Kon pa Prosperá Spiritualmente Durante Behes

“[Esnan] plantá den e kas di SEÑOR . . . asta den nan behes nan lo duna fruta.”—SALMO 92:13, 14.

1, 2. (a) Kon hende hopi bes ta deskribí behes? (b) Kiko e Skritura ta primintí enkuanto e efektonan di piká heredá for di Adam?

BEHES. Riba kiko bo ta pensa ora bo tende e palabra ei? Kueru tur di ploi? Orea ku no ta tende bon? Pianan suak? Òf un otro aspekto di e “dianan malu” detayá na un manera bibu na Eklesiastés 12:1-7? Si ta asina, ta importante pa nos kòrda ku Eklesiastés kapítulo 12 ta deskribí e kambionan ku ta tuma lugá segun nos edat ta subi. Pero e kambionan aki no ta segun e propósito original di e Kreadó, Yehova Dios, sino debí na e efektonan di e piká di Adam riba e kurpa humano.—Romanonan 5:12.

² E echo ku hende su edat ta subi no ta un maldishon riba su mes, pasobra pa bo sigui eksistí, tempu tin ku pasa. Bon mirá, kresementu i madures ta karakterístikanan deseabel di tur kos bibu. Pero pronto e dañonan kousá pa seis mil aña di piká i imperfekshon ku nos ta mira rònt di nos lo pasa pa historia. E ora ei tur hende obediente lo disfrutá di bida manera tabata Dios su propósito, sin e doló di behes i morto. (Génesis 1:28; Revelashon 21:4, 5) E tempu ei, “ningun habitante lo no bisa: ‘Mi ta malu.’” (Isaias 33:24) Personanan di edat lo bolbe tin nan ‘vigor di hubentut,’ i nan karni lo “bira mas suave ku esun di mucha.” (Jòb 33:25) Pero miéntras tantu, nan tur tin ku lucha ku e estado pekaminoso ku nan a heredá for di Adam. Sin embargo, sirbidónan di Yehova ta benefisiá den maneranan spesial ora nan drenta nan añanan di behes.

3. Menshoná algun manera ku kristiannan por ‘duna fruta den nan behes.’

³ E Palabra di Dios ta sigurá nos ku esnan “plantá den e kas di [Yehova] . . . asta den nan behes nan lo duna fruta.” (Salmo 92:13, 14) Ku palabranan figurativo e salmista a ekspresá e bèrdat fundamental ku fiel sirbidónan di Dios den sentido spiritual por sigui progresá, floresé i prosperá, asta si físikamente nan kurpa ta bai atras. Den Beibel i den nos tempu tin hopi ehèmpel ku ta konfirmá esaki.

Semper Presente

4. Kon e profeta di edat, Ana, a demostrá su deboshon na Dios, i ki rekompensa el a haña?

⁴ Laga nos konsiderá profeta Ana di promé siglo. Na edat di 84 aña, Ana ‘nunka no tabata sali for di tèmpel, i tabata sirbi di dia i anochi ku yunamentu i orashon.’ Pero Ana no por tabata biba literalmente den tèmpel ya ku su tata tabata di “e tribu di Aser,” un tribu no-levita. Figura bo anto kuantu esfuerso lo e mester tabata hasi p’e ta na e tèmpel tur  dia for di ora di e ofrenda di mainta te na ora di e ofrenda di anochi! Sin embargo, Ana a haña un gran rekompensa pa su deboshon. E tabatin e privilegio di ta na e tèmpel ora Hosé ku Maria a trese Hesus komo beibi pa present’é na Yehova manera e Lei a manda pa hasi. Ora Ana a mira Hesus, el “a kuminsá duna gradisimentu na Dios, i a sigui papia di [e mucha] ku tur esnan ku tabata spera e redenshon di Yerusalèm.”—Lukas 2:22-24, 36-38; Numbernan 18:6, 7.

5, 6. Kua ta algun manera ku hopi ruman di edat djawe ta desplegá un aktitut manera di Ana?

⁵ Awe tin hopi ruman di edat entre nos ku ta manera Ana. Nan ta asistí na reunion ku regularidat, ta supliká Yehova sinseramente pa e progreso di adorashon berdadero i tin e deseo ardiente di prediká e bon nobo. Un ruman hòmber di 80 i piku aña ku ta asistí ku regularidat na e reunionnan kristian huntu ku su kasá a bisa: “Nos a kultivá e kustumber di bai reunion. Nos no ke ta ningun otro kaminda. Kaminda e pueblo di Dios ta, ei nos ke ta. Einan nos ta sinti nos dushi.” Esaki ta un ehèmpel ku ta animá nos tur!—Hebreonan 10:24, 25.

