Bo A Peka Kontra Spiritu Santu?

“Tin un piká ku ta hiba na morto.”—1 JUAN 5:16.

1, 2. Kon bin nos sa ku un hende por peka kontra Dios su spiritu santu?

“MI TABATA opseshoná ku e pensamentu ku mi a peka kontra spiritu santu.” Asina un señora na Alemania a skirbi, apesar ku e tabata sirbi Dios. Un kristian realmente por peka kontra Dios su spiritu santu òf forsa aktivo?

² Sí, un hende por peka kontra Yehova su spiritu santu. Hesukristu a bisa: “Tur piká i blasfemia lo wòrdu pordoná na hende, ma blasfemia kontra e spiritu lo no wòrdu pordoná.” (Mateo 12:31) Nos ta haña e spièrtamentu: “Si nos sigui peka boluntariamente despues di a risibí e konosementu di e bèrdat, no ta keda sakrifisio pa piká mas, sino un sierto ekspektativa teribel di huisio.” (Hebreonan 10:26, 27) Anto apòstel Juan a skirbi: “Tin un piká ku ta hiba na morto.” (1 Juan 5:16) Pero ta keda na e persona ku a kometé un pika grave pa determiná si el a kometé “un piká ku ta hiba na morto”?

Repentimentu Ta Trese Pordon

3. Kiko muy probablemente ta e kaso si nos ta masha tristu pa motibu di un piká ku nos a kometé?

³ Yehova ta e Hues supremo di malechornan. De echo, nos tur tin ku duna kuenta na dje, i semper e ta hasi loke ta korekto i hustu. (Génesis 18:25; Romanonan 14:12) Ta Yehova ta disidí si nos a kometé un piká imperdonabel, i ta é por kita su spiritu for di nos. (Salmo 51:11) Sin embargo, si nos ta masha tristu pa motibu di un piká ku nos a kometé, muy probablemente nos a repentí di bèrdat. Pero kiko ta berdadero repentimentu?

4. (a) Kiko ta nifiká ku bo a repentí? (b) Dikon Salmo 103:10-14 ta un gran konsuelo?

⁴ Repentí ta nifiká ku nos ta kambia nos aktitut pa ku kosnan malu ku nos a hasi na ántes òf ku nos tabatin intenshon di hasi. Esei ta nifiká ku nos ta sinti duele òf tristesa pa esei i ta stòp di sigui un kaminda pekaminoso. Si nos a kometé piká grave pero a dal e pasonan nesesario pa mustra ku di bèrdat nos a repentí, nos por haña konsuelo for di e palabranan aki di e salmista: “[Yehova] no a trata ku nos segun nos pikánan, ni a paga nos segun nos inikidatnan. Pasobra mes haltu ku e shelunan ta for di tera, mes grandi su miserikòrdia ta pa esnan ku ta tem’é. Mes leu ku pariba ta for di pabou, mes leu el a alehá nos transgreshonnan for di nos. Meskos ku un tata tin kompashon ku su yunan, asina SEÑOR tin kompashon ku esnan ku ta tem’é. Pasobra e sa di kiko nos ta trahá; e ta kòrda ku ta stòf nos ta.”—Salmo 103:10-14.

5, 6. Duna e idea prinsipal di 1 Juan 3:19-22, i splika kiko e palabranan di e apòstel ta nifiká.

⁵ Un otro konsuelo mas ta e palabranan aki di apòstel Juan: “Na esaki nos lo sa ku nos ta di e bèrdat, i lo sigurá nos kurason dilanti di dje, den kiko ku nos kurason kondená nos; pasobra Dios ta mas grandi ku nos kurason i sa tur kos. Stimánan, si nos kurason no ta kondená nos, nos tin konfiansa dilanti di Dios; i kiko ku nos pidi nos ta risibí for di dje, pasobra nos ta warda su mandamentunan i ta hasi e kosnan ku ta agradabel den su bista.”—1 Juan 3:19-22.

