Sigui “Vense Malu ku Bon”

“No laga malu vense bo, ma mas bien vense malu ku bon.”—ROMANONAN 12:21.

1. Dikon nos por tin sigur ku nos por vense malu?

TA POSIBEL para firme kontra hende ku violentamente ta oponé adorashon berdadero? Ta posibel derotá e podernan ku ta purba hala nos pa bai bèk den e mundu malbado? E kontesta riba ámbos pregunta ta sí! Dikon nos ta bisa asina? Debí na loke apòstel Pablo a deklará den su karta na e Romanonan. El a skirbi: “No laga malu vense bo, ma mas bien vense malu ku bon.” (Romanonan 12:21) Si nos ta konfia den Yehova i ta determiná pa no laga mundu vense nos, su maldat lo no por vense nos. Ademas, e ekspreshon “vense malu” na e idioma griego original ta mustra ku nos por derotá maldat si nos sigui lucha pa resistí maldat. E mundu malbado aki i su gobernante malisioso, Satanas e Diabel, lo vense solamente e personanan ku stòp di vigilá i di lucha.—1 Juan 5:19.

2. Dikon nos lo konsiderá algun suseso den bida di Nehemias?

² Un 500 aña promé ku e tempu di Pablo, un sirbidó di Dios ku tabata biba na Yerusalèm a konfirmá e bèrdat di e palabranan di Pablo tokante e lucha kontra maldat. E hòmber di Dios ei, Nehemias, no solamente a resistí oposishon di parti di hende malbado sino tambe a vense malu ku bon. Ki situashonnan difísil el a konfrontá? Kiko a yud’é ku tòg e tabata eksitoso? Kon nos por imitá su ehèmpel? Pa kontestá e preguntanan ei, laga nos konsiderá algun suseso den bida di Nehemias. *

3. Den ki ambiente Nehemias a biba, i ki hazaña el a logra?

³ Nehemias a sirbi den e palasio di Rei Artaherhes di Persia. Ounke Nehemias tabata biba meimei di hende no-kreyente, e no a ‘biba konforme e mundu’ di e tempu ei. (Romanonan 12:2) Ora a surgi un nesesidat den Huda, el a sakrifiká e bida kómodo ku e tabatin, i a hasi e biahe pisá pa Yerusalèm i a kuminsá ku e tarea inmenso di rekonstruí e muraya di e stat. (Romanonan 12:1) Apesar ku e tabata gobernadó di Yerusalèm, Nehemias diariamente a traha duru huntu ku e otro israelitanan ‘for di ora ku dia a habri te ora ku e  streanan a sali.’ Komo resultado, nan a terminá e proyekto denter di apénas dos luna! (Nehemias 4:21; 6:15) Esei tabata un gran hazaña, pasobra durante e trabou di konstrukshon, e israelitanan a konfrontá vários forma di oposishon. Ken tabata e opositornan di Nehemias, i kiko tabata nan meta?

4. Kiko tabata meta di e opositornan di Nehemias?

⁴ E opositornan prinsipal tabata Sanbalat, Tobias i Gesem, hòmbernan di gran influensia ku tabata biba pegá ku Huda. Komo ku nan tabata enemigu di e pueblo di Dios, “a desagradá nan mashá ku [Nehemias] a bin pa buska e bienestar di e yunan di Israel.” (Nehemias 2:10, 19) E enemigunan di Nehemias tabata determiná pa para su plannan di konstrukshon, i asta a rekurí na kòmplòtnan maligno. Akaso Nehemias ‘lo a laga malu vens’é’?

“Furioso i Masha Rabiá”

5, 6. (a) Kon e enemigunan di Nehemias a reakshoná riba e trabou di konstrukshon? (b) Dikon Nehemias no a spanta pa su opositornan?

