Yehova Ta Stima Hustisia

“Ami, SEÑOR, ta stima hustisia.”—ISAIAS 61:8.

1, 2. (a) Kiko e palabranan “hustisia” i “inhustisia” ta nifiká? (b) Kiko Beibel ta bisa tokante Yehova i su kualidat di hustisia?

HUSTISIA ta un kualidat ku ta enserá ser imparsial, no hasi distinshon di persona i aktua a base di loke ta moralmente rekto i bon. En kambio, inhustisia ta enserá trata otro ku parsialidat, prehuisio òf malisia.

² Kasi 3.500 aña pasá, Moisés a skirbi relashoná ku e Soberano di Universo, Yehova: “Tur su kamindanan ta hustu; un Dios di fieldat i sin inhustisia.” (Deuteronomio 32:4) Mas ku 7 siglo despues, Dios a inspirá Isaias pa skirbi e palabranan aki: “Ami, SEÑOR, ta stima hustisia.” (Isaias 61:8) Anto den promé siglo, apòstel Pablo a sklama: “Akaso tin inhustisia serka Dios? Di ningun manera!” (Romanonan 9:14) I den e mesun siglo, apòstel Pedro a bisa: “Dios no ta hasi distinshon di persona, ma den tur nashon e hende ku ta tem’é i ku ta hasi hustisia ta aseptabel p’e.” (Echonan 10:34, 35) Sí, Yehova ta “stima hustisia.”—Salmo 37:28; Malakias 3:6.

Inhustisia Ta Predominá

3. Kon inhustisia a kuminsá riba tera?

³ Awe, loke ta predominá ta inhustisia. Nos por bira víktima di aktonan di inhustisia na tur nivel sosial—na trabou, na skol, den nos trato ku funshonarionan, i den otro maneranan—asta den seno di famia. Klaru ku e inhustisianan ei no ta nada nobo. Nan a bira parti di e famia humano ora nos promé mayornan a rebeldiá kontra Dios i a desviá for di su lei, instigá pa e kriatura spiritual rebelde ku a bira Satanas e Diabel. Sin duda, tabata un akto di inhustisia di parti di Adam, Eva i Satanas ora nan a malusá e don maravioso di boluntat liber ku Yehova a duna nan. Nan mal akshonnan lo a resultá den enorme sufrimentu i morto pa henter e famia humano.—Génesis 3:1-6; Romanonan 5:12; Hebreonan 2:14.

4. Pa kuantu tempu kaba inhustisia ta reina den historia humano?

⁴ Desde e rebelion den Edén, inhustisia tin mas o ménos 6.000 aña kaba ta reina den sosiedat humano. Esaki sigur no ta un sorpresa pasobra e dios di e mundu aki ta Satanas. (2 Korintionan 4:4) E ta un mentiroso i e tata di mentira, un kalumniadó i opositor di Yehova. (Juan 8:44) Semper el a kometé inhustisia flagrante. Por ehèmpel, debí parsialmente na e influensia malbado di Satanas promé ku e Diluvio di dia di Noe, Dios a tuma nota ku e “maldat di hende tabata grandi riba tera, i ku tur intenshon di e pensamentunan di su kurason tabata kontinuamente maldat so.” (Génesis 6:5) E situashon ei a sigui eksistí te den e tempu di Hesus. El a bisa: “Kada dia tin sufisiente problema di su mes,” i un di e problemanan ku ta afligí hende ta inhustisia. (Mateo 6:34) Korektamente Beibel ta bisa: “Henter e kreashon ta keha i ta sufri e dolónan di parto huntu, te awor.”—Romanonan 8:22.

5. Dikon tin mas inhustisia den nos tempu ku nunka promé?

⁵ Pues, den henter historia humano a sosodé kosnan malu ku a resultá den gran inhustisia. Awor e situashon ta mas pió ku nunka. Dikon? Pasobra e mal sistema di kosnan aki ta den su “último dianan” pa hopi dékada kaba, i segun ku e ta yegando su fin e ta pasa den “tempunan trabahoso.” Beibel a profetisá ku durante e periodo aki den historia, hende lo a bira “stimadó di nan mes, stimadó di plaka,  gabadó, arogante, blasfemadó, . . . ingrato, impio, sin amor, irekonsiliabel, ku mala lenga, sin dominio propio, grosero, odiadó di loke ta bon, traidó, imprudente, sobèrbè.” (2 Timoteo 3:1-5) E mal karakterístikanan ei ta hiba na tur tipo di inhustisia.

