Spera Riba e Dia di Yehova ku Perseveransia

“Añadí na boso fe . . . perseveransia.”—2 PEDRO 1:5, 6.

1, 2. Kiko ta perseveransia, i dikon kristiannan tin mester di dje?

E GRAN dia di Yehova ta masha serka. (Joel 1:15; Sofonias 1:14) Komo kristiannan ku ta determiná pa mantené nos integridat na Dios, nos ta spera ansiosamente riba e tempu ei ya ku nos lo mira e soberania di Yehova ser vindiká. Miéntras tantu, nos ta konfrontá odio, reproche, persekushon i morto pa motibu di nos fe. (Mateo 5:10-12; 10:22; Revelashon 2:10) Esaki ta rekerí perseveransia di nos parti, esta, e kapasidat di soportá situashonnan difísil i desfaborabel. Apòstel Pedro a urgi nos: “Añadí na boso fe . . . perseveransia.” (2 Pedro 1:5, 6) Nos tin mester di perseveransia pasobra Hesus a bisa: “Esun ku perseverá te na fin, esei lo ta salbá.”—Mateo 24:13.

² Ademas, nos ta konfrontá malesa, morto di ser kerí i otro pruebanan. Satanas lo keda masha kontentu si nos mester pèrdè nos fe! (Lukas 22:31, 32) Pero ku e sosten di Yehova, nos por wanta vários prueba. (1 Pedro 5:6-11) Ban konsiderá algun eksperensia di bida real ku ta duna prueba ku nos por spera riba e dia di Yehova ku perseveransia i fe firme.

Malesa No A Stòp Nan

3, 4. Duna un ehèmpel pa mustra ku nos por sirbi Yehova fielmente apesar di malesa.

³ Dios no ta kura nos milagrosamente, pero sí e ta duna nos e fortalesa pa soportá malesa. (Salmo 41:1-3) Sharon a konta di su kaso: “Te asina leu ku mi ta kòrda, semper mi tabatin un ròlstul komo kompaño. Parálisis selebral a pone ku for di ora mi a nase mi no por a gosa di mi infansia.” Sharon a haña speransa dor di siña tokante Yehova i su promesa di duna hende un salú perfekto. Ounke Sharon ta papia i kana ku difikultat, e ta haña goso den e ministerio kristian. Un 15 aña pasá el a bisa: “Mi salú kisas ta sigui bai atras, pero mi konfiansa den Dios i mi relashon kuné ta mi salbabida. Mi ta masha felis ku mi tin Yehova su sosten konstante i ku mi ta parti di su pueblo!”

⁴ Apòstel Pablo a urgi kristiannan na Tesalónika pa “enkurashá esnan ku ta falta ánimo [òf, “deprimí,” NW].” (1 Tesalonisensenan 5:14) Kosnan manera por ehèmpel un desepshon grandi por kousa depreshon. Na 1993 Sharon a skirbi: “Mi a sinti ku mi a frakasá totalmente, i . . . mi a kai den depreshon profundo pa un periodo di tres aña. . . . Mi a haña konsuelo i konseho serka e ansianonan. . . . Pa medio di E Toren di Vigilansia, Yehova amorosamente a duna un mihó komprondementu di depreshon severo. Di bèrdat e ta interesá den su pueblo i ta komprondé nos sintimentunan.” (1 Pedro 5:6, 7) Te ainda Sharon ta sirbiendo Dios fielmente segun e ta spera riba e gran dia di Yehova.

5. Kiko ta duna prueba ku kristiannan por wanta bastante strès?

⁵ Tin kristiannan ta sufri di bastante strès debí na kosnan ku nan a yega di pasa aden. Harley, por ehèmpel, a mira kombatenan feros durante Segundo Guera Mundial i e tabatin pesadia tokante guera. Den su soño e tabata grita: “Tene kuido! Paga tinu!” Ora e lanta fo’i soño, e tabata papa sodá. Sin embargo, el a logra hiba un bida na armonia ku e guia di Dios, i ku tempu e tipo di soñonan ei a bira ménos intenso i frekuente.

6. Kon un ruman hòmber kristian a enfrentá problemanan emoshonal?

⁶ Pa un ruman hòmber kristian ku dòkternan  a diagnostiká ku trastorno di beis bipolar tabata masha difísil p’e prediká di kas pa kas. Sin embargo, el a persistí pasobra e tabata sa ku e ministerio ta nifiká bida p’e i pa e hendenan ku reakshoná faborablemente. (1 Timoteo 4:16) Tabatin biaha ku pará dilanti di un kas simplemente e no tabatin e kurashi pa primi e bèl. Pero el a bisa: “Despues di un ratu, lo mi por a dominá mi emoshonnan, bai n’e siguiente porta i purba atrobe. Dor di sigui prediká, mi salú spiritual a keda basta bon.” Tabata difísil tambe p’e asistí na reunion, pero e ruman aki tabata konvensí di e balor di asosiá ku su rumannan den fe. P’esei el a hasi e esfuerso nesesario pa ta presente.—Hebreonan 10:24, 25.