⁶ Nos “sa ku nos ta di e bèrdat” debí na e  echo ku nos ta desplegá amor di ruman i nos no ta hasié un kustumber pa peka. (Salmo 119:11) Si pa un òf otro motibu nos ta sinti nos kondená, nos mester kòrda ku “Dios ta mas grandi ku nos kurason i sa tur kos.” Yehova ta mustra miserikòrdia na nos pasobra e sa di nos “amor sinsero pa ku e rumannan,” di nos lucha kontra piká i di nos esfuerso pa hasi su boluntat. (1 Pedro 1:22) Nos kurason “no ta kondena nos” si nos ta konfia den Yehova, ta demostrá amor di ruman i no tin e kustumber di kometé piká deliberadamente. Ora di hasi orashon nos lo tin frankesa di ekspreshon òf “konfiansa dilanti di Dios,” i lo e kontestá nos pasobra nos ta warda su mandamentunan.

Personanan Ku A Peka Kontra e Spiritu

7. Kiko ta determiná si un piká ta perdonabel òf nò?

⁷ Kua piká no ta ser pordoná? Pa kontestá e pregunta aki, laga nos konsiderá algun ehèmpel den Beibel. E konsiderashon aki lo ta un konsuelo pa nos si nos a repentí di nos erornan grave, pero te ainda ta sinti nos hopi angustiá. Nos lo mira ku loke ta determiná si un piká ta perdonabel òf nò, no tin asina tantu keber ku e klase di piká ku un persona a kometé, sino mas bien ku su motivashon, e kondishon di su kurason i te na ki grado e piká tabata intenshonal.

8. Kon algun lider religioso hudiu di promé siglo a peka kontra spiritu santu?

⁸ Lidernan religioso hudiu di promé siglo ku malisiosamente a oponé Hesukristu tabata peka kontra spiritu santu. Nan a mira e spiritu di Dios obra den Hesus segun ku Hesus a hasi milagernan ku a onra Yehova. Sin embargo, e enemigunan aki di Kristu a atribuí e poder aki na Satanas e Diabel. Hesus a bisa ku e hendenan aki ku di e manera ei a blasfemá kontra Dios su spiritu santu tabata kometé un piká ku lo no a ser pordoná den “den e siglo aki, ni den e siglo ku ta bin.”—Mateo 12:22-32.

9. Kiko ta blasfemia, i kiko Hesus a bisa tokante esei?

⁹ Blasfemia ta ora un hende ta kalumniá òf papia kos perhudisial òf insultante. Siendo ku ta Dios ta e Fuente di spiritu santu, ora hende papia kontra su spiritu ta meskos ku ta kontra Yehova nan ta papia. Un hende ku rekurí na e forma di papia aki sin repentí, ta hasi un kos imperdonabel. Loke Hesus a bisa tokante e tipo di piká ei ta mustra ku Hesus tabata referí na hende ku deliberadamente ta oponé e obramentu di Dios su spiritu santu. Komo ku e spiritu di Yehova tabata obra den Hesus pero su opositornan a atribuí e poder aki na Diabel, nan a blasfemá i peka kontra e spiritu. P’esei Hesus a deklará: “Ken ku blasfemá kontra spiritu santu nunka lo no haña pordon, ma ta kulpabel di un piká eterno.”—Marko 3:20-29.

10. Dikon Hesus a yama Hudas “yu di pèrdishon”?

¹⁰ Konsiderá tambe e kaso di Hudas Iskariot. El a sigui un rumbo desonesto, hòrtando for di e kaha di plaka konfiá na dje. (Juan 12:5, 6) Despues Hudas a bai serka e gobernantenan hudiu i a palabrá ku nan ku lo e traishoná Hesus pa 30 pida plata. Ta bèrdat ku Hudas a sinti remordimentu despues di su traishon, pero nunka el a repentí di su piká deliberá. Konsekuentemente, Hudas no ta digno di haña un resurekshon. P’esei Hesus a yam’é “yu di pèrdishon.”—Juan 17:12; Mateo 26:14-16.

Personanan Ku No A Peka Kontra e Spiritu

11-13. Kon Rei David a peka en konekshon ku Bètsabé, i ki konsuelo nos por saka for di e manera ku Dios a trata ku nan?

¹¹ De bes en kuando, kristiannan ku a konfesá nan piká grave i ku a haña yudansa spiritual serka ansianonan di kongregashon, tòg ta keda preokupá sin fin pa e transgreshon ku nan a kometé kontra e lei di Dios. (Santiago 5:14) Si nos personalmente ta sufri di e  angustia aki, nos muy probablemente lo benefisiá di un konsiderashon di loke e Skritura ta bisa di hendenan ku Dios a pordoná nan piká.

