Perseveransia Apesar di Sufrimentu Por Benefisiá Nos

“Nos ta konsiderá komo bendishoná esnan ku a perseverá.”—SANTIAGO 5:11.

1, 2. Kiko ta mustra ku no tabata e propósito di Yehova pa hende sufri?

NIUN hende normal no ke sufri. Nos Kreadó, Yehova Dios, tampoko no ke pa hende sufri. Nos por komprondé esaki ora nos analisá su Palabra inspirá i tuma nota di loke a sosodé despues ku el a krea hòmber i muhé. Dios a krea e hòmber promé. “SEÑOR Dios a forma hende di e stòf di tera i a supla e rosea di bida den su nanishi; i hende a bira un ser bibu.” (Génesis 2:7) Adam tabatin un kurpa i mente perfekto, i e no tabatin nodi di bira malu ni muri.

² Den ki kondishon Adam a biba? “SEÑOR Dios a planta un hòfi parti pariba, na Edén; i ayanan el a pone e hòmber ku el a forma. I for di suela SEÑOR Dios a hasi nase tur palu ku ta agradabel pa bista i bon pa kuminda.” (Génesis 2:8, 9) Sí, Adam tabatin un hogar maravioso. No tabatin sufrimentu den Edén.

3. Ki futuro tabatin dilanti e promé pareha humano?

³ Génesis 2:18 ta informá nos: “E ora ei SEÑOR Dios a bisa: ‘No ta bon pa e hòmber ta so; lo mi traha un yudadó p’e ku ta pas kuné.’” Anto Yehova a krea un esposa perfekto pa Adam, lokual a hasi posibel ku hende por tabatin un bida di famia felis. (Génesis 2:21-23) Beibel ta informá nos mas aleu: “Dios a bendishoná nan, i Dios a bisa nan: ‘Sea fruktífero i multipliká, i yena e tera i hasi esaki someté na bo.’” (Génesis 1:28) E promé pareha humano lo tabatin e privilegio maravioso di ekspandé e Paradeis di Edén te ora ku esaki finalmente lo a kubri tera kompletu i bira un paradeis mundial. I nan lo a trese yunan felis na mundu, ku lo tabata liber di sufrimentu. Ki un komienso magnífiko!—Génesis 1:31.

Komienso di Sufrimentu

4. Ora nos wak historia, kiko ta opvio tokante humanidat?

⁴ Pero, ora nos wak e kondishon di hende atraves di historia, ta opvio ku algu a bai kompletamente robes. Tabatin hopi kos malu ku a  sosodé, i hende a sufri hopi. Den transkurso di siglonan, tur desendiente di Adam ku Eva a bira malu, a bira bieu i ku tempu a muri. Tera sigur no ta un paradeis yen di hende felis. Romanonan 8:22 ta duna nos un deskripshon eksakto di e situashon. E ta bisa: “Henter e kreashon ta keha i ta sufri e dolónan di parto huntu, te awor.”

5. Ki papel nos promé mayornan a hunga den e komienso di sufrimentu di hende?

⁵ Nos no por kulpa Yehova pa e enorme sufrimentu ku ta eksistí pa asina tantu tempu. (2 Samuel 22:31) Hende mes tin parti di e kulpa. “Nan ta korumpí, nan a kometé echonan abominabel.” (Salmo 14:1) Nos promé mayornan a haña un bon komienso. Tur loke nan mester a hasi pa sigui riba e bon kaminda tabata di obedesé Dios, pero Adam ku Eva a skohe e rumbo di independensia for di Yehova. For di tempu ku nos promé mayornan a rechasá Yehova, nan no tabata perfekto mas. Nan kurpa a kuminsá bai atras te ora nan a muri. Asina nos a bin heredá imperfekshon.—Génesis 3:17-19; Romanonan 5:12.

6. Ki ròl Satanas tabatin den e orígen di sufrimentu?

⁶ Un otro persona ku tabatin di haber ku e komienso di tur sufrimentu ta e kriatura spiritual ku a bira Satanas e Diabel. El a ser kreá ku un boluntat liber. Sin embargo, den un intento pa risibí adorashon, el a hasi mal uso di e fakultat ei. Pero ta Yehova so hende mester adorá, i no su kreashon. Ta Satanas a pone Adam ku Eva buska independensia for di Yehova, komo si fuera ku asina nan por a bira “manera Dios, konosiendo bon i malu.”—Génesis 3:5.

Ta Yehova So Tin Derecho di Goberná

7. Kiko e konsekuensianan di rebelion kontra Yehova ta demostrá?

⁷ E mal konsekuensianan di rebelion ta demostrá ku ta Yehova so, e Soberano di Universo, tin e derecho di goberná i ku ta su gobernashon so ta hustu. E mil añanan ku a pasa a demostrá ku Satanas, kende a bira “e prens di e mundu aki,” a desaroyá un gobernashon malbado, inhustu i violento ku no a benefisiá hende ku nada. (Juan 12:31) E gobernashon largu i lamentabel di hende bou di kontròl di Satanas a demostrá tambe ku nan no tin e kapasidat pa goberná den hustisia. (Jeremias 10:23) Pues, tur tipo di gobernashon ku hende por imaginá ku ta independiente for di esun di Yehova lo frakasá sigur. Historia a demostrá esaki bon kla.

8. Kiko ta Yehova su propósito relashoná ku tur forma di gobernashon humano, i kon lo e kumpli ku e propósito ei?

⁸ Awor ku Yehova a laga hende eksperimentá ku gobernashon independiente for di dje pa míles di aña, e tin tur motibu pa eliminá tur e formanan aki di gobernashon for di riba tera i remplasá nan ku su mes gobièrnu. Un profesia tokante esaki ta bisa: “Den e dianan di e reinan ei [gobièrnunan humano] e Dios di shelu lo lanta un reino [su gobièrnu selestial den man di Kristu] ku nunka lo no wòrdu destruí. . . . E lo garna i pone un fin na  tur e reinonan aki, ma e mes lo dura pa semper.” (Daniel 2:44) Gobernashon demoniako i humano lo disparsé, i e Reino selestial di Dios so lo keda eksistí i goberná tera. Kristu lo ta e Rei, i lo e tin komo ko-gobernante 144.000 hende fiel tumá for di tera.—Revelashon 14:1.

Sufrimentu Por Trese Benefisio

9, 10. Kon Hesus a benefisiá di e sufrimentu ku el a pasa aden?

⁹ Ta interesante pa analisá e kualifikashonnan di e personanan ku lo goberná den e Reino selestial. Na promé lugá, Kristu Hesus a mustra ku e ta bon kualifiká pa kumpli ku su papel komo Rei. El a pasa un tempu largísimo huntu ku Yehova, hasiendo e boluntat di su Tata, siendo su “trahadó eksperto.” (Proverbionan 8:22-31) Ora Yehova a mand’é na tera, Hesus a kumpli di buena gana. Aki el a dediká su mes na konta hende tokante e soberania i Reino di Yehova. Hesus a pone un ekselente ehèmpel pa nos tur dor di someté su mes totalmente na e soberania ei.—Mateo 4:17; 6:9.

¹⁰ Hesus a ser persiguí, i finalmente el a ser matá. Durante su ministerio, e por a mira e kondishon deplorabel di humanidat tur rònt di dje. El a benefisiá di e kosnan ku el a mira i di e sufrimentu ku e mes a pasa aden? Sí. Hebreonan 5:8 ta bisa: “Ounke ku e tabata Yu [di Dios], el a siña obedensia dor di e kosnan ku el a sufri.” E eksperensia ku Hesus a pasa aden tempu e tabata riba tera a hasié mas bondadoso i kompasivo. El a eksperensiá personalmente e kondishon di e famia humano. E por a sinti pa esnan ku ta sufri i por a komprondé mihó su papel komo nan reskatadó. Ripará kon apòstel Pablo ta resaltá esaki den e buki di Hebreonan: “E mester a wòrdu hasí igual ku su rumannan den tur kos, pa e por a bira un sumo saserdote miserikòrdioso i fiel den kosnan ku tin di hasi ku Dios, pa hasi ekspiashon pa e pikánan di e pueblo. Pasobra komo ku e mes a wòrdu tentá den loke el a sufri, e por bin na yudansa di esnan ku ta wòrdu tentá.” “Nos no tin un sumo saserdote ku no por kompadesé di nos debilidatnan, sino un ku a wòrdu tentá den tur kos meskos ku nos, ma tòg sin piká. P’esei, laga nos aserká e trono di grasia ku konfiansa, pa nos risibí miserikòrdia i haña grasia pa yuda den tempu di nesesidat.”—Hebreonan 2:17, 18; 4:14-16; Mateo 9:36; 11:28-30.

11. Kon e eksperensia riba tera di e futuro rei- i saserdotenan selestial lo benefisiá nan?

¹¹ Nos por bisa kasi meskos di e 144.000 personanan ku a “wòrdu kumprá” for di tera pa ta ko-gobernante ku Kristu Hesus den e Reino selestial. (Revelashon 14:4) Nan tur a nase komo hende riba tera, a lanta den un mundu rondoná pa sufrimentu, i nan mes a sufri. Hopi di nan a ser persiguí, i algun a wòrdu asta matá pa motibu ku nan a mantené nan integridat na Yehova i tabata dispuesto pa sigui Hesus. Pero nan ‘no tabatin bèrgwensa di e testimonio di nos Señor, ma a uni den sufrimentu pa e evangelio.’ (2 Timoteo 1:8) Spesialmente nan eksperensia riba tera ta kualifiká nan pa husga  hende for di nan posishon den shelu. Nan a siña pa ta mas kompasivo, bondadoso i ansioso pa yuda hende.—Revelashon 5:10; 14:2-5; 20:6.

Felisidat di Esnan Ku Tin Speransa Terenal

12, 13. Kon hende ku tin un speransa terenal por benefisiá di sufrimentu?

¹² E sufrimentu aktual por benefisiá hende ku tin speransa di biba pa semper den un paradeis riba tera liber di enfermedat, tristesa i morto? E doló i angustia ku sufrimentu ta trese kuné riba su mes no ta nada agradabel. Pero ora nos ta wanta tal sufrimentu, esei por mehorá nos bon kualidatnan i hasi nos felis.

¹³ Wak kiko e Palabra inspirá di Dios ta bisa tokante esaki: “Maske boso mester sufri pa motibu di hustisia, boso ta bendishoná.” “Si boso wòrdu reprochá pa e nòmber di Kristu, boso ta bendishoná.” (1 Pedro 3:14; 4:14) “Bendishoná boso ta ora ku hende insultá boso i persiguí boso, i ta gaña tur klase di maldat riba boso pa mi kousa. Regosihá i sea kontentu, pasobra boso rekompensa den shelu ta grandi.” (Mateo 5:11, 12) “Bendishoná ta un hende ku ta perseverá den prueba; pasobra unabes ku el a pasa e prueba, e lo risibí e korona di bida.”—Santiago 1:12.

14. Den ki sentido sufrimentu ta hasi Yehova su adoradónan felis?

¹⁴ Ta klaru ku no ta e sufrimentu mes ku nos por ta pasando aden ta hasi nos felis. Nos ta felis, i nos ta haña un satisfakshon, pasobra nos sa ku nos ta sufri pa motibu ku nos ta hasiendo e boluntat di Yehova i ta siguiendo e ehèmpel di Hesus. Por ehèmpel, den e promé siglo, algun di e apòstelnan a ser enkarselá i despues hibá dilanti e korte supremo hudiu i denunsiá pa motibu ku nan a prediká tokante Hesukristu. Nan a suta nan i despues a laga nan bai. Kiko tabata e aktitut di e apòstelnan? E relato bíbliko ta bisa ku nan “a bai for di presensia di e Konsilio, regosihando ku nan a wòrdu konsiderá digno pa sufri bèrgwensa pa su nòmber.” (Echonan 5:17-41) Nan tabata felis, no pasobra nan a haña sota i sinti doló, sino pasobra nan a komprondé ku esaki a sosodé pa motibu ku nan a mantené nan integridat na Yehova i a sigui den e pasonan di Hesus.—Echonan 16:25; 2 Korintionan 12:10; 1 Pedro 4:13.

15. Si nos wanta sufrimentu aworakí, kon esei lo benefisiá nos den futuro?

¹⁵ Si nos wanta oposishon i persekushon ku e aktitut korekto, esei por duna nos mas perseveransia. Esaki lo yuda nos wanta futuro sufrimentu. Beibel ta bisa nos: “Konsiderá esaki komo puru goso, mi rumannan, ora boso haña boso mes den diferente pruebanan, sabiendo ku e prueba di boso fe ta produsí perseveransia.” (Santiago 1:2, 3) Meskos tambe Romanonan 5:3-5 ta bisa nos: “Nos ta regosihá tambe den nos tribulashonnan, sabiendo ku tribulashon ta produsí perseveransia; i perseveransia, karakter; i karakter, speransa; i speransa no ta desapuntá.” Pues mas nos wanta prueba aworakí pa motibu di e bida kristian ku nos ta hiba, mihó prepará nos lo ta pa wanta e pruebanan ku nos lo haña mas despues den e mal sistema di kosnan aki.

Yehova Lo Rekompensá Nos

16. Kon Yehova lo kompensá e futuro rei- i saserdotenan pa nan sufrimentu?

¹⁶ Asta ora nos pèrdè nos kosnan material pa motibu di e oposishon òf persekushon ku nos ta sufri debí ku nos ta sigui e kaminda kristian, nos por ta kontentu ya ku nos sa ku Yehova lo rekompensá nos kompletamente. Por ehèmpel, apòstel Pablo a skirbi algun di e personanan ku tabatin speransa di bai shelu: “Boso . . . a aseptá ku goso e konfiskashon di boso propiedat,  sabiendo ku boso tin pa boso mes un mihó poseshon i un ku ta permanesé” komo gobernante den e Reino di Dios. (Hebreonan 10:34) Imaginá bo e goso ku nan lo haña ora ku, bou di direkshon di Yehova i Kristu nan yuda repartí e bendishonnan maravioso n’e habitantenan riba tera den e mundu nobo. Loke apòstel Pablo a skirbi kristiannan fiel ta masha sierto: “Mi ta konsiderá ku e sufrimentunan di e tempu presente aki no ta digno di wòrdu kompará ku e gloria ku lo wòrdu revelá na nos.”—Romanonan 8:18.

17. Kiko Yehova lo hasi pa hende ku tin e speransa terenal ku ta sirbié lealmente aworakí?

¹⁷ Di mes manera, sin importá kiko hende ku tin speransa di biba riba tera por pèrdè òf sakrifiká boluntariamente aworakí pa motibu ku nan ta sirbi Yehova, lo e rekompensá nan na abundansia ku loke lo e hasi den futuro. Lo e duna nan bida perfekto i sin fin den un paradeis riba tera. Den e mundu nobo ei, Yehova “lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló; e promé kosnan a pasa.” (Revelashon 21:4) Ki un promesa maravioso! Nada ku nos sakrifiká sea boluntariamente òf inboluntariamente den e mundu aktual pa kousa di Yehova por igualá e bida maravioso ku pronto lo e duna su sirbidónan fiel ku ta wanta sufrimentu.

18. Ki promesa alentador Yehova ta duna nos den su Palabra?

¹⁸ Kualke sufrimentu ku nos lo tin ku wanta ainda sigur lo no afektá nos goso di bida eterno den Dios su mundu nobo. E kondishonnan magnífiko ku lo eksistí den e mundu nobo lo kompensá tur esei kompletamente. Isaias 65:17 i 18 ta bisa nos: “E kosnan di ántes lo no wòrdu rekordá mas ni bin na memoria. Ma sea kontentu i regosihá pa semper den loke mi ta krea.” Konsekuentemente, e siguiente komentario di Santiago, mitar ruman di Hesus, tabata masha apropiá: “Nos ta konsiderá komo bendishoná esnan ku a perseverá.” (Santiago 5:11) En bèrdat, si nos perseverá fielmente apesar di e sufrimentu aktual, esei por benefisiá nos awor i den futuro.

Kon Lo Bo Kontestá?

• Kon bin hende a kuminsá sufri?

• Ki benefisio sufrimentu por trese pa e futuro gobernantenan i habitantenan di tera?

• Pakiko nos por ta felis awor apesar di sufrimentu?

[Preguntanan di Estudio]

[Plachi na página 13]

Nos promé mayornan tabatin un futuro maravioso nan dilanti

[Plachi na página 14]

E sufrimentu ku Hesus a mira i pasa aden a yuda prepar’é p’e ta un bon Rei i Sumo Saserdote

[Plachi na página 16]

E apòstelnan a ‘regosihá pasobra nan a wòrdu konsiderá digno pa sufri bèrgwensa’ pa motibu di nan fe