Pregunta di Lektor

Akaso Proverbionan 22:6 ta un garantia ku si mayornan instruí nan yunan kristian korektamente, nan lo no apartá for di e kaminda di Yehova?

E versíkulo aki ta bisa: “Instruí un mucha den e kaminda ku e mester kana, i asta ora ku e bira bieu e lo no apartá su mes for di dje.” Meskos ku ora bo dobla un taki, esei ta influensiá su forma segun ku e ta krese bira un palu, asina muchanan instruí korektamente ta mas inkliná na sigui sirbi Yehova ora nan bira grandi. Manera tur mayor sa, e tipo di edukashon ei ta tuma basta tempu i esfuerso. Pa mayornan por hasi nan yunan disipel kristian, nan mester instruí, spièrta, animá i disipliná e muchanan kuidadosamente i tambe pone un bon ehèmpel pa nan. Anto nan mester hasi esaki na un manera konsistente i amoroso pa hopi aña largu.

Pero esaki ta nifiká ku si un mucha stòp di sirbi Yehova, ta e instrukshon ku e mayornan a duna no tabata bon? Den algun kaso, bèrdat mayornan kisas tabata defisiente den nan esfuerso pa lanta nan yunan den e disiplina i instrukshon di Yehova. (Efesionan 6:4) Di otro banda, e proverbio no ta un garantia ku dunamentu di bon instrukshon lo produsí yunan ku ta fiel na Dios. Mayornan no por pone nan yunan bira loke nan komo mayor ta deseá. Meskos ku hende grandi, mucha tin boluntat liber i na final di kuenta ta nan tin ku skohe nan propio rumbo den bida. (Deuteronomio 30:15, 16, 19) Apesar di e esfuersonan di mas sinsero di mayornan, tin yu ta bira infiel, meskos ku Salomon a bira infiel siendo ku e mes a skirbi e versíkulo ku nos ta tratando. Asta Yehova tabatin algun yu ku a resultá infiel.

Pues e versíkulo aki no ke men ku den tur kaso un mucha “lo no apartá su mes for di dje,” pero ku por lo general esaki lo ta e resultado. Ki un gran animashon pa mayornan! Mester ta un estímulo pa nan di sa ku nan esfuerso sinsero pa instruí nan yunan den e kaminda di Yehova lo produsí bon resultado. Ya ku mayornan ta hunga un papel importante i tin gran influensia riba nan yunan, lo ta bon pa nan tuma nan papel na serio.—Deuteronomio 6:6, 7.

Asta ora yunan stòp di sirbi Yehova, mayornan ku a hasi nan bèst den instruí nan yunan por karga e speransa ku nan yunan lo rekobrá nan sano huisio. E bèrdat ku tin den Beibel ta poderoso, i yunan no ta lubidá lihé e instrukshon ku nan a haña di nan mayornan.—Salmo 19:7.