Hende di Edat Ta un Bendishon pa Hóbennan
Hende di Edat Ta un Bendishon pa Hóbennan
“Asta ora mi bira bieu, ku kabei blanku, o Dios, no bandoná mi, te ora mi deklará bo poder na e generashon aki, bo poder na tur esnan ku ta bin.”—SALMO 71:18.
1, 2. Kiko sirbidónan di Dios di edat mester realisá, i kiko nos lo bai konsiderá?
UN ANSIANO kristian na Wèst Afrika a bishita un ruman hòmber ungí di edat i a puntr’é: “Kon ta bai ku ruman?” E ruman a kontest’é: “Mi por kore i mi por bula riba dos pia i asta riba un pia.” I segun ku e tabata bisa esei, el a purba mustra kon. Kaba el a agregá: “Pero mi no por bula manera para.” E ansiano a komprondé kiko e ruman tabata ke men, esta: ‘Loke mi por hasi, mi ta keda kontentu pa hasi, pero loke mi no por hasi, mi no ta hasi.’ E ansiano ku a hasi e bishita ei awor tin riba 80 aña, i e tin grato rekuerdo di e ruman di edat ei su sentido di humor i su lealtat.
2 Ora un persona di edat ta desplegá kualidatnan ku ta agradá Dios, esei por tin un impreshon duradero riba otro hende. Klaru ku edat riba su mes no ta produsí sabiduria ni e kualidatnan ku Kristu a desplegá. (Eklesiastés 4:13) Beibel ta deklará: “Kabei blanku ta un korona digno, ku bo ta gana ora bo biba segun Dios su palabra.” (Proverbionan 16:31, BPK) Si bo ta un persona di edat avansá, bo ta realisá ki bon influensia loke bo ta bisa i hasi por tin riba otro hende? Konsiderá algun ehèmpel bíbliko ku ta mustra te kon leu personanan di edat tabata un berdadero bendishon pa personanan mas hóben.
Fe Ku Tabatin Efekto di Largu Alkanse
3. Kon Noe su fieldat a benefisiá tur hende na bida awe?
3 E fe i firmesa di Noe a produsí benefisio ku hende ta sinti te awe. Noe tabatin kasi 600 aña ora ku el a traha e arka, trese e bestianan huntu i prediká na su próhimo. (Génesis 7:6; 2 Pedro 2:5) Noe su temor di Dios a influensiá e manera ku el a aktua, i debí na esei e ku su famia a sobrebibí e gran Diluvio i a bira e antepasado di tur hende riba tera awe. Ta bèrdat ku Noe a biba tempu ku hende por lo general tabata biba mas largu. Sin embargo, asta ora e tabata di edat mas avansá, el a keda fiel i esei a resultá den bendishonnan di gran balor. Den ki manera?
4. Ki kualidatnan Noe a demostrá ku ta bale la pena pa sirbidónan di Dios djawe imitá?
4 Noe tabatin kasi 800 aña di edat ora Nimròd a kuminsá konstruí e Toren di Babel, lokual tabata kontrali na Yehova su mandamentu pa ‘yena e tera.’ (Génesis 9:1; 11:1-9) Pero Noe no a partisipá den e rebelion di Nimròd. Pues, probablemente Noe sí a keda ku su idioma ora ku Yehova a konfundí idioma di e rebeldenan. Un kos ta sigur, ta bale la pena pa sirbidónan di Dios di tur edat imitá e fe i firmesa di Noe. E kualidatnan ei tabata bisto no solamente durante su behes sino durante henter e bida largu ku e tabatin.—Hebreonan 11:7.
Influensia Riba Famia
5, 6. (a) Kiko Yehova a manda Abraham hasi ora e tabatin 75 aña? (b) Kon Abraham a reakshoná riba e òrdu di Dios?
5 Pues, for di e bida di e patriarkanan ku a biba despues di Noe, nos por mira ki influensia personanan di edat por tin riba e fe di nan miembronan di famia. Abraham tabatin mas o ménos 75 aña ora ku Dios a bis’é: “Sali for di bo tera, i for di bo famianan i for di kas di bo tata, bai na e tera ku lo mi mustra bo; i lo mi hasi bo un nashon grandi, i lo mi bendishoná bo.”—Génesis 12:1, 2.
