Desishonnan Ku Ta Hiba na Felisidat

“MIHÓ mi no a tuma e desishon ei!” Kuantu biaha bo a yega di bisa bo mes e palabranan ei? Nos tur ke tuma desishonnan ku nos lo no tin ku lamentá despues; spesialmente ora e desishonnan ei tin efekto riba nos futuro. Kiko por yuda nos tuma desishonnan ku ta hiba na felisidat?

Pa kuminsá, nos mester tin normanan ku ta realmente konfiabel. E tipo di normanan ei ta eksistí? Hopi hende no ta kere esei. Segun un enkuesta ku nan a tene na Merka, 75 porshento di studiantenan di universidat ta kere ku norma di loke ta bon i malu no ta eksistí i ku e konsepto ta varia dependiendo di “norma- i balornan personal i diferensianan kultural.”

Ta realmente rasonabel pa kere ku normanan moral ta simplemente un asuntu di opinion personal òf general? Nò, esei no ta rasonabel. Si hende tabata liber pa hasi tur loke nan ta deseá, esei lo hiba na un situashon kaótiko. I ta ken lo ke biba kaminda no tin lei, ni korte ni polis? Ademas, opinion personal no ta semper un guia konfiabel. Nos por disidí di hasi algu ku nos ta kere ta bon, anto despues deskubrí ku nos tabata robes. En realidat, henter e historia di humanidat ta konfirmá ku e siguiente prinsipio bíbliko ta bèrdat: “No ta keda na hende pa dirigí su pasonan.” (Jeremias 10:23) Na ki fuente nos por akudí anto pa haña guia pa tuma desishonnan tokante asuntunan importante di bida?

E gobernante hóben menshoná den e artíkulo anterior a hasi bon di bai serka Hesus pa haña konseho. Manera nos a mira, ora Hesus a kontestá e pregunta di e hòmber hóben, el a referí na e Lei di Dios. Hesus a rekonosé ku Yehova Dios ta e Fuente di konosementu i sabiduria  di mas haltu ku tin i ku Yehova sa kiko ta mihó pa su kriaturanan. Ta p’esei mes Hesus a bisa: “Mi siñansa no ta di mi, ma di esun ku a manda mi.” (Juan 7:16) Sí, e Palabra di Dios ta un fuente di guia konfiabel ku por yuda nos tuma bon desishon den bida. Laga nos konsiderá algun prinsipio ku tin den e Palabra di Dios ku lo por kontribuí na nos felisidat, si nos apliká nan.

E Regla di Oro

Den su famoso Sermon Riba Seru, Hesus a siña hende un prinsipio básiko ku por yuda nos tuma bon desishon den nos trato ku otro hende. El a bisa lo siguiente: “P’esei, tur loke boso kier pa hende hasi pa boso, hasi meskos pa nan.” (Mateo 7:12) Hopi bes hende ta yama e prinsipio aki e Regla di Oro.

Tin hende a usa un ekspreshon similar pero ku ta nèt kontrario di loke Hesus a bisa: “No hasi ku otro hende loke bo no ke pa nan hasi ku bo.” Pa mustra e diferensia entre e Regla di Oro i e forma aki ku ta nèt kontrario, konsiderá Hesus su komparashon di e bon samaritano. Un ladron a bati un hudiu i a lag’é bentá mitar morto kant’i kaminda. Un saserdote i un levita a mir’é pero nan a pasa bai lag’é. Debí na e echo ku nan no a hasi e hòmber daño, maske nan no a yud’é tampoko, un hende lo por pensa ku tòg nan a kumpli ku loke hende ta kere ta e Regla di Oro. Kontrario na e saserdote i e levita, un samaritano ku a pasa ei banda si a para pa yuda e hòmber. El a mara su heridanan i a hib’é na un posada. E si a hasi pa e hòmber loke lo e tabata ke pa hende hasi kuné. El a apliká e Regla di Oro i di e manera ei a tuma un bon desishon.—Lukas 10:30-37.