⁵ Ku kurashi Nehemias a urgi su pueblo: “Laga nos rekonstruí e muraya di Yerusalèm.” Nan a kontest’é: “Laga nos lanta i traha.” Nehemias a deklará: “Nan a pone man na e bon trabou,” pero opositornan a kuminsá “hasi bofon di nos i a despresiá nos i a bisa: ‘Kiko e kos aki ku boso ta hasi ta? Ta kontra rei boso ta rebeldiá?’” Nehemias no a laga nan bofon i akusashonnan falsu spant’é. El a bisa e opositornan: “E Dios di shelu lo duna nos éksito; p’esei nos, su sirbidónan, lo lanta i traha.” (Nehemias 2:17-20) Nehemias tabata determiná pa sigui padilanti ku “e bon trabou.”

⁶ Un di e opositornan ei, Sanbalat, “a bira furioso i masha rabiá” i su atake ku palabra a bira mas intenso. Hasiendo bofon el a bisa: “Ta kiko e hudiunan débil aki ta hasi? . . . Nan por rebibá e piedranan for di e monton di basura, kimá manera nan ta?” Tobias a djòin e hasimentu di bofon i a bisa: “Si un zoro bula riba dje, e lo basha nan muraya di piedra abou!” (Nehemias 4:1-3) Kon Nehemias a reakshoná?

7. Kon Nehemias a reakshoná riba e akusashonnan di su opositornan?

⁷ Nehemias simplemente a ignorá nan bofon. El a sigui e mandamentu di Dios i no a purba paga nan bèk. (Levítiko 19:18) Mas bien, el a laga e asuntu den man di Yehova i a pidi den orashon: “Tende, o nos Dios, kon nos ta wòrdu despresiá! Debolbé nan reproche riba nan mes kabes.” (Nehemias 4:4) Nehemias a konfia den e garantia ku Yehova a duna: “Ami lo tuma vengansa. Ami lo paga bèk.” (Deuteronomio 32:35, BPK) Ademas, Nehemias i su pueblo a sigui “traha e muraya.” Nan no a laga loke tabata pasa desviá nan. De echo, “henter e muraya a wòrdu pegá na otro te na mitar di su haltura, pasobra e pueblo tabatin ánimo pa traha.” (Nehemias 4:6) E enemigunan di adorashon berdadero a frakasá den nan intento pa para e trabou di konstrukshon! Kon nos por imitá Nehemias?

8. (a) Kon nos lo por imitá Nehemias ora opositornan ta akusá nos falsamente? (b) Konta un eksperensia ku bo tabatin òf ku bo a tende ku ta mustra ku ta sabí pa no paga malu ku malu.

⁸ Awe, opositornan na skol, na trabou òf asta den kas, kisas ta ataká nos ku bofon i akusashon. Sin embargo, hopi biaha e mihó manera pa atendé e akusashonnan falsu ei ta dor di apliká e prinsipio bíbliko: “Tin . . . un tempu pa keda ketu.” (Eklesiastés 3:1, 7) P’esei, meskos ku Nehemias, nos ta frena nos mes di paga bèk ku palabranan pika. (Romanonan 12:17) Nos ta akudí na Dios den orashon, ku konfiansa den e garantia ku e ta duna nos: “Ami lo paga bèk.” (Romanonan 12:19; 1 Pedro 2:19, 20) Den e manera ei nos no ta laga nos opositornan desviá nos for di e trabou spiritual ku nos tin ku efektuá awe, e trabou di prediká e bon nobo di e Reino di Dios i di hasi disipel. (Mateo 24:14; 28:19, 20) Kada biaha ku nos partisipá den e trabou di prediká  i nenga di laga oposishon stroba nos, nos ta demostrá e mesun fieldat ku Nehemias.