⁶ E lema di Jean, un biuda kristian di 80 i piku aña ta: “Si tin kualke kos ku ta enbolbé adorashon berdadero i mi por ta un parti di dje, mi ke hasié.” El a sigui bisa: “Klaru ku mi tin mi momentonan di tristesa. Pero dikon tur hende rònt di mi mester ta tristu ora ami ta tristu?” Anto su kara tabata bria ora el a konta kon dushi ta pa bishitá otro paisnan pa okashonnan spiritualmente edifikante. Durante un biahe ku el a hasi resientemente, el a bisa e hendenan ku tabata biaha huntu kuné: “Mi no ke mira mas kastel; mi ke bai den sirbishi di vèlt!” Ounke Jean no por a papia e idioma lokal, tòg el a logra lanta interes di algun hende den e mensahe di Beibel. Ademas, pa vários aña el a traha huntu ku un kongregashon ku tabatin mester di yudansa, maske esei a nifiká ku e mester a siña un idioma nobo i biaha ún ora pa bai reunion i ún ora pa bin bèk.

Maneranan pa Mantené e Mente Aktivo

7. Kon Moisés, na edat avansá, a ekspresá su deseo pa ta mas será ainda ku Dios?

⁷ Hende ta gana eksperensia di bida segun ku tempu ta pasa. (Jòb 12:12) Di otro banda, progreso spiritual no ta bin outomátikamente segun ku edat ta subi. P’esei sirbidónan fiel di Dios no ta djis dependé riba e konosementu ku nan a haña den pasado. Mas bien nan ta hasi esfuerso pa “krese den siñansa” segun ku añanan ta pasa. (Proverbionan 9:9) Moisés tabatin 80 aña ora Yehova a dun’é un enkargo. (Eksodo 7:7) Parse ku den su tempu nan a konsiderá un hende di e edat ei algu inusual, pasobra e mes a skirbi: “E dianan di nos bida ta setenta aña, òf si hende tin hopi forsa, ochenta aña.” (Salmo 90:10) Tòg Moisés no a sinti nunka ku e tabata muchu bieu pa siña. Despues di a sirbi Dios pa vários dékada, i a disfrutá di tantísimo privilegio, i a karga responsabilidatnan pisá, el a roga Yehova: “Laga mi konosé bo kamindanan, pa mi konosé bo.” (Eksodo 33:13) Moisés semper tabatin e deseo pa ta mas será ainda ku Yehova.

8. Kon Daniel a mantené su mente aktivo ora e tabatin 90 i piku aña, i ku ki resultado?

⁸ Profeta Daniel tabatin probablemente 90 i piku aña ora ku ainda e tabata saminá kuidadosamente e skrituranan santu. Loke el a komprondé for di su estudio di “e bukinan”—esei posiblemente a inkluí Levítiko, Isaias, Jeremias, Oseas i Amos—a motiv’é pa akudí na Yehova den orashon ferviente. (Daniel 9:1, 2) Komo kontesta riba e orashon ei el a haña informashon inspirá tokante e binida di e Mesias i e futuro di adorashon puru.—Daniel 9:20-27.

9, 10. Kiko algun ruman a hasi pa mantené nan mente aktivo?

⁹ Meskos ku Moisés i Daniel, nos por hasi esfuerso pa mantené nos mente aktivo dor di  konsentrá riba asuntunan spiritual te kaminda nos por. Hopi ruman di edat ta hasiendo esei kaba. Worth, un ansiano kristian di 80 i piku aña, ta hasi esfuerso pa keda al dia ku e kuminda spiritual ku “e esklabo fiel i prudente” ta prepará i distribuí. (Mateo 24:45) El a bisa: “Mi stima e bèrdat sinfin. Anto mi ta haña masha emoshonante pa mira kon e lus di e bèrdat ta bira mas i mas kla.” (Proverbionan 4:18) Fred tambe, kende a pasa mas ku 60 aña den sirbishi di tempu kompletu, ta haña un gran animashon spiritual ora e por tin kòmbersashon tokante Beibel ku e rumannan. El a bisa: “Mi tin ku tene e Beibel bibu den mi mente. Bo mester por laga Beibel haña bida, esta, mira su balor i propósito. Bo mester por mira kon loke bo ta siña ta pas den e patronchi òf ‘ehèmpel di palabranan sano.’ Si bo por hasi e dos kosnan aki, e ora ei bo no tin simplemente pida-pida informashon pará riba nan kurpa. Mas bien lo bo por mira kon kada pida bèrdat ta bria manera stenchi den un hoya.”—2 Timoteo 1:13.

