Bo Obedensia Ta di Gran Balor pa Yehova

“Sea sabí, mi yu, i hasi mi kurason kontentu.”—PROVERBIONAN 27:11.

1. Ki spiritu ta reina den e mundu djawe?

DEN e mundu djawe ta reina un spiritu di independensia i desobedensia. Apòstel Pablo a splika e motibu den su karta na e kristiannan di Efeso. E di: “Boso tabata kana ántes segun e kurso di e mundu aki, segun e prens di e poder di laira, di e spiritu ku ta obra awor den e yunan di desobedensia.” (Efesionan 2:1, 2) Sí, Satanas e Diabel, “e prens di e poder di laira,” a kontagiá henter e mundu, na moda di papia, ku e spiritu di desobedensia. El a hasi esei den promé siglo, i e ta hasiendo esei mas intensamente ainda for di dia ku a sak’é for di shelu rònt di Promé Guera Mundial.—Revelashon 12:9.

2, 3. Ki motibunan nos tin pa obedesé Yehova?

² Sin embargo, komo kristian, nos sa ku Yehova Dios ta meresé nos obedensia sinsero pasobra e ta nos Kreadó, Esun ku ta sostené nos bida, e amoroso Señor Soberano i Esun ku ta libra nos. (Salmo 148:5, 6; Echonan 4:24; Kolosensenan 1:13; Revelashon 4:11) E israelitanan den tempu di Moisés tabata sa ku Yehova tabata Esun ku a duna nan bida i a reskatá nan. P’esei Moisés a bisa nan: “Mira pa boso hasi meskos ku SEÑOR boso Dios a ordená boso.” (Deuteronomio 5:32) Sí, Yehova a meresé nan obedensia. Sin embargo, no a tarda mashá ku nan a desobedesé nan Soberano.

³ Kon importante nos obedensia na e Kreadó di universo ta? Wèl, un biaha Dios a laga profeta Samuel bisa Rei Saul: “Obedesé ta mihó ku sakrifisio.” (1 Samuel 15:22, 23) Dikon ta asina?

Den Ki Sentido Obedensia “Ta Mihó ku Sakrifisio”

4. Den ki sentido nos por duna algu na Yehova?

⁴ Komo e Kreadó, Yehova ya kaba ta doño di tur kos material ku nos tin. Siendo ku ta asina, tin algu ku nos por dun’é? Sí, nos por dun’é algu masha balioso. Kiko esei ta? Nos por saka e kontesta for di e siguiente konseho: “Sea sabí, mi yu, i hasi mi kurason kontentu, pa mi por kontestá esun ku reprochá mi.” (Proverbionan 27:11) Nos por duna Dios nos obedensia. Maske nos sirkunstansia i antesedente ta diferente for di otro, dor di ta obediente, nos kada un por kontestá e  ponensia malisioso di Satanas e Diabel di ku hende lo no keda fiel na Dios ora nan ta konfrontá prueba. Ki un gran privilegio esei ta!

5. Kon desobedensia ta afektá e Kreadó? Ilustrá esei.

⁵ Dios ta interesá den e desishonnan ku nos ta tuma. Si nos desobedes’é, esei ta afekt’é. Den ki manera? E ta sintié masha tristu ora e ta mira un hende sigui un rumbo ku no ta sabí. (Salmo 78:40, 41) Por ehèmpel, suponé ku un persona ta diabétiko i e no ta tene su mes na e dieta saludabel ku su dòkter a preskribié pa su bon. E ta sigui kome loke ta malu pa su salú. Kon su dòkter ku ta interesá den su bienestar lo sintié? Nos por tin sigur ku Yehova ta sintié masha tristu ora hende ta desobedes’é, pasobra e sa kiko ta e konsekuensianan di keda sin hasi kaso di su resèpt pa bida.

6. Kiko lo yuda nos obedesé Dios?

⁶ Kiko lo yuda nos individualmente pa ta obediente? Ta bon pa kada un di nos pidi Dios “un kurason obedesidu,” manera Rei Salomon a hasi. El a pidi un kurason asina ya e por a “diserní entre bon i malu” ora di husga e otro israelitanan. (1 Reinan 3:9, NW) Nos tin mester di “un kurason obedesidu” si nos ke diserní entre bon i malu den un mundu kaminda ta reina e spiritu di desobedensia. Dios a perkurá vários kos pa yuda nos kultivá “un kurason obedesidu,” por ehèmpel su Palabra, publikashonnan pa studia Beibel, reunionnan kristian i ansianonan kariñoso den kongregashon. Nos ta hasiendo bon uso di e perkurashonnan amoroso aki?

