Bo Ta Imitá Yehova den Kuida Otro Hende?

“TIRA tur preokupashon riba [Dios], pasobra e ta kuida boso.” (1 Pedro 5:7, BPK) Ki un invitashon kaluroso! Yehova Dios ta personalmente interesá den su pueblo. Nos por sinti nos sigur den su brasa.

Nos mester kultivá i desplegá e mesun interes i kuido pa otro hende. Pero komo ku nos ta imperfekto, nos tin ku tene kuidou ku sierto peligernan ora nos ta mustra interes personal den otro hende. Promé ku nos trata algun di e peligernan ei, laga nos wak algun manera ku Yehova ta mustra interes i ta kuida su pueblo.

Salmista David a usa un wardadó di karné pa ilustrá Dios su kuido. El a bisa: “[Yehova] ta mi wardadó, lo mi no tin falta di nada. E ta pone mi drumi den lugánan di yerba bèrdè; e ta hiba mi kantu di awanan ketu. E ta restorá mi alma . . . Maske mi kana den e vaye di sombra di morto, mi no tin miedu di maldat, pasobra abo ta ku mi.”—Salmo 23:1-4.

Siendo ku David mes tabata un wardadó di karné, e tabata sa kiko kuida un tou a enserá. E wardadó ta protehá su karnénan di bestia yagdó, manera leon, lobo i ber. E ta sòru pa e tou no plama for di otro, e ta buska karné ku pèrdè, e ta karga lamchinan ku kansa den su brasa, i e ta kuida e bestianan malu i heridá. Tur dia e ta duna e tou awa. Pero esaki no ta nifiká ku e wardadó ta dirigí delaster un stap di e karnénan. E karnénan ta liber pero tòg protehá.

Asina Yehova ta kuida su pueblo. Apòstel Pedro a splika: ‘Boso ta ser protehá dor di e poder di Dios.’ Aki, ‘ser protehá’ ta nifiká literalmente ser mantené bou di vigilansia. (1 Pedro 1:5) Motivá pa berdadero interes i preokupashon, Yehova semper ta vigilá nos, i e ta semper kla pa duna nos un man asina ku nos pidié. Sin embargo, Yehova a krea nos ku boluntat liber, pues e no ta intervení den tur loke nos ta hasi i disidí. Kon nos por imitá Yehova den esaki?

Imitá Dios den Bo Manera di Kuida Bo Yunan

“Yunan ta un herensia di SEÑOR.” Pues, mayornan mester protehá i kuida nan yunan. (Salmo 127:3) Esaki kisas ta enserá ku nan mester animá nan yunan pa ekspresá loke nan ta pensa i sinti, anto tene kuenta ku esei ora nan ta trata ku e yunan. Si mayornan ta purba dirigí delaster un stap di nan yunan, ignorando nan deseonan kompletamente, esei lo ta meskos ku un wardadó di karné ku ta purba kontrolá su karnénan dor di mara nan na kabuya. Ningun wardadó ta kuida su tou den e manera ei; i Yehova tampoko no ta hasi esei ku nos.

 Mariska * ta atmití: “Pa hopi tempu mi tabata blo bisa mi yunan: ‘Boso mester hasi esaki’ i ‘Boso no mag di hasi esei.’ Mi a kere ku esaki tabata mi obligashon komo mayor. Nunka mi no tabata duna nan un kòmplimènt, ni mi no tabata ègt komuniká ku nan.” Ounke Mariska su yu muhé tabata papia oranan largu na telefòn ku su amiganan, kòmbersashonnan ku su mama no tabata dura largu. Mariska a sigui bisa: “Mi a bin realisá kiko tabata e diferensia. Ora di papia ku su amiganan, mi yu muhé tabata usa ekspreshonnan ku ta mustra komprenshon, manera: ‘Sí, mi ta di akuerdo’ òf ‘Mi tambe.’ Mi a kuminsá usa ekspreshonnan similar pa animá mi yu pa ekspresá su mes, i no a dura hopi ku nos kòmbersashonnan a bira mas largu i mas agradabel.” Esaki ta suprayá e importansia di bon komunikashon, lokual por lo general no ta bin di ún banda so sino di tur dos banda.

Mayornan tin ku animá nan yunan pa ekspresá nan mes, i yunan tin ku komprondé dikon e echo ku nan mayornan ta preokupá pa nan ta sirbi komo un protekshon. Beibel ta konsehá yu pa obedesé nan mayornan; kaba e ta deklará e motibu: “Pa bai bo bon i pa bo tin bida largu riba tera.” (Efesionan 6:1, 3) Yunan ku ta bon konvensí di e benefisionan di ser sumiso ta ripará ku ta mas fásil pa obedesé nan mayornan.

Ora di Kuida e Tou di Yehova

Yehova su interes amoroso ta ser reflehá den e kongregashon kristian. Hesukristu, komo Kabes di e kongregashon, ta manda ansianonan kuida su tou. (Juan 21:15-17) E palabra griego pa superintendente ta ligá ku un verbo ku ta nifiká “vigilá kuidadosamente.” Pedro a enfatisá kon mester hasi esaki, i a instruí ansianonan: “Pastoriá e tou di Dios meimei di boso, hasiendo e trabou di kuidadó, no fòrsá, ma boluntariamente, segun e boluntat di Dios; i no pa ganashi desonesto, sino ku hopi afan; no manera hende ku tin dominio riba esnan ku a wòrdu konfiá na boso, ma siendo ehèmpel pa e tou.”—1 Pedro 5:2, 3.