Nos por apliká e prinsipio aki den hopi situashon i logra bon resultado. Suponé ku bo a haña bisiña nobo. Pakiko bo no ta tuma e inisiativa pa sera konosí ku nan i duna nan un bonbiní? Kisas bo por laga nan sera konosí ku e área i kontestá nan preguntanan i duna nan un man. Ora bo ta tuma inisiativa pa mustra interes den bo próhimo, lo bo desaroyá un bon relashon ku bo bisiñanan nobo. Tambe lo bo sinti un satisfakshon pa e echo ku bo sa ku bo a hasi loke ta agradá Dios. Esei no ta un bon desishon?

Desishonnan Basá Riba Amor pa Otro Hende

Fuera di e Regla di Oro, tin otro guia ku Hesus a duna ku lo por yuda bo tuma bon desishonnan. Na momento ku un hòmber a puntra Hesus kua ta e mandamentu mas grandi di e Lei di Moisés, el a kontestá: “‘Stima SEÑOR bo Dios ku henter bo kurason, i ku henter bo alma, i ku henter bo mente.’ Esaki ta e gran mandamentu i e di promé. I e di dos ta semehante: ‘Stima bo próhimo manera bo mes.’ Riba e dos mandamentunan aki henter e Lei i e Profetanan ta basá.”—Mateo 22:35-40.

E anochi promé ku su morto, Hesus a duna su disipelnan “un mandamentu nobo,” pa stima otro. (Juan 13:34) Pakiko el a bisa ku e mandamentu ei ta nobo? No ta asina ku el a kaba di splika ku stima nan próhimo tabata un di e dos mandamentunan riba kua henter e Lei ta basá? E Lei di Moisés a manda e israelitanan: “Stima bo próhimo manera bo mes.” (Levítiko 19:18) Sin embargo, riba e anochi ei Hesus a manda su disipelnan pa hasi mas ku esei. Hesus a bisa nan ku e tabata a punto di entregá su bida pa nan. Anto el a sigui bisa nan: “Esaki ta mi mandamentu, ku boso stima otro meskos ku ami a stima boso. Ni un hende no tin amor mas grandi ku esaki, ku un hende ta duna su bida pa su amigunan.” (Juan 15:12, 13) Sí, e mandamentu aki tabata nobo den e sentido ku nan mester a pone interes di otro hende promé ku esun di nan mes.

Tin hopi manera ku nos por mustra amor inegoista, i no djis wak loke ta kumbiní nos so. Suponé ku bo ta biba den un flèt i bo ke skucha músika na un volúmen ku ta eksitá abo pero ta iritá bo bisiña. Bo ta dispuesto pa  sakrifiká bo preferensia personal te na e grado ku bo bisiña por tin un tiki trankilidat? Ku otro palabra, lo bo pone e bienestar di bo bisiña promé ku esun di bo mes?

Konsiderá un otro situashon. Na Canada riba un dia di wenter ku tabata hasi hopi friu i ku sneu tabata kai, un hòmber di edat a haña un bishita di dos Testigu di Yehova. Durante e kòmbersashon e hòmber a menshoná ku e no por a kita e sneu for di dilanti su kas pasobra e tin problema ku kurason. Mas o ménos un ora despues, el a tende zonidu di skòp. E dos Testigunan a bin bèk i a kita tur e sneu ku tabatin dilanti di e porta di kas. “Awe mi a eksperensiá berdadero amor kristian den akshon,” el a skirbi den un karta na e sukursal di Testigunan di Yehova na Canada. Tambe el a skirbi: “Esaki realmente a mehorá e punto di bista generalmente pesimista ku mi tin di e mundu djawe. I mi a haña mas rèspèt pa boso obra mundial.” Sí, ora nos opta pa duna un man, maske ku ta un tiki so nos por hasi, esei por tin un efekto positivo riba otro hende. Esta bon nos ta sinti ora nos disidí di duna di nos mes di tal manera!

Desishonnan Basá Riba Amor pa Dios

Un otro faktor ku nos mester tene kuenta kuné ora nos ta tuma desishon ta loke Hesus a deskribí komo e mandamentu di mas grandi, esta ku nos mester stima Dios. Hesus su palabranan tabata dirigí na e hudiunan, kendenan komo un nashon ya tabata dediká kaba na Yehova. Sin embargo, kada un di nan individualmente tabatin ku disidí si nan lo sirbi nan Dios ku henter nan alma i kurason.—Deuteronomio 30:15, 16.