6 Imaginá bo ku un persona manda bo bandoná bo kas, bo amigunan, bo pais natal i e siguridat di bo famianan djaserka, i pa bo bai na un pais ku bo no konosé. Ta presis esei Dios a bisa Abraham. Anto el ‘a sali bai manera Yehova a papia kuné,’ i pa e restu di su bida el a biba den tènt komo stranhero den e pais di Kánaan, biahando di un lugá pa otro. (Génesis 12:4; Hebreonan 11:8, 9) Ounke Yehova a bisa ku Abraham lo a bira “un nashon grandi,” el a muri hopi promé ku su desendientenan a bira un multitut grandi. Su kasá, Sara, a haña ún yu so, Isaak. Anto esei tabata despues ku ya Abraham tabatin 25 aña den e Tera Primintí. (Génesis 21:2, 5) Sin embargo, Abraham no a kansa i bai bèk na e stat for di kaminda el a bin. Un ekselente ehèmpel di fe i perseveransia!
7. Ki efekto Abraham su perseveransia tabatin riba su yu Isaak, i ku ki resultado pa humanidat?
7 E perseveransia di Abraham tabatin un gran influensia riba su yu Isaak, kende a pasa henter su bida—180 aña—komo stranhero den e pais di Kánaan. Isaak su perseveransia tabata basá riba fe den e promesa di Dios, fe ku su mayornan di edat avansá a inkulká den dje i ku despues a ser reforsá pa e palabra ku Yehova mes a papia kuné. (Génesis 26:2-5) Isaak su firmesa a hunga un papel klave den e kumplimentu di Yehova su promesa ku un “simia” òf desendiente for di e famia di Abraham lo a trese bendishon pa henter humanidat. Sientos di aña despues, Hesukristu, e parti prinsipal di e “simia” ei, a habri e kaminda pa tur ku ehersé fe den dje por ser rekonsiliá ku Dios i disfrutá di bida eterno.—Galationan 3:16; Juan 3:16.
8. Kon Jakòb a demostrá fe fuerte, i ku ki resultado?
8 Isaak na su turno a yuda su yu Jakòb kultivá un fe fuerte ku a sosten’é te den su behes. Jakòb tabatin 97 aña ora ku el a lucha henter anochi ku un angel p’e haña un bendishon. (Génesis 32:24-28) Promé ku Jakòb a muri na edat di 147 aña, el a usa tur su forsa pa bendishoná kada un di su 12 yunan. (Génesis 47:28) E palabranan profétiko ku el a ekspresá—skirbí na Génesis 49:1-28—a resultá bèrdat i ta kumpli te ainda.
9. Kiko nos por bisa di e influensia ku rumannan di edat spiritualmente madurá tin riba nan famia?
9 Ta bisto anto ku fiel sirbidónan di Dios di edat avansá por tin un influensia sano riba nan miembronan di famia. Instrukshon bíbliko kombiná ku e bos di eksperensia i un ehèmpel di perseveransia por ta un gran yudansa pa un hóben krese ku fe sólido. (Proverbionan 22:6) Rumannan di edat no mester balotá nunka e tremendo influensia positivo ku nan por tin riba nan famia.
Influensia Riba Otro Sirbidó di Yehova
10. Ki òrdu Hosé ‘a duna tokante di su wesunan,’ i ki efekto esei tabatin?
10 Personanan di edat por tin un bon influensia tambe riba otro sirbidó di Yehova. Jakòb su yu hòmber Hosé, den su behes a hasi algu simpel ku a demostrá su fe i ku tabatin un efekto profundo riba miónes di adoradó berdadero ku a biba despues di dje. E tabatin 110 aña ora el “a duna òrdu tokante di su wesunan.” E tabata ke pa ora ku por fin e israelitanan a bandoná Egipto, pa nan a bai ku su wesunan. (Hebreonan 11:22; Génesis 50:25) E òrdu ei a sirbi komo un rayo di speransa pa Israel durante e tantísimo añanan di sklabitut pisá ku a sigui despues di Hosé su morto i a duna nan e siguransa ku nan liberashon lo a bin.
11. Ki influensia Moisés, di edat avansá, probablemente tabatin riba Josué?
11 Un di esnan ku a haña gran estímulo for di e ekspreshon di fe di Hosé tabata Moisés. Na edat di 80 aña, el a haña e privilegio di bai ku e wesunan di Hosé for di e tera di Egipto. (Eksodo 13:19) Rònt di e tempu ei el a konosé Josué, kende tabata hopi mas yòn kuné. Durante e 40 añanan ku a sigui, Josué a fungi komo Moisés su sirbidó personal. (Numbernan 11:28) El a kompañá Moisés te na mitar di kaminda ora el a subi Seru Sinaí i tabat’ei presente pa topa Moisés ora el a baha for di e seru ku e tablanan di Testimonio. (Eksodo 24:12-18; 32:15-17) Moisés, komo un persona di edat avansá, lo mester tabata un fuente di sabiduria i konseho maduro pa Josué!