7. Ounke algun kristian tin miedu di papia den públiko òf di asistí na un reunion, kon nan ta demostrá perseveransia?

⁷ Tin algun kristian ku tin fobia, es desir, demasiado miedu di sierto situashonnan òf ophetonan. Por ehèmpel, kisas nan tin miedu di papia den públiko òf di asistí na un reunion. Imaginá bo kon difísil ta pa nan duna komentario na reunionnan kristian òf duna un parti den e Skol di Ministerio Teokrátiko! Sin embargo, nan ta perseverá, i nan presensia i partisipashon ta un gran estímulo pa nos.

8. Kiko ta masha efektivo ora nos ta trata ku difikultatnan emoshonal?

⁸ Sosegá i drumi mas tantu kisas por yuda un persona soportá difikultatnan emoshonal. Podisé ta konsehabel pa buska yudansa médiko. Sin embargo, un kos masha efektivo ta di konfia riba Dios pa medio di orashon. Salmo 55:22 ta bisa: “Tira bo karga riba SEÑOR, i e lo sostené bo; nunka e lo no permití pa e hustu wòrdu moví.” Pues anto, mas ku tur kos, ‘konfia den Yehova ku henter bo kurason.’—Proverbionan 3:5, 6.

Kon pa Trata ku e Pèrdida di un Ser Kerí

9-11. (a) Kiko por yuda nos karga e tristesa ora un ser kerí muri? (b) Kon e ehèmpel di Ana por yuda nos karga e pèrdida di un ser kerí?

⁹ Ora ku morto separá miembronan di famia, e pèrdida grandi ei por resultá den tristesa profundo. Abraham a yora ora su kasá stimá, Sara, a muri. (Génesis 23:2) Asta e hòmber perfekto Hesus “a yora” ora su amigu Lázaro a muri. (Juan 11:35) Pues, ta natural pa sinti tristesa ora ku un hende ku bo ta stima muri. Sin embargo, kristiannan sa ku lo bai tin un resurekshon. (Echonan 24:15) P’esei nan no “ta tristu manera e otronan ku no tin speransa.”—1 Tesalonisensenan 4:13.

¹⁰ Kon nos por trata ku e tristesa ku morto di un ser kerí ta kousa? Podisé un ilustrashon lo ta útil. Normalmente nos lo no keda tristu pa hopi tempu ora un amigu bai di biahe, ya ku nos ta ferwagt di mir’é atrobe ora e bin bèk. Si nos ta mira e morto di un kristian fiel di e mesun manera, esei lo por mengua nos tristesa pasobra nos sa ku lo e haña un resurekshon.—Eklesiastés 7:1.

¹¹ Pleno konfiansa den e “Dios di tur konsuelo” lo yuda nos karga e tristesa di a pèrdè un ser kerí. (2 Korintionan 1:3, 4) Ta bon tambe pa nos reflekshoná riba loke e biuda Ana a hasi den promé siglo. El a bira biuda despues di apénas shete aña kasá. Pero na edat di 84 aña ainda e tabata rindi sirbishi sagrado na Yehova na e tèmpel. (Lukas 2:36-38) Sin duda, e bida ei di deboshon a yud’é trata ku tristesa i soledat. Si nos ta partisipá ku regularidat den aktividatnan kristian, inkluso den e predikashon di Reino, esei por yuda nos soportá e efektonan di tristesa ku morto di un ser kerí ta kousa.

Kon pa Trata ku Vários Prueba

12. Algun kristian a wanta ki prueba relashoná ku bida di famia?

¹² Algun kristian tin ku wanta prueba relashoná ku bida di famia. Por ehèmpel, si un kasá a kometé adulterio, esei por tin un efekto masha devastador riba e famia. E shòk i tristesa por pone ku e kasá traishoná ta yora sinfin i no por drumi. Kisas tareanan simpel ta kous’é asina tantu strès ku e ta kometé eror òf un aksidente ta sosodé. Kisas e kasá inosente no por kome, e ta pèrdè peso i por  bira emoshonalmente perturbá. Kisas ta difísil p’e partisipá den aktividatnan kristian. Anto no papia mes di e manera ku e yunan ta ser afektá!

13, 14. (a) Ki animashon bo ta haña for di e orashon ku Salomon a hasi na inougurashon di e tèmpel? (b) Pakiko nos ta pidi pa spiritu santu den orashon?

