Siña Boso Yunan Stima Yehova

“Manera flecha den man di un guerero, asina ta e yunan hañá den un hende su hubentut.”—SALMO 127:4.

1, 2. Den ki sentido yunan ta manera “flecha den man di un guerero”?

UN TIRADÓ di flecha ta prepará pa tira riba su blanko. Kuidadosamente e ta pone e flecha na e kuèrdè di e bog, i e ta usa tur su forsa pa span e bog. Apesar di e tenshon ku e bog di span ta kousa riba su brasanan, e ta tuma su tempu. Kaba e ta lag’é bai! E flecha lo alkansá e blanko? Tin vários faktor ku ta determiná esei, entre otro, kon kompetente e tiradó di flecha ta, e efekto di bientu i e kondishon di e flecha mes.

² Rei Salomon a kompará yu ku “flecha den man di un guerero.” (Salmo 127:4) Wak kon nos lo por apliká e komparashon aki. Un tiradó di flecha tin e flecha den su bog pa un tempu relativamente kòrtiku. P’e por alkansá e blanko, e tin ku laga e flecha lòs rápidamente. Asina tambe mayornan tin un periodo di tempu relativamente kòrtiku pa kultivá un amor sinsero pa Yehova den nan yunan. Despues di loke ta parse apénas un par di aña, nan yunan ta krese i bai biba riba nan mes. (Mateo 19:5) E yunan lo alkansá e blanko? Nan lo sigui stima Dios i sirbié despues ku nan bai riba nan mes? E kontesta ta dependé di hopi faktor. Tres di e faktornan ei ta kon kompetente e mayor ta, e ambiente den kua nan ta lanta e yunan i e manera ku e “flecha”—e yu—ta reakshoná riba e edukashon ku e ta haña. Laga nos analisá kada un di e faktornan aki mas a fondo. Di promé nos lo konsiderá algun di e karakterístikanan di un mayor kompetente.

Mayornan Kompetente Ta Pone un Bon Ehèmpel

3. Dikon e palabranan di un mayor mester ta apoyá ku echo?

³ Hesus tabata un ehèmpel pa mayornan pasobra el a praktiká loke el a prediká. (Juan 13:15) Di otro banda, el a kondená e fariseonan pasobra nan a “papia” pero ‘no a hasi.’ (Mateo 23:3) Pa mayornan por motivá nan yunan pa stima Yehova, loke nan ta bisa mester kuadra ku loke nan ta hasi. Palabranan sin echo ta mesun inútil ku un bog sin kuèrdè.—1 Juan 3:18.

4. Ki pregunta ta bon pa mayornan hasi nan mes, i pakiko?

 ⁴ Dikon e ehèmpel di mayornan ta asina importante? Meskos ku hende grandi por siña stima Dios dor di wak e ehèmpel di Hesus, asina mucha por siña stima Yehova dor di sigui e bon ehèmpel di nan mayornan. E hendenan ku un mucha ta anda kuné por sea fortales’é òf ‘daña su bon kustumbernan.’ (1 Korintionan 15:33) Pa un gran parti di un mucha su bida, i sigur durante e añanan importante di su formashon, e hendenan mas serka di dje i ku mas influensia ta su mayornan. P’esei ta bon pa mayornan puntra nan mes: ‘Ki klase di asosiashon mi ta pa mi yu? Mi ehèmpel ta animá mi yu pa kultivá bon kustumber? Ki ehèmpel mi ta poniendo den asuntunan sumamente importante manera hasi orashon i studia Beibel?’

Mayornan Kompetente Ta Hasi Orashon ku Nan Yunan

5. Kiko muchanan por siña for di e orashonnan di un mayor?

⁵ Boso yunan por siña hopi tokante Yehova dor di skucha boso orashonnan. Si nan ta tende boso gradisí Dios na ora di kome i hasi orashon na ora di studia Beibel, ki lès nan lo por siña? Probablemente nan lo siña ku ta Yehova ta perkurá pa nos nesesidatnan físiko—p’esei nos mester yam’é danki—i ku ta é ta siña nos bèrdatnan for di Beibel. Esakinan ta lèsnan balioso.—Santiago 1:17.

