“Boso Tata Ta Miserikòrdioso”

“Sea miserikòrdioso, meskos ku boso Tata ta miserikòrdioso.”—LUKAS 6:36.

1, 2. Kiko Hesus a bisa tantu e eskriba- i fariseonan komo su disipelnan ku ta indiká ku miserikòrdia ta un kualidat deseabel?

E KÓDIGO di Lei ku Dios a duna e israelitanan mediante Moisés a konsistí di mas o ménos 600 diferente lei i rekisito. Ounke tabata nesesario pa e pueblo a kumpli ku tur e rekisitonan di e Lei di Moisés, tabata masha importante tambe pa nan a mustra miserikòrdia. Pensa riba loke Hesus a bisa e fariseonan, kendenan no tabata personanan miserikòrdioso. Na dos okashon el a reprendé nan i a señalá na e deklarashon di Dios: “Mi ta deseá miserikòrdia i no sakrifisio.” (Mateo 9:10-13; 12:1-7; Oseas 6:6, NW) Na final di su ministerio, Hesus a bisa: “Ai di boso, eskribanan i fariseonan, hipókritanan! Pasobra boso ta duna un di dies parti di menta, eneldo i komino, i boso a neglishá loke ta mas importante di e Lei: hustisia, miserikòrdia i fieldat.”—Mateo 23:23.

² No tin duda, Hesus a duna hopi balor na e kualidat di miserikòrdia. El a bisa su siguidónan: “Sea miserikòrdioso, meskos ku boso Tata ta miserikòrdioso.” (Lukas 6:36) Sin embargo, pa nos por bira “imitadónan di Dios” den e aspekto aki, nos tin ku sa promé kiko ta berdadero miserikòrdia. (Efesionan 5:1) Ademas, ora nos komprondé kiko ta e benefisionan di miserikòrdia, esaki lo motivá nos pa desplegá e kualidat aki mas plenamente den nos bida.

Miserikòrdia pa ku Hende den Nesesidat

3. Dikon nos mester akudí na Yehova pa haña sa kiko ta berdadero miserikòrdia?

³ E salmista a kanta: “SEÑOR ta yen di grasia i kompashon, kende no ta rabia lihé, i ta grandi den miserikòrdia. SEÑOR ta bon pa tur, i su miserikòrdianan ta riba tur su obranan.” (Salmo 145:8, 9) Yehova ta “e Tata di miserikòrdianan i Dios di tur konsuelo.” (2 Korintionan 1:3) Un persona miserikòrdioso ta trata otro hende ku kompashon. Esaki ta un aspekto klave di Dios su personalidat. Su ehèmpel i instrukshonnan ku el a duna nos ta siña nos kiko ta berdadero miserikòrdia.

4. Kiko Isaias 49:15 ta siña nos tokante miserikòrdia?

⁴ Segun e palabranan registrá na Isaias 49:15, Yehova a bisa: “Un muhé por lubidá su yu ku e ta kria na pechu, i no tene kompashon ku e yu di su mondongo?” E palabra hebreo tradusí akinan komo “kompashon” tin relashon estrecho ku e palabranan ku a ser usá en konekshon ku miserikòrdia na Salmo 145:8 i 9 sitá den e paragraf anterior. Aki Beibel ta kompará e sintimentu ku ta motivá Yehova pa mustra miserikòrdia ku e sintimentu tierno ku un mama ku tin yu na pechu normalmente ta sinti  pa su yu. Ora un beibi tin hamber òf kisas un otro nesesidat, sintimentunan di kompashon òf konsiderashon ku ta lanta den e mama, ta motiv’é pa perkurá pa e nesesidat di su beibi. Ta e sintimentunan tierno ei Yehova ta sinti pa ku personanan ku e ta mustra miserikòrdia na dje.

