku ta dirigí e manera ku hende ta pensa i aktua. P’esei mes, Efesionan 2:2 [NW] ta bisa ku Diabel ta “e gobernante dje outoridat  di aire, e spiritu [òf, aktitut dominante] ku awor ta obra den e yunan di desobedensia.” En bes di animá hende pa teme Dios i hasi bon, e “aire” demoniako aki ta instigá hende pa bai kontra Dios i su normanan. Asina Satanas i su demoñonan ta promové e maldat ku hende ta kometé i ta pone ku esaki ta bira kada bes mas pió.

“Warda Bo Kurason”

Un manifestashon di e “aire” aki ta e plaga di pornografia, ku ta lanta deseo seksual inapropiá den hende i hasi komportashon apnormal parse atraktivo. (1 Tesalonisensenan 4:3-5) Violashon seksual, sadismo, violashon seksual na grupo, sèks ku bestia i abusu seksual di mucha ta algun di e kosnan ku pornografia ta presentá komo entretenimentu. Asta e formanan ménos dañino di pornografia por krea un adikshon fuerte, afektando esnan ku ta wak e òf lesa di dje di tal manera ku nan ta krea e kustumber di wak e. * E ta un bisio ku ta daña tantu bo relashon ku otro hende komo bo relashon ku Dios. Pornografia ta reflehá e mentalidat degradá di e demoñonan ku ta promov’é, esta, e rebeldenan kende nan deseonan seksual inapropiá ta data for di tempu di Noe den e mundu promé ku e Diluvio.

E hòmber sabí Salomon tabatin bon motibu anto pa spièrta hende: “Warda bo kurason riba tur kos, pasobra e ta e fuente di bida.” (Proverbionan 4:23) Den práktika, pa bo warda bo kurason for di e trampa di pornografia, lo bo tin ku kambia kanal di televishon òf paga bo kòmpiuter ora esenanan ku kontenido seksual presentá. I ta importante pa bo aktua mesora, sin vasilá! Imaginá bo ku bo ta un sòldá ku ta purba rechasá un misil lansá den direkshon di bo kurason. Satanas ta mek riba bo kurason figurativo—bo sentro di motivashon i deseo—i ta trata di korumpí esaki.

Tambe bo tin ku protehá bo kurason pa e no kuminsá gusta violensia, pasobra Diabel sa ku “esun ku ta gusta violensia [Yehova] ta odia.” (Salmo 11:5) Ripará ku Satanas no tin nodi hasi bo un kriminal feros pa bo bira enemigu di Dios; tur loke e tin ku hasi ta pon’é bo kuminsá gusta violensia. P’esei no ta un koinsidensia ku medionan di komunikashon ta saturá ku violensia, hopi bes asta ku temanan tokante kosnan sobrenatural. Nèfilim a muri i no t’ei mas, pero nan karakterístikanan i komportashon sí t’ei ketu bai! Bo eskoho di entretenimentu ta mustra ku bo ta resistí e trikinan di Satanas?—2 Korintionan 2:11.

 Kon pa Resistí Satanas Su Influensia Malbado

E forsanan di maldat por parse hopi difísil pa lucha kuné. Beibel ta mustra ku hende ku ta hasi esfuerso pa agradá Dios tin ku “lucha” no solamente kontra nan mes karni pekaminoso sino tambe “kontra e forsanan spiritual di maldat.” Pa nos por gana den e lucha i haña e aprobashon di Dios, nos tin ku probechá di tur e provishonnan di Dios.—Efesionan 6:12; Romanonan 7:21-25.

E provishonnan aki ta inkluí Dios su spiritu santu, e forsa di mas poderoso den universo. Apòstel Pablo a skirbi e kristiannan di promé siglo: “Nos a risibí, no e spiritu di mundu, sino e spiritu ku ta bin di Dios.” (1 Korintionan 2:12) Hende ku ta laga e spiritu di Dios guia nan ta siña stima loke Dios ta stima i odia loke e ta odia. (Amos 5:15) Kon bo por haña spiritu santu? Prinsipalmente pa medio di orashon, estudio di Beibel—siendo ku Beibel mes ta un produkto di spiritu santu—i asosiashon saludabel ku hende ku di bèrdat ta stima Dios.—Lukas 11:13; 2 Timoteo 3:16; Hebreonan 10:24, 25.

Ora bo ta probechá di e provishonnan di Dios aki, bo ta kuminsá bisti “e armadura kompletu di Dios,” e úniko protekshon sigur kontra “e trampanan di Diabel.” (Efesionan 6:11-18) Awor mas ku nunka ta urgente pa nos saka pleno probecho di e provishonnan aki. Kon asina?

Fin di Maldat Ta Serka!

Segun e salmista, “ora e malbado sprùit manera yerba, i tur ku ta hasi inikidat floresé, ta pa nan wòrdu destruí pa semper.” (Salmo 92:7) Sí, meskos ku den e tempu di Noe, e maldat ku ta reina awe ta un indikashon ku e huisio di Dios ta aserkando rápidamente, no djis kontra hende malbado sino tambe kontra Satanas i su demoñonan, kendenan lo ser tirá den un abismo di inaktividat komo preludio di nan destrukshon final. (2 Timoteo 3:1-5; Revelashon 20:1-3, 7-10) Ken lo ehekutá e huisio ei? Esei lo ta Hesukristu mes, di kende nos ta lesa: “E Yu di Dios a aparesé pa e propósito aki, pa e destruí e obranan di Diabel.”—1 Juan 3:8.

Bo ta anhelá pa maldat yega na su fin? Si ta asina, bo por haña konsuelo den e promesanan ku Beibel ta kontené. No tin niun otro buki ku ta desenmaskará e fuente mes di maldat, esta, Satanas. Tampoko no tin niun otro buki ku ta mustra kon tantu e komo tur su obranan malbado lo ser destruí finalmente. Nos ta animá bo pa buska konosementu eksakto di Beibel awor pa bo protehá bo mes kontra e influensianan malbado di Satanas i pa garantisá bo speransa di biba den un mundu liber di maldat.—Salmo 37:9, 10.

[Nota]

[Kuadro/​Plachi na página 6]

Leyenda ku un Rastro di e Bèrdat

Rònt mundu bo por haña leyendanan di for di tempu antiguo tokante semi-dios, gigante i un diluvio katastrófiko. Por ehèmpel, e Poema Épiko di Gilgamesh na akadio ta menshoná un diluvio, un barku i sobrebibiente. Gilgamesh mes a ser deskribí komo un semi-dios—mitar dios, mitar hende—inmoral i violento. Leyenda asteka ta papia di un mundu antiguo habitá pa gigante i tambe di un diluvio grandi. Leyenda norwechi ta deskribí un rasa di gigante i un hòmber sabí ku tabata yama Bergelmir ku a konstruí un boto grandi pa salba su mes i su esposa. E testimonio kombiná di tur e leyendanan ei ta konfirmá e testimonio ku Beibel ta duna, esta, ku tur hende a bini di e sobrebibientenan di un diluvio ku a destruí un mundu malbado di antigwedat.

[Plachi]

Un tabla riba kua e Poema Épiko di Gilgamesh ta grabá

[Rekonosementu]

The University Museum, University of Pennsylvania (neg. # 22065)

[Plachi na página 5]

Awe hende ta reflehá karakterístika di nèfilim

[Plachi na página 7]

Konosementu eksakto ta duna nos fortalesa pa resistí influensianan malbado