‘Nos Lo Mata Boso’

9. Ki forma di oposishon e enemigunan di Nehemias a lansa, i kon Nehemias a reakshoná?

⁹ Ora opositornan di adorashon berdadero den tempu di Nehemias a tende ku “e reparashon di e murayanan di Yerusalèm tabata sigui,” nan a kue nan spada pa “bringa kontra Yerusalèm.” E situashon a pinta skur pa e hudiunan. Den nort tabatin e samaritanonan, den ost e amonitanan, den zùit e arabirnan i den wèst e asdoditanan. Yerusalèm tabata rondoná pa enemigu; e konstruktornan a parse atrapá! Kiko nan mester a hasi? Nehemias a bisa: “Nos a hasi orashon na nos Dios.” E enemigunan a menasá: “[Nos lo] mata nan, i pone un fin na e trabou.” Nehemias su reakshon? El a duna e konstruktornan e tarea di defendé e stat “ku nan spadanan, nan lansanan i nan bognan.” Tabata bèrdat ku for di un punto di bista humano e grupo chikitu di hudiu lo no tabatin niun chèns kontra e forsanan enemigu hopi mas grandi, pero Nehemias a urgi nan: “No tene miedu . . . kòrda riba Señor, kende ta grandi i temibel.”—Nehemias 4:7-9, 11, 13, 14.

10. (a) Kiko a pone ku diripiente kos a kambia serka e enemigunan di Nehemias? (b) Ki medidanan Nehemias a tuma?

¹⁰ Pero diripiente kos a kambia. E enemigunan a para e atake. Kon bin? Nehemias a raportá: “Dios a hasi nan plan frakasá.” Sin embargo, Nehemias a realisá ku e enemigunan ainda tabata un menasa. P’esei prudentemente el a ahustá e método di traha di e konstruktornan. Djei padilanti, nan tabata “hasi e trabou ku ún man, i den e otro man nan tabatin un arma tené.” Ademas, Nehemias a asigná un hòmber ku mester a “supla tròmpèt” den kaso di un atake enemigu pa asina spièrta e konstruktornan. Riba tur kos, Nehemias a trankilisá e pueblo bisando: “Nos Dios lo bringa pa nos.” (Nehemias 4:15-20) Bon animá i prepará pa trata ku agreshon, e konstruktornan a sigui traha. Ki lèsnan nos por siña for di e relato aki?

11. Kiko ta kapasitá kristiannan berdadero pa resistí malu den paisnan kaminda e obra di Reino ta prohibí, i kon nan ta vense malu ku bon?

¹¹ Tin biaha kristiannan berdadero ta konfrontá persekushon violento. De echo, den algun pais personanan malisioso ku ta oponé adorashon berdadero ta forma un forsa enemigu abrumador. Desde un punto di bista humano, nos rumannan den e paisnan ei no tin niun chèns. Sin embargo, e Testigunan ei tin sigur ku ‘Dios lo bringa pa nan.’ Anto en bèrdat, rumannan persiguí pa nan fe a eksperensiá bes tras ku Yehova ta kontestá nan orashonnan i ta pone ‘e plan di enemigunan poderoso frakasá.’ Asta den paisnan kaminda e obra di Reino ta prohibí, kristiannan ta haña maneranan pa sigui prediká e bon nobo.  Meskos ku e konstruktornan na Yerusalèm a ahustá nan métodonan di traha, asina Testigunan di Yehova djawe prudentemente ta ahustá nan métodonan di prediká ora nan ta bou di atake. Klaru ku nan sí no ta usa arma literal. (2 Korintionan 10:4) Asta e menasa di violensia físiko no ta pone nan stòp ku nan aktividat di prediká. (1 Pedro 4:16) Al kontrario, e rumannan balente ei ta sigui “vense malu ku bon.”

“Ban, Laga Nos Reuní Huntu”

12, 13. (a) Ki strategia e opositornan di Nehemias a usa? (b) Dikon Nehemias a rechasá e invitashon pa topa su opositornan?

¹² Despues ku e enemigunan di Nehemias a realisá ku nan atakenan direkto a frakasá, nan a akudí na formanan mas sutil di oposishon. De echo, nan a purba tres kòmplòt. Kua nan tabata?

