Nos Ta ‘Trahá na un Manera Maravioso’

“Mi ta trahá na un manera temerosamente maravioso.”—SALMO 139:14.

1. Dikon hopi hende ku ta pensa mas leu ta duna Dios krédito pa e maravianan riba tera?

NATURALESA ta yen di kreashon maravioso. Kon nan a bin na eksistensia? Tin hende ta kere ku nos por haña e kontesta sin referí na un Kreadó inteligente. Otro hende ta di opinion ku si nos disidí arbitrariamente di rechasá e idea ku tin un Kreadó, esei ta stroba nos di komprondé naturalesa. Nan ta kere ku e kriaturanan riba tera ta muchu kompliká, muchu variá i, lo bo por agregá, muchu maravioso pa nan a bin di puru kasualidat. Pa hopi hende, inkluso algun sientífiko, evidensia ta mustra ku universo tabatin un Kreadó sabí, poderoso i bondadoso. *

2. Kiko a motivá David pa alabá Yehova?

² Rei David di Israel di antigwedat tabata un di e hendenan konvensí ku tabatin un Kreadó ku a meresé alabansa pa Su kreashon maravioso. Ounke David a biba hopi tempu promé ku nos era sientífiko, el a ripará ku tur rònt di dje tabatin ehèmpel di Dios su obranan di kreashon. Pero e mester a djis analisá su propio kurpa pa el a keda profundamente impreshoná ku Dios su kapasidat di krea. El a skirbi: “Mi ta alabá bo, pasobra mi ta trahá na un manera temerosamente maravioso; maravioso ta bo obranan, i mi alma sa esei masha bon.”—Salmo 139:14.

3, 4. Pakiko ta importante pa kada un di nos pensa seriamente riba e obranan di Yehova?

³ David a haña e konvikshon fuerte aki dor di pensa seriamente riba e obranan di Yehova. Awendia, lèsnan di skol i medionan di komunikashon ta bin ku yen di teoria tokante e orígen di hende, teorianan ku ta destruí fe. Pa nos por tin fe manera di David, nos tambe tin ku pensa seriamente riba e obranan di Yehova. Ta peligroso pa laga otro hende pensa i disidí pa nos kiko nos mester kere, foral relashoná ku asuntunan fundamental manera e eksistensia di un Kreadó i su papel komo fuente di tur kos.

⁴ Es mas, ora nos ta kontemplá e obranan di Yehova, nos ta haña hopi mas apresio p’e i tambe konfiansa den su promesanan pa futuro. Esei en buèlta por motivá nos pa siña konosé Yehova mas mihó ainda i sirbié. P’esei laga nos konsiderá kon siensia moderno a konfirmá David su konklushon, esta, ku nos ta ‘ta trahá na un manera maravioso.’

E Manera Maravioso Ku Nos Kurpa Ta Desaroyá

5, 6. (a) Kon nos tur a kuminsá eksistí? (b) Ki funshon nos nirnan tin?

⁵ “Bo a forma mi riñonnan; bo a wef mi, forma mi den barika di mi mama.” (Salmo  139:13) Nos tur a kuminsá eksistí den barika di nos mama komo un solo sèl, mas chikitu ku e punto na final di e frase aki. E sèl mikroskópiko ei tabata sumamente kompliká, un fábrika chikitu! El a krese rápidamente. Na fin di bo di dos siman den barika, bo órganonan prinsipal tabata formá kaba, entre nan, bo nirnan (riñonnan). Ora bo a nase, bo nirnan tabata kla pa filtra bo sanger. Nan a eliminá venenu i awa di mas den bo sanger pero a keda ku e supstansianan útil. Si bo dos nirnan ta salú, nan ta filtra e awa den bo sanger kada 45 minüt, i esei por ta mas o ménos sinku liter den kaso di un adulto!

⁶ Ademas, bo nirnan ta yuda mantené e nivel di mineral, di ásido i di preshon di bo sanger. Nan ta efektuá hopi funshon mas ku ta sumamente importante. Por ehèmpel, nan ta kombertí vitamina D den un otro forma ku ta nesesario pa bo wesunan por desaroyá bon i nan ta produsí e hormon eritropoyetin, ku ta stimulá produkshon di sèl kòrá di sanger den bo wesunan. P’esei no ta un sorpresa ku hende a yega di yama e nirnan “e spesialistanan kímiko di e kurpa”! *

7, 8. (a) Deskribí kon un yu ku no a nase ta kuminsá desaroyá. (b) Den ki manera un yu ku ta desaroyá ta ser “formá den e profundidatnan di tera”?