6. Kon mayornan por yuda nan yunan sinti ku Yehova ta interesá den nan individualmente?

⁶ Sin embargo, si boso ta hasi orashon ku boso famia na otro momentonan ku no ta ora di kome òf di estudio di Beibel di famia, i si den e orashonnan ei boso ta menshoná asuntunan spesífiko ku tin keber ku boso òf boso yunan, boso lo logra asta mas tantu ainda. Boso lo yuda boso yunan sinti ku Yehova ta parti di boso famia, ku e ta profundamente interesá den kada un di boso. (Efesionan 6:18; 1 Pedro 5:6, 7) Un tata a bisa: “For di ora ku nos yu muhé a nase, nos a kuminsá hasi orashon kuné. Segun ku el a krese, nos tabata hasi orashon tokante bon asosiashon i otro asuntunan ku tabatin efekto riba dje. Te dia ku el kasa bai for di kas, no a pasa ni un dia sin ku nos a hasi orashon huntu kuné.” Boso tambe lo por hasi orashon ku boso yunan tur dia? Boso lo por yuda nan mira Yehova komo un Amigu? Un Amigu ku no solamente ta perkurá pa nan nesesidatnan físiko i spiritual, sino tambe ku ta interesá den nan nesesidatnan emoshonal?—Filipensenan 4:6, 7.

7. Pa mayornan su orashonnan por ta spesífiko, kiko nan mester sa?

⁷ Klaru ku pa boso orashonnan por ta spesífiko, boso mester sa kiko ta pasando den bida di boso yu. Tuma nota di loke un tata ku a lanta dos yu a bisa: “Na fin di kada siman, mi tabata hasi mi mes dos pregunta: ‘Kiko tabata e kosnan ku a okupá mente di mi yunan e siman aki? I kiko ta e kosnan bon ku a sosodé den nan mundu?’” Mayornan, boso por hasi boso mes e preguntanan ei anto inkorporá algun di e kontestanan den e orashonnan ku boso ta hasi ku boso yunan? Si boso hasi esei, boso ta siña nan resa na Yehova komo Esun ku ta skucha orashon i tambe siña stim’é.—Salmo 65:2.

Mayornan Kompetente Ta Stimulá Bon Kustumber di Studia den Nan Yunan

8. Dikon mayornan tin ku yuda nan yunan kultivá e kustumber di studia e Palabra di Dios?

⁸ Kon un mayor su aktitut pa ku studiamentu di Beibel por influensiá un yu su relashon ku Dios? Pa kualke relashon por krese i dura, e personanan enbolbí no solamente mester papia ku otro sino tambe skucha otro. Un manera ku nos ta skucha Yehova ta dor di studia Beibel ku yudansa di  e publikashonnan ku “e esklabo fiel” ta perkurá. (Mateo 24:45-47; Proverbionan 4:1, 2) Pues, pa yuda nan yunan desaroyá un relashon duradero i amoroso ku Yehova, lo ta bon pa mayornan stimulá nan pa kultivá e kustumber di studia e Palabra di Dios.

9. Kon bo por yuda bo yunan kultivá bon kustumber di studia?

⁹ Kon mayornan por yuda yunan kultivá bon kustumber di studia? Un biaha mas, e ehèmpel di mayor ta e mihó manera pa siña nan. Bo yunan ta mira bo disfrutá regularmente di lesamentu di Beibel òf estudio personal? Ta bèrdat ku probablemente bo ta hopi okupá ta atendé bo yunan, i kisas bo ta puntra bo mes ta ki ora bo ta haña tempu pa lesa i studia. Pero puntra bo mes: ‘Mi yunan ta mira mi ta wak televishon tur ora bai?’ Si ta asina, lo bo no por usa un poko di e tempu ei pa pone un bon ehèmpel pa nan den e asuntu di estudio personal?

10, 11. Dikon mayornan mester konsiderá temanan bíbliko regularmente komo famia?

¹⁰ Un otro manera práktiko ku mayornan por siña nan yunan skucha Yehova ta dor di konsiderá temanan bíbliko regularmente komo famia. (Isaias 30:21) Pero kisas tin hende ta puntra nan mes: ‘Pakiko yunan tin mester di un estudio di famia si nan mayornan regularmente ta bai e reunionnan di kongregashon ku nan?’ Tin vários bon motibu. Yehova a enkargá na promé lugá mayornan ku e responsabilidat pa siña nan yunan. (Proverbionan 1:8; Efesionan 6:4) Estudio di Beibel den famia ta siña e muchanan ku adorashon di Yehova no ta un rito ku nan ta kumpli kuné pa formalidat solamente den públiko, sino ku e ta un parti integral tambe di e bida di famia na kas.—Deuteronomio 6:6-9.