¹³ Di promé, e enemigunan di Nehemias a purba gañ’é. Nan a bis’é: “Ban, laga nos reuní huntu na un di e pueblitonan den e sabana di Ono.” Ono tabata keda entre Yerusalèm i Samaria. Pues, e enemigunan a proponé pa Nehemias topa nan na mitar di kaminda pa resolvé nan desakuerdonan. Nehemias lo por a pensa: ‘Esei ta zona rasonabel. Ta mihó nos papia ku nos bringa.’ Pero Nehemias a nenga di bai. Anto el a splika dikon: “Nan tabatin plan di hasi mi daño.” El a diserní nan kòmplòt i no a ser engañá. Kuater biaha el a bisa su opositornan: “Mi no por bin. Pakiko e trabou mester stòp miéntras ku mi ta lag’é pa bin serka boso?” E intentonan di e enemigunan pa laga Nehemias komprometé su prinsipionan a frakasá. El a mantené su bista fihá riba e trabou di konstrukshon.—Nehemias 6:1-4.

14. Kon Nehemias a reakshoná riba su akusadónan falsu?

¹⁴ Di dos, enemigunan di Nehemias a rekurí na plama rumornan falsu, akusando Nehemias di “tin plan di rebeldiá” kontra Rei Artaherhes. Un biaha mas, nan a bisa Nehemias: “Laga nos deliberá huntu.” Nehemias a bolbe nenga, pasobra el a ripará kiko tabata e intenshon di e enemigunan. Nehemias a splika: “Nan tur tabata trata di spanta nos, bisando: ‘Nan lo wòrdu deskurashá den e trabou i e trabou lo no wòrdu hasí.’” Sin embargo, e biaha aki Nehemias a refutá e akusashon di e enemigunan, deklarando: “Kosnan asin’aki manera bo ta bisa no ta sosodé. Ma ta bo mes kurason ta inventá nan.” Ademas, Nehemias a akudí na Yehova pa sosten, pidiendo den orashon: “Fortalesé mi mannan.” El a konfia ku lo e por a stroba e kòmplòt maligno aki ku e yudansa di Yehova i sigui padilanti ku e proyekto di konstrukshon.—Nehemias 6:5-9.

15. Ki rekomendashon un profeta falsu a hasi, i dikon Nehemias no a aseptá e rekomendashon ei?

¹⁵ Di tres, e enemigunan di Nehemias a usa un traidó, e israelita Semaias, pa purba pone Nehemias kibra e Lei di Dios. Semaias a bisa Nehemias: “Laga nos reuní den e kas di Dios, den e tèmpel, i laga nos sera e portanan di tèmpel, pasobra nan ta bin pa mata bo.” Semaias a bis’é ku nan tabata a punto di asesin’é pero ku e por a salba su bida dor di skonde den e tèmpel. Sin embargo, Nehemias no tabata un saserdote. Lo el a kometé un piká si el a bai skonde den e kas di Dios. Akaso lo el a kibra e Lei di Dios den un intento pa skapa su bida? Nehemias a kontestá: “Un hende manera ami por bai den tèmpel pa skapa su bida? Mi no ta bai paden”! Dikon Nehemias no a kai den e trampa ku nan a pone p’e? Pasobra e tabata sa ku maske Semaias tambe tabata un israelita, “Dios no a mand’é.” De echo, un profeta berdadero nunka lo a konseh’é pa kibra e Lei di Dios. Un biaha mas, Nehemias no a laga opositornan malisioso vens’é. Poko despues e por a raportá: “E muraya a keda kla riba e di binti sinku dia di luna di Elul, den sinkuentidos dia.”—Nehemias 6:10-15; Numbernan 1:51; 18:7.

16. (a) Kon nos mester trata ku amigu falsu, akusadó falsu i ruman falsu? (b) Kon bo ta demostrá ku bo ta nenga di komprometé bo kreensianan na kas, na skol òf na trabou?