⁷ “Mi wesunan no tabata skondí pa bo, tempu ku mi a wòrdu trahá na sekreto, bon formá den e profundidatnan di tera.” (Salmo 139:15) E sèl original a parti na dos, i e sèlnan nobo a sigui parti. Poko despues e sèlnan a kuminsá spesialisá nan mes pa bira sèl di nèrvio, sèl di múskulo, sèl di kueru, etcetera. Sèlnan di e mesun tipo a keda huntu pa forma tehido i despues órgano. Por ehèmpel, durante e di tres siman despues di a ser konsebí, bo wesunan a kuminsá desaroyá. Pa ora ku bo tabatin apénas shete siman i tabata midi solamente 2,5 centimeter, tur e 206 wesunan ku lo bo tin komo adulto tabata na nan lugá, maske nan tabata chikitu i no a bira wesu duru ainda.

⁸ E proseso asombroso aki a tuma lugá den barika di bo mama, skondí for di bista humano komo si fuera den e profundidat di tera. De echo, te ainda hende no sa mashá tokante kon nos ta desaroyá. Por ehèmpel, dado momento sierto sèlnan a kuminsá spesialisá nan mes pa forma e diferente partinan di bo kurpa. Kiko a aktivá sierto gene den bo sèlnan pa start e proseso ei? Kisas sientífikonan ku tempu lo deskubrí esaki, pero manera David a sigui bisa, nos Kreadó—Yehova—sí tabata sa esei for di prinsipio.

9, 10. Den ki sentido e formashon di e partinan di un èmbrio ta ‘skirbí den Dios su buki’?

⁹ “Bo wowonan a mira mi supstansia sin forma [“èmbrio,” NW]; i e dianan ku tabata stipulá pa mi, tur tabata skirbí den bo buki, tempu ku no tabatin ningun di nan ainda.” (Salmo 139:16) Bo promé sèl tabatin e mapa kompletu di henter bo kurpa. E mapa aki a guia bo desaroyo den barika di bo mama durante e nuebe lunanan promé ku bo a nase, i a sigui hasié pa mas ku 20 aña segun bo tabata krese bira adulto. Durante e tempu ei, bo kurpa a pasa den vários etapa, i tur a ser dirigí pa e informashon programá den esun sèl original ei.

¹⁰ David no tabata sa di sèl i gene, ya ku e no tabatin ni sikiera mikroskop. Pero korektamente el a komprondé ku e desaroyo di su propio kurpa a duna prueba ku mester tabatin un plan trahá di antemano. Podisé David tabatin  algun konosementu di e manera ku èmbrio ta desaroyá, p’esei e por a rasoná ku kada stap mester ta tuma lugá segun un diseño i orario establesé kaba. Ku palabranan poétiko el a deskribí e diseño aki komo si fuera ‘skirbí den Dios su buki.’

11. Di unda nos a haña nos karakterístikanan físiko?

¹¹ Awendia, ta konosí ku ta bo genenan ta determiná e karakterístikanan ku bo ta heredá di bo mayornan i antepasadonan; kosnan manera bo haltura, rasgonan di kara, koló di wowo i di kabei, i míles di otro karakterístika. Kada un di bo sèlnan ta kontené míles di gene, i kada gene ta parti di un kadena largu trahá di DNA (ásido desoksiribonukleiko). Den e struktura kímiko di bo DNA personal tin e instrukshonnan “skirbí” pa forma bo kurpa. Kada biaha ku bo sèlnan parti—pa traha sèl nobo òf pa remplasá sèl bieu—bo DNA ta pasa e instrukshonnan ei over, i ta esei ta tene bo na bida i ta laga bo keda básikamente ku e mesun aparensia. Ki un ehèmpel sobresaliente di e poder i sabiduria di nos Kreadó selestial!