¹² Rei David a peka gravemente en konekshon ku Bètsabé, esposa di Urias. David tabata riba dak di su kas i ora el a wak abou el a mira e muhé bunita aki ta baña. El a manda nan tres’é na su palasio i a tene relashon seksual kuné. Despues ora David a haña sa ku Bètsabé a sali na estado, el a trama un kòmplòt pa laga su kasá, Urias, drumi kuné pa tapa e adulterio. Ora e plan ei a frakasá, rei a regla un manera pa nan mata Urias den bataya. Despues di esei Bètsabé a kasa ku David i a duna lus pero e yu a muri.—2 Samuel 11:1-27.

¹³ Yehova mes a atendé e asuntu di David ku Bètsabé. Dios a pordoná David, aparentemente tumando na kuenta algun faktor, manera su repentimentu i e pakto di Reino ku el a sera kuné. (2 Samuel 7:11-16; 12:7-14) Bètsabé evidentemente tambe a mustra repentimentu, pasobra el a haña e privilegio di bira mama di Rei Salomon i antepasado di Hesukristu. (Mateo 1:1, 6, 16) Si nos a peka, ta bon pa nos kòrda ku Yehova ta tuma nota di nos aktitut arepentí.

14. Kon e kaso di Manasés ta ilustrá te kon leu Dios su pordon ta yega?

¹⁴ E kaso di Rei Manasés di Huda tambe ta ilustrá te kon leu Yehova su pordon ta yega. Manasés a hasi loke tabata malu den bista di Yehova. El a traha altar pa Baal, el a adorá “henter e ehérsito di shelu,” i asta a traha altar pa diosnan falsu riba dos plenchi di e tèmpel. El a laga su yu hòmbernan pasa dor di kandela, el a fomentá práktikanan spiritista i a pone e habitantenan di Huda i di Yerusalèm ‘hasi mas maldat ku e nashonnan ku Yehova a destruí dilanti di e yunan di Israel.’ E no a hasi kaso di e spièrtamentunan di e profetanan di Dios. Ku tempu, rei di Asiria a kue Manasés prezu. Despues ku Manasés a kai prezu el a repentí i humildemente a keda hasi orashon na Dios. Yehova a pordon’é i a dun’é su reino bèk na Yerusalèm, kaminda el a promové adorashon berdadero.—2 Krónikanan 33:2-17.

15. Ki insidente den bida di apòstel Pedro ta mustra ku Yehova ta pordoná “abundantemente”?

¹⁵ Siglonan despues, apòstel Pedro a peka gravemente ora el a nenga Hesus. (Marko 14:30, 66-72) Sin embargo, Yehova a pordoná Pedro “abundantemente.” (Isaias 55:7) Kon bin? Pasobra Pedro di bèrdat a repentí. (Lukas 22:62) Loke a indiká bon kla ku Dios a pordon’é tabata ku 50 dia despues riba dia di Pentekòste, Pedro tabatin e privilegio di duna un testimonio tokante Hesus, lokual el a hasi sin miedu. (Echonan 2:14-36) Akaso tin kualke motibu pa kere ku awe Dios lo ta ménos dispuesto pa pordoná kristiannan ku di bèrdat a repentí? E salmista a kanta: “Si abo, SEÑOR, tuma inikidatnan na kuenta, o Señor, ken lo por a keda para? Ma serka bo tin pordon.”—Salmo 130:3, 4.

Kalma e Miedu di A Peka Kontra Spiritu Santu

16. Bou di ki sirkunstansia Dios ta pordoná?

¹⁶ E ehèmpelnan anterior mester por yuda aliviá nos preokupashon di a peka kontra spiritu santu. Nan ta mustra ku Yehova ta pordoná pekadó ku repentí. E kos di mas importante ta orashon sinsero na Dios. Si nos a peka, nos por roga Dios pordoná nos a base di vários kos, entre otro, e sakrifisio di reskate di Hesus, Yehova su miserikòrdia, nos imperfekshon heredá i nos registro di sirbishi fiel. Konosiendo Yehova su grasia òf bondat inmeresí, nos por buska pordon ku e konfiansa ku nos lo hañ’é.—Efesionan 1:7.

