Buska un Propósito den Bida Ku Ta Bale La Pena

“Laga tur loke tin rosea alabá SEÑOR.”—SALMO 150:6.

1. Deskribí kon un yònkuman tabata buskando propósito den bida.

“MI A studia medisina pasobra mi tabata kier a usa mi bida pa yuda otro hende. Tambe mi tabata pensa ku e prestigio i e benefisionan finansiero ku lo mi haña komo dòkter lo hasi mi felis,” Seung Jin, kende a lanta na Korea ta konta. * “Mi a keda desepshoná ora mi a bin realisá kon tiki un dòkter realmente por hasi pa yuda otro hende. Despues mi a bira pintor, pero mi kreashonnan artístiko no a benefisiá otro hende mashá, i mi a sinti ku mi ta egoista. Mi a bira un maestro i pronto mi a deskubrí ku ta informashon so mi por a duna, pero no guia ku por hiba na berdadero felisidat.” Meskos ku hopi otro hende, Seung Jin tabata buskando un propósito den bida ku ta bale la pena.

2. (a) Ki ora bo por bisa ku un hende tin propósito den bida? (b) Kon nos por sa ku e Kreadó a pone nos riba tera ku un propósito na mente?

² Ora un hende tin berdadero propósito den bida, e tin un motibu pa biba, un meta bon definí i esei ta bira esun prinsipal pa kua e ta hasi tur su esfuerso. Hende realmente por tin un propósito asina den bida? Sí! E echo ku nos ta dotá ku inteligensia, konsenshi i abilidat pa rasoná ta nifiká ku e Kreadó a pone nos riba tera ku un bon propósito na mente. Pues, ta lógiko ku nos por haña i logra kumpli ku nos berdadero propósito den bida solamente si nos biba na armonia ku e propósito di e Kreadó.

3. Kiko Dios su propósito pa humanidat ta enserá?

³ Beibel ta revelá ku Dios su propósito pa nos ta enserá vários kos. E manera maravioso ku nos ta trahá en bèrdat ta un ekspreshon di Dios su amor sin egoismo pa ku nos. (Salmo 40:5; 139:14) Pues, biba na armonia ku e propósito di Dios ta enserá stima otro hende di un manera desinteresá meskos ku Dios. (1 Juan 4:7-11) Tambe e ta enserá obedesé Dios su instrukshon, ku ta yuda nos biba na armonia ku su propósito amoroso.—Eklesiastés 12:13; 1 Juan 5:3.

4. (a) Kiko ta nesesario pa un hende por tin berdadero propósito den bida? (b) Kiko ta e propósito di mas elevá ku un hende por tin den bida?

⁴ Ademas, Dios su propósito tabata pa hende biba felis i na pas ku otro i ku tur otro kreashon. (Génesis 1:26; 2:15) Pero, kiko nos mester hasi pa nos por sinti nos felis, sigur i pa nos tin pas mental? Meskos ku un mucha mester sa ku su mayornan no ta muchu leu for di dje pa e sinti su mes felis i sigur, nos mester tin un bon relashon ku nos Tata selestial pa por haña berdadero propósito den bida. (Hebreonan 12:9) Dios ta hasi e relashon ei posibel dor di laga nos hala serka dje i dor di tende nos orashonnan. (Santiago 4:8; 1 Juan 5:14, 15) Si nos “kana ku Dios” pa medio di fe i bira su amigu, nos por hasi Yehova kontentu i alab’é komo nos Tata selestial. (Génesis 6:9; Proverbionan 23:15, 16; Santiago 2:23) E propósito ei ta e propósito di mas elevá ku nos por tin den bida. E salmista a skirbi: “Laga tur loke tin rosea alabá SEÑOR.”—Salmo 150:6.

Kiko Ta Bo Propósito den Bida?