 ¹⁶ Nos tambe, meskos ku Nehemias, lo por haña nos ku opositor den forma di amigu falsu, akusadó falsu i ruman falsu. Tin hende ta invitá nos pa komprometé nos kreensianan, òf na moda di papia, topa nan na mitar kaminda. Podisé nan ta purba konvensé nos ku si nos ta sirbi Yehova ku un poko ménos entusiasmo, nos lo por sigui a la bes tras di metanan mundano. Sin embargo, komo ku e Reino di Dios ta na promé lugá den nos bida, nos ta nenga di komprometé nos kreensianan. (Mateo 6:33; Lukas 9:57-62) Opositornan ta plama tambe akusashonnan falsu kontra nos. Den algun pais, nos ta ser akusá di ta un menasa pa Estado, meskos ku nan a akusá Nehemias di ta rebeldiá kontra rei. Tin akusashonnan ku nos a logra refutá den kortenan hudisial. Pero sea kual sea e resultado den situashonnan individual, ku konfiansa nos ta pidi Yehova pa dirigí e asuntunan di akuerdo ku su boluntat. (Filipensenan 1:7) Oposishon lo por bin tambe for di hende ku ta pretendé di ta sirbi Yehova. Meskos ku un otro hudiu a purba konvensé Nehemias pa kibra e Lei di Dios pa skapa su bida, asina eks-Testigunan apóstata por purba influensiá nos pa di un manera òf otro komprometé nos prinsipionan. Sin embargo, nos ta rechasá apóstatanan pasobra nos sa ku nos ta skapa nos bida dor di kumpli ku e leinan di Dios, no dor di kibra nan! (1 Juan 4:1) Sí, ku Yehova su yudansa nos por vense tur forma di maldat.

Proklamá e Bon Nobo Apesar di Ta Konfrontá Maldat

17, 18. (a) Kiko Satanas ku su kompinchinan ta hasi esfuerso pa logra? (b) Kiko abo ta determiná pa hasi, i dikon?

¹⁷ E Palabra di Dios ta deklará relashoná ku e rumannan ungí di Kristu: “Nan a vense [Satanas] pa motibu . . . di e palabra di nan testimonio.” (Revelashon 12:11) Pues, tin un relashon direkto entre vense Satanas—e fuente di maldat—i prediká e mensahe di Reino. P’esei no ta straño ku Satanas persistentemente ta ataká tantu e restu ungí komo e “multitut grandi” dor di instigá oposishon!—Revelashon 7:9; 12:17.

¹⁸ Manera nos a mira, oposishon por bin den forma di atake ku palabra òf menasa di violensia òf den formanan mas sutil. En todo kaso, e meta di Satanas ta keda semper meskos, esta, pa para e trabou di prediká. Sin embargo, lo e frakasá miserablemente pasobra e pueblo di Dios djawe, meskos ku Nehemias di pasado, ta determiná pa sigui “vense malu ku bon.” Nan lo hasi esei dor di sigui prediká e bon nobo te ora Yehova bisa ku e trabou ta kla!—Marko 13:10; Romanonan 8:31; Filipensenan 1:27, 28.

[Nota]

Bo Ta Kòrda?

• Ki oposishon sirbidónan di Dios di pasado a konfrontá i tambe kristiannan djawe?

• Kiko tabata e meta prinsipal di e enemigunan di Nehemias, i kiko ta e meta di enemigunan di Dios djawe?

• Kon nos awe por sigui vense malu ku bon?

[Preguntanan di Estudio]

[Kuadro/​Plachi na página 29]

Lèsnan for di e Buki di Nehemias

Sirbidónan di Dios ta konfrontá

• bofon

• menasa

• engaño

Engaño ta ser usá dor di

• amigu falsu

• akusadó falsu

• ruman falsu

Sirbidónan di Dios ta vense malu dor di

• perseverá den e tarea ku Dios a duna nan

[Plachi na página 27]

Nehemias i su kolaboradónan a rekonstruí e muraya di Yerusalèm apesar di oposishon violento

[Plachi na página 31]

Kristiannan berdadero ta prediká e bon nobo sin miedu