7. Dikon Yehova ta enfatisá obedensia mas ku sakrifisio?

⁷ En konekshon ku esaki, kòrda ku den pasado Yehova a revelá na su pueblo di antigwedat ku obedensia tabata asta mas importante ku sakrifisio di bestia. (Proverbionan 21:3, 27; Oseas 6:6; Mateo 12:7) Dikon tabata asina, siendo ku ta Yehova mes a manda su pueblo ofresé e sakrifisionan ei? Wèl, kiko tabata e motivashon di e persona ku a ofresé e sakrifisio? El a hasié pa agradá Dios? Òf e tabata djis sigui un sierto ritual? Si un adoradó di bèrdat kier a agradá Dios, lo el a sòru obedesé tur e mandamentunan di Dios. Dios no tin mester di sakrifisio di bestia, pero nos obedensia sí ta un kos di balor ku nos por dun’é.

Un Ehèmpel Ku Ta Sirbi Komo Atvertensia

8. Dikon Dios a rechasá Saul komo rei?

⁸ E relato den Beibel tokante Rei Saul ta enfatisá e importansia di obedensia. Saul a kuminsá komo un gobernante humilde i modesto, ‘chikitu den su mes bista.’ Pero ku tempu, orguyo i rasonamentu falsu a kuminsá dominá su desishonnan. (1 Samuel 10:21, 22; 15:17) Na un okashon, Saul tabatin ku konfrontá e filisteonan den bataya. Samuel a bisa e rei pa ward’é yega pa ofresé sakrifisio na Yehova i p’e duna e rei mas instrukshon. Sin embargo, Samuel no a bin na e ora ku nan a sper’é, i e pueblo a kuminsá plama for di otro. Ora Saul a mira esei sosodé, el a “ofresé e ofrenda kimá.” Yehova no a keda niun tiki kontentu ku esaki. Ora ku finalmente Samuel a yega, e rei a hustifiká su desobedensia bisando ku ta pasobra Samuel tabata lat, el ‘a sinti su mes obligá’ di ofresé e ofrenda kimá p’e haña Yehova su aprobashon. Pa Rei Saul, tabata mas importante pa ofresé e sakrifisio ei ku obedesé e instrukshon ku el a haña pa warda pa Samuel ofresé e sakrifisio. Samuel a bis’é: “Bo a aktua na manera bobo; bo no a warda e mandamentu di SEÑOR bo Dios ku el a ordená bo.” Saul a desobedesé Yehova. Esei a pon’é pèrdè su reinado.—1 Samuel 10:8; 13:5-13.

9. Kon Saul a desplegá e mal kustumber di desobedesé Dios?

⁹ Akaso e rei a siña un lès for di e eksperensia aki? Nò! Mas despues, Yehova a manda Saul destruí e nashon di Amalek, pasobra nan a yega di ataká Israel sin ningun  provokashon. Saul no tabatin mag di spar ni sikiera nan bestianan doméstiko. El a obedesé Yehova dor di “derotá e amalekitanan, for di Havila te yega Shur.” Ora Samuel a bin pa top’é, e rei tabata sumamente kontentu ku e viktoria i a bisa: “Ku SEÑOR bendishoná bo! Mi a kumpli ku e òrdu di SEÑOR.” Sin embargo, kontrario na e instrukshonnan bon kla ku Saul i e pueblo a haña, nan no a mata Rei Agag ni “e mihónan di e karnénan, e bueynan, e bestianan gòrdá, e lamchinan i tur loke tabata bon.” Rei Saul a hustifiká su proseder desobediente bisando: “E pueblo a spar e mihó di e karnénan i bueynan pa ofresé sakrifisio na SEÑOR bo Dios.”—1 Samuel 15:1-15.

10. Ki lès Saul no a siña?

¹⁰ E ora ei Samuel a bisa Saul: “Akaso SEÑOR tin mes tantu delisia den ofrendanan kimá i sakrifisionan ku den obedensia na e bos di SEÑOR? Mira, obedesé ta mihó ku sakrifisio, i skucha ta mihó ku vèt di karné chubatu.” (1 Samuel 15:22) Ya ku Yehova a bisa di antemano ku mester a destruí e bestianan ei, nan no tabata aseptabel pa ofresé komo sakrifisio.