5. Dikon ta irealístiko pa pone interesnan material na promé lugá?

⁵ Dios su propósito tambe ta pa nos kuida nos mes i nos famia bon. Esaki ta inkluí perkurá tantu pa e nesesidatnan físiko komo spiritual. Sin embargo, nos mester ta balansá pa no laga interesnan i preokupashonnan di bida diario bira mas importante ku interesnan spiritual.  (Mateo 4:4; 6:33) Hopi hende lamentablemente ta enfoká prinsipalmente riba atkerí kos material. Sin embargo, ta irealístiko pa kere ku kos material so ta satisfasé tur nos nesesidatnan. Un enkuesta bou di mionarionan na Asia ta mustra ku hopi di nan, “ta sinti nan mes insigur i preokupá, maske nan tin e posishon sosial i sintimentu di logro ku nan rikesa ta trese kuné.”—Eklesiastés 5:11.

6. Ki konseho Hesus a duna na hende ku ta kore tras di rikesa?

⁶ Hesus a papia tokante “e engaño di rikesa.” (Marko 4:19) Di ki manera rikesa ta engañoso? Pasobra por parse ku rikesa ta hasi hende felis, pero esei no ta e kaso. Rei sabí Salomon a indiká ku “hende ku stima rikesa nunka no ta satisfecho ku su entrada.” (Predikador [Eklesiastés] 5:10, BPK) Pero ta posibel pa sigui tras di metanan materialista i tòg keda sirbi Dios ku henter nos alma? Nò, esei no ta posibel. Hesus a splika: “Ningun hende no por sirbi dos shon; pasobra òf e lo odia esun i stima e otro, òf e lo ta leal na esun i despresiá e otro. Boso no por sirbi Dios i Rikesa.” Hesus a urgi su siguidónan pa montoná, no kos material riba tera, sino ‘tesoro den shelu,’ pa establesé un bon nòmber serka Dios, kende “sa kiko boso tin mester, promé ku boso pidié.”—Mateo 6:8, 19-25.

7. Kon nos por “gara loke ta bida berdadero”?

⁷ Ora apòstel Pablo a skirbi su kolaboradó Timoteo, el a duna konseho fuerte enkuanto esei. El a bisa Timoteo: “Instruí esnan ku ta riku . . . pa nan no fiha nan speransa riba e insiguridat di rikesa, ma riba Dios, kende ta proveé pa nos tur kos na abundansia pa nos disfrutá di nan. . . . Pa nan ta generoso i dispuesto pa kompartí, pa nan montoná pa nan mes e tesoro di un bon fundeshi pa futuro, pa nan gara loke ta bida berdadero.”—1 Timoteo 6:17-19.

Kiko Ta “Bida Berdadero”?

8. (a) Dikon hopi hende ta lucha pa haña rikesa i posishon? (b) Kiko hende ku ta hasi esei no ta realisá?

⁸ Pa mayoria di hende e ekspreshon “bida berdadero” ta nifiká un bida di luho i plaser. Un revista di opinion di Asia ta bisa: “Hende ku ta wak pelíkula òf televishon ta siña deseá loke nan ta mira i soña ku loke nan lo por tin.” Hopi hende ta hasi e buskamentu di rikesa i posishon nan meta den bida. Hopi di nan ta sakrifiká nan hubentut, salú, bida di famia i balornan spiritual pa nan sigui tras di e kosnan ei. Masha poko di nan ta para ketu un ratu i realisá ku e imágennan ku nan ta mira via medionan di komunikashon ta djis un refleho di “e spiritu di mundu.” E manera di pensa predominante aki ta influensia gran parti di e biones di hendenan ku ta biba riba tera i ta pone nan aktua nèt kontrali ku Dios su propósito pa nos. (1 Korintionan 2:12; Efesionan 2:2) Pues, no ta nada straño anto ku asina tantu hende ta infelis awe!—Proverbionan 18:11; 23:4, 5.