¹¹ Ademas, un estudio di famia bon kondusí por yuda mayornan haña sa kiko nan yunan ta pensa di asuntunan spiritual i moral. Por ehèmpel, ora yunan ta chikitu, mayornan por usa publikashonnan manera Siña for di e Gran Maestro. * Den kasi tur paragraf di e publikashon aki pa studia Beibel, e ta pidi e muchanan ekspresá nan opinion riba e tópikonan ku e ta trata. Mayornan lo por yuda nan yunan kultivá nan kapasidat pa “diserní loke ta bon i loke ta malu” dor di rasoná ku nan riba e tekstonan bíbliko menshoná den e buki.—Hebreonan 5:14.

12. Kon mayornan lo por adaptá e estudio di famia na e nesesidatnan di yu, i kiko boso a haña ta duna resultado den e asuntu aki?

¹² Segun ku bo yunan ta krese, adaptá e estudio na nan nesesidatnan. Tuma nota di e manera ku un pareha a yuda nan yunan tiner rasoná riba nan petishon pa bai un  fiesta di skol. E tata a konta: “Nos a bisa nos yunan ku durante e siguiente estudio di famia, ami ku mi kasá lo a hunga e papel di yu, i ku nos yu muhénan mester a hasi komo si fuera ta nan ta e mayornan. Un di nan por a hunga pa Tata i e otro pa Mama, pero nan mester a traha huntu pa buska informashon riba e tópiko i duna nos guia tokante fiesta di skol.” Ku ki resultado? E tata a sigui konta: “Nos a keda babuká pa e manera responsabel ku nos yu muhénan (hungando nan ròl di mayor) a splika nos (komo yu) nan motibunan basá riba Beibel pakiko lo no tabata sabí pa bai e fiesta. Loke tambe a impreshoná nos ta e sugerensianan ku nan a bin kuné komo alternativanan aseptabel pa e aktividat aki. Esaki a duna nos un bon idea di loke nan tabata pensa i deseá.” Pa mayornan mantené un estudio di famia regular i relevante, en bèrdat nan mester tin perseveransia i imaginashon, pero e rekompensanan ta hasi esei bale la pena.—Proverbionan 23:15.

Krea un Ambiente di Pas

13, 14. (a) Kon mayornan por krea un ambiente di pas na kas? (b) Kiko lo por ta e bon resultado ora un mayor atmití ku el a kometé un eror?

¹³ Un flecha tin mas chèns di alkansá su blanko si e tiradó di flecha mek e bog i lag’é lòs ora no tin bientu fuerte. Asina tambe, tin mas chèns ku yunan lo siña stima Yehova si mayornan krea un ambiente di pas den e hogar. Santiago a skirbi: “E simia, kual su fruta ta hustisia, ta wòrdu sembrá den pas dor di esnan ku ta hasi pas.” (Santiago 3:18) Kon mayornan por krea un ambiente di pas na kas? Un pareha kasá mester mantené un laso matrimonial fuerte. Un esposo i esposa ku ta stima i respetá otro tin mas chèns di siña nan yunan stima i respetá otro personanan, inkluso Yehova. (Galationan 6:7; Efesionan 5:33) Amor i rèspèt ta promové pas. Anto un pareha ku ta na pas ku otro ta den mihó posishon pa trata ku konfliktonan ku lo por surgi den e famia.

¹⁴ Klaru ku, meskos ku aktualmente no tin matrimonionan perfekto, no tin famianan perfekto riba tera. Tin biaha mayornan no ta desplegá e fruta di spiritu ora nan ta trata ku nan yunan. (Galationan 5:22, 23) Ora ku esei sosodé, kiko mayornan lo mester hasi? Si nan atmití ku nan a kometé un eror, akaso esei lo mengua un yu su rèspèt pa nan? Konsiderá e ehèmpel di apòstel Pablo. E tabata manera un tata spiritual pa hopi kristian. (1 Korintionan 4:15) Sin embargo, el a atmití abiertamente ku el a kometé eror. (Romanonan 7:21-25) No opstante, su humildat i frankesa a duna nos mas—i no ménos—rèspèt p’e. Apesar di Pablo su fayonan,  e por a skirbi ku konfiansa na e kongregashon na Korinto: “Sea imitadónan di mi, meskos ku ami tambe ta di Kristu.” (1 Korintionan 11:1) Si bo tambe atmití bo erornan, bo yunan probablemente lo pasa nan por haltu.