Asina tambe, e desishonnan ku abo tuma ta reflehá bo sintimentunan pa ku Dios. Por ehèmpel, segun ku bo ta krese den apresio pa e balor práktiko di Beibel, abo tambe lo tin ku tuma un desishon. Bo ta dispuesto pa tuma un kurso di Beibel, ku e meta pa bira un siguidó di Hesus? Si bo disidí di hasi esei, lo bo sinti bo felis, pasobra Hesus a bisa: “Felis [ta] esnan ku ta rekonosé ku nan tin mester di Dios.”—Mateo 5:3, BPK.

Nos no sa si e gobernante hóben a lamentá e desishon ku el a tuma. Sin embargo, loke si nos sa ta kon apòstel Pedro a sinti despues di a sigui Hesukristu pa hopi tempu. Rònt di aña 64 di nos era, kasi na final di su bida, Pedro a animá su kompañeronan di fe: “Sea diligente pa [Dios] haña boso den pas, sin mancha i sin kulpa.” (2 Pedro 1:14; 3:14) No kabe duda ku Pedro no a lamentá e desishon ku el a tuma mas ku 30 aña promé, i el a animá otro sirbidónan pa nan tambe kumpli ku e desishon ku nan a tuma.

Pedro su konseho ta enserá pa nos aseptá e responsabilidat di bira un di Hesus su disipelnan i warda Dios su mandamentunan. (Lukas 9:23; 1 Juan 5:3) Esaki por parse difísil, pero nos tin Hesus su promesa trankilisante: “Bin serka mi tur ku ta kansá i kargá, i lo mi duna boso sosiegu. Tuma mi yugo riba boso, i siña  di mi, pasobra mi ta mansu i humilde di kurason; i boso lo haña sosiegu pa boso alma. Pasobra mi yugo ta suave i mi karga ta lihé.”—Mateo 11:28-30.

Tuma por ehèmpel e eksperensia di Arthur. Na edat di dies aña Arthur a kuminsá tuma lès di violin, ku e prospekto di bira un músiko profeshonal. Tempu ku e tabatin 14 aña, ya e tabata bon konosí komo tokadó di violin na konsiertonan. Pero tòg e no tabata felis. Semper su tata tabatin preguntanan tokante e propósito di bida i a invitá maestronan di religion na su kas. Pero nunka e tabata keda satisfecho ku nan kontestanan. Komo famia nan tabata papia riba tópikonan manera, si Dios realmente ta eksistí i pakiko e ta permití maldat. Dado momento e tata di Arthur a topa ku Testigunan di Yehova i el a kuminsá papia ku nan. E kòmbersashon a toka kurason di Arthur su tata i henter e famia a kuminsá studia Beibel.

Ku tempu, Arthur a bin komprondé for di e Skritura pakiko Dios ta permití sufrimentu i tambe el a bin mira bon kla kiko ta e propósito di bida. Huntu ku tres otro miembro di su famia, Arthur a tuma un desishon ku e no a lamentá despues. El a dediká su bida na Yehova. Despues el a bisa: “Mi ta asina felis ku Yehova a bendishoná mi ku konosementu di e bèrdat i ku el a libra mi di e rivalidat ku ta karakterisá e mundu di músikonan profeshonal. Pa hende logra éksito nan ta dispuesto pa hasi kualke kos.”

Te ainda Arthur ta gusta toka violin pa entretené su amigunan, pero esei no ta e kos di mas importante den su bida. Awor, e kos prinsipal den su bida ta sirbi Dios. Aktualmente e ta sirbi na un di e sukursalnan di Testigunan di Yehova. Meskos ku Arthur i miónes di otro hende, pero kontrario na e gobernante riku, abo tambe por skohe loke ta hiba na e felisidat di mas grandi, esta aseptá Hesus su invitashon pa bira su siguidó.

[Plachi na página 6]

E desishon ku bo tuma pa yuda otro por hasi un diferensia den nan bida

[Plachi na página 7]

Abo lo studia Beibel i bira un siguidó di Hesus?