9. Kiko hende nunka por logra, i dikon no?

⁹ Kiko di hende ku ta duna generosamente di nan mes pa e bienestar di otro hende, es desir, ku ta lucha pa kaba ku hamber, malesa i inhustisia? E sakrifisio ku nan ta hasi ta atmirabel i ta benefisiá hopi hende. Sin embargo, ni maske kuantu esfuerso nan hasi, nunka nan lo kambia e sistema di kosnan aki pa unu ku ta hustu. Dikon no? Pasobra en realidat “henter mundu ta bou di kontròl di e malbado,” Satanas, i e no kier pa e sistema aki kambia.—1 Juan 5:19.

10. Na ki tempu hende fiel lo gosa di “bida berdadero”?

¹⁰ Ki tristu ta ora un hende no tin ningun otro speransa ku no ta, di biba den e mundu aktual! Pablo a skirbi: “Si ta den e bida aki so nos a spera den Kristu, e ora ei di tur hende nos ta esnan mas di kompadesé [“di mas mizerabel,” BPK].” E aktitut di hende ku ta kere ku e bida aki ta tur loke tin ta: “Laga nos kome i bebe, pasobra mañan nos ta muri.” (1 Korintionan 15:19, 32) Pero tin un futuro, pasobra “segun [Dios] su promesa nos ta sperando shelunan nobo i un tera nobo, den kual ta biba hustisia.” (2 Pedro 3:13) Na e tempu ei, kristiannan por gosa di “bida berdadero,” esta “bida eterno” den perfekshon, sea den shelu òf riba tera bou di e gobernashon amoroso di e Reino di Dios.—1 Timoteo 6:12.

11. Dikon ta bale la pena pa traha pa e adelanto di interesnan di e Reino di Dios?

 ¹¹ Ta e Reino di Dios so lo logra solushoná tur problema di humanidat ku éksito. P’esei, traha pa e adelanto di interesnan di e Reino di Dios, ta e aktividat di mas signifikativo ku nos por ta enbolbí aden. (Juan 4:34) Tanten ku nos ta partisipá den e obra ei, nos ta gosa di un relashon presioso ku nos Tata selestial. Tambe nos tin e goso di sirbi huntu ku miónes di ruman hòmber i muhé spiritual ku tin e mesun meta ku nos den bida.

Hasi e Sakrifisionan Korekto

12. Kompará bida den e sistema aki ku e “bida berdadero.”

¹² Beibel ta bisa: “E mundu ta pasa bai i su deseonan tambe.” Ningun parti di e mundu di Satanas, inkluso su fama i rikesa, lo no keda sin wòrdu destruí, “ma esun ku hasi e boluntat di Dios ta permanesé pa semper.” (1 Juan 2:15-17) Rikesa insigur, e gloria pasahero i e plaser superfisial di e sistema aki ta kosnan temporal. Na kontraste ku esei, e “bida berdadero,” esta bida eterno bou di e Reino di Dios ta permanente i ta bale la pena pa nos hasi sakrifisio p’e. Klaru ku nos tin ku hasi e sakrifisionan korekto sí.

13. Kon un pareha a hasi e sakrifisionan korekto?

¹³ Konsiderá e kaso di Henry i Suzanne. Nan tin konfiansa total den Dios su promesa ku tur hende ku pone e Reino promé den nan bida lo haña yudansa di Dios. (Mateo 6:33) P’esei nan a opta pa biba den un kas ku no ta karu ya asina un di nan dos so mester a traha. Di e manera ei, nan por a dediká mas tempu na aktividatnan spiritual huntu ku nan dos yu muhénan. (Hebreonan 13:15, 16) Un amiga ku bon intenshon, no por a komprondé dikon nan a hasi e eskoho ei. P’esei el a bisa Suzanne: “Wak dushi, si un dia bo ke biba den un kas mas bunita, lo bo tin ku hasi sakrifisio.” Pero Henry i Suzanne tabata sa ku pone Yehova promé, “ta kontené promesa pa e bida presente i pa esun ku ta bin.” (1 Timoteo 4:8; Tito 2:12) Nan yu muhénan a krese bira predikadónan seloso di tempu kompletu. Komo famia, nan ta sinti ku nan no a pèrdè nada, mas bien, nan a benefisiá masha hopi debí na e echo ku nan ta trata na optené un gara firme riba e “bida berdadero” lokual ta nan propósito den bida.—Filipensenan 3:8; 1 Timoteo 6:6-8.

