Kon Bo Por Haña Berdadero Spiritualidat?

“MENTE fihá riba e karni ta morto, ma e mente fihá riba e spiritu ta bida i pas,” segun apòstel Pablo. (Romanonan 8:6) Ku e palabranan ei, e apòstel a mustra ku ser un persona spiritual no ta djis un asuntu di gustu personal òf sintimentu. En realidat, e ta un asuntu di bida i morto. Pero den ki sentido un persona spiritual ta haña “bida i pas”? Segun Beibel, e hende ei ta disfrutá di pas for di awor—pas ku su mes i pas ku Dios—i den futuro lo e haña e rekompensa di bida eterno. (Romanonan 6:23; Filipensenan 4:7) Nada straño anto ku Hesus a bisa: “Felis ta esnan ku ta konsiente di nan nesesidat spiritual”!—Mateo 5:3, NW.

E echo ku bo ta lesando e revista aki ta indiká ku bo tin interes den kosnan spiritual, i esei ta sabí di bo parti. Pero tin gran diferensia di opinion riba e tópiko aki, p’esei kisas bo ta puntra bo mes: ‘Kiko ta berdadero spiritualidat i kon mi por hañ’é?’

“E Mente di Kristu”

Ademas di mustra riba e importansia i benefisionan di tin nos mente fihá riba kosnan spiritual, apòstel Pablo a bisa hopi kos tokante kiko ta berdadero spiritualidat. Por ehèmpel, Pablo a splika e kristiannan den e stat antiguo di Korinto e diferensia entre un hende karnal, esta, un persona ku ta sigui e deseonan di karni, i un hende spiritual, un persona ku ta balorá kosnan spiritual. Pablo a skirbi: “Un hende ku no ta spiritual [esta, un hende karnal] no ta aseptá e kosnan di e spiritu di Dios; pasobra nan ta lokura p’e.” Di otro banda, Pablo a splika ku e hende spiritual ta esun ku tin “e mente di Kristu.”—1 Korintionan 2:14-16.

Un hende ku tin “e mente di Kristu” ta un hende ku básikamente tin e mesun “aktitut . . . ku tabatin tambe den Kristu Hesus.” (Filipensenan 2:5) Ku otro palabra, un hende spiritual ta un hende ku ta pensa meskos ku Hesus i ta kana den su pasonan. (1 Pedro 2:21; 4:1, NW) Mas un hende su mente ta reflehá esun di Kristu, mas spiritual e ta bira i mas serka e ta di haña “bida i pas.”—Romanonan 13:14.

Kon Bo Por Konosé “e Mente di Kristu”?

Sin embargo, pa bo tin e mente di Kristu, bo mester konosé e mente ei promé. P’esei, e promé paso pa bo por logra bira un hende spiritual ta di siña konosé Hesus su manera di pensa. Pero kon bo por siña konosé e mente di un persona ku a biba riba tera 2.000 aña pasá? Por ehèmpel, kon bo a siña konosé e personanan históriko di bo pais? Probablemente dor di lesa tokante nan. Meskos tambe, un manera importante pa siña konosé e mente di Kristu ta di lesa un historia skirbí tokante dje.—Juan 17:3.

Den e kaso di Hesus, tin kuater relato históriko fasinante—e Evangelionan di Mateo, Marko, Lukas i Juan. Ora bo lesa e relatonan aki kuidadosamente, nan lo yuda bo kapta Hesus su manera di pensa, su sintimentunan di mas profundo i e motivashon tras di su akshonnan. Anto segun ku bo ta saka tempu pa meditá riba loke bo ta lesa tokante Hesus, bo ta kuminsá forma un kuadro mental di ki klase di persona e tabata. Asta si bo ta konsiderá bo mes kaba un siguidó di Kristu, e lesamentu i meditashon ei lo yuda bo “sigui krese den grasia i konosementu di nos Señor i Salbadó Hesukristu.”—2 Pedro 3:18, BPK.

Ku esei na mente, laga nos analisá algun pasashi den e Evangelionan pa mira kiko a hasi  Hesus un persona asina spiritual. Kaba, puntra bo mes kon bo por imitá e ehèmpel ku el a laga.—Juan 13:15.

Spiritualidat i ‘Fruta di Spiritu’

Lukas, un di e eskritornan di Evangelio, a deklará ku Dios a drama su spiritu santu riba Hesus na su boutismo i ku Hesus tabata “yen di spiritu santu.” (Lukas 3:21, 22; 4:1) Hesus, na su turno, a mustra su siguidónan e importansia di laga e spiritu santu di Dios guia nan. (Lukas 11:9-13) Pakiko esei ta asina importante? Pasobra e spiritu di Dios tin poder pa transformá un persona su mente, pa asina e kuminsá reflehá e mente di Kristu. (Romanonan 12:1, 2) Spiritu santu ta produsí den un persona kualidatnan manera “amor, goso, pas, pasenshi, kariño, bondat, fieldat, mansedumbre, dominio propio.” E kualidatnan aki—ku Beibel ta yama ‘fruta di spiritu’—ta identifiká un persona ku ta berdaderamente spiritual. (Galationan 5:22, 23) Ku otro palabra, un persona ku tin inklinashon spiritual ta unu ku ta laga e spiritu di Dios gui’é.

Hesus a manifestá e fruta di spiritu durante henter su ministerio. Kualidatnan manera amor, kariño i bondat tabata hopi bisto den e manera ku el a trata hende ku den bista di komunidat tabata di kondishon humilde. (Mateo 9:36) Tuma por ehèmpel un insidente ku apòstel Juan a deskribí. Nos ta lesa: “Ora ku [Hesus] tabata pasa, el a mira un hòmber ku tabata siegu for di su nasementu.” Hesus su disipelnan tambe a wak e hòmber pero nan a mir’é komo un pekadó. Nan a puntra Hesus: “Ta ken a peka, e hòmber aki òf su mayornan?” E hòmber su bisiñanan tambe a tuma nota di e hòmber, pero tur loke nan a mira tabata un pididó di limosna. Nan a bisa: “No ta esaki ta esun ku sa sinta pidi limosna?” Ma Hesus a mira e hòmber siegu komo un persona ku tabatin mester di yudansa. El a papia ku e hòmber siegu i a kur’é.—Juan 9:1-8.

Kiko e insidente aki ta bisa bo tokante e mente di Kristu? Na promé lugá, Hesus no a pasa por haltu di hende di kondishon humilde sino a trata nan ku tierno kompashon. Na di dos lugá, el a tuma e inisiativa pa yuda otro hende. Abo ta siguiendo e ehèmpel aki ku Hesus a laga? Bo ta mira hende manera Hesus a mira nan, dunando nan e yudansa ku nan tin mester pa drecha nan bida i haña un mihó speransa pa futuro? Òf bo tin e tendensia di faboresé hende prominente i pasa por haltu di esnan ku no ta? Si bo ta mira hende manera Hesus a mira nan, e ora ei en bèrdat bo ta siguiendo e ehèmpel di Hesus.—Salmo 72:12-14.

Spiritualidat i Orashon

E relatonan di Evangelio ta mustra ku Hesus a akudí hopi bes na Dios den orashon. (Marko 1:35; Lukas 5:16; 22:41) Durante su ministerio riba tera, el a saka tempu pa hasi orashon. Disipel Mateo a skirbi: “Despues  ku [Hesus] a manda e multitutnan bai, e so a subi bai riba seru pa hasi orashon.” (Mateo 14:23) Hesus a saka fortalesa for di e ratunan ei ku el a dediká pa papia trankilamente ku su Tata selestial. (Mateo 26:36-44) Awe tambe, hende spiritual ta buska oportunidat pa papia ku Dios, sabiendo ku esaki lo fortalesé nan relashon ku e Kreadó i yuda nan imitá Kristu mihó den nan forma di pensa.

Hopi bes Hesus a hasi orashon pa oranan largu. (Juan 17:1-26) Por ehèmpel, promé ku el a skohe e 12 hòmbernan ku lo a bira su apòstelnan, Hesus a “subi bai riba seru pa hasi orashon, i el a pasa henter anochi den orashon na Dios.” (Lukas 6:12) Ounke hende spiritual no nesesariamente ta pasa henter anochi hasiendo orashon, nan ta sigui sí e ehèmpel di Hesus. Promé ku nan tuma desishonnan importante den bida, nan ta tuma nan tempu pa hasi orashon na Dios, buskando e guia di spiritu santu pa yega na desishonnan ku lo hasi nan mas spiritual ainda.

Ademas, Hesus a demostrá den su orashonnan un sinseridat ku nos tin ku imitá den nos orashonnan. Ripará kiko Lukas a skirbi tokante e manera ku Hesus a hasi orashon e anochi promé ku el a muri. “Den ansha profundo, Hesus a resa ku mas fervor ainda; su sodó tabata kai riba suela manera gota di sanger.” (Lukas 22:44, BPK) Hesus a yega di hasi orashon ferviente, pero na e okashon aki, enfrentá ku e prueba di mas pisá di su bida riba tera, el a hasi orashon “ku mas fervor”—i Dios a kontestá su orashon. (Hebreonan 5:7) Hende berdaderamente spiritual ta sigui Hesus su ehèmpel. Ora nan haña nan enfrentá ku prueba ku ta hopi pisá, nan ta pidi Dios “ku mas fervor” ainda p’e duna nan su spiritu santu, guia i sosten.

Siendo ku opviamente Hesus tabata un hende di orashon, no ta nada straño ku su disipelnan kier a imit’é riba e punto aki. P’esei, nan a pidié: “Señor, siña nos hasi orashon.” (Lukas 11:1) Meskos awe tambe, hende ku ta balorá kosnan spiritual i ku kier laga e spiritu santu di Dios guia nan ta sigui e ehèmpel di Hesus den e manera ku nan ta resa na Dios. Berdadero spiritualidat ta estrechamente ligá ku orashon.

Spiritualidat i Predikashon di e Bon Nobo

Den e Evangelio di Marko, nos ta haña un relato den kua Hesus a kura hopi hende malu, algu ku a dura te anochi lat. Su siguiente mainta trempan, ora Hesus tabata su so hasiendo orashon, su apòstelnan a bin serka dje i a bis’é ku hopi hende tabata busk’é, tal bes ku deseo di wòrdu kurá. Sin embargo, Hesus a bisa nan: “Laga nos bai otro kaminda, na e statnan serka aki banda, pa mi por prediká ayanan tambe.” Anto Hesus a splika nan dikon: “Ta pa e motibu ei mi a bin.” (Marko 1:32-38; Lukas 4:43) Ounke kuramentu di hende tabata importante pa Hesus, predikashon di e bon nobo di e Reino di Dios tabata Hesus su mishon prinsipal.—Marko 1:14, 15.

Te awe, e trabou di prediká na otro hende tokante e Reino di Dios ta un marka ku ta identifiká hende ku tin e mente di Kristu. Hesus a duna tur hende ku ke ta su siguidó e siguiente mandato: “P’esei, bai i hasi tur e nashonnan disipel di mi, i . . . siña nan pa kumpli ku tur loke mi a ordená boso.” (Mateo 28:19, 20) Ademas, Hesus a profetisá: “E evangelio  aki di e reino lo wòrdu prediká den henter mundu komo un testimonio na tur nashon, i e ora ei e fin lo yega.” (Mateo 24:14) E Palabra di Dios ta indiká ku ta pa medio di e poder di spiritu santu ta logra efektuá e trabou di prediká. Pues, esnan ku ta partisipá ku entusiasmo den dje mester ta hende berdaderamente spiritual.—Echonan 1:8.

Predikashon di e mensahe di Reino na hende rònt mundu ta rekerí esfuerso uní di miónes di hende. (Juan 17:20, 21) Esnan ku ta partisipá den e trabou aki mester ta no solamente hende spiritual sino tambe bon organisá riba un eskala mundial. Abo por identifiká e hendenan ku ta siguiendo den e pasonan di Kristu i ta predikando e bon nobo di e Reino rònt mundu?

Abo Ta Kumpli ku e Rekisitonan?

Naturalmente, tin mas karakterístika ku ta identifiká un persona berdaderamente spiritual, pero kon abo ta pará relashoná ku esnan ku nos a menshoná kaba? Pa bo haña sa esei, puntra bo mes: ‘Mi ta lesa Beibel, e Palabra di Dios, regularmente i meditá riba loke mi ta lesa? Mi ta manifestá e fruta di spiritu den mi bida? Mi ta hasi orashon regularmente? Mi kier asosiá ku hende ku ta efektuando e obra mundial di prediká e bon nobo di e Reino di Dios?’

Un eksaminashon franko di bo mes lo por yuda bo determiná kon spiritual bo ta. Nos ta urgi bo pa bo dal e pasonan nesesario awor ya bo tambe por disfrutá di “bida i pas.”—Romanonan 8:6; Mateo 7:13, 14; 2 Pedro 1:5-11.

[Kuadro/​Plachinan na página 7]

KARAKTERÍSTIKA DI HENDE SPIRITUAL

◆ Tin amor pa e Palabra di Dios

◆ Ta manifestá e fruta di spiritu

◆ Ta hasi orashon na Dios regularmente i ku sinseridat

◆ Ta kompartí e bon nobo di Reino ku otro hende

[Plachi na página 5]

Beibel ta yuda bo siña konosé “e mente di Kristu”