Sirkunsishon Ta un Señal di Hombresa?

NA HOPI parti di mundu, hende ta sirkunsidá beibinan maskulino pa motibunan di salú. Otro kaminda sí no tin e kustumber di sirkunsidá mucha hòmber, ni ora nan bira hende grandi. Den algun kultura, manera esnan hudiu i mòslem, sirkunsishon ta mas ku un medida di salú; e tin un nifikashon religioso.

Sin embargo, den sierto paisnan, ora un mucha hòmber bira grandi, nan ta lag’é pasa den un proseso di sirkunsishon. Por lo general, esaki ta enserá ku nan ta manda e mucha un skol tradishonal, kaminda nan ta sirkunsid’é i manten’é separá for di komunidat pa algun siman te ora e rekuperá di e operashon. Durante e tempu aki, e mucha hòmber mester partisipá den sierto seremonianan spesífiko i nan ta siñ’é bira hòmber. E tipo di sirkunsishon aki ta nesesario pa proba ku un hobensitu a bira hòmber? Laga nos konsiderá kiko Beibel ta bisa tokante e punto di bista di Dios riba e asuntu aki.—Proverbionan 3:5, 6.

Kon Dios Ta Mira Sirkunsishon

Algun pueblo di pasado, manera e egipsionan, a praktiká sirkunsishon. Esaki a nifiká ku nan tabata kita e prepusio (kueru na final) di e órgano seksual maskulino. Sin embargo, Abraham no a nase den un kultura asina. De echo, e mayor parti di Abraham su bida, e no tabata sirkunsidá. Es mas, siendo insirkunsidá, el a demostrá ku e tabata un hòmber balente. Ku un grupo chikitu di hòmber, el a persiguí i derotá e ehérsitonan di e kuater reinan ku a kapturá su subrino Lòt. (Génesis 14:8-16) Rònt di 14 aña despues, Dios a bisa Abraham pa e laga sirkunsidá su mes i henter su famia. Pakiko Dios mand’é hasi esei?

Esei sigur no tabata un señal ku ta e ora ei numa Abraham a bira hòmber, ya ku pa e tempu ei e tabatin 99 aña kaba! (Génesis 17:1, 26, 27) Dios a duna e motibu pa e mandamentu aki, bisando: “Boso mester laga sirkunsidá e karni di boso prepusio, i esaki lo ta e señal di e aliansa entre ami i boso.” (Génesis 17:11) E aliansa ei ku Dios a sera ku Abraham a inkluí Su promesa ku despues di tempu, pa medio di Abraham, lo el a bendishoná “tur e famianan di mundu.” (Génesis 12:2, 3) Pues, den bista di Dios, sirkunsishon no tabatin nada di haber ku hombresa. Tabata sirkunsidá hende hòmber pa indiká ku nan a forma parti di e desendientenan israelita di Abraham, ku a ‘wòrdu konfiá ku e palabra di Dios,’ lokual tabata un privilegio pa nan.—Romanonan 3:1, 2.

Ku tempu e nashon di Israel a demostrá ku nan no tabata digno di e konfiansa ei ya ku nan a rechasá e berdadero Simia di Abraham, Hesukristu. P’esei Dios a rechasá nan, i nan sirkunsishon no tabatin ningun balor mas den bista di Dios. Sin embargo, algun kristian den e promé siglo di nos era a insistí ku ainda Dios tabata rekerí pa hende laga sirkunsidá nan mes. (Echonan 11:2, 3; 15:5) Pa motibu di esaki, apòstel Pablo a manda Tito pa “korigí loke tabata defekto” [NW] den vários kongregashon. Tokante un di e defektonan ei, Pablo a skirbi Tito: “Tin hopi hende rebelde,  hende ku ta papia pa papia, i gañadónan, spesialmente esnan di e sirkunsishon, kendenan mester wòrdu silensiá, pasobra nan ta trastorná famianan kompletu, siñando hende kosnan ku nan no mag siña nan, djis pa nan haña ganashi desonesto.”—Tito 1:5, 10, 11.