5. Kon Yehova a demostrá ku e ta “riku den miserikòrdia,” den kaso di Israel?

⁵ Sinti kompashon ta un kos, pero aktua a base di e sintimentu aki i asina yuda hende den nesesidat, ta henteramente un otro kos. Wak kon Yehova a reakshoná ora su adoradónan tabata den sklabitut na Egipto un 3.500 aña pasá. El a bisa Moisés: “Siguramente mi a mira e aflikshon di mi pueblo ku ta na Egipto, i a tende nan sklamashon pa motibu di nan kapatasnan, pasobra mi ta konsiente di nan sufrimentunan. P’esei mi a baha bin pa libra nan for di man di e egipsionan i pa saka nan for di e tera ei hiba na un tera bon i grandi, na un tera ku tin lechi i miel na abundansia.” (Eksodo 3:7, 8) Rònt di 500 aña despues ku e israelitanan a ser librá for di Egipto, Yehova a rekordá nan: “Mi a saka Israel for di Egipto i mi a libra boso for di man di e egipsionan i for di poder di tur e reinonan ku tabata oprimí boso.” (1 Samuel 10:18) Debí ku e israelitanan tabata desviá for di Dios su normanan hustu, konstantemente nan tabata den aflikshon. Sin embargo, Yehova a sinti kompashon pa nan i bes tras bes e tabata reskatá nan. (Huesnan 2:11-16; 2 Krónikanan 36:15) Esaki ta ilustrá kon e Dios amoroso ta aktua na fabor di hende den nesesidat, den peliger i den problema. Yehova ta “riku den miserikòrdia.”—Efesionan 2:4.

6. Kon Hesukristu a imitá su Tata den mustra miserikòrdia?

⁶ Ora Hesukristu tabata riba tera, el a mustra miserikòrdia imitando su Tata perfektamente. Kon Hesus a reakshoná ora dos hòmber siegu a rog’é, bisando: “Señor, Yu di David, tene miserikòrdia di nos”? Nan tabata roga Hesus p’e restorá nan bista milagrosamente. Hesus a hasi esei tambe, pero e no a hasi e milager na un manera indiferente òf sin ningun sintimentu. Beibel ta bisa: “Hesus a tene kompashon ku nan i a mishi ku nan wowonan; i mesora nan a rekobrá nan bista.” (Mateo 20:30-34) Kompashon a motivá Hesus pa hasi hopi milager ku a trese alivio pa hende siegu, hende poseí pa demoño, hende leproso i pa mayornan di yunan afligí.—Mateo 9:27; 15:22; 17:15; Marko 5:18, 19; Lukas 17:12, 13.

7. Kiko e ehèmpelnan di Yehova Dios i su Yu ta siña nos tokante miserikòrdia?

⁷ E ehèmpelnan di Yehova Dios i Hesukristu ta mustra ku miserikòrdia ta konsistí di dos aspekto: sintimentunan di kompashon i konsiderashon pa ku e persona den nesesidat, i akshon ku ta trese alivio p’e. Un persona miserikòrdioso mester kumpli ku tur e dos aspektonan ei. Hopi bes Beibel ta papia di miserikòrdia ora un persona ta ekspresá konsiderashon bondadoso dor di tuma akshon pa yuda hende den nesesidat. Pero kon un persona ta mustra miserikòrdia ora ta trata di un kaso hudisial? E ta enserá ku e persona ta keda sin tuma akshon, manera por ehèmpel, keda sin duna kastigu?

Miserikòrdia pa ku Pekadónan

8, 9. Kiko e miserikòrdia ku Yehova a ekstendé na David despues ku el a peka ku Bètsabé a enserá?

⁸ Konsiderá loke a pasa despues ku profeta Natan a konfrontá Rei David di Israel di antigwedat ku e adulterio ku David a kometé ku Bètsabé. David, kende a repentí, a resa: “Tene miserikòrdia di mi, o Dios, segun bo miserikòrdia; segun e grandesa di bo kompashon, kita mi transgreshonnan. Laba mi kita tur mi inikidat, i purifiká mi di mi piká. Pasobra mi ta rekonosé mi transgreshonnan, i mi piká ta semper mi dilanti. Kontra abo, abo so, mi a peka i a hasi loke ta malu den bo bista.”—Salmo 51:1-4.

⁹ David a sinti duele profundo pa loke el a hasi. Yehova a pordoná su piká i a duna e ku Bètsabé ménos kastigu ku loke nan a meresé. Segun e Lei di Moisés, tantu David komo  Bètsabé mester a ser matá. (Deuteronomio 22:22) Ounke nan no a skapa di tur e konsekuensianan di nan piká, Dios a permití nan keda na bida. (2 Samuel 12:13) E echo ku Dios ta mustra miserikòrdia ta enserá ku e ta pordoná eror. Sin embargo, e no ta keda sin duna e kastigu apropiá.

10. Ounke Yehova ta miserikòrdioso ora e ta husga, dikon nos no mester abusá di su miserikòrdia?

¹⁰ Siendo ku “dor di ún hende [Adam] piká a drenta den mundu,” i “pago di piká ta morto,” tur hende meresé morto. (Romanonan 5:12; 6:23) Nos por ta masha gradisidu ku Yehova ta mustra miserikòrdia ora e ta husga nos! Sin embargo, nos tin ku tene kuidou pa nos no abusá di Dios su miserikòrdia. Deuteronomio 32:4 ta bisa: “Tur [Yehova] su kamindanan ta hustu.” Pues, ora Yehova ta mustra miserikòrdia, e no ta ignorá su normanan perfekto di hustisia.

