“Warda Boso di Tur Golosidat”

“Bida di hende no ta konsistí di e abundansia di e kosnan ku e tin.”—LUKAS 12:15.

1, 2. (a) Kiko bo a opservá relashoná ku e hendenan djawe su interes i aktividat? (b) Kon e aktitutnan ei lo por afektá nos?

PLAKA, propiedat, prestigio, un trabou ku ta paga bon, famia; esakinan ta algun di e kosnan ku mayoria di hende ta konsiderá komo un indikashon di éksito òf un garantia pa un futuro sigur. Ta bisto ku tantu den paisnan riku komo pober, hopi hende su interes i aktividat ta konsentrá riba hasi ganashi material i bai dilanti den bida. Di otro banda, nan interes den asuntunan spiritual, si e t’ei mes, ta menguando rápidamente.

² Esaki ta presis loke Beibel a profetisá: “Den e último dianan tempunan trabahoso lo bin. Pasobra hende lo ta stimadó di nan mes, stimadó di plaka, . . . mas bien stimadó di plaser ku stimadó di Dios; ku tin aparensia di ta religioso bèrdè, ma ku ta nenga su poder.” (2 Timoteo 3:1-5) Kristiannan berdadero ku ta biba dia aden dia afó meimei di hendenan asina ta haña nan konstantemente bou di preshon pa adaptá nan mes na e tipo di mentalidat i estilo di bida aki. Kiko por yuda nos resistí e esfuerso ku mundu ta hasi pa ‘primi nos den su propio malchi’?—Romanonan 12:2, The New Testament in Modern English, di J. B. Phillips.

3. Ki konseho ku Hesus a duna nos lo bai konsiderá awor?

³ Hesukristu, komo “Outor i Kumplidó di fe,” a siña nos algun lès poderoso relashoná ku esaki. (Hebreonan 12:2) Na un okashon ku Hesus tabata papia ku un multitut pa duna nan mayor komprondementu spiritual, un hòmber a interumpí e kòmbersashon ku e petishon: “Maestro, bisa mi ruman hòmber pa parti e herensia ku mi.” Komo kontesta, Hesus a duna e hòmber—i tur esnan ku tabata skucha—algun konseho serio. Hesus a ekspresá un atvertensia fuerte kontra golosidat i a reforsá e spièrtamentu ei ku un ilustrashon ku ta duna nos kos pa pensa ariba. Ta bon pa nos hasi kaso di loke Hesus a bisa na e okashon ei i wak kon nos por aplik’é den nos propio bida.—Lukas 12:13-21.

Un Petishon Inapropiá

4. Dikon e interupshon di e hòmber tabata inapropiá?

⁴ Promé ku e hòmber a interumpí Hesus, e tabata papia ku su disipelnan i otro hende pa nan tene kuido ku hipokresia, pa nan tin e kurashi pa konfesá union ku e Yu di hende i tokante haña yudansa di spiritu santu. (Lukas 12:1-12) Esakinan sigur tabata tópikonan sumamente importante ku e disipelnan mester a tuma na pechu. Sin embargo, meimei di un diskurso asina serio ku a stimulá hende pa saminá nan konsenshi, e hòmber abruptamente ta interumpí Hesus i pidié intermediá den loke a parse un disputa familiar tokante poseshon material. Pero tin un lès importante ku nos por siña for di e suseso aki.

5. Kiko e petishon di e hòmber a revelá di dje?

⁵ A yega di ser bisá ku “e karakter di un hende hopi biaha ta ser indiká pa e direkshon ku su pensamentu ta kue ora e ta skuchando un diskurso religioso.” Miéntras ku Hesus tabata papia tokante asuntunan spiritual serio, e hòmber probablemente tabata pensa riba kiko lo e por hasi pa logra sierto bentaha finansiero. Beibel no ta bisa si e tabatin un base legítimo  pa keha en konekshon ku e herensia. Podisé e kier a purba probechá di Hesus su outoridat i reputashon komo hues sabí den asuntunan humano. (Isaias 11:3, 4; Mateo 22:16) En todo kaso, su pregunta a indiká ku posiblemente den su kurason tabatin un problema, un falta serio di apresio pa asuntunan spiritual. Akaso esaki no ta un bon motibu pa nos saminá nos mes? Na reunionnan kristian por ehèmpel, ta fásil pa laga nos mente dual òf bai pensa riba loke nos lo hasi despues di reunion. Na lugá di esei, nos mester paga tinu na loke ta ser bisá i pensa riba maneranan ku nos por hasi aplikashon personal di e informashon ya asina nos por mehorá nos relashon ku nos Tata selestial, Yehova Dios, i ku nos rumannan kristian.—Salmo 22:22; Marko 4:24.