Sea Obediente den Tur Kos

11, 12. (a) Kon Yehova ta mira nos esfuerso pa agrad’é den nos adorashon? (b) Kon un persona lo por gaña su mes i kere ku e ta hasiendo e boluntat di Dios miéntras ku en realidat e ta desobedesidu?

¹¹ Yehova ta keda masha kontentu ora e ta mira su sirbidónan fiel ta keda firme apesar di persekushon, ta proklamá e Reino apesar ku mayoria di hende no ta interesá i ta asistí na reunionnan kristian apesar ku nan ta bou di preshon pa gana nan pan di kada dia. Nos obedensia den e aspektonan importante ei di nos bida spiritual ta hasi su kurason kontentu! Nos esfuersonan pa adorá Yehova tin gran balor p’e ora nos ta hasié komo muestra di nos amor. Hende kisas no ta ripará nos trabou duru, pero Dios sí ta tuma nota di nos ofrendanan sinsero i ta keda kòrda nan.—Mateo 6:4.

¹² Sin embargo, pa nos agradá Dios plenamente, nos mester ta obedesidu den tur faseta di nos bida. Nos no mester gaña nos mes nunka i pensa ku nos por desviá un poko for di e rekisitonan di Dios tanten ku nos ta ador’é den otro aspektonan di bida. Por ehèmpel, un persona lo por gaña su mes i kere ku si e ta kumpli superfisialmente ku sierto rasgonan di adorashon djis pa formalidat, lo e por skapa kastigu si e kometé inmoralidat òf partisipá den otro malecho serio. Esei ta un ekibokashon grave!—Galationan 6:7, 8.

13. Kon nos obedensia na Yehova por ser poné na prueba den asuntunan privá?

 ¹³ Di akuerdo ku esei, nos por puntra nos mes: ‘Mi ta obedesé Yehova den mi aktividatnan diario, asta den kosnan ku aparentemente ta asuntunan privá?’ Hesus a deklará: “Esun ku ta fiel den un kos masha chikitu, ta fiel tambe den hopi; i esun ku ta inhustu den un kos masha chikitu, ta inhustu tambe den hopi.” (Lukas 16:10) Nos ta ‘kana den e integridat di nos kurason’ asta ‘den nos kas,’ kaminda otro hende no ta mira nos? (Salmo 101:2) Sí, nos integridat por ser poné na prueba den nos kas. Den hopi pais kaminda kasi tur hende tin kòmpiuter na kas, ta masha fásil pa haña akseso na potrètnan sumamente inmoral. Te ku un par di aña pasá, bo mester a drenta den un lugá di entretenimentu inmoral pa mira e tipo di kosnan ei. Akaso nos lo ta obedesidu i tuma na pechu e palabranan di Hesus: “Ken ku wak un muhé pa dese’é, ya kaba el a kometé adulterio kuné den su kurason”? Es mas, nos lo nenga di asta wak potrètnan inmoral? (Mateo 5:28; Jòb 31:1, 9, 10; Salmo 119:37; Proverbionan 6:24, 25; Efesionan 5:3-5) Kiko di programanan na televishon ku ta violento? Nos ta di akuerdo ku nos Dios, kende ta ‘odia esun ku ta gusta violensia’? (Salmo 11:5) Òf kiko di bebe demasiado alkohòl den privá? Beibel ta kondená buracheria, pero tambe e ta spièrta kristiannan pa nan no ta “sklabisá na biña.”—Tito 2:3; Lukas 21:34, 35; 1 Timoteo 3:3.

14. Menshoná algun manera den kua nos ta demostrá nos obedensia na Dios den asuntunan di plaka.

¹⁴ Nos mester ta alerta tambe den asuntunan di plaka. Por ehèmpel, nos lo enbolbé nos mes den un proyekto pa bira riku lihé ku kasi ta un forma di estafa? Nos ta sinti e tentashon pa rekurí na medionan ilegal pa keda sin paga belasting? Òf mas bien nos ta obedesé kuidadosamente e mandamentu pa “duna tur hende loke boso debe nan: si boso ta debe belasting, paga belasting”?—Romanonan 13:7.