12. Kon Josué a demostrá di tabatin un bon influensia riba e nashon di Israel te na su morto?
12 Josué na su turno tabata un fuente di animashon pa e nashon di Israel te na su morto. Huesnan 2:7 ta bisa nos: “E pueblo a sirbi SEÑOR tur e dianan di Josué, i tur e dianan di e ansianonan ku a biba mas ku Josué, ku a mira henter e gran obra di SEÑOR ku El a hasi pa Israel.” Sin embargo, despues ku Josué i e otro ansianonan a muri, a kuminsá un periodo di 300 aña di vasilashon entre adorashon berdadero i falsu ku a dura te na e dianan di profeta Samuel.
Samuel A “Efektuá Hustisia”
13. Kiko Samuel a hasi pa “efektuá hustisia”?
13 Beibel no ta bisa kon bieu Samuel tabata ora el a muri, pero e susesonan den e buki di Promé Samuel ta abarká mas o ménos 102 aña, i Samuel tabata testigu di mayoria di nan. Na Hebreonan 11:32 i 33 [NW] nos ta lesa ku huesnan i profetanan hustu a “efektuá hustisia.” Sí, Samuel a influensiá algun di e hendenan di su tempu i a pone ku nan a evitá òf stòp di hasi malu. (1 Samuel 7:2-4) Kon el a logra esei? E tabata fiel na Yehova durante henter su bida. (1 Samuel 12:2-5) E no tabatin miedu di duna konseho fuerte ni sikiera na e rei. (1 Samuel 15:16-29) Ademas, ora Samuel tabata ‘bieu i ku kabei blanku,’ el a duna prueba di ta un bon ehèmpel den hasi orashon pa otro hende. El a deklará ku e no a pensa mes ‘di peka kontra Yehova dor di stòp di hasi orashon’ pa e otro israelitanan.—1 Samuel 12:2, 23.
14, 15. Kon rumannan di edat awe lo por imitá Samuel den e asuntu di orashon?
14 Tur esaki ta enfatisá un manera masha importante ku rumannan di edat por tin un bon influensia riba otro sirbidó di Yehova. Apesar di e limitashonnan ku problema ku salú i otro sirkunstansianan ta pone riba esnan di edat avansá, nan por hasi orashon pa otro hende. Rumannan di edat, boso ta realisá kuantu boso orashonnan ta benefisiá e kongregashon? Debí na boso fe den e sanger ku Kristu a drama, boso tin un posishon aprobá dilanti di Yehova, i debí na boso registro di perseveransia, boso a duna “prueba di boso fe.” (Santiago 1:3; 1 Pedro 1:7) No lubidá esaki nunka: “E orashon efektivo di un hende hustu por logra hopi.”—Santiago 5:16.
15 Pues, nos tin mester di boso orashonnan na fabor di e trabou di prediká i e funshonamentu di e kongregashon. Algun di nos rumannan ta den prizon pa motibu di nan neutralidat kristian. Otro rumannan ta víktima di desaster natural, guera i konfliktonan sivil. Ademas tin otronan, den nos propio kongregashon, ku ta konfrontá tentashon i oposishon. (Mateo 10:35, 36) E rumannan ku ta hiba delantera den e trabou di prediká i ta supervisá e kongregashonnan tambe tin mester di boso orashonnan regular na nan fabor. (Efesionan 6:18, 19; Kolosensenan 4:2, 3) Pues, ta bon ku boso ta menshoná e rumannan den fe den boso orashonnan, meskos ku Epafras a hasi!—Kolosensenan 4:12.
Siña e Generashon Ku Ta Bin
16, 17. Kiko Salmo 71:18 a profetisá, i kon esaki a kumpli?
16 Kristiannan ku ta forma parti di e “otro karnénan” tin e speransa di biba pa semper riba tera. Nan a haña entrenamentu sumamente importante dor di asosiá ku rumannan fiel di e “tou chikitu,” kendenan tin e yamada selestial. (Lukas 12:32; Juan 10:16) Salmo 71:18 a profetisá esaki, bisando: “Asta ora mi bira bieu, ku kabei blanku, o Dios, no bandoná mi, te ora mi deklará bo poder na e generashon aki, bo poder na tur esnan ku ta bin.” Rumannan ungí ku spiritu santu ta ansioso pa entrená nan kompañeronan—e otro karnénan—pa karga mayor responsabilidat, promé ku nan bai laga nan pa ser glorifiká huntu ku Hesukristu.