6. Dikon Hesus a nenga di kumpli ku e hòmber su petishon?

⁶ Sea loke sea a motivá e hòmber pa hasi e petishon, Hesus a nenga di kumpli kuné. Na lugá di esei Hesus a bis’é: “Hòmber, ta ken a pone mi komo hues òf rèfri riba boso?” (Lukas 12:14) Ku e palabranan ei Hesus a referí na algu ku e hendenan tabata bon na haltura di dje, pasobra segun e Lei di Moisés, a nombra huesnan den e statnan pa dikta sentensia den netamente e tipo di kasonan ei. (Deuteronomio 16:18-20; 21:15-17; Ruth 4:1, 2) Hesus, di otro banda, tabata enbolbí ku kosnan mas importante, manera duna testimonio di e bèrdat di e Reino i siña hende e boluntat di Dios. (Juan 18:37) Imitando e ehèmpel di Hesus, nos no ta laga preokupashonnan di tur dia desviá nos, sino mas bien ta usa nos tempu i energia pa prediká e bon nobo i pa ‘hasi disipel di hende di tur nashon.’—Mateo 24:14; 28:19.

Tene Kuido ku Golosidat

7. Ki opservashon penetrante Hesus a hasi?

⁷ Komo ku Hesus por a distinguí e intenshonnan di mas profundo di kurason, e tabata sa ku tabatin algu mas serio tras di e hòmber su petishon p’e intervení den un asuntu personal. Pues, en bes di djis nenga di kumpli ku e petishon, Hesus a bai na e rais di e asuntu i a bisa: “Tene kuidou, i warda boso di tur golosidat; pasobra bida di hende no ta konsistí di e abundansia di e kosnan ku e tin.”—Lukas 12:15.

8. Kiko ta golosidat, i na kiko e por hiba?

⁸ Golosidat ta mas ku simplemente e deseo di tin plaka òf sierto kos, kosnan ku por tin nan propósito i uso apropiá. E ta e deseo eksesivo pa rikesa òf propiedat òf pa kos di otro hende. E ta enserá kudishi i e deseo insasiabel i haragan pa tin kos—podisé kos ku ta pertenesé na un otro persona—djis pa bo tiné, sin tin kunes ku bo tin mester di dje òf ki efekto lo e tin riba otro hende. Un persona golos ta laga loke e ta deseá dominá su pensamentu i akshon di tal grado ku esei básikamente ta bira su dios. Kòrda ku apòstel Pablo a igualá un persona kudisioso òf golos ku un adoradó di dios falsu, kende lo no heredá e Reino di Dios.—Efesionan 5:5; Kolosensenan 3:5.

9. Den ki manera golosidat por ser manifestá? Duna algun ehèmpel.

⁹ Ta interesante pa nota ku Hesus a spièrta kontra “tur golosidat.” Golosidat ta bin den hopi forma. E último di e Dies Mandamentu a menshoná algun di nan, bisando: “No kudishá kas di bo próhimo; no kudishá esposa di bo próhimo, ni su sirbidó hòmber, ni su sirbidó muhé, ni su buey, ni su buriku, ni nada ku ta pertenesé na bo próhimo.” (Eksodo 20:17) Beibel tin kantidat di ehèmpel di personanan ku a kometé piká grave debí na un òf otro tipo di golosidat. Satanas ta e promé ku a kudishá algu ku a pertenesé na un otro persona, esta, e gloria, onor i outoridat ku ta pertenesé na Yehova so. (Revelashon 4:11) Eva a kudishá e derecho di outodeterminashon. Anto debí ku el a ser engañá den e asuntu aki, e rasa humano a kohe e kaminda di piká i morto. (Génesis 3:4-7) E demoñonan tabata angel ku a bira mal kontentu ku ‘nan mes posishon, i a bandoná nan propio lugá di biba’ pa algu ku nan no tabatin derecho riba dje. (Hudas 6; Génesis 6:2) Pensa tambe riba Balaam, Akan, Gehazi i Hudas.  En bes di tabata kontentu ku nan situashon den bida, nan a permití un deseo eksesivo pa kos material pone nan hasi mal uso di nan posishon di konfiansa, lokual a hiba nan na ruina i destrukshon.