Obedensia Motivá pa Amor

15. Pakiko abo ta obedesé e mandamentunan di Yehova?

¹⁵ Obedensia na e instrukshonnan divino ta trese bendishon. Por ehèmpel, komo ku nos ta apstené di usa tabako, i nos ta hiba un bida moralmente limpi i ta respetá e santidat di sanger, nos por evitá di bira víktima di sierto malesa. Ademas, dor di biba na armonia ku e bèrdat di Beibel den otro aspektonan di bida, nos por benefisiá ekonómikamente, i tambe riba tereno sosial òf den nos bida di famia. (Isaias 48:17) Nos por konsiderá kualke un di e benefisionan físiko ei korektamente komo bendishonnan ku ta duna prueba ku e leinan di Dios ta práktiko. Pero tòg e motibu prinsipal pakiko nos ta obedesé Yehova ta pasobra nos stim’é. Nos no ta sirbi Dios pa motibunan egoista. (Jòb 1:9-11; 2:4, 5) Dios a duna nos e libertat di obedesé ken ku nos ke. Nos ta skohe pa obedesé Yehova komo ku nos ke agrad’é i komo ku nos ta trata di hasi loke ta korekto.—Romanonan 6:16, 17; 1 Juan 5:3.

16, 17. (a) Kon Hesus a demostrá obedensia na Dios motivá pa amor profundo? (b) Kon nos por imitá Hesus?

¹⁶ Hesus tabata e ehèmpel perfekto di obedesé Yehova motivá pa un amor profundo p’e. (Juan 8:28, 29) Ora Hesus tabata riba tera “el a siña obedensia dor di e kosnan ku el a sufri.” (Hebreonan 5:8, 9) Kon asina? Hesus “a humiá su mes dor di bira obedesidu te na morto,” asta morto na un staka di tormento. (Filipensenan 2:7, 8) Ounke Hesus tabata obedesidu kaba den shelu, su obedensia a ser poné na prueba mas ainda riba tera. Nos por tin sigur ku Hesus ta bon kualifiká den tur sentido pa sirbi komo Sumo Saserdote di su rumannan spiritual i tambe  pa otro personanan kreyente.—Hebreonan 4:15; 1 Juan 2:1, 2.

¹⁷ Kiko di nos? Nos por imitá Hesus dor di duna prioridat na obedesé e boluntat di Dios. (1 Pedro 2:21) Nos por haña satisfakshon personal ora nos amor pa Dios motivá nos pa hasi loke Yehova ta manda, asta na momentonan ku nos ta ser preshoná òf ta sinti e tentashon pa hasi lo kontrario. (Romanonan 7:18-20) Esaki ta enserá ku nos ta dispuesto pa obedesé instrukshon di e rumannan ku ta hiba delantera den adorashon berdadero, apesar ku nan ta imperfekto. (Hebreonan 13:17) Nos obedensia na mandamentunan divino den nos bida priva ta di gran balor den bista di Yehova.

18, 19. Nos obedensia sinsero na Dios ta resultá den kiko?

¹⁸ Awe, nos obedensia na Yehova kisas ta enserá wanta persekushon afin di mantené nos integridat. (Echonan 5:29) Ademas, pa nos por obedesé Yehova su mandamentu di bai prediká i siña hende nos mester perseverá te na fin di e sistema aki. (Mateo 24:13, 14; 28:19, 20) Nos tin mester di perseveransia pa sigui reuní ku nos rumannan, apesar ku kisas nos ta sinti e peso di e preshon ku mundu ta pone riba nos. Nos Dios amoroso ta bon konsiente di nos esfuerso pa obedes’é riba e terenonan ei. Sin embargo, pa nos ta plenamente obediente, nos tin ku lucha kontra nos karni pekaminoso i apartá for di loke ta malu miéntras ku a la bes nos ta kultivá apresio pa loke ta bon.—Romanonan 12:9.

¹⁹ Ora nos ta sirbi Yehova motivá pa amor i ku un kurason gradisidu, e ta bira pa nos “Esun ku ta rekompensá esnan ku ta busk’é.” (Hebreonan 11:6) Sakrifisionan apropiá ta nesesario i deseabel, pero loke ta agradá Yehova mas tantu ta pleno obedensia motivá pa amor p’e.—Proverbionan 3:1, 2.

Kon Lo Bo Kontestá?

• Dikon nos por bisa ku nos tin algu pa duna Yehova?

• Ki erornan Saul a kometé?

• Kon bo por demostrá ku bo ta kere ku obedensia ta mihó ku sakrifisio?

• Kiko ta motivá bo pa obedesé Yehova?

[Preguntanan di Estudio]

[Plachi na página 26]

Kon un dòkter ku ta interesá den e bienestar di su pashènt lo sinti si e pashènt no ta sigui su rekomendashonnan?

[Plachi na página 28]

Dikon Rei Saul a pèrdè Yehova su aprobashon?

[Plachinan na página 30]

Abo ta obedesé e mandamentunan di Dios den e privasidat di bo kas?