¹⁰ E echo ku un hende ta di edat avansá no ta nifiká ku nan no por siña ideanan nobo i difísil. Hende den kareda di 60, 70 i asta 80 aña, a logra siña lesa i skirbi, òf a siña idiomanan nobo. Tin Testigunan di Yehova ku a hasi esei ku e meta di kompartí e bon nobo ku hende di diferente nashonalidat. (Marko 13:10) Harry ku su kasá tabata riba 65 aña ora ku nan a disidí di bai yuda den teritorio portugues. Harry a bisa: “Laga nos ta franko. Kualke tarea den bida ta bira mas difísil segun ku bo edat ta subi.” Pero ku esfuerso i persistensia, nan a logra dirigí estudionan di Beibel na portugues. Anto ya pa hopi aña kaba Harry ta duna asta diskurso di kongreso di distrito na portugues.

11. Pakiko konsiderá e logronan di rumannan fiel di edat?

¹¹ Klaru ku no ta tur hende tin e salú ni e sirkunstansia pa aseptá e tipo di retonan ei. Pues pakiko nos ta konsiderá loke algun ruman di edat a logra? Un kos ta sigur, esaki no ta pa indiká ku tur ruman di edat mester hasi esfuerso pa logra meskos. Mas bien, esaki ta na armonia ku loke apòstel Pablo a skirbi e kristiannan hebreo relashoná ku ansianonan fiel di kongregashon: “Konsiderando e resultado di nan kondukta, imitá nan fe.” (Hebreonan 13:7) Ora nos ta kontemplá e ehèmpelnan ei di selo, nan por animá nos pa imitá e fe fuerte ku ta motivá e rumannan di edat aki den nan sirbishi na Dios. Harry, ku awor tin 87 aña, a splika kiko ta motiv’é: “Lo mi ke usa e añanan di bida ku a resta mi na un manera sabí i ser mas útil posibel den e sirbishi di Yehova.” Fred, menshoná un biaha kaba, ta haña gran satisfakshon den kumpli ku su asignashon na Bètel. El a bisa: “Bo tin ku buska pa sa kua ta e mihó manera pa bo sirbi Yehova i pega na esei.”

Deboto Apesar di Kambio di Sirkunstansia

12, 13. Kon Barzilai a desplegá deboshon na Dios apesar ku su sirkunstansia a kambia?

¹² Tin biaha ta difísil pa aseptá i trata ku kambionan físiko. Sin embargo, ta posibel pa demostrá deboshon na Dios apesar di tal kambio. Barzilai e galaadita tabata un  ekselente ehèmpel den esaki. Na edat di 80 aña, el a demostrá hospitalidat ekstraordinario na David i su ehérsito. El a perkurá kuminda i lugá di keda pa nan durante e rebelion di Absalon. Ora David tabata regresá Yerusalèm, Barzilai a eskoltá henter e grupo te na Riu Hordan. David a ofresé Barzilai un puesto den su korte real. Kon Barzilai a reakshoná? “Mi tin ochenta aña awor. . . . Bo sirbidó por sinti smak di loke mi ta kome òf loke mi ta bebe? Òf mi por tende ainda e bos di hòmbernan i muhénan ku ta kanta? . . . Ata bo sirbidó Kimam aki, lag’é krusa ku señor mi rei, i hasi p’e loke ta bon den bo bista.”—2 Samuel 17:27-29; 19:31-40.

¹³ Apesar ku Barzilai su sirkunstansia a kambia, el a hasi loke e tabata por pa apoyá e rei nombrá pa Yehova. El a rekonosé ku su oido i sentido di sinti smak no tabata meskos ku ántes mas, pero e no tabata amargá. Mas bien, Barzilai a laga mira ki tipo di persona e tabata ora ku generosamente el a rekomendá pa Kimam risibí e benefisionan ku David a ofres’é. Meskos ku Barzilai, tin hopi ruman di edat awe ku ta mustra ku nan no ta egoista i ku ta desplegá un aktitut generoso. Nan ta hasi loke nan por pa apoyá adorashon berdadero, sabiendo ku “sorto di sakrifisionan asina ta agradá Dios.” Ta ki un bendishon di tin rumannan leal entre nos!—Hebreonan 13:16.

14. Kon e edat avansá di David ta agregá nifikashon na e palabranan di Salmo 37:23-25?

¹⁴ Apesar ku e sirkunstansianan di David a kambia hopi biaha atraves di añanan, el a keda konvensí ku e kuido di Yehova pa su sirbidónan leal no ta kambia nunka. Kasi na final di su bida, David a komponé e kantika konosí awe komo Salmo 37. Djis imaginá bo David den un estado di ánimo pensativo ta toka riba arpa i ta kanta e palabranan aki: “E pasonan di un hende ta establesí dor di SEÑOR, i E tin delisia den su kaminda. Maske e trompeká, e lo no kai; pasobra SEÑOR ta sosten’é ku su man. Mi tabata yòn, i awor mi ta bieu; ma nunka mi no a mira e hustu desampará, ni su desendientenan ta pidi pan.” (Salmo 37:23-25) Yehova a haña ku ta bon pa inkluí e referensia na David su edat den e salmo inspirá aki. Esei ta agregá un sintimentu profundo na e palabranan sinsero ei!