11. Kon Yehova a tene e debido kuenta ku hustisia ora el a trata ku David pa su piká ku Bètsabé?

¹¹ Den kaso di David ku Bètsabé, promé ku Yehova por a kita e pena di morto, e mester a pordoná nan pa nan piká. Pero e huesnan israelita no tabatin outoridat pa hasi esaki. Si Yehova a permití nan trata e kaso, nan lo no por a hasi otro sino dikta sentensia di morto. Pasobra ta esei ta loke e Lei a eksigí. Sin embargo, debí na su pakto ku David, Yehova kier a determiná si tabatin base pa pordoná David su piká. (2 Samuel 7:12-16) P’esei, Yehova Dios, “e Hues di henter mundu,” esun ku “ta skudriñá kurason,” a skohe pa e mes husga den e kaso aki. (Génesis 18:25; 1 Krónikanan 29:17) Dios por a mira eksaktamente kiko tabatin den David su kurason, evaluá si el a repentí di bèrdat i asina pordon’é.

12. Kon hende pekadó por benefisiá di Dios su miserikòrdia?

¹² E miserikòrdia ku Yehova ta mustra na nos dor di hasi posibel pa nos ser librá for di e kastigu pa piká heredá ta na armonia ku su hustisia. Pa hasi pordon di piká posibel, sin ku Yehova ta violá su normanan di hustisia, el a perkurá e sakrifisio di reskate di su Yu, Hesukristu: e mayor ekspreshon di miserikòrdia ku un persona a yega di hasi. (Mateo 20:28; Romanonan 6:22, 23) Pa nos por benefisiá di Dios su miserikòrdia ku por libra nos di e kastigu pa piká heredá, nos tin ku ehersé fe òf “kere den e Yu.”—Juan 3:16, 36.

Un Dios di Miserikòrdia i Hustisia

13, 14. Dios su miserikòrdia ta suavisá su hustisia? Splika.

¹³ Yehova su miserikòrdia no ta violá su normanan di hustisia; pero e ta afektá su hustisia den un òf otro manera? Miserikòrdia ta kibra e forsa di hustisia divino dor di suavis’é? Nò.

¹⁴ Mediante profeta Oseas, Yehova a bisa e israelitanan: “Lo mi tuma bo komo mi esposa pa semper; sí, lo mi tuma bo komo mi esposa den rektitut i hustisia, den miserikòrdia i den kompashon.” (Oseas 2:19) E palabranan aki ta mustra bon kla ku e manera ku Yehova ta mustra miserikòrdia semper ta na armonia ku su otro atributonan, inkluso hustisia. Yehova ta un “Dios, yen di kompashon i grasia, . . . kende ta pordoná inikidat, transgreshon i piká; sin embargo, di ningun manera e lo no laga di kastigá e kulpabel.” (Eksodo 34:6, 7) Yehova ta un Dios di miserikòrdia i hustisia. Relashoná kuné, Beibel ta bisa: “E Baranka! Su obra ta perfekto, pasobra tur su kamindanan ta hustu.” (Deuteronomio 32:4) Dios su hustisia ta mesun perfekto ku su miserikòrdia. Niun no ta superior na e otro, ni esun no tin mester di e otro pa suavisá su efekto. Mas bien, e dos kualidatnan aki ta traha den armonia perfekto ku otro.

15, 16. (a) Kiko ta mustra ku e hustisia di Dios no ta kruel? (b) Kiko adoradónan di Yehova por ta sigur di dje ora Yehova ehekutá su huisio riba e mal sistema di kosnan aki?

¹⁵ Yehova su hustisia no ta kruel. Hustisia kasi semper tin implikashonnan legal, i huisio normalmente ta rekerí pa duna e kastigu meresí na hasidónan di maldat. Sin embargo, hustisia divino por enserá tambe salbashon pa  esnan ku meresé esei. Por ehèmpel, ora e malbadonan den e statnan di Sodoma i Gomora a ser destruí, patriarka Lòt i su dos yu muhénan a ser salbá.—Génesis 19:12-26.

¹⁶ Nos por tin konfiansa ku ora Yehova ehekutá su huisio riba e aktual sistema malbado di kosnan, e “multitut grandi” di adoradónan berdadero, ku “a laba nan pañanan i a hasi nan blanku den e sanger di e Lamchi,” lo ser salbá. Pues, nan lo “sali for di e gran tribulashon.”—Revelashon 7:9-14.

