Sin Rumbo den un Mundu di Norma- i Balornan Ku Ta Kambiando

SEGUN un leyenda popular, Diógenes, un filósofo ku a biba na Atenas den siglo 4 promé ku nos era, tabata kana rònt di dia kla ku un lantèrna ta buska un hende rekto. Maske kuantu el a buska, e no por a topa niun.

Nos no por konfirmá si e leyenda ei ta bèrdat òf nò. Pero, si Diógenes tabata na bida awe, lo no tabata nada straño si e tabatin ku buska hopi mas ainda pa deskubrí un hende desente. Aparentemente, hopi hende no ta gusta e idea di biba segun normanan moral establesí. Hopi bes medionan di komunikashon ta duna informe di eskándalonan—den bida privá, den gobièrnu, na trabou, den deporte, den e mundu di komersio i den otro áreanan. Awe no tin rèspèt mas pa hopi di e norma- i balornan ku generashonnan di pasado a tene nan mes na dje. Hende ta re-evaluá normanan establesí i hopi bes ta rechasá nan. Òf kisas nan ta haña sierto normanan masha bunita, pero no pa nan mes kumpli ku nan.

“E tempu ku tur hende tabata biba segun normanan moral establesí a pasa,” segun e sosiólogo di religion Alan Wolfe. El a bisa tambe: “Nunka den historia tabata reina e sintimentu ku tin awe, esta, ku hende no por dependé riba tradishon- i institushonnan pa haña guia moral.” Relashoná ku e último 100 añanan, e korant Los Angeles Times ta komentá riba e remarke di e filósofo Jonathan Glover, kende a bisa ku e deterioro di religion i leinan moral universal a hunga un papel importante den e oumento mundial di violensia.

Sin embargo, e konfushon ei tokante norma- i balornan komunmente aseptá no a stroba algun hende di buska un kódigo di norma moral. Algun aña pasá, Federico Mayor, eks-direktor general di UNESCO, a deklará ku “awor mas ku nunka, e asuntu di balornan moral ta un preokupashon sumamente serio pa mundu kompletu.” Pero e echo ku mundu no ta biba segun balornan moral haltu no ta nifiká ku no ta eksistí norma- i balornan saludabel ku hende por i mester adoptá.

 Pero, tur hende por bai di akuerdo tokante ki normanan nan mester adoptá? Klaru ku nò. I si no tin akuerdo riba kua ta e normanan di loke ta bon i loke ta malu, kon un hende por evaluá kua norma i balor e tin ku sigui? Ta e relativismo moral ei, un situashon den kua normanan no ta fiho, sino ta kambia dependiendo di e hende- òf gruponan ku ta atené nan mes na nan, ta na moda awe. Ma bo por mira ku e aktitut aki no a kontribuí realmente na mihó normanan moral en general.

E historiadó britániko Paul Johnson ta kere firmemente ku e filosofia aki di relativismo a yuda “debilitá . . . e sintimentu altamente desaroyá di responsabilidat personal i di deber pa ku un berdadero kódigo moral ophetivo i establesí” ku aparentemente tabata reina promé ku kuminsamentu di siglo 20.

Ta posibel anto pa haña un “berdadero kódigo moral ophetivo” òf pa biba segun “leinan moral universal”? Tin un outoridat ku por proveé norma- i balornan ku no ta kambia ku tempu i ku por duna nos bida mas stabilidat i un speransa pa futuro? E siguiente artíkulo lo kontestá e preguntanan aki.