15. Kon apòstel Juan a pone un ekselente ehèmpel di fieldat apesar di behes i kambio di sirkunstansia?

¹⁵ Apòstel Juan ta un otro ekselente ehèmpel di fieldat apesar di edat avansá i kambio di sirkunstansia. Despues di a sirbi Dios pa kasi 70 aña, Juan a ser eksiliá pa e isla di Patmos “pa motibu di e palabra di Dios i e testimonio di Hesus.” (Revelashon 1:9) Sin embargo, su trabou no a kaba. De echo, tur loke Juan a skirbi ku ta den Beibel, el a skirbi den e último añanan di su bida. Miéntras e tabata na Patmos el a haña e vishon impreshonante di Revelashon, lokual el a skirbi kuidadosamente. (Revelashon 1:1, 2) Historiadónan por lo general ta kere ku el a sali for di eksilio durante e reinado di emperador romano Nerva. Despues di esei, rònt di aña 98 di nos era, ora ku e tabatin probablemente 90 òf 100 aña di edat, Juan a skirbi su Evangelio i e tres kartanan ku ta karga su nòmber.

Un Registro Permanente di Perseveransia

16. Kon rumannan ku ta limitá den nan kapasidat di komuniká por demostrá nan deboshon na Yehova?

¹⁶ Limitashonnan por bin den vários forma  i na diferente grado. Por ehèmpel, tin persona ku a bira limitá asta den nan kapasidat di komuniká. Sin embargo, te ainda nan tin grato rekuerdo di Dios su amor i bondat inmeresí. Maske nan ta limitá den loke nan por bisa ku nan boka, den nan kurason nan ta bisa Yehova: “O kuantu mi ta stima bo lei! E ta mi meditashon henter dia.” (Salmo 119:97) Yehova, di su parti, konosé esnan ku ta “pensa riba su nòmber.” E ta apresiá ku nan ta masha distinto for di e gran mayoria di humanidat ku no ta niun tiki interesá den su kamindanan. (Malakias 3:16, NW; Salmo 10:4) Pues, ta un gran konsuelo pa sa ku loke nos ta meditá riba dje den nos kurason ta hasi Yehova kontentu!—1 Krónikanan 28:9; Salmo 19:14.

17. Kiko sirbidónan di Yehova di hopi tempu a logra ku ta realmente úniko?

¹⁷ Un kos ku nos no mester pasa por haltu ta e echo ku e rumannan ku a sirbi Yehova fielmente pa vários dékada a logra algu ku ta realmente úniko i ku nos no por haña na ningun otro manera. Esei ta un registro permanente di perseveransia. Hesus a bisa: “Dor di boso perseveransia boso lo gana boso alma.” (Lukas 21:19) Perseveransia ta esensial pa haña bida eterno. Boso ku a hasi “e boluntat di Dios” i ku na boso manera di biba a duna prueba di boso lealtat por spera ku goso di risibí “loke a wòrdu primintí.”—Hebreonan 10:36.

18. (a) Kiko Yehova ta keda kontentu di mira relashoná ku rumannan di edat? (b) Kiko nos lo konsiderá den e siguiente artíkulo?

¹⁸ Yehova ta duna gran balor na boso sirbishi di henter alma sin importá kon hopi òf kon tiki boso por hasi. Apesar di loke por ta pasando ku e “hende eksterior” segun ku nos edat ta subi, e “hende interior” por ser renobá dia tras dia. (2 Korintionan 4:16) No tin duda ku Yehova ta apresiá loke boso a logra den pasado, pero ta bisto tambe ku e ta apresiá loke boso ta hasiendo aworakí pa su nòmber. (Hebreonan 6:10) Den e siguiente artíkulo nos lo konsiderá e efekto di largu alkanse ku e tipo di fieldat ei tin.

Kon Lo Bo Kontestá?

• Ki ekselente ehèmpel Ana a pone pa kristiannan di edat djawe?

• Dikon edat no nesesariamente ta limitá loke un hende por hasi?

• Kon rumannan di edat por sigui demostrá deboshon na Dios?

• Kon Yehova ta mira e sirbishi ku rumannan di edat ta rindi na dje?

[Preguntanan di Estudio]

[Plachi na página 23]

Na edat avansá Daniel a komprondé for di “e bukinan” e durashon di Huda su eksilio

[Plachinan na página 25]

Hopi ruman di edat ta ehemplar den asistí na reunion ku regularidat, den prediká ku selo i den nan gran deseo pa siña