Sí, ansianonan su tarea ta kasi meskos ku di wardadó di karné. Ansianonan kristian tin ku kuida e rumannan spiritualmente enfermo i reahustá nan di tal manera ku nan bida ta reflehá normanan hustu. Ansianonan ta esnan responsabel pa organisá aktividatnan spiritual di  kongregashon, hasi areglo pa reunion i mantené òrdu den kongregashon.—1 Korintionan 14:33.

Pero e palabranan di Pedro sitá anteriormente ta hala nos atenshon na un peliger. Esei ta ku ansianonan por kuminsá ‘ehersé dominio riba’ e kongregashon. Un posibel indikashon di esei ta ora un ansiano ta traha reglanan innesesario. Kisas un ansiano ta sinti un gran obligashon pa protehá e tou, i esei lo por pon’é bai muchu leu. Den un kongregashon na Oriente, ansianonan a traha regla tokante kon e rumannan mester kumindá otro den Salòn di Reino. Por ehèmpel, nan a indiká ken mester papia promé. Segun nan, e reglanan aki lo a kontribuí na pas den e kongregashon. E ansianonan ei sin duda a hasi esaki ku bon intenshon, pero nan a imitá e manera ku Yehova ta kuida su pueblo? Ta bon pa tuma nota di e aktitut mental ku apòstel Pablo a reflehá den e siguiente palabranan: “No ku nos tin dominio riba boso fe, ma nos ta trahadó huntu ku boso pa boso goso; pasobra den boso fe boso ta para firme.” (2 Korintionan 1:24) Yehova ta konfia su pueblo.

Fuera di evitá di pone regla ku no tin base bíbliko, ansianonan amoroso ta mustra ku nan ta berdaderamente interesá den nan rumannan dor di no revelá informashon konfidensial. Nan ta tene na mente e spièrtamentu divino: “No revelá sekreto di un otro.”—Proverbionan 25:9.

Apòstel Pablo a kompará e kongregashon di kristiannan ungí ku e kurpa humano, bisando: “Dios a komponé e kurpa di tal manera . . . pa no tin divishon den e kurpa, ma pa e miembronan tin e mesun perkurashon un pa otro.” (1 Korintionan 12:12, 24-26) E ekspreshon griego “tin e mesun perkurashon un pa otro” ta nifiká literalmente ‘mester ta preokupá pa otro.’ E miembronan di e kongregashon kristian lo mester ta profundamente interesá den otro.—Filipensenan 2:4.

Kon kristiannan berdadero por demostrá ku nan ta ‘preokupá pa otro’? Nan lo por demostrá nan preokupashon pa otro miembronan di e kongregashon mediante nan orashonnan i dor di ofresé yudansa práktiko na esnan den nesesidat. Esaki ta yuda saka e bon ku tin den otro hende. Konsiderá kon Tadataka a haña yudansa dor di tal interes amoroso. Ora el a batisá na edat di 17 aña, e tabata e úniko persona den su famia ku tabata sirbi Yehova. El a konta: “Tabatin un famia den kongregashon ku hopi biaha tabata invitá mi pa bin serka nan pa kome i pa reunionnan sosial. Kasi tur mainta riba kaminda pa skol mi tabata pasa na nan kas pa konsiderá e teksto di Beibel di e dia ei huntu ku nan. Nan a duna mi konseho kon pa trata ku problema na skol, i nos tabata hasi orashon huntu tokante esei. Mi a siña kultivá e spiritu di duna for di e famia aki.” Awor Tadataka ta poniendo na práktika loke el a siña dor di sirbi na un di e sukursalnan di Testigunan di Yehova.

Apòstel Pablo a spièrta pa un peliger spesífiko den e asuntu di mustra interes den otro hende. El a menshoná sierto hende muhé ku tabata kana “hasi redu i mete den asuntu di otro hende, papiando kosnan ku no ta kumbiní.” (1 Timoteo 5:13) Ounke ta apropiá pa nos ta interesá den otro hende, nos tin ku tene kuidou pa nos no bai asina leu ku nos ta mete den nan asuntunan personal. Demasiado interes den otro hende por manifestá su mes den ‘papia kosnan ku no ta kumbiní,’ por ehèmpel dor di hasi remarkenan krítiko.

Ta bon pa nos kòrda ku kisas kristiannan ta diferensiá den e manera ku nan ta atendé nan asuntunan personal, den loke nan ta skohe pa kome i ki forma di rekreo sano nan ta skohe. Denter di e límitenan ku prinsipionan di Beibel ta indiká, kada persona ta liber pa disidí kiko e ta hasi. Pablo a spièrta e kristiannan romano: “No laga nos husga otro mas . . . Laga nos buska e kosnan ku ta trese pas i edifikashon di otro.” (Romanonan 14:13, 19) Ta bon pa den kongregashon nos demostrá nos interes sinsero pa otro dor di ta kla pa duna un man, i no dor di mete den asuntu di otro hende. Ora nos ta mustra interes i ta kuida otro den e manera aki, amor i union lo floresé den famia i den kongregashon.

[Nota]

[Plachi na página 19]

Animá bo yunan pa ekspresá nan mes dor di elogiá nan i mustra komprenshon