Maldat A Sali for di Man?

Un hobensitu kurioso ta kue un opheto riba un tereno—un mina di tera—​ku ta eksplotá i lag’é siegu i mankaron pa restu di su bida. Un mama ta bai laga su beibi resien nasí skondí den un bola di sushi kant’i kaminda. Un empleado ku nan a kita for di trabou ta bolbe bèk kaminda e tabata traha, tira tur hende ku e topa den su kaminda, kaba e ta mata su mes. Un siudadano respetá ta abusá seksualmente di muchanan indefenso.

TA TRISTU pa mira kon informe tokante e tipo di malechonan ei a bira masha komun den nos tempu. Loke ta mas tristu ainda ta ku hopi bes e informenan ei ta haña ménos atenshon ku notisianan [mas impaktante] tokante genosidio i terorismo. Un editorial publiká na 1995 a bisa: “Si nos husga e siglo aki a base di su aspektonan di mas pió, nos por bisa ku esaki ta e era di Satanas. Den niun otro époka hende a yega di demostrá un set i kapasidat asina grandi pa mata miónes di otro hende pa motibu di rasa, religion òf klase sosial.”

Na mes momento, hende ta kontaminá aire, daña e tera i kaba ku tur su rekursonan, poniendo ku awe hopi sorto di bestia ta na rant di ekstinshon. Hende por eliminá tur e maldat aki i drecha mundu, hasié mas sigur? Òf un intento pa hasi esei lo ta manera purba dueila ku kranchi habrí? Un profèser ku a skirbi ekstensamente riba e tópiko di maldat a bisa: “Mi tabata ègt sinti ku mi mester a trese un kambio den e mundu aki pa drech’é. Pero ta bisto ku mundu no ta bayendo dilanti.” Tal bes bo ta pensa meskos.

Nos por kompará e direkshon ku mundu ta bayendo ku un barku ku ta nabegá den un laman ku dia pa dia ta bira mas brutu i mas peligroso. Ounke niun hende no ke bai den e direkshon ei, tur esfuerso pa kambia di rumbo ta frakasá. E barku ta sigui move stret den direkshon di e tormenta mortífero, sin ku ningun hende por par’é.

Te na sierto grado, nos por atribuí e situashon di deterioro aki na imperfekshon humano. (Romanonan 3:23) Pero maldat ta tuma lugá na un eskala asina grandi, asina ekstenso i asina kruel ku difísilmente por atribuí esaki na e malisia di e ser humano so. Ta eksistí e posibilidat ku un forsa invisibel pero poderoso i maligno ta manipulando humanidat? Si ta asina, kiko òf ken e ta, i kon nos por protehá nos mes kontra dje? E siguiente artíkulo lo kontestá e preguntanan aki.

[Rekonosementu pa Potrèt na página 3]

© Heldur Netocny/​Panos Pictures