Nos Mente Úniko

12. Kiko spesialmente ta distinguí hende for di bestia?

¹² “Ki presioso bo pensamentunan ta pa mi, o Dios! Ki grandi nan kantidat ta! Si mi lo a konta nan, nan lo a surpasá e pipitanan di santu.” (Salmo 139:17, 18a) Bestia tambe ta trahá na un manera maravioso, i algun di nan tin sierto sentido i kapasidat ku ta surpasá esnan di hende. Pero Dios a duna hende fakultatnan mental ku ta surpasá esnan di kualke bestia. Un buki pa studia temanan sientífiko a bisa: “Ounke nos komo hende den hopi aspekto ta similar na otro espesie, nos kapasidat pa usa idioma i di pensa ta úniko entre e formanan di bida riba tera. . . . Nos ta úniko tambe den nos kuriosidat profundo tokante nos mes. Nos ke sa: Kon nos kurpa ta hinká den otro? Kon nos a ser formá?” Esaki ta preguntanan ku David tambe a meditá riba dje.

13. (a) Kon David por a meditá riba e pensamentunan di Dios? (b) Kon nos por sigui e ehèmpel di David?

¹³ Mas importante ainda, na kontraste ku bestia, nos ta úniko den nos kapasidat pa kontemplá e pensamentunan di Dios. * E don spesial aki ta un di e maneranan ku nos ta trahá “segun e imágen di Dios.” (Génesis 1:27) David a hasi bon uso di e don aki. El a meditá riba e evidensia ku a konfirmá Dios su eksistensia i riba Dios su bon kualidatnan reflehá den su kreashon riba tera. Ademas, David tabatin e promé bukinan di e Santu Skritura ku a kontené loke Dios a revelá tokante su mes i su obranan. E skrituranan inspirá aki a yud’é komprondé Dios su pensamentu, personalidat i propósito. David a meditá riba e Skritura, riba kreashon i  riba Dios su trato kuné, i esei a motiv’é pa alabá su Kreadó.

Loke Fe Ta Enserá

14. Dikon nos no tin nodi sa tur kos tokante Dios pa nos por tin fe den dje?

¹⁴ Mas David a kontemplá kreashon i e Skritura, mas el a bin realisá ku ta fuera di su alkanse pa komprondé e límite kompletu di Dios su konosementu i kapasidat. (Salmo 139:6) Asina ta ku nos tambe. Nunka nos lo no komprondé tur kos tokante Dios su obranan di kreashon. (Eklesiastés 3:11; 8:17) Pero Dios a “manifestá” sufisiente konosementu via e Skritura i den naturalesa pa asina hasi posibel ku hende di kualke époka ku a buska e bèrdat, por a kultivá fe a base di evidensia.—Romanonan 1:19, 20; Hebreonan 11:1, 3.

15. Ilustrá kon fe i nos relashon ku Dios ta ligá ku otro.

¹⁵ Fe ta enserá mas ku djis rekonosé ku bida i universo mester tabatin un Fuente inteligente. E ta enserá konfia den Yehova Dios komo persona, un persona ku ke pa nos siña konos’é i mantené un bon relashon kuné. (Santiago 4:8) Nos lo por kompará esaki ku e fe i konfiansa ku bo tin den un tata amoroso. Si un persona mester bisa ku e ta duda ku bo tata realmente lo yuda bo den un krísis, kisas lo bo no por konvens’é ku bo tata ta digno di konfiansa. Sin embargo, si di eksperensia bo a akumulá evidensia di bo tata su bon karakter, bo por tin e konfiansa ku lo e no laga bo na kaya. Asina tambe, ora nos siña konosé Yehova dor di studia e Skritura, dor di kontemplá kreashon i dor di eksperensiá su yudansa komo kontesta riba nos orashonnan, esei ta motivá nos pa konfia den dje. E ta pone ku nos ke siña mas i mas tokante dje i alab’é pa semper komo muestra di nos amor i deboshon. Esei ta e meta di mas noble ku un hende por sigui.—Efesionan 5:1, 2.

Buska e Guia di Nos Kreadó!

16. Kiko nos por siña for di David su relashon íntimo ku Yehova?

¹⁶ “Skudriñá mi, o Dios, i konosé mi kurason; purba mi i konosé mi pensamentunan, i mira si tin kualke kaminda di maldat den mi, i guia mi riba e kaminda eterno.” (Salmo 139:23, 24) David tabata sa ku Yehova konos’é kaba ‘door en door’; tur loke el a pensa, bisa òf hasi, su Kreadó por a tuma nota di dje. (Salmo 139:1-12; Hebreonan 4:13) E echo ku Dios tabata konos’é asina íntimamente a duna David un sintimentu di siguridat, meskos ku un mucha chikitu ta sintié sigur den brasa di su mayornan amoroso. David a apresiá e relashon íntimo aki ku Yehova i a hasi su bèst pa manten’é dor di pensa profundamente riba Yehova su obranan i dor di hasi orashon na dje. De echo, hopi di e salmonan di David—inkluso Salmo 139—ta básikamente orashon kompañá pa muzik. Hasi orashon i meditá riba e obranan di Dios por yuda nos tambe hala serka Yehova.