10. Manera Hesus a spièrta, kon nos tin ku “tene kuidou”?

¹⁰ Ta masha apropiá ku promé ku Hesus a spièrta hende pa golosidat el a usa e ekspreshon “tene kuidou”! Dikon? Pasobra rara bes hende sa rekonosé ku nan ta kulpabel di golosidat. Sin embargo, apòstel Pablo a señalá ku “amor pa plaka ta rais di tur sorto di maldat.” (1 Timoteo 6:9, 10) Disipel Santiago a splika ku ora mal deseo “konsebí, e ta duna lus na piká.” (Santiago 1:15) Na armonia ku e spièrtamentu di Hesus, nos tin ku “tene kuidou” den nos kurason pa ‘warda nos di tur golosidat.’

Un Bida di Abundansia

11, 12. (a) Ki spièrtamentu Hesus a duna kontra golosidat? (b) Dikon nos tin ku hasi kaso di e spièrtamentu di Hesus?

¹¹ Pero tin un motibu mas pakiko nos tin ku warda nos di golosidat. Tuma nota di loke Hesus a sigui bisa: “Pasobra bida di hende no ta konsistí di e abundansia di e kosnan ku e tin.” (Lukas 12:15) En bista di nos era materialista, esaki sigur ta kos pa nos pensa ariba, ya ku awe hende ta konsiderá ku rikesa i prosperidat ta estrechamente ligá ku felisidat i éksito. Pero ku e palabranan ei Hesus a indiká ku un bida ku tin berdadero satisfakshon i propósito no ta resultá ni dependé di poseshon material, ni maske kon abundante nan ta.

¹² Sin embargo, tin hende no ta di akuerdo ku esei. Podisé nan ta rasoná ku poseshon material ta hasi bida mas kómodo i agradabel, i asina bida ta bale la pena. P’esei nan ta dediká nan mes na aktividatnan ku lo duna nan e oportunidat pa optené tur e biennan material i aparatonan elektróniko ku nan ta deseá. Nan ta pensa ku esaki lo resultá den un bida bon. Pero si nan ta pensa asina, nan no a kapta e punto ku Hesus kier a enfatisá.

13. Kiko ta un punto di bista balansá di bida i poseshon material?

¹³ En bes di enfoká riba si ta bon òf malu pa hende tin un abundansia, Hesus a enfatisá ku e bida di un persona no ta resultá òf bin for di “e kosnan ku e tin.” Relashoná ku esaki, nos tur sa ku pa biba, òf pa sostené e bida ku nos tin, nos no tin mester di masha kos. Ta djis un tiki kuminda, algu pa bisti i un lugá pa drumi. Hende riku tin un abundansia di e kosnan aki, i hende pober kisas tin ku lucha pa optené loke nan tin mester. Sin embargo, sea riku òf pober, nan tur dos ta bira meskos ora bida yega na su fin, tur kos ta kaba einan. (Eklesiastés 9:5, 6) Pues, pa bida tin propósito i balor, e no por—i lo no mester—ta konsistí simplemente di kosnan ku bo tin òf por atkerí. E pensamentu aki ta bin dilanti ora nos analisá e klase di bida ku Hesus tabata papia di dje.

14. Kiko nos por siña for di e palabra “bida” den e relato bíbliko aki?

¹⁴ Ora Hesus a bisa ku ‘bida di hende no ta konsistí di e kosnan ku e tin,’ e palabra ku e Evangelio di Lukas a usa pa “bida” (na griego, zo·é) no ta referí na e manera òf estilo di biba, sino na bida mes, bida den e sentido apsoluto di e palabra. * Hesus tabata bisando ku sea nos ta riku òf pober, sea ku nos ta biba den luho òf apénas nos por haña nos pan di kada dia, nos no tin pleno kontròl riba kon largu nos lo biba, a ni sikiera si nos lo ta na bida mañan. Hesus a deklará den su Sermon Riba Seru: “Ni maske kuantu boso preokupá, ta kua di boso lo por rèk su bida un krenchi?” (Mateo 6:27, BPK) Beibel ta mustra bon kla ku ta Yehova so ta “e fuente di bida.” Ta e so por duna su fiel sirbidónan “loke ta bida berdadero”—“bida eterno”—bida sin fin, sea den shelu òf riba tera.—Salmo 36:9; 1 Timoteo 6:12, 19.