Ainda Pablo su konseho ta válido. P’esei, for di e punto di bista bíbliko, siguramente no ta korekto pa un kristian berdadero rekomendá otro hende pa laga sirkunsidá nan yu. En bes di “mete den asuntu di otro” hende, un kristian ta laga e desishonnan personal ei den man di mayornan. (1 Pedro 4:15) Ademas, Dios a inspirá Pablo pa skirbi tokante sirkunsishon segun e Lei di Moisés: “Tin hende ku a wòrdu yamá, siendo sirkunsidá? No lag’é bira insirkunsidá. Tin hende ku a wòrdu yamá, siendo insirkunsidá? No lag’é wòrdu sirkunsidá. Sirkunsishon no ta nada, ni insirkunsishon no ta nada, ma loke sí ta importante ta e kumplimentu di e mandamentunan di Dios. Laga kada hende keda den e kondishon ku el a wòrdu yamá.”—1 Korintionan 7:18-20.

Kiko di “Skolnan di Sirkunsishon”?

Kiko di mayornan kristian ku ta disidí di laga sirkunsidá nan yu hòmbernan? Ta bíblikamente korekto pa nan manda nan yunan e asina yamá skolnan di sirkunsishon deskribí anteriormente? Baimentu di e skolnan ei ta enserá hopi mas ku djis un operashon pa kita e prepusio. E alumno lo pasa vários siman den asosiashon estrecho ku otro mucha i maestronan ku no ta adoradó di Yehova. Hopi kos ku nan ta siña na e skolnan aki ta bai kontra e normanan moral haltu di Beibel. Beibel ta spièrta: “Mal kompania ta daña bon kustumber.”—1 Korintionan 15:33.

Ta eksistí tambe un peliger físiko ku ta oumentando pa esnan ku ta asistí na e skolnan aki. Na 2003 e South African Medical Journal a duna e spièrtamentu: “E aña aki nos a bolbe tuma nota di kasonan teribel di sirkunsishon, ku informenan di morto i mutilashon ku tur e kanalnan di notisia importante ta publikando rònt mundu. . . . Ku poko palabra, awe hopi di e asina yamá ‘skolnan di sirkunsishon’ ta engañoso i mortífero.”

Ademas di e posibel leshonnan físiko ku un hóben por sufri tin tambe un peliger spiritual mas grandi ainda. E siñansa- i práktikanan na skolnan di sirkunsishon ta estrechamente konektá ku spiritismo i adorashon di antepasado. Por ehèmpel, en bes di atmití ku operashon kon-ku-ta i situashonnan a-higiéniko ta responsabel pa e leshonnan ku ta ser kousá, hopi hende ta kere ku ta hasimentu di bruha òf e defuntu antepasadonan mal kontentu ta kousa e tragedianan aki. Relashoná ku konekshon ku religion falsu, Beibel ta taha: “No uni boso mes den yugo desigual ku inkrédulonan, pasobra ki kompañerismo hustisia tin ku inhustisia, i ki komunion lus tin ku skuridat? . . . ‘P’esei, sali for di meimei di nan i separá boso mes,’ SEÑOR ta bisa. ‘I no mishi ku loke ta impuru; i lo mi risibí boso.’” (2 Korintionan 6:14-17) En bista di e konseho aki, ta masha imprudente pa mayornan kristian manda nan yu hòmber un skol di sirkunsishon.

Kiko Ta Hasi un Kristian Hòmber?

Sea un hòmber kristian ta sirkunsidá òf no, esei no ta bisa nada di su hombresa. E interes prinsipal di kristiannan berdadero ta pa agradá Dios, no pa “hasi un bon impreshon den karni.”—Galationan 6:12.

Sin embargo, pa un kristian agradá Dios e mester ‘sirkunsidá su kurason.’ (Deuteronomio 10:16; 30:6; Mateo 5:8) E ta hasi esei no dor di kòrt’é ku un kuchú, sino dor di rechasá mal deseo i pensamentunan di orguyo, manera e kreensia ku dor ku e ta sirkunsidá den karni, esei ta hasié mas ku otro hende. Sea un hòmber kristian ta sirkunsidá òf nò, e por demostrá su hombresa ora e ta wanta prueba i para “firme den fe.”—1 Korintionan 16:13; Santiago 1:12.