15, 16. Pakiko mayornan mester eduká nan yunan pa stima nan rumannan kristian, i kon nan por hasi esaki?

¹⁵ Kiko mas mayornan por hasi pa krea un ambiente kaminda nan yunan por krese ku amor pa Yehova? Apòstel Juan a skirbi: “Si un hende bisa: ‘Mi ta stima Dios,’ i ta odia su ruman, e ta un gañadó; pasobra esun ku no ta stima su ruman ku el a mira, no por stima Dios, kende e no a mira.” (1 Juan 4:20, 21) Pues, ora bo ta eduká bo yunan pa stima nan rumannan kristian, bo ta siñando nan pa stima Dios. Ta bon pa mayornan puntra nan mes: ‘Mi kòmbersashonnan tokante e kongregashon ta edifikante òf mi ta gusta kritiká?’ Kon boso por sa? Wèl, skucha bon kon boso yunan ta papia tokante e reunionnan i e miembronan di kongregashon. Chèns ta grandi ku boso lo tende boso pensamentunan for di nan boka.

¹⁶ Kiko mayornan por hasi pa yuda nan yunan stima nan rumannan spiritual? Peter, tata di dos yu hòmber tiner, a konta: “For di tempu ku nos muchanan tabata yòn, nos tabata invitá regularmente rumannan maduro pa bin kome serka nos i pasa tempu ku nos na kas, i nos tabata haña esei hopi dushi. Nos yunan a lanta den kompania di rumannan ku stima Yehova, i awor nan ta mira ku sirbi Dios ta un dushi manera pa biba.” Dennis, tata di sinku yu muhé, a bisa: “Nos a animá nos yunan pa sera amistat ku e pioneronan di mas edat den kongregashon, i ki ora ku tabata posibel nos a mustra hospitalidat na superintendentenan biahero i nan kasá.” Boso tambe lo por tuma inisiativa pa yuda boso yunan mira e kongregashon komo un ekstenshon di boso famia?—Marko 10:29, 30.

E Responsabilidat di Yu

17. Ku tempu, ki desishon yunan tin ku tuma?

¹⁷ Laga nos ban bèk na e komparashon di e tiradó di flecha. Ounke kisas e ta kompetente, lo e no tin muchu chèns di dal e blanko si e flecha ku e ta tira ta un poko doblá. Klaru ku mayornan lo hasi nan bèst pa stret e flecha doblá, na moda di papia, dor di traha duru pa ahustá e manera di pensa robes di un yu. Pero ku tempu, yunan tin ku disidí pa nan mes si nan lo laga e mundu aki moldia nan segun su boluntat òf si nan lo laga Yehova ‘dirigí nan bereanan,’ i hasi nan kaminda stret.—Proverbionan 3:5, 6; Romanonan 12:2.

18. Ki efekto e desishon di un yu por tin riba otro personanan?

¹⁸ Ounke mayornan tin un responsabilidat pisá pa lanta nan yunan ‘den e disiplina i instrukshon di Yehova,’ ta keda na e yu mes pa disidí al final ki tipo di persona lo e ta ora e bira grandi. (Efesionan 6:4) P’esei, muchanan, puntra boso mes: ‘Lo mi aseptá e edukashon amoroso ku mi mayornan ta duna mi?’ Si e kontesta ta sí, boso lo ta skohiendo e mihó manera di biba. Boso lo hasi boso mayornan masha felis, anto mas importante, boso lo hasi Yehova su kurason kontentu.—Proverbionan 27:11.

[Nota]

Bo Ta Kòrda?

• Kon mayornan por pone un bon ehèmpel den hasi orashon i studia Beibel?

• Kon mayornan por krea un ambiente di pas na kas?

• Ki desishon yunan ta konfrontá, i ki efekto e desishon ku nan tuma lo tin riba otro personanan?

[Preguntanan di Estudio]

[Plachi na página 28]

Bo ta un bon ehèmpel pa bo yu pa loke ta estudio personal?

[Plachi na página 29]

Un ambiente di pas den famia ta kontribuí na felisidat