15. Dikon hopi hende ta pone nan konfiansa den poseshon material?

 ¹⁵ E palabranan di Hesus ta indiká kon fásil ta pa hende haña un punto di bista trosí di bida. Sea riku òf pober, tur hende ta imperfekto i tin un solo final. Moisés di antigwedat a komentá: “E dianan di nos bida ta setenta aña, òf si hende tin hopi forsa, ochenta aña; tòg nan orguyo no ta nada otro ku molèster i pena, pasobra un djis el a pasa, i nos ta bula bai.” (Salmo 90:10; Jòb 14:1, 2; 1 Pedro 1:24) Pa e motibu aki, hende ku no a kultivá un bon relashon ku Dios hopi biaha ta adoptá e mentalidat ku apòstel Pablo a referí na dje, esta, “laga nos kome i bebe, pasobra mañan nos ta muri.” (1 Korintionan 15:32) Otro hende ku ta sinti ku bida ta pasahero i insigur, ta purba haña siguridat i stabilidat pa medio di poseshon material. Podisé nan ta pensa ku si nan tin hopi kos material palpabel, esei di un manera òf otro lo hasi bida mas sigur. Pues, nan ta traha nònstòp pa akumulá rikesa i propiedat, pensando ekibokadamente ku e kosnan ei ta estrechamente ligá ku siguridat i felisidat.—Salmo 49:6, 11, 12.

Un Futuro Sigur

16. Riba kiko e berdadero balor di un hende su bida no ta basá?

¹⁶ Kisas ta bèrdat ku un nivel mas haltu di bida—un abundansia di kuminda, paña, kas i otro kosnan di luho—lo por kontribuí na un bida mas kómodo, òf por asta permití un hende haña mihó kuido médiko i asina agregá un par di aña na su bida. Sin embargo, un bida asina realmente ta mas sigur i tin mas propósito? E berdadero balor di un hende su bida no ta ser midí na e kantidat di aña ku lo e por biba òf na e kantidat di kosnan material ku lo e por tin òf ku e ta disfrutá di dje. Apòstel Pablo a señalá e peliger di pone demasiado konfiansa den e kosnan ei. El a skirbi Timoteo: “Instruí esnan ku ta riku den e mundu aktual pa nan no ta sobèrbè i pa nan no fiha nan speransa riba e insiguridat di rikesa, ma riba Dios, kende ta proveé pa nos tur kos na abundansia pa nos disfrutá di nan.”—1 Timoteo 6:17.

17, 18. (a) Ki ehèmpelnan sobresaliente relashoná ku poseshon material ta digno di imitashon? (b) Kua parábola di Hesus nos lo konsiderá den e siguiente artíkulo?

¹⁷ No ta sabí pa fiha nos speransa riba rikesa pasobra e ta un kos “insigur.” Patriarka Jòb tabata masha bon pará, pero ora ku diripiente desaster a dal aden, su rikesa no por a yud’é; esei a disparsé di un dia pa otro. Pero ta Jòb su relashon sólido ku Dios a sostené atraves di tur su prueba- i tribulashonnan. (Jòb 1:1, 3, 20-22) Abraham no a permití su abundansia di poseshon material strob’é di aseptá un asignashon difísil for di Yehova, i komo rekompensa el a bira “tata di un multitut di nashonnan.” (Génesis 12:1, 4; 17:4-6) E ehèmpelnan aki i otronan mas ta digno di imitashon. Sea ku nos ta hóben òf bieu, nos tin ku analisá nos mes pa wak kiko ta realmente importante den nos bida i riba kiko nos ta fiha nos speransa.—Efesionan 5:10; Filipensenan 1:10.

¹⁸ E par di palabranan ku Hesus a papia tokante golosidat i e punto di bista korekto di bida ta realmente signifikativo i instruktivo. Sin embargo, Hesus tabatin mas instrukshon na mente, i el a sigui ku un parábola tokante un hòmber riku bobo, un ilustrashon ku ta duna nos kos pa pensa ariba. Kiko e ilustrashon ei tin keber ku nos bida awe, i kiko nos por siña for di dje? E siguiente artíkulo lo kontestá esei.

[Nota]

Kiko Ta Bo Kontesta?

• Kiko nos por siña for di e echo ku Hesus a nenga di kumpli ku e petishon di un hòmber den e multitut?

• Dikon nos tin ku tene kuidou ku golosidat, i kon nos por hasi esei?

• Dikon bida no ta resultá for di kos material?

• Kiko por hasi bida realmente sigur i bale la pena?

[Preguntanan di Estudio]

[Plachi na página 25]

Dikon Hesus a nenga di kumpli ku e petishon di un hòmber?

[Plachi na página 25]

Golosidat por hiba na resultadonan desastroso

[Plachinan na página 27]

Kon Abraham a demostrá un punto di bista korekto di poseshon material?