¹³ Yehova ta perkurá loke nos tin mester ora nos ta eksperensiá e tipo di pruebanan ei. (Salmo 94:19) Manera Rei Salomon a menshoná den su orashon na inougurashon di e tèmpel di Yehova, Dios ta skucha e orashonnan di su pueblo. Salomon a pidi Dios: “Kualke orashon òf súplika ku un hende òf ku henter bo pueblo Israel hasi, ora kada un konosé e aflikshon di su mes kurason, i ta habri su mannan den direkshon di e kas aki—e ora ei tende abo den shelu, bo lugá di biba, i pordoná, i aktua, i duna kada un segun tur su kamindanan, kende su kurason bo konosé (pasobra ta abo so konosé kurason di tur e yunan di hende), pa nan tin temor pa bo tur e dianan ku nan ta biba den e tera ku bo a duna nos tatanan.”—1 Reinan 8:38-40.

¹⁴ Loke foral por yuda ta di sigui pidi pa spiritu santu den orashon. (Mateo 7:7-11) E fruta di spiritu ta inkluí kualidatnan manera goso i pas. (Galationan 5:22, 23) Esta un alivio nos ta sinti ora ku nos Tata selestial kontestá nos orashonnan, anto goso remplasá tristesa, i pas bin na lugá di angustia!

15. Kua tekstonan bíbliko por yuda kalma nos preokupashon?

¹⁵ Echo ta ku nos por ferwagt un sierto grado di preokupashon ora nos tin ku soportá hopi tenshon. Pero nos lo por kalma e preokupashon aki un poko si nos tene na mente e palabranan aki di Hesus: “No preokupá boso mes pa boso bida, kiko boso lo kome òf kiko boso lo bebe; tampoko pa boso kurpa, kiko boso lo bisti. . . . Ma buska promé e reino di Dios i su hustisia, i tur e kosnan aki lo wòrdu añadí na boso.” (Mateo 6:25, 33, 34) Apòstel Pedro a urgi nos pa ‘tira tur nos preokupashon riba Dios, pasobra e ta perkurá pa nos.’ (1 Pedro 5:6, 7) Ta na su lugá pa nos hasi esfuerso pa resolvé un problema. Pero despues ku nos a hasi loke nos por, preokupashon lo no yuda nos ku nada, ma orashon sí. E salmista a kanta: “Enkomendá bo kaminda na SEÑOR, konfia tambe den dje, i e lo [aktua].”—Salmo 37:5.

16, 17. (a) Pakiko nos no por ta kompletamente liber di preokupashon? (b) Kiko nos lo eksperensiá si nos apliká Filipensenan 4:6 i 7?

¹⁶ Pablo a skirbi: “No preokupá pa nada; ma den tur kos, pa medio di orashon i súplika ku gradisimentu, laga boso petishonnan ta konosí dilanti di Dios. I e pas di Dios, ku ta surpasá tur komprondementu, lo warda boso kurason i boso mente den Kristu Hesus.” (Filipensenan 4:6, 7) Di mes, komo desendiente imperfekto di Adam, hende no por ta totalmente liber di preokupashon. (Romanonan 5:12) Por ehèmpel, e esposanan heteo di Esau “a trese amargura den bida di Isaak i Rebeka,” e mayornan deboto di Esau. (Génesis 26:34, 35) Malesa lo mester a kousa gran preokupashon pa kristiannan manera Timoteo i Trófimo. (1 Timoteo 5:23; 2 Timoteo 4:20) Pablo a preokupá pa rumannan den fe. (2 Korintionan 11:28) Pero Esun “ku ta skucha orashon” semper t’ei pa esnan ku stim’é.—Salmo 65:2.

¹⁷ Segun nos ta spera riba e dia di Yehova, nos tin e sosten i konsuelo di “e Dios di pas.” (Filipensenan 4:9) Yehova ta “yen di kompashon i grasia,” e ta “bon, i kla pa pordoná,” i “e ta kòrda ku ta stòf nos ta.” (Eksodo 34:6; Salmo 86:5; 103:13, 14) P’esei ‘laga nos petishonnan ta konosí dilanti dje,’ pasobra esaki lo yuda nos haña “e pas di Dios,” un trankilidat ku ta surpasá loke hende por komprondé.

18. Manera Jòb 42:5 ta deklará, kon ta posibel pa “mira” Dios?

¹⁸ Ora nos orashonnan ta ser kontestá, nos sa ku Dios ta ku nos. Despues ku Jòb a wanta su pruebanan, el a bisa: “Ta tende mi a tende di bo [Yehova], ma awor mi wowo ta mira bo.” (Jòb 42:5) Ku wowo di fe nos por reflekshoná riba Dios su trato ku nos di manera ku nos ta krese den komprondementu i gratitut p’e i nos por  ‘mir’é’ manera nunka promé. Tal intimidat ta duna nos pas di mente i kurason!