6, 7. Ki gran inhustisia a afligí e famia humano den tempu moderno?

⁶ Den e último shen añanan inhustisia a alkansá un nivel sin presedente. Un motibu ta ku den e añanan aki tabatin mas guera ku tur otro époka den pasado. Por ehèmpel, algun historiadó ta kalkulá ku den Segundo Guera Mundial so kaba tabatin un total di 50 pa 60 mion morto, di kua e mayoria tabata sivil—hòmber, muhé i mucha inosente. For di dia ku e guera ei a kaba, miónes di hende mas a pèrdè nan bida den vários konflikto, di kua e mayoria atrobe tabata sivil. Satanas ta promové e inhustisianan ei pasobra e ta furioso, sabiendo ku pronto Yehova lo derot’é totalmente. Profesia di Beibel ta splika esei di e forma aki: “Diabel a baha bin serka boso ku gran furia, sabiendo ku ta ked’é solamente un poko tempu mas.”—Revelashon 12:12.

⁷ Aktualmente, e gastunan militar di tur nashon huntu ta rònt di un bion dòler kada aña. Pero miónes i miónes di hende no tin ni e kosnan básiko di bida, manera kuminda, bibienda, skol, hospital, etcetera. Lo no ta mas mihó pa gasta e plaka ei pa yuda nan? Mas o ménos mil mion hende no tin sufisiente pa kome, miéntras ku otronan tin na abundansia. Segun un fuente di Nashonnan Uní, rònt di sinku mion mucha ta muri pa aña di e efektonan di hamber. Esta un gran inhustisia! Anto pensa tambe riba e hopi kriaturanan inosente ku ta pèrdè nan bida pa motibu di aborto. Segun kálkulonan, rònt mundu esei ta entre 40 pa 60 mion tur aña! No tin palabra pa deskribí e inhustisia ei.

8. Ken so por perkurá berdadero hustisia pa humanidat i kon?

⁸ Gobernantenan humano no ta hañando solushon pa e problemanan enorme ku ta tormentando humanidat awe; i esfuersonan humano lo no mehorá e situashon tampoko. E Palabra di Dios a bisa ku den nos tempu “hendenan malbado i gañadónan lo bai di malu pa peor.” (2 Timoteo 3:13) Inhustisia a penetrá asina tantu den hende su bida diario ku nan mes no por elimin’é mas. Ta e Dios di hustisia so por elimin’é. Ta e so por kaba ku Satanas, e demoñonan i hende malbado.—Jeremias 10:23, 24.

E Preokupashon Ta Komprendibel

9, 10. Pakiko Asaf a sintié desanimá?

⁹ Den pasado, asta algun eskritor di Beibel a puntra nan mes pakiko Dios no a intervení kaba den asuntunan humano i introdusí berdadero hustisia i rektitut. Tuma por ehèmpel un sierto hòmber den tempu bíbliko. E enkabesamentu di Salmo 73 ta menshoná e nòmber Asaf, i esei por ta referí na sea un músiko levita prominente durante e reinado di Rei David òf na e músikonan di e kas di kua Asaf tabata e kabes paterno. Asaf i su desendientenan a skirbi hopi komposishon musikal ku nan tabata usa den adorashon públiko. Pero, na dado momento den su bida, e eskritor di e salmo aki a sintié desanimá spiritualmente. E tabata mira kon e malbadonan tabata prosperá materialmente, i ku hopi biaha a parse ku nan tabata hiba un bida di plaser, sin eksperimentá ningun konsekuensia desfaborabel.

¹⁰ Nos ta lesa: “Mi tabata envidioso di e arogantenan, ora mi a mira e prosperidat di e malbadonan. Pasobra nan no konosé doló na ora di morto, i nan kurpa ta salú i fuerte. Nan no ta pasa trabou manera otro hende; ni nan no ta wòrdu afligí manera otro hende.” (Salmo 73:2-8) Pero ku tempu e eskritor di Beibel ei a bin realisá ku e punto di bista negativo ei tabata robes. (Salmo 73:15, 16) E salmista a purba ahustá su manera di pensa, pero e no por a kaba di komprondé pakiko e  malbadonan tabata hasi malu aparentemente sin haña kastigu, miéntras ku hende rekto sí hopi bes tabata sufri.