Dikon Nos Mester Ta Miserikòrdioso?

17. Kiko ta un motibu fundamental pa mustra miserikòrdia?

¹⁷ E ehèmpelnan di Yehova i Hesukristu realmente ta siña nos kiko ta berdadero miserikòrdia. Proverbionan 19:17 ta duna nos un motibu fundamental pa mustra miserikòrdia. E ta bisa: “Esun ku tene miserikòrdia di un hende pober ta fia SEÑOR, i E lo pag’é bèk pa su bon obra.” Yehova ta keda kontentu ora nos ta imitá é i su Yu dor di trata otro hende ku miserikòrdia. (1 Korintionan 11:1) Anto otro hende di nan banda tambe ta ser animá pa mustra miserikòrdia na nos, pasobra miserikòrdia ta produsí miserikòrdia.—Lukas 6:38.

18. Dikon nos tin ku hasi esfuerso pa ta miserikòrdioso?

¹⁸ Miserikòrdia ta un kombinashon di vários bon kualidat. E ta enserá grasia, amor, kariño i bondat. Sintimentunan tierno di kompashon òf konsiderashon ta motivá un persona pa mustra miserikòrdia. Ounke e miserikòrdia di Dios no ta suavisá hustisia, Yehova ta slow pa rabia i ku pasenshi e ta duna hasidónan di maldat sufisiente tempu pa nan repentí. (2 Pedro 3:9, 10) Pues miserikòrdia tin di haber ku pasenshi. Siendo ku un akto di miserikòrdia ta un kombinashon di vários kualidat deseabel—inkluso e vários aspektonan di e fruta di e spiritu di Dios—e ta duna hende oportunidat pa kultivá e kualidatnan aki. (Galationan 5:22, 23) P’esei, ta masha importante pa nos hasi esfuerso pa mustra miserikòrdia na otro hende.

“Bendishoná Ta Esnan Miserikòrdioso”

19, 20. Den ki sentido miserikòrdia ta triunfá riba huisio?

¹⁹ Disipel Santiago ta bisa nos dikon nos tin ku hasi esfuerso pa miserikòrdia bira un kualidat masha importante den nos bida. El a skirbi: “Miserikòrdia ta triunfá riba huisio.” (Santiago 2:13b) Aki Santiago tabata papia di e miserikòrdia ku un adoradó di Yehova ta mustra na otro hende. E ta triunfá riba huisio den e sentido ku ora e tempu yega pa un persona “duna kuenta di su mes na Dios,” Yehova lo tene kuenta ku e manera miserikòrdioso ku e persona aki a trata otronan i ta pordon’é a base di e sakrifisio di reskate di Su Yu. (Romanonan 14:12) Sin duda un di e motibunan pakiko Dios a mustra miserikòrdia na David den kaso di su piká ku Bètsabé, tabata pasobra e mes tabata un hòmber miserikòrdioso. (1 Samuel 24:4-7) Na e otro banda, “huisio lo ta sin miserikòrdia pa ku esun ku no a mustra miserikòrdia.” (Santiago 2:13a) No ta nada straño anto ku hende ku ta “sin miserikòrdia” ta ser menshoná entre esnan ku segun Dios ta “meresé morto”!—Romanonan 1:31, 32.

²⁰ Den su Sermon Riba Seru, Hesus a bisa: “Bendishoná ta esnan miserikòrdioso, pasobra nan lo risibí miserikòrdia.” (Mateo 5:7) Di un manera konvinsente e palabranan aki ta mustra ku esnan ku ta buska Dios su miserikòrdia tambe mester mustra miserikòrdia. E siguiente artíkulo lo konsiderá kon nos por mustra miserikòrdia den nos bida diario.

Kiko Bo A Siña?

• Kiko ta miserikòrdia?

• Den ki maneranan miserikòrdia ta ser manifestá?

• Den ki sentido Yehova ta un Dios di miserikòrdia i hustisia?

• Dikon nos mester mustra miserikòrdia?

[Preguntanan di Estudio]

[Plachi na página 12]

Yehova su sintimentunan tierno pa hende den nesesidat ta manera esnan di un mama pa su beibi

[Plachi na página 12]

Kiko e milagernan di Hesus ta siña nos tokante miserikòrdia?

[Plachi na página 12]

Yehova a violá su normanan di hustisia ora el a ekstendé miserikòrdia na David?

[Plachi na página 12]

Dios su miserikòrdia pa ku hende pekadó ta na armonia ku su hustisia