No ‘Hasi Uso Kompletu di e Mundu’

14. Kiko por ta e konsekuensia si nos lubidá nos berdadero propósito den bida?

¹⁴ Sin embargo, ta masha peligroso si nos lubidá nos berdadero propósito den bida i pèrdè nos gara riba e “bida berdadero.” Nos ta kore peliger di “wòrdu hogá dor di preokupashonnan, rikesa i plasernan di bida.” (Lukas 8:14) Deseonan deskontrolá i “preokupashonnan di bida,” por pone ku un hende ta enbolbé su mes demasiado den e sistema di kosnan aki. (Lukas 21:34) Lamentablemente, algun kristian a laga e deseo di bira riku ku ta asina komun awe dominá nan i komo konsekuensia a “desviá for di e fe, i a traspasá nan mes ku hopi doló,” i asta a pèrdè nan relashon presioso ku Yehova. Ki un preis haltu nan a paga pa e echo ku nan no a mantené un ‘gara firme riba e bida eterno’!—1 Timoteo 6:9, 10, 12; Proverbionan 28:20.

15. Kon un famia a benefisiá di e echo ku nan ‘no hasi uso kompletu di e mundu’?

¹⁵ Pablo a konsehá “esnan ku ta hasi uso di e kosnan di mundu, [pa hasi] komo si fuera nan no a hasi uso kompletu di nan.” (1 Korintionan 7:31) Keith i Bonnie a tuma e konseho ei na pechu. Keith ta konta: “Mi a bira un Testigu di Yehova nèt ora mi tabata kabando mi estudionan pa bira dentista.” E ta sigui konta: “Mi mester a skohe. Mi por a tuma hopi pashènt i gana hopi plaka, pero esei lo a interferí ku nos aktividatnan spiritual. P’esei mi a skohe pa tuma ménos pashènt pa mi por tin mas tempu pa e bienestar spiritual i emoshonal di nos famia, ku a bin inkluí sinku yu muhé. Maske ku rara bes nos tabata sobra sèn, nos a siña ekonomisá, i semper nos tabatin loke ta nesesario. Nos bida di famia tabata yen di kariño i goso i nos tabata masha uní ku otro. Ku tempu nos tur a drenta den e ministerio di tempu kompletu. Awor nos yu muhénan ta felismente kasá i tres di nan tin yu. Nan tur su bida di famia tambe ta felis, pasobra nan ta sigui pone Yehova su propósito promé den nan bida.”

 Pone e Propósito di Dios Promé den Bo Bida

16, 17. Ki ehèmpel Beibel ta duna di hende ku tabatin bon abilidat, i kiko nos ta rekordá di nan?

¹⁶ Beibel ta duna ehèmpel tantu di hende ku a biba na armonia ku Dios su propósito komo di hende ku no a hasi esei. E lès ku nos ta siña di e ehèmpelnan ei ta apliká na hende di tur edat i kultura i den tur sirkunstansia. (Romanonan 15:4; 1 Korintionan 10:6, 11) Nimròd a konstruí statnan grandi, pero el a hasi esei na oposishon ku Yehova. (Génesis 10:8, 9, NW) Pero tabatin hopi personahe bíbliko ku tabata bon ehèmpel. Por ehèmpel, Moisés su propósito den bida no tabata pa mantené su posishon komo un miembro di alta sosiedat di Egipto. Mas bien, el a balorá su privilegionan spiritual komo “rikesanan mas grandi ku e tesoronan di Egipto.” (Hebreonan 11:26) Lukas ku tabata un dòkter, probablemente a yuda Pablo i otro hende ku nan malesa. Pero Lukas a logra hasi mas tantu kos bon pa otro hende komo un evangelisadó i eskritor di Beibel. I den kaso di Pablo, e ta konosí no komo un eksperto di Lei sino komo un misionero, un “apòstel” di e nashonnan.—Romanonan 11:13.

¹⁷ Hende ta rekordá David prinsipalmente no komo un komandante militar ni komo un músiko i kompositor, sino komo un “hòmber na [Dios] su agrado.” (1 Samuel 13:14, BPK) Daniel ta konosí no pa su trabou komo un funshonario di gobièrnu babilóniko, sino pa su servisio komo Yehova su profeta leal; Ester, ta konosí no komo reina di Persia sino komo un ehèmpel di kurashi i fe; Pedro, Andres, Santiago i Juan, ta konosí no komo bon piskadó sino komo apòstelnan di Hesus. I finalmente, Hesus mes, kende ta pa nos, no “e karpinté” sino “e Kristu.” (Marko 6:3; Mateo 16:16) Tur e personanan aki a komprondé bon kla ku sin importá ki abilidat, propiedat òf posishon nan tabatin, nan enfoke prinsipal mester tabata riba nan sirbishi na Dios i no riba nan karera den bida. Nan tabata sa ku e propósito di mas noble i mas balioso ku nan por tabatin den bida ta di ser un hòmber òf muhé temeroso di Dios.

18. Kon un kristian hóben a disidí di usa su bida, i kiko el a bin realisá?

¹⁸ Seung Jin, menshoná den e introdukshon, tambe a bin komprondé esaki. El a splika: “En bes di dediká tur mi energia na medisina, arte òf enseñansa, mi a disidí di usa mi bida pa kumpli ku mi dedikashon na Dios.” El a sigui bisa: “Mi ta sirbi aktualmente kaminda tin gran nesesidat pa maestro ku por siña hende Beibel pa asina yuda nan haña e kaminda ku ta hiba na bida eterno. Mi tabata pensa ku e ministerio di tempu kompletu lo no laga mi usa mi abilidatnan plenamente. Pero awor mi bida ta mas interesante ku nunka, ya ku mi ta purba mehorá mi personalidat i mi abilidat pa siña hende di diferente kultura. Mi a realisá ku e úniko manera di biba ku ta bale la pena ta ora nos hasi Yehova su propósito nos propósito den bida.”

19. Kon nos por haña berdadero propósito den bida?

¹⁹ Komo kristian, nos a haña konosementu ku ta salba bida i e speransa di salbashon. (Juan 17:3) P’esei, laga nos no “aseptá e bondat inmeresí di Dios i keda sin kumpli ku su propósito.” (2 Korintionan 6:1, NW) Mas bien, laga nos usa nos dianan i añanan presioso di bida pa alabá Yehova. Laga nos plama e konosementu ku ta duna berdadero felisidat awor, i ku ta hiba na bida eterno. Si nos hasi esei, nos lo mira ku e siguiente palabranan di Hesus ta bèrdat: “Ta mas bendishoná pa duna ku pa risibí.” (Echonan 20:35) Anto di e manera ei nos lo haña berdadero propósito den bida.

[Nota]

Bo Por Splika?

• Kua ta e propósito di mas elevá ku nos por tin den bida?

• Dikon ta irealístiko pa biba djis pa haña kos material so?

• Kiko ta e “bida berdadero” ku Dios ta primintí?

• Kon nos por usa nos bida pa kumpli ku e propósito di Dios?

[Preguntanan di Estudio]

[Plachi na página 23]

Kristiannan mester hasi e sakrifisionan korekto