17. Kiko nos mester hasi si nos a peka i nos tin mester di yudansa spiritual?

¹⁷ Kiko si nos a peka i a daña nos relashon  ku Yehova di tal grado ku nos ta sinti ku nos no por hasi orashon na dje? Relashoná ku esaki, disipel Santiago a skirbi: “Laga [un persona asina] yama e ansianonan di iglesia, i laga nan hasi orashon p’e, huntando é ku zeta den e nòmber di Señor; i e orashon hasí den fe lo restorá esun ku ta malu, i Señor lo lant’é, i si el a kometé piká, e lo wòrdu pordoná.”—Santiago 5:14, 15.

18. Dikon un persona su piká no nesesariamente ta imperdonabel asta si a ekspuls’é for di kongregashon?

¹⁸ Asta si un persona ku a hasi malu no mustra repentimentu na e momento ei i ta ekspuls’é for di kongregashon, su piká no nesesariamente ta imperdonabel. Pablo a skirbi en konekshon ku un persona ungí ku a hasi malu i a ser ekspulsá na Korinto: “E kastigu aki ku el a haña di e mayoria ta sufisiente, asina ku, al kontrario, mas bien boso mester pordon’é i konsol’é, pa di un òf otro manera un hende asina no keda desesperá dor di demasiado tristesa.” (2 Korintionan 2:6-8; 1 Korintionan 5:1-5) Sin embargo, pa restorá nan relashon ku Yehova, personanan ku a kometé eror tin ku aseptá e yudansa spiritual basá riba Beibel di ansianonan kristian i duna prueba di berdadero repentimentu. Nan tin ku “duna fruta ku ta kuadra ku repentimentu.”—Lukas 3:8.

19. Kiko por yuda nos keda “sano den fe”?

¹⁹ Kiko lo por kontribuí na e sintimentu ku nos a peka kontra spiritu santu? Algun faktor por ta un konsenshi demasiado sensitivo òf mal salú físiko òf mental. Den tal kaso, orashon i èkstra sosiegu lo por ta útil. Nos tin ku paga masha tinu pa nos no laga Satanas desanimá nos, di manera ku nos ta stòp di sirbi Dios. Ya ku Yehova no tin plaser den morto di e malbadonan, ta sigur ku e no tin goso den pèrdè un di su sirbidónan. Pues si nos tin miedu ku nos a peka kontra e spiritu, nos tin ku sigui alimentá nos mes ku e Palabra di Dios, inkluso e partinan ku ta duna konsuelo manera e Salmonan. Nos tin ku sigui asistí na reunionnan kristian i partisipá den e trabou di prediká e Reino. E kosnan ei lo yuda nos keda “sano den fe” i sin e preokupashon ku kisas nos a kometé un piká imperdonabel.—Tito 2:2.

20. Ki rasonamentu por yuda un persona mira ku e no a peka kontra spiritu santu?

²⁰ Ken ku tin miedu ku nan a peka kontra spiritu santu lo por puntra nan mes: ‘Mi a blasfemá kontra spiritu santu? Mi a repentí sinseramente di mi piká? Mi tin fe ku Dios ta pordoná? Mi ta un apóstata ku a rechasá lus spiritual?’ Tin hopi chèns ku e personanan ei ta realisá ku nan no a blasfemá kontra Dios su spiritu santu, ni nan no a bira apóstata. Nan a repentí, i nan tin un fe firme den e pordon di Yehova. Si ta asina, nan no a peka kontra Yehova su spiritu santu.

21. E siguiente artíkulo lo trata ku kua preguntanan?

²¹ Ta un gran bendishon ora nos sa sigur ku nos no a peka kontra spiritu santu! Sin embargo, relashoná ku e asuntu aki di spiritu santu, tin algun pregunta ku nos lo bai konsiderá den e siguiente artíkulo. Por ehèmpel, nos lo por puntra nos mes: ‘Di bèrdat Dios su spiritu santu ta guia mi? Su fruta ta bisto den mi bida?’

Kiko Ta Bo Kontesta?

• Dikon nos por bisa ku un hende por peka kontra spiritu santu?

• Kiko repentí ta nifiká?

• Ken a peka kontra e spiritu ora Hesus tabata riba tera?

• Kon nos por vense e preokupashon di a kometé un piká imperdonabel?

[Preguntanan di Estudio]

[Plachi na página 10]

E hendenan ku a bisa ku Hesus a hasi milager ku poder di Satanas a peka kontra Dios su spiritu santu

[Plachi na página 11]

Ounke Pedro a nenga Hesus, e no a kometé un piká imperdonabel