17. (a) Dikon David tabata ke pa Yehova saminá su kurason? (b) Kon e manera ku nos ta ehersé nos boluntat liber ta influensiá nos bida?

¹⁷ Komo ku nos ta trahá den e imágen di Dios, nos ta dotá ku boluntat liber. Nos por  skohe pa hasi bon òf pa hasi malu. E libertat ei ta trese kuné ku nos tin ku rindi kuenta di nos kondukta. David no kier a ser kontá huntu ku e malbadonan. (Salmo 139:19-22) E kier a evitá di kometé erornan doloroso. Pues, despues di a kontemplá e echo ku Yehova ta na haltura di tur kos, David humildemente a pidi Dios saminá su persona interior i gui’é den e kaminda ku ta hiba na bida. E normanan moral hustu di Dios ta apliká na tur hende; pues nos tambe tin ku tuma desishonnan korekto. Yehova ta urgi nos tur pa obedes’é. Si nos hasié, nos ta haña su aprobashon i hopi benefisio. (Juan 12:50; 1 Timoteo 4:8) Kana ku Yehova tur dia ta yuda nos kultivá pas mental, asta ora nos ta konfrontá problemanan doloroso.—Filipensenan 4:6, 7.

Sigui e Guia di Nos Kreadó Maravioso!

18. Ki konklushon David a saka despues di a meditá riba kreashon?

¹⁸ Komo hóben, David tabata hopi biaha pafó den kunuku ta kuida karné. E karnénan tabata baha nan kabes pa kome yerba, pero é tabata hisa su kara pa wak shelu. Den e skuridat djanochi, David a reflekshoná riba e grandesa di universo i riba loke tur esei a nifiká. El a skirbi: “E shelunan ta konta di e gloria di Dios; i e firmamentu ta proklamá e obra di su mannan. Dia ta emití palabra na otro dia, i nochi ta revelá konosementu na otro nochi.” (Salmo 19:1, 2) David a komprondé ku e tabatin ku buska i sigui e guia di Esun ku a traha tur kos na un manera asina maravioso. Nos tambe tin ku hasi meskos.

19. Ki lèsnan nos, tantu hóben komo bieu, por siña for di e echo ku nos ta ‘trahá na un manera maravioso’?

¹⁹ David a sirbi komo un ehèmpel di e konseho ku su yu hòmber Salomon a duna despues na hóbennan: “Kòrda tambe riba bo Kreadó den e dianan di bo hubentut . . . Teme Dios i warda su mandamentunan, pasobra esaki ta aplikabel na kada persona.” (Eklesiastés 12:1, 13) For di hóben kaba David a ripará ku e tabata ‘trahá na un manera maravioso.’ E echo ku el a biba na armonia ku e konosementu aki a trese gran benefisio p’e durante henter su bida. Si nos, tantu hóben komo bieu, alabá i sirbi nos Magnífiko Kreadó, nos lo disfrutá di un bida dushi awor i den futuro. Beibel ta primintí esnan ku keda serka di Yehova i biba segun su normanan hustu: “Asta den nan behes nan lo duna fruta; nan lo ta yen di vigor i bèrdè-bèrdè, pa deklará ku SEÑOR ta rekto.” (Salmo 92:14, 15) Ademas, nos lo tin e speransa di disfrutá di e obranan maravioso di nos Kreadó pa semper.

[Nota]

Bo Por Splika?

• Kon e manera ku un èmbrio ta desaroyá ta mustra ku nos ta ‘trahá na un manera maravioso’?

• Pakiko ta bon pa nos meditá riba e pensamentunan di Yehova?

• Kon fe i nos relashon ku Yehova ta ligá ku otro?

[Preguntanan di Estudio]

[Plachi na página 23]

Un yu su desaroyo den barika di su mama ta sigui un diseño predeterminá

DNA

[Rekonosementu]

Feto: Lennart Nilsson

[Plachi na página 24]

Nos tin konfiansa den Yehova meskos ku yu ku ta konfia un tata amoroso

[Plachi na página 25]

David a meditá riba e kreashon di Yehova i esei a motiv’é pa alab’é