11. Kiko e salmista Asaf a bin komprondé?

¹¹ Ku tempu, e hòmber fiel ei di antigwedat a bin komprondé kiko tabata warda e malbadonan, esta, ku finalmente Yehova lo a regla kuenta ku nan. (Salmo 73:17-19) David a skirbi: “Spera riba SEÑOR i sigui su kaminda, i e lo halsa bo pa heredá e tera; ora ku e malbadonan wòrdu kòrta kitá afó, abo lo mira esaki.”—Salmo 37:9, 11, 34.

12. (a) Kiko ta Yehova su propósito relashoná ku maldat i inhustisia? (b) Kiko bo ta pensa tokante e solushon ei pa e problema di inhustisia?

¹² Un kos ta sigur, e propósito di Yehova ta pa eliminá maldat i e inhustisia ku esaki ta trese kuné for di e tera aki, i lo e hasi esei na su debido tempu. Esei ta algu ku asta kristiannan leal mester keda tene na mente. Yehova ta bai eliminá esnan ku ta bai kontra su boluntat, i lo e rekompensá esnan ku ta biba na armonia ku esaki. “Su wowonan ta weta, su klèpnan di wowo ta pone e yunan di hende na prueba. SEÑOR ta pone e hustu i e malbado na prueba, ma esun ku ta gusta violensia su alma ta odia. Riba e malbadonan e lo laga yobe karbon sendí; kandela i suafel i un bientu ku ta kima . . . Pasobra SEÑOR ta hustu; e ta stima hustisia.”—Salmo 11:4-7.

Un Mundu Nobo di Hustisia

13, 14. Kiko lo pone hustisia i rektitut prevalesé den e mundu nobo?

¹³ Ora Yehova destruí e sistema di kosnan inhustu aki ku ta bou di dominio di Satanas, lo e introdusí un glorioso mundu nobo. Esei lo ta bou di dominio di e Reino selestial di Dios, pa kua Hesus a siña su siguidónan pidi den orashon. Rektitut i hustisia lo remplasá maldat i inhustisia, pasobra na e tempu ei e orashon ‘pa laga bo reino bin, laga bo boluntat sosodé na tera meskos ku den shelu,’ lo ser  kontestá den e sentido kompletu di palabra.—Mateo 6:10.

¹⁴ Beibel ta bisa nos ki klase di gobernashon nos por spera, un gobernashon ku tur hende di kurason hustu ta anhelá aworakí. E ora ei Salmo 145:16 lo kumpli den su forma mas kompletu: “[Abo, Yehova,] ta habri bo man, i ta satisfasé e deseo di tur ser bibu.” Ademas, Isaias 32:1 ta bisa: “Mira, un rei [Kristu Hesus den shelu] lo reina ku hustisia, i prensnan [Kristu su representantenan riba tera] lo goberná ku huisio.” Relashoná ku e Rei Hesukristu, Isaias 9:7 ta profetisá: “Lo no tin fin na e oumento di su gobernashon i di pas, riba e trono di David i riba su reino, pa establesé esaki i manten’é ku huisio i hustisia for di e tempu ei i pa semper. E selo di e SEÑOR di ehérsitonan lo hasi esaki.” Bo por mira bo mes ta biba bou di e gobernashon hustu ei?

15. Kiko Yehova lo hasi pa humanidat den e mundu nobo?

¹⁵ Den e mundu nobo di Dios, nos lo no tin motibu mas pa ekspresá e palabranan ku nos ta haña na Eklesiastés 4:1: “Mi a bolbe wak tur e aktonan di opreshon ku a wòrdu hasí bou di solo. I ata, mi a wak e lágrimanan di esnan oprimí, i ku nan no tabatin ni un hende pa konsolá nan; i pa banda di nan opresornan tabatin poder, ma nan no tabatin ni un hende pa konsolá nan.” Ta difísil bèrdat pa imaginá ku nos mente imperfekto kon maravioso e mundu nobo di hustisia ei lo ta. Maldat lo no eksistí mas; mas bien, tur dia lo ta yen di kos bon. Sí, Yehova lo korigí tur loke ta malu, i lo e hasi esei na un manera ku ta surpasá asta nos mihó ekspektativanan. P’esei, ta masha apropiá ku Yehova Dios a inspirá apòstel Pedro pa skirbi: “Segun su promesa nos ta sperando shelunan nobo i un tera nobo, den kual ta biba hustisia.”—2 Pedro 3:13.

16. Kiko ta e “shelunan nobo” ku a ser establesé, i den ki sentido e “tera nobo”ta ser prepará awe?

¹⁶ En bèrdat, e “shelunan nobo,” e reino selestial di Dios den man di Hesukristu, ta establesé kaba. Esnan ku lo forma e núkleo di e “tera nobo,” un sosiedat nobo aki riba tera ku ta konsistí di hende hustu, ta ser reuní durante e último dianan aki. Ya kaba nan ta kasi shete mion, den por lo ménos 235 pais i den rònt di 100.000 kongregashon. E miónes di personanan aki ta siñando di e kamindanan hustu i rekto di Yehova, i komo resultado di esei, rònt mundu nan ta disfrutá di un union ku ta fundá riba amor kristian. Nan union ta esun di mas bisto i mas duradero den historia di mundu, i e ta superior na tur loke súpditonan di Satanas ta eksperimentá. Tal amor i union ta duna un bista adelantá di e tempu maravioso ku lo bini den Dios su mundu nobo, ku lo ser goberná den hustisia i rektitut.—Isaias 2:2-4; Juan 13:34, 35; Kolosensenan 3:14.

E Atake di Satanas Lo Frakasá

17. Dikon e atake final di Satanas riba e pueblo di Yehova lo frakasá sigur?

¹⁷ Pronto Satanas i su siguidónan lo lanta kontra Yehova su adoradónan den un intento pa destruí nan. (Ezekiel 38:14-23) Esei lo ta parti di loke Hesus a yama e “gran tribulashon, manera nunka tabatin for di prinsipio di mundu te awor aki, i ku lo no tin nunka mas tampoko.” (Mateo 24:21) E atake di Satanas lo tin éksito? Nò. E Palabra di Dios ta sigurá nos: “SEÑOR ta stima hustisia i no ta bandoná su santunan. Nan ta keda preservá pa semper; ma e desendientenan di e malbado lo wòrdu kòrtá kitá afó. E hustunan lo heredá e tera, i lo biba den dje pa semper.”—Salmo 37:28, 29.

18. (a) Kon Dios lo reakshoná ora Satanas ataká su pueblo? (b) Pakiko tabata bon pa bo a repasá e informashon aki basá riba Beibel tokante e triunfo di hustisia?

 ¹⁸ E atake di parti di Satanas i su kompinchinan riba Yehova su sirbidónan lo ta su último intento. Yehova a profetisá pa medio di Zakarias: “Esun ku mishi ku boso ta mishi ku mi pòpch’i wowo.” (Zakarias 2:8, NW) Ta komo si fuera un persona ta hinka dede den Yehova su pòpch’i wowo. Lo e reakshoná inmediatamente i eliminá nan. Yehova su sirbidónan ta e hendenan di mas amoroso, uní, pasífiko i kumplidó di lei riba tera. Pues e atake ei kontra nan lo ta inhustu; lo e no tin ningun hustifikashon. E gran ‘stimadó di hustisia’ lo no toler’é. Su intervenshon na fabor di su pueblo lo resultá den e destrukshon eterno di nan enemigunan, den e triunfo di hustisia i den e salbashon di esnan ku ta adorá e úniko Dios berdadero. Susesonan asombroso i emoshonante ta warda nos djis tras di porta!—Proverbionan 2:21, 22.

Kon Lo Bo Kontestá?

• Pakiko tin asina tantu inhustisia?

• Kon Yehova lo resolvé e problema di inhustisia riba tera?

• Ki punto den e estudio aki tokante e triunfo di hustisia a konmové bo?

[Preguntanan di Estudio]

[Plachi na página 10]

Den e mundu nobo di Dios, hustisia i rektitut lo remplasá maldat

[Plachi na página 11, 12]

Meskos ku den e tempu promé ku Diluvio, den “e ultimo dianan” aki tambe tin hopi maldat