17 Lo por apliká e prinsipio di Salmo 71:18 tokante siña “esnan ku ta bin” tambe na e otro karnénan ku a haña instrukshon for di e ungínan di Dios. Esta, den e sentido ku Yehova a konfia rumannan di edat ku e privilegio di duna testimonio di dje na e hendenan ku awor ta aseptá adorashon berdadero. (Joel 1:2, 3) E otro karnénan ta sinti nan bendishoná ku loke nan a siña for di e ungínan i ta ser motivá pa kompartí nan edukashon bíbliko ku otro hende ku ta deseá di sirbi Yehova.—Revelashon 7:9, 10.
18, 19. (a) Ki informashon balioso hopi sirbidó di Yehova di mas edat por kompartí? (b) Kristiannan di edat por ta sigur di kiko?
18 Tin sirbidó di Yehova di mas edat na bida awe—tantu ungí komo otro karné—ku a eksperensiá susesonan históriko importante. Un par di nan tabat’ei na e promé presentashonnan di e “Foto-Drama di Kreashon.” Algun di nan tabata konosé personalmente e rumannan ku tabata hiba delantera i ku a ser enkarselá na aña 1918. Otro rumannan di edat a partisipá den transmishonnan di e emisora di radio di Watchtower, WBBR. Hopi di nan por konta tokante e tempu ku a bringa kasonan hurídiko relashoná ku e libertat religioso di Testigunan di Yehova den e tribunalnan di mas haltu. Tambe tin otronan ku a para firme pa adorashon berdadero tempu nan a biba bou di régimennan di diktadura. Sí, rumannan di edat por konta kon e komprondementu di e bèrdat a ser revelá progresivamente. Beibel ta animá nos pa benefisiá di e abundansia di eksperensia aki.—Deuteronomio 32:7.
19 Nos ta urgi kristiannan di edat avansá pa nan ta un bon ehèmpel pa kristiannan mas hóben. (Tito 2:2-4) Podisé boso no ta mira awor umbes e efekto ku boso perseveransia, orashon i konseho tin riba otronan. Noe, Abraham, Hosé, Moisés i otronan no por tabata sa e pleno impakto ku nan fieldat lo tabatin riba e generashonnan ku a sigui. Sin embargo, nan registro di fe i integridat tabatin un gran impakto; i boso ehèmpel por tin mesun efekto awe.
20. Ki bendishonnan ta spera esnan ku mantené nan speransa firme te na fin?
20 Sea ku boso sobrebibí e “gran tribulashon” òf boso ta bolbe na bida mediante e resurekshon, lo ta masha dushi pa eksperensiá “loke ta bida berdadero”! (Mateo 24:21; 1 Timoteo 6:19) Imaginá boso e tempu durante Kristu su Reinado di Mil Aña ora ku Yehova lo anulá e efektonan di behes. En bes di eksperensiá e degenerashon implakabel di nos kurpa, nos lo lanta kada dia i ripará ku pokopoko nos kurpa ta bai dilanti: mas energia, wowonan mas skèrpi, oreanan ku ta tende mas bon, mihó aparensia! (Jòb 33:25; Isaias 35:5, 6) E personanan bendishoná pa biba den Dios su mundu nobo semper lo ta yòn, apesar ku nan lo biba pa eternidat. (Isaias 65:22) P’esei laga nos tur mantené nos speransa firme te na fin i sigui sirbi Yehova di henter nos alma. Nos por tin sigur ku Yehova lo kumpli ku tur loke el a primintí i ku loke lo e hasi lo surpasá tur nos ekspektativanan.—Salmo 37:4; 145:16.
Kon Lo Bo Kontestá?
• Kon e firmesa di Noe na edat avansá a resultá den bendishon pa henter humanidat?
• Ki efekto e fe di e patriarkanan tabatin riba nan desendientenan?
• Kon Hosé, Moisés, Josué i Samuel, den nan behes a fortalesé otro sirbidó di Yehova?
• Ki registro rumannan di edat por laga atras?
[Preguntanan di Estudio]
[Plachi na página 26]
Abraham su perseveransia tabatin un gran efekto riba Isaak
[Plachi na página 28]
Moisés su konseho maduro a animá Josué
[Plachi na página 29]
Bo orashonnan pa otro hende por logra hopi kos bon
[Plachi na página 30]
Hóbennan ta benefisiá dor di skucha rumannan fiel di edat