19. Kiko lo pasa si nos ‘tira tur nos preokupashon riba Yehova’?

¹⁹ Si nos ‘tira tur nos preokupashon riba Yehova,’ nos por wanta prueba ku un pas interno ku ta protehá nos mente i kurason. Den fondo di nos kurason nos lo sinti nos liber di intrankilidat, miedu i spantu. Nos mente lo no ta intrankil debí na insiguridat òf preokupashon.

20, 21. (a) E kaso di Esteban ta duna prueba ku un hende ta sinti ki trankilidat ora e ta bou di persekushon? (b) Menshoná un ehèmpel di nos tempu ku ta mustra e trankilidat di un persona ku ta wanta prueba.

²⁰ Disipel Esteban a desplegá trankilidat ora e tabata pasando un prueba severo di su fe. Promé ku el a duna un último testimonio, tur e hendenan den e Sanedrin, “a mira su kara manera kara di angel.” (Echonan 6:15) Su kara tabata trankil, manera di un mensahero di Dios, un angel. Despues ku Esteban a saka na kla nan kulpabilidat den e morto di Hesus, e huesnan “a bira furioso i nan a sera djente kontra dje.” Ma “yen di spiritu santu” Esteban “a fiha su bista na shelu i a mira e gloria di Dios, i Hesus pará na man drechi di Dios.” Fortalesí pa e vishon ei, Esteban a keda fiel te na morto. (Echonan 7:52-60) Ounke nos no ta haña vishon, nos por tin e trankilidat ku Dios ta duna ora nos ta bou di persekushon.

²¹ Konsiderá e sintimentunan di algun kristian ku a muri na man di e nazinan durante Segundo Guera Mundial. Por ehèmpel, un ruman hòmber a skirbi tokante su eksperensia den korte promé ku su ehekushon: “Nan a dekretá e sentensia di morto. Mi a skucha, i despues ku mi a ekspresá e palabranan: ‘Sea fiel te na morto,’ i un par di otro palabra di nos Señor, tur kos a kaba. Pero esei no ta importante mas. Boso no por imaginá ki un pas, ki un trankilidat, mi ta sinti!” Un hóben kristian ku a enfrentá morto na guiotina a skirbi su mayornan: “Ta despues di meianochi kaba. Ainda mi por kambia di opinion. Akaso lo mi por ta felis atrobe den e mundu aki si mi nenga nos Señor? Imposibel! Pero awor boso por tin e siguransa ku mi a bai laga e mundu aki den felisidat i pas.” No tin duda ku Yehova ta sostené su sirbidónan leal.

Bo Por Perseverá!

22, 23. Di kiko bo por ta sigur segun bo ta spera riba e dia di Yehova ku perseveransia?

²² Kisas bo no ta konfrontá un di e difikultatnan ku nos a trata. Sin embargo, e hòmber temeroso di Dios, Jòb, tabatin rason ora el a bisa: “Hende ku a nase di muhé ta biba poko dia i ta yen di problema.” (Jòb 14:1) Podisé bo ta un mayor ku ta traha duru pa duna bo yunan guia spiritual. Nan ta haña nan ta wanta prueba na skol, pero esta felis bo ta sinti bo ora ku nan tuma un posishon firme na banda di Yehova i su prinsipionan hustu! Podisé bo ta konfrontando difikultat i tentashon na trabou. Sin embargo, bo por wanta e situashonnan aki i otro mas, pasobra Yehova “dia tras dia ta karga nos karganan.”—Salmo 68:19.

²³ Kisas bo ta konsiderá bo mes djis un persona komun i koriente, pero kòrda ku Yehova nunka lo lubidá bo trabou i e amor ku bo a mustra pa su nòmber santu. (Hebreonan 6:10) Ku su yudansa, nos por wanta pruebanan di fe. Pues, inkluí e hasimentu di e boluntat di Dios den bo orashon i den bo plannan. E ora ei bo por tin e konfiansa di haña su bendishon i sosten segun bo ta spera riba e dia di Yehova ku perseveransia.

Kon Lo Bo Kontestá?

• Dikon kristiannan tin mester di perseveransia?

• Kiko por yuda nos soportá malesa i pèrdida di un ser kerí?

• Kon orashon ta yuda nos wanta prueba?

• Kon bin ta posibel pa spera riba e dia di Yehova ku perseveransia?

[Preguntanan di Estudio]

[Plachi na página 21]

Konfiansa den Yehova ta yuda nos karga e pèrdida di un ser kerí

[Plachi na página 23]

Orashon sinsero ta